時代變遷，甜品唔再係傳統嘅豆腐花、西米露，而可以係一個個精緻嘅藝術品。呢間餐廳努力鑽研可以令人賞心悅目既甜品，令一眾喜愛影相嘅女士大滿足！ 某個星期六嘅下晏，我同啲姊妹一齊嚟放鬆食下午茶。 餐廳環境擺滿畫同雲嘅佈置，令顧客頓感放鬆，可以悠然自得品嘗甜品，同朋友歡聚短刻。 Tea set party 唔似一般英式茶餐廳有三層高，用六角形雲石塊鋪成擺放甜品嘅碟，然後專心地將每樣甜品放於甜上，份量係唔足以食飽架當然，幸好每樣味道都豐富，加上外型搭夠，都唔錯既。 Tea set party包兩杯野飲，我叫左Peach and passionfruit tea，我初頭喺到諗，做咩放支珍寶珠落杯茶到呢，朋友就同我講呢個係放茶包架，好有趣，哈哈！ Namida 日文嚟，即係眼淚咁解，又真係整左成滴眼淚嘅形態出嚟wo，視覺上都夠哂震撼啦！其實外圍係用糖膠製作，入面會有益力多冰同白玉可以食，都有好多唔同素材豐富成個甜品，唔只係個外型靚咁簡單！

某本專門介紹日本景點日本餐廳既雜誌有一篇文章係報導呢間「坐忘」既，餐廳主打有營咖哩同埋豬軟骨，價錢又親民，咁就當然要嚟一試喇！ 廣島蠔雜菌咖哩飯 咖哩係日本咖哩，偏甜唔辣，但食得出味道有層次，惹味；雜菌有先炒過，有陣陣蒜香味；雖然價錢都幾親民，但都有幾隻廣島蠔係入面，係細隻d架喇，都尚可接受。 豬軟骨定食 唔知豬軟骨係咪呢間餐廳既招牌菜呢？我望向四周都有為數不少嘅客人食，期待感亦相對提高。一試，果真冇令人失望wo，豬軟骨煮到稔熟，果醋味好濃郁，完全唔痴牙，好好味呀，下次一定會encore!

如果週末到銅鑼灣，又唔想等位但又想食好野既呢，我就會向朋友介紹呢間位於希慎14樓嘅Wired Cafe喇！ 我地3個女仔叫左兩個意粉、一個班戟，雖然都係細細碟，但都夠飽嘅 菠菜蝦忌廉湯扁意粉，蝦幾嫩滑彈牙，不過湯味道就冇咁豐富，只係一個簡單嘅醬汁，不過都還可以嘅。 茄子水牛芝士意粉，呢個整得幾出色，一啖水牛芝士食落肚，味道恰好，塊茄子又煎得香脆，好味👍 明太子薯仔煙肉班戟，個班戟係好鬆軟，同薯仔、煙肉個味道配合得好好，唔好覺得好漏好飽肚，正👍👍👍

話說近排都多出尖沙咀試韓國菜，之前喺韓國街果幾間都食過下，咁就行過少少去厚福街試食。朋友話有間味道可以但又唔係好多人食嘅，咁都去試下味，順勢傾下計。佢嘅menu有跟set，咁就叫左海鮮鍋、泡菜芝士餅同泡菜豆腐鍋。小菜四碟唔少得，個薯仔最好食，夠入味！泡菜豆腐鍋都唔錯，豆腐嫩滑，湯唔鹹😊呢個海鮮鍋本身都幾好，又足料，但唔知係咪我同朋友傾得耐，搞到個湯越嚟越鹹，海鮮嘅海水味出哂嚟😂個泡菜芝士餅厚身嘅，不過比較淋，但都好食嘅！

其實都想講講間餐廳嘅service都要再加強，由於韓國菜本身比較濃味，係需要時常加水或者預備好枝水喺有食野果圍，感覺會較好。

今次嚟就試下店內限定嘅「咖哩沾麵」，原來喺餐牌上係要選擇會員限定嘅，咁我又唔係會員又可以揀個會員限定嘅，咁果行會員限定係咪可以順勢拎走呢？

去番正題，呢個咖哩沾麵其實幾可口，湯底就有d類近cup noodle果隻咖喱海鮮味嘅，同時佢配上辣粉，可以按個人喜好添加，個人就認為加d落去惹味d。麵條方面好彈性，所以比較做到湯掛面嘅作用。另外，佢嘅筍都整得幾好食，酸酸地，飽肚感會因而下降，令整體味道中和番。

喺銅鑼灣食完飯，梗係想搵間甜品店坐下，傾多兩句計先肯散水啦，而家韓風咁勁，梗係去時代廣場搵下呢間食下冰啦

一入店，食甜品時段都唔多人食，可能係因為位置比較偏僻所致。

今次試左兩隻冰，第一個oreo口味，第2個藍莓芝士味。呢個就係所謂「oreo有oreo味」喇，冇咩太大驚喜，同埋佢賣相上明顯係好寡，會唔會插多d oreo喺側邊會令外型更吸引？藍莓芝士味其實比較好食，可能佢酸d令整體上冇咁漏，同埋有一舊舊嘅芝士蛋糕喺邊，覺得幾抵食，哈哈！呢個值得推薦！

事源朋友話而家堅尼地城餐廳林立，食得飽之餘又可以飲番杯嘆下咁，就試下呢間門面幾靚嘅Butcher & Baker Cafe試下菜。Chicken Caesar Salad

菜好多，雞粒有烤過嘅，但略嫌個汁唔夠酸，再酸d可以整體上味道會更加有層次。Seafood Stew

法包焗得幾鬆脆，好食。蕃茄海鮮部分係覺得蕃茄好足料，海鮮都多嘅，但如果落多少少香草呀、胡椒就會更好嘅。The Zingy Zest

幾種水果果皮整成嘅一杯mocktail，都幾fresh！

順帶一提，雖然呢間餐廳環境同食物質素都ok，但店員好似未上手，經常都會將隔離枱嘅野食擺左嚟我地張枱，睇嚟員工要再加強訓練下！

銅鑼灣近來人頭湧湧，一來減價時節各店舖爭相搶客；臨近聖誕佳節，買各式各樣聖誕禮物的人亦不勝其數。作為一個典型香港人，行轉銅鑼灣已經一手兩個袋，兩手四個袋如上完戰場一般，無論是雙腿或是肚子，都已經響起警號，命我要暫停爆買了。

行過皇室堡，想起上次環境優美、食物質素亦頗佳的台灣過江龍Dazzling Cafe，即馬上進入其中，先醫飽肚子再算。

在Dazzling Cafe進食有時間限制，給予你90分鐘時間去享受食物及閒暇，其實以香港人快人至上的生活態度，90分鐘已是十分足夠。餐廳點餐要使用國語，充滿台灣氣息。不過經觀察所得，店內香港人台灣人大概各佔一半，不懂國語的人用廣東話點餐亦無問題。另外，餐廳規定每位客人可以不點餐，但必須點一杯飲品，或許是只品嘗一杯飲品就足以讓客人流連忘返吧。鳳梨伯爵風味茶（上）、仲夏熱帶水果茶（下），味道清甜，嘴裡滿是水果茶香。翻開茶壺蓋，亦見有幾片橙在內，真材實料。熱騰騰端出來的蕃茄明蝦意大利麵，看似份量不多，實際上份量頗足。幼麵條可令醬汁更為入味，蝦既大隻又爽口，蝦有蝦味，十分推薦。最後一道為墨西哥風芝士薄餅，芝士不鋪在面，反而夾於中間，另配有兩款醬汁讓客人鋪在餅上，風味亦頗佳。但略嫌餅底有點軟，我比較愛吃脆口的，不過正所謂「鹹魚白菜，各有所愛」，可能亦有其他客人喜歡較軟身的吧！

90分鐘，不忙不趕，只以一杯茶、一碟意粉就能想像自己置身於台灣做個偽文青，然後休息夠𣊬間回復為爆買香港人，這不是挺好的嗎？