朋友生日book咗小天使餐廳試食，位於赤柱市集少少偏僻位置，入小巷前猶豫嗰陣附近商舖嘅人會好心指示小天使喺邊，好有愛。 跟set嘅餐配果份煙三文魚沙律比想像中大兜，普通跟湯麵包。 煙三文魚闊條麵個味幾似pizzahut嘅海鮮闊條麵🤣 西冷牛扒如果肉質再細滑啲更好🤓 重頭戲來了，咁我只係喺openrice book位remark左朋友生日，同點左個甜品，冇準備蛋糕嘅，餐廳非常聰明喺個酥皮蘋果撻伴雪糕上面加枝蠟燭，好驚喜🎂不過記得要快啲吹蠟燭🤣🤣 呢個甜品真係大推呀，蘋果撻有啲焦糖脆同朱古力醬、雪糕好夾。

作為M+新餐廳，第五波前去就未開張，一鬆綁見啲報道話有靚景咁就去試吓啦。睇OpenRice大家對佢哋嘅服務有不滿，相信佢哋有睇到評語，然後服務感覺上大為改善，覺得算係呢個博物館餐廳嚟講，服務態度幾好，已經好主動提供公叉啦、又識拉埋凳（真心算超越呢個lv嘅服務🤣），又話黑口黑面我今次就感受唔到喇。 星期六去都要排一排隊先入到去，過程等得唔耐嘅。咁就好彩地到我地果陣就坐到靠近窗口位置(拿講真呢啲位置係可遇不可求，除非訂位），張枱個設計都幾打卡able，夢幻漸變藍色咁。 食物嚟講算合格啦，可能你會覺得同樣食物喺其他餐廳嚟講偏貴，但我會認為你不如當佢係同迪士尼、海洋公園入面嘅餐廳差唔多，而且係食環境多啲嘅。 個menu其實有齊西式d pizza意粉呀，點心、生滾粥都有，咁之但係嚟之前有睇過吓啲報導嘅，就叫咗啲media有highlight嘅海南雞飯，雞嫩口唔痴牙，三款醬我比較鍾意酸辣，湯無油，不過飯唔夠香。再叫左港式咖喱牛腩飯，牛腩幾好食wor，咬落去食到牛嘅油脂。兩個飯同樣係餸多過飯，一舊肉送一啖飯係唔work，會想要多兩啖飯送下汁🤣 再叫多個乳鴿BB連蝦片，個味同平時食嘅就冇咩分別嘅，肉就比較瘦，蝦片擺左一陣都脆。 另外叫杯lemonade特飲，有成大支薄荷喺入面，通常只係一片葉，呢個幾surprised。

差唔多晏晝5、6點經過登龍街睇下有咩外賣買番歸食，發現原來燈籠滷味有出滷味外賣包，個姐姐喺門口同客人細心講解緊有咩食呀，點整呀，份量係幾多呀，我喺隔離偷聽都心郁想食。HK$78急凍包成兩人份量，入面有9款餸，包括蜂巢牛肚、鴨胗、豬耳、甜不辣、貢丸、百頁豆腐、麻吉燒、黑木耳、高麗菜，送一包王子麵同辣油。 姐姐就咁推介下就吸引左幾個客買，而且整法好簡單，將急凍包放入滾水浸10-15分鐘就食得。 份量激多，一個人食一定要分開兩次食，雖然係急凍包，但材料好入味，菜份量都幾多，會encore

第3次去海雲天食點心放題，上網睇以為去果日已經變咗芝士主題，但都仲係芫荽主題，可能係因為幫襯第2日已經要暫時關閉到2月24日先開番，而家餐廳真係唔易做，以為係酒店會好啲，所以想食真係要把握機會食。 一如以往，如果想要坐海景窗口位，請務必早到，位置唔多。果日去仲係有分c區d區，冇影定針紙櫃檯仲話唔知安唔安排到窗口位（但我明明第一個到），好彩最後都安排到。現場見到職員唔少都戴兩個口罩，或kf94，防護都算係咁。 芫荽主題我覺得一定要叫芫荽燒賣，因為好大粒，肉汁飽滿，平時酒樓係頂點嚟。 芫荽鮮竹卷：湯頭芫荽味濃，同鮮竹卷好夾。 叫芫荽牛肉球嘅時候留意係用份，而其他係用粒，我就叫錯咗4籠，以為係4粒。 鮮蝦莧菜餃比芫荽蝦餃出色，蝦餃冇咩芫荽味，可能驚客人覺得太濃味，畢竟有人比較討厭食芫荽。而鮮蝦莧菜餃入面莧菜份量多，食落口感豐富。 芝士撻：不過不失 每人會附送一碗灌湯餃，入面有鮑魚仔。 椒鹽豆腐好脆口，一份份量都多。 我叫咗90分鐘點心放題，大概可以點菜時間為60分鐘，一入坐即刻計算，臨走前會有職員埋嚟收茶錢，就算喺購票平台比咗package錢都要再畀嘅。

東京蛋包飯過江龍殺到海港城，點都試吓啦。佢坐落排隊店靚位，以前blt burger都係每次經過總有條隊，新屎坑加靚位梗係要排啦，不過都排得幾快吓就入到，大約10分鐘左右啦，可能早？weekend 12點咁唔係咁多人。 入到去完全係熟悉嘅日式西餐廳裝修，同ucc差唔多。當然要食蛋包飯，叫咗滿天星肉汁漢堡扒蛋包飯（HK$238）同滿天星肉汁忌廉蟹肉餅蛋包飯（HK$208），上菜快，隻蛋橙色好靚。 不過覺得招牌亦較貴嘅漢堡扒冇蟹肉餅咁好食，食落普通，而蛋嘅蛋味唔重，同個飯冇blend得咁好。蟹肉餅一食好脆唔會好厚粉，味道香濃。 就係漢堡扒咁嘅味，但無話食落好突出。 忌廉蟹肉餅味道香濃，加出蕃茄汁可以平衡番果種「劉」口。 士多啤梨奶昔（HK$78）靚過張相，整得好靚，好味 整體而言，就未去到神級要狂encore啦，可能蛋嘅選擇要搵再香濃蛋味嘅蛋？而且身為咖喱蛋包飯fans嘅選擇就少啲，想食漢堡扒又一定要肉汁蛋包飯，想食野菜蛋包飯又剩係得野菜咖喱飯，如果可以開放選擇兩隻汁就好😀

果日去D2 Place見到有賣公仔包嘅點心店就入咗去試食。餐廳裝修走懷舊風，符合個名回憶昔日荔園情懷。點心價錢親民，叫個點心拼盤有8件，價錢只係$108，原本無留意係點心摩天輪，但上架就好驚喜，「做作」嘅擺盤真係好適合打卡。 點心摩天輪首先好吸睛，因為側面上扶手電梯嘅人都會眼甘甘望住，而且味道比想像中好，因為咁打卡通常味道就冇乜期望，入面有老虎仔流沙包、烏龜菠蘿包、兔仔鹹水角同鬆糕？（因為個樣好似蛋散，一開始以為係） 老虎仔流沙包熱辣辣，真流心，小心熱。 烏龜菠蘿包原來係菠蘿叉燒包，咬落塊脆口鬆化，味道唔錯。 兔仔鹹水角就係咩特別啦，都係鹹水角咁嘅味。至於件鬆糕都係味道一般，係食完咁多件已經幾飽。 另外叫咗鮮蝦趣意腸（HK$36），腸粉包住炸蝦，個皮有啲似天婦羅。 呢個紫薯波波球（HK$36）真係必點，層次好豐富。首先個波波上面啲脆脆係真係好脆，紫薯皮再包住流心奶黃餡，無諗過咁好食。係就算放低一陣先食（兩個人食前面果啲已經好飽）都係咁脆口。 最後，睇到前面話發生嘅衛生問題我就好好彩冇經歷到啦🤣而且啲侍應會聊下小朋友同媽媽傾計咁？好似服務態度都唔錯呀。可以試食，玄米茶都好飲，茶位只係HK$4位。

見到天際萬豪自助餐聖誕有9折，又順便去大嶼山玩就嚟試食吓，見到之前啲留言又話冇嘢食呀，性價比唔高呀，但我就覺得比想像中有驚喜。 首先聖誕當日有好多幾代同堂嚟食，好多小朋友氣氛好熱鬧，餐廳每枱放咗啲聖誕派對用品，有頭cool、吹吹捲呀等，好多人都戴咗個頭cool周圍走。食食吓又會有聖誕老人出嚟派糖同影相，好有氣氛。 食物方面種類雖然唔係特別多，但每款都有水準。一嚟最多人排隊嘅刺身海鮮類，食咗三文魚同蟹鉗，啖啖肉仲有d膏，另外仲有青口、蝦、吞拿魚等選擇。試埋煙三文魚同忌廉焗三文魚，前者唔會死鹹，焗三文魚就不過不失，呢個價位食聖誕自助午餐收貨wor又，試過食九龍君綽真係可以用難食嚟形容。 想講周打蜆湯都足料，見到真係有蜆、魷魚咁，不過個湯同放碗個位有距離，想拎湯就要打擾到排緊海鮮隊嘅人龍，有d麻煩。佢配包得兩三款，但自助餐應該冇咩人食包，所以合理🤣 有啲菜式覺得比之前食嘅自助餐岩口味，印度脆脆有啲地方會整得好鹹，但呢度唔會，平時飲橙汁蘋果汁會覺得好甜，但呢度都係唔會，同埋有樽裝維他奶又幾啱天氣凍飲wor🤣 幾款點心我就揀咗食比較唔易飽嘅豬肉燒賣同魚肉燒賣，貼近平時酒樓質素，都見到會有人拎糯米雞同叉燒包，但真係驚一食就飽咗。又試吓燒味，有燒鴨、雞等，食落係普通嘅。 去到火雞、鴨胸係一啲都唔hai口，火喉控制得幾好，配搭啲粒粒紅蘿蔔好味，四季豆、奶油椰菜款式感覺上係普通但好食。同埋本身幾鐘意食冷盤，好似雲耳、青瓜同蓮藕，所以滿意。 最後甜品環節，我覺得真係要試吓豆腐花，好有豆味。pancake可以揀落cream定紅豆，我揀咗紅豆，好大粒吓。蛋糕仔果度area係細，但會換唔同款式嘅甜品上去，香蕉蛋糕、星星莓撻，仲有聖誕帽芒果布甸都唔錯，其實仲有薑餅人曲奇同鬆餅，但最後時段先去會比人拎晒。都有movenpick同哈根大師雪糕揀。不過水果款式冇跟季節，係食菠蘿、火龍果、哈蜜瓜同西瓜，可想而知唔當造就唔好食。 其實去到最後食甜品前已經幾飽吓，雖然食物款式唔係勁多，但志在每款都幾岩口味，整體上都幾滿意，見在場喺最後半個鐘好多已經食飽抖緊🤣而且唔少人專登揸車嚟食，冇前面啲comment講到咁差，服務態度都好好👍

疫情下繼續喺香港感受旅遊氣氛，千辛萬苦先book到香港航空聯乘Pier 1929，唔知點解係冇乜星期六日揀，基本上係得平日，日日捕住一見到release即訂🤣 ✅ 1. 用真香港航空餐箱裝住出嚟已經正 2. 原來book位留個名會印喺張teacation機票到，早知寫全名啦 3. 個餐廳環境係打卡able嘅，又比幾個cushion喺位到係咁影相，周不時好似有去婚紗展嘅cp嚟睇環境擺酒🤣仲有無遮擋維港景 4. 嚿富士山、蝦多士係唔錯嘅❤️i like 鬆餅、brownie too，其實唔無限添個set都飽肚 5. 會有同款商務艙嘅杯、碟仔、餐具拎番屋企，每人一set，旅遊怪應該好啱用 6. 拎encore野食果陣會推個香港航空餐車出嚟，如果可以扮埋空姐會唔會再有氣氛啲🤣 7. 留番張單會抽日本機票 富士山柚子芝士蛋糕：酸酸地好入味，加埋下面綠茶粒粒好有口感。 台灣珍珠奶茶慕斯杯、無限添檸檬撻 蝦多士 Encore 雞肉酥盒、三文魚撻都好食😋 扮到嘢登機閘口 ❎ 1. 整體而言無限添食嘅好味啲（烤雞肉酥盒好啱口味），章魚燒入面係黑松露Risotto，個飯有啲淋，珍珠奶茶慕絲茶味唔係幾出，杯韓國彩虹棉花糖飲品酒個人覺得太甜 2. 叫凍飲冇飲熱茶咁化算🤣叫茶會係咁添，真係唔應該叫凍檸茶 3. 一開始用佢嘅酒精搓手液勁嗱，要馬上去洗手，如果唔係敏感🥲 4. 打卡位無宣傳圖咁多，通道係得啲登機牌cushion做裝飾 5. 一開始等下午茶上架都幾耐，唔係準時到就準備好有得食，好彩有welcome drink打發🥸 韓國彩虹棉花糖飲品，真係幾甜 章魚燒 餐牌 ✈️：即日起至12月17日 📍：灣仔碼頭2樓 The Pier 1929 💰：$698 / 2人 （另收加一）

之前都有聽過由師大夜市嚟到香港嘅燈籠滷味，喺朗豪坊經過見到充滿台灣味嘅設計已經想行入去食，入到去不斷播90後最愛嘅經典台灣歌，隔離枱都好似唱緊k咁🤣 招牌滷味可以挑選唔同菜式，約莫30款左右，不過其實啲餸嘅滷水味其實唔夠，應該係整熟咗再淋滷水喺面。 芋泥肉鬆蔥抓餅真係勁好味，口感綿滑扎實，肉鬆比例啱啱好，再喺蔥抓餅上淋上糖漿，下次嚟都會encore!!! 麻辣鴨血冬粉：連我平時唔食豬紅嘅人都覺得好食，湯底其實都係果款滷水汁加麻辣味，冬粉原來係粉絲😂台灣腸如果蒜片可以再多啲就更好😙

第一次試香港仔工廈既餐廳，冇諗過個環境係咁好，雖然店面較細，只可以容納到20人左右，但相對上比人覺得係可以坐低同朋友屋企人渡過悠閒時光既好地方。 餐廳以西菜同品茶為主，所以佈置左好多茶杯、茶壺。午餐menu，價錢around$78-$88，包一款前菜。 揀左b餐，望落份量唔多，但比想像中飽肚好多。首先湯係濃郁唔稀，好似以攪拌機整薯仔同蒜頭，所以飲落去係感受到顆粒，另外意粉有四大舊水牛芝士，相當足料。 套餐加配飲品半價，咁我就加左收銀機隔離有推薦既芝士奶蓋紅茶，盛惠$19。staff捧野飲出嚟時仲細心講解最佳飲用方案，濃郁既芝士奶蓋配上清香既紅茶，perfect match，難怪幾乎所有客人都點左。 加配$10有甜品選擇，份量比想像中細，但味道ok。 另外餐廳其實係有個tea menu，以好精緻既茶具奉上，有機會得閒果陣都想一試。