今日約咗個好耐冇見嘅朋友嚟旺角食嘢，想搵間餐廳舒服咁坐吓慢慢同朋友聚下舊，朋友推介左登打士街嘅樓上咖啡店 呢間咖啡店其實已經好多年，細細個啱啱出嚟做嘢成日嚟呢度食，係一間充滿童年回憶嘅咖啡店！ 咖啡店設計簡約，空間都幾大，無限時任坐，係一個傾偈嘅好地方！ 除咗傾偈仲有一系列嘅旅遊書和多款桌上遊戲供客人玩，例如係大富翁、猜猜畫畫、象棋等，可以享用美食之餘又可以玩下遊戲，拍拖來玩就最啱啦！ 我哋揀咗個二人套餐，套餐包括一款小食兩個主食兩個甜品同兩杯嘢飲都只係$398 炸蠔好新鮮，即叫即炸，好鮮味好好食！ 單點 —鹽酥雞 $68 鹽酥雞份量都好大份，雞肉爽滑，雞皮炸到好脆薄，正！ 特色黑椒鹹豬手配薯角 佢個鹹豬手超有驚喜！豬手好嫩滑，肥瘦均勻，炆到好淋，帶少少蜜糖嘅甜味，好正好好食！估唔到小店都出到呢一個水準，係個薯角就爭少少冇咩味 黑松露軟殼蟹忌廉意粉 店家加咗好多黑松露上去，一啲都唔吝嗇，味道好香濃，鍾意食黑松露嘅朋友唔好錯過！佢個意粉汁呢做到好杰身所以可以鎖住到個黑松露味，好食😋 焦糖拿鐵 香濃嘅咖啡味配上厚滑嘅奶泡，正常水準 熱柚子茶 甜度適中，好香柚子味既飲品

今次嚟到銅鑼灣登龍街食晚飯，選擇實在好多，揀左樂湯雞試下，佢主打係養生湯底，指名自己沒有落任何味精，非常健康！亦都有素菜選擇，適合一種go green既朋友仔😋 餐廳以中式格局設計，配有多種養生湯飯以供客人選擇 砂鍋花膠雞湯翅 $92 呢個係佢嘅招牌嚟，但個人感覺幾失望下…因為成個湯底係完全冇味…落咗兩羹鹽都覺得個味道好淡口，不過雞件幾滑溜，花膠量不多，但食到一排翅，係足料嘅！只係個湯唔知係唔係因為冇落味精所以真係好淡，同以前喺澳門食嘅花膠湯翅爭好遠爭九條街，連小小嘅雞鮮味都無，佢主打嘅招牌食物都做呢個水準感覺好失望，或者係我自己食慣濃味嘅雞湯唔係好慣食呢種淡口味….😅 藥膳醉雞配刀削麵 $74 醉雞酒味好濃郁，雞肉質嫩爽口，唔錯！呢個反而好食過雞湯翅，味道濃烈好多，口感層次豐富，有藥膳雞淆出嚟嘅味道，再加醉雞嘅酒香味，唔錯唔錯！

人氣食店蘇媽·蘇媽終於開到嚟銅鑼灣啦！佢係主打馬來西亞菜式 餐廳係用南洋茶室嘅懷舊風格設計，牆上嘅壁畫勁有馬拉風味！ 不過我想講啦呢間餐廳雖然食過幾次，我發覺店員嘅服務態度每次來都好差！明明當時有好多張吉枱，又無咩客，都係要你坐張二人枱或者搭枱，每次都坐得好唔舒服又迫！同佢地講要求換枱佢哋又西面唔理人！又會吹你落單，好似趕住做下一台客咁🙄真係呢種咁嘅服務態度令人好討厭🤬🤬🤬幾好食嘅嘢食都冇用😡 懷舊復古嘅茶餐廳文化令到你好似置身喺馬來西亞嘅小店一樣，好特別！ 魚仔將蘿蔔糕 $52 魚仔醬有少少微辣和胡椒香，個醬做得好好食！蘿蔔糕係偏淋身嘅，食出嚟個口感好煙韌，當一個小食都唔錯幾開胃！ 招牌砂煲老鼠粉 $92 呢個老鼠粉做得超好食每次來食必點！因為佢加咗大量花生，肉碎和豉油去炒個銀針粉，加埋佢個蝦乾炒得好香脆，撈埋一齊令到個味道好濃烈，係馬拉娘惹菜嘅感覺，甜甜地加小小辣正！ 個咖喱汁好好食！佢落咗好多花生同沙嗲醬，好濃既沙嗲味，雞肉串同豬肉串好食啲！牛肉比較老就冇乜特別 咖映多士 呢個係每次嚟食必點嘅甜品！個咖映斑斕醬真係好濃烈，唔會好甜！配埋個香脆既烤多士和牛油，個斑斕醬爆曬出嚟，真係好好食😋！

今日嚟荃灣行街，發覺而家嚟荃灣方便咗，除左屯馬線開通左，好多幾個大型商場都連接天橋，三五分鐘就可以到達，真係好方便！今次嚟到海之戀商場搵食，揀左呢間人氣東北菜老掌櫃 由於當日係同家人吃飯預早訂位，店家安排海景位置坐，非常舒適，一睇就知佢幾受歡迎啦，晚市如果冇book位起碼要等半個鐘🤣 素三鮮 $48 北京餃子🥟個皮會比較南方餃子厚身，因為北方天氣較凍要食飽d暖身，食落口個口感好煙韌，肉汁飽滿，份量都幾多幾抵食！ 京燒羊肉 $138 羊肉個皮炸到好香脆，再加咗好多胡椒粉和特製辣粉去減低羊肉既羊騷味，好惹味，唔食羊嘅朋友都可以試吓！唔算好騷！ 四喜烤麩 $68 呢個都係北京菜裏面必點嘅小食，不過個人覺得個味道偏淡口，不過真係好大碟！係同一個小菜嘅大細一樣！最後都係食唔晒🥲 糖醋桂花魚 $268 桂花魚炸到好脆，配埋個酸酸甜甜嘅糖醋汁好開胃好入味，略嫌個醬汁太酸，但係個魚係幾新鮮，其實咪即係松子魚囉！不過桂花魚就冇咁多骨嘅💕唔錯 北京填鴨半隻 $168 呢個係佢嘅招牌菜式，因為聽聞佢好快就賣晒，我哋喺訂位嘅時候已經預留咗，但係來到有少少失望，因為個鴨肉呢唔係好肥美，比較乾身…北京填鴨嘅靈魂係佢個鴨皮，但係你見到佢個皮嘅份量係好少，係靠佢嗰個鴨醬去吊味先覺得好食…但係份量係比起其他店鋪係多好多嘅！只能夠講話係抵食囉，但係唔算話好好食！ 整體來講我覺得佢係大件夾抵食嘅！適合一班人嚟食，如果兩個人嚟食可能叫兩個菜式已經飽咗，但係質量就真係一般般….只能夠講呢間係平民版嘅北京菜館，如果要追求高要求好食既可能未必岩

想起香港都食到日本最出名既飛驒牛，就要來喱間銅鑼灣很有名氣高級烤肉店試試，佢提供嘅飛驒牛全部都係每日日本直送，飛驒牛和日本第三大和牛並排，牛肉品質全部都係A5最高級別，一片片櫻花粉色嘅霜降和牛，肥美肉嫩！真係好令人回味❤️ ​ 飛驒牛他他 飛驒牛他他混合梨肉碎和生雞蛋，入口更清爽，好開胃！ ​ 海膽飛驒牛軍艦 一片生吃既霜降和牛包住海膽，一啖入口滿口都是和牛油花的香甜味，牛肉細嫩到入口即溶，必點！ ​ 飛驒牛五部位 今次試左五個佢最出名的飛驒牛既部位（牛肩肉、牛西冷、腰脊肉、臀骨肉、里脊肉）我自己最鍾意嘅係牛肩肉同里脊肉，經過燒烤後牛味更香濃，細嫩多汁，好好食 ​ 厚切牛舌 厚切的牛舌燒烤煮嘅過程中更加能夠鎖住肉汁。食落口更入味，外層燒金黃色般香脆，入口Q陣，口感軟腍！必點 ​ 壽喜燒風和牛西冷 即係去日本會食到既大判燒！ 首先用特製醬醃製牛西冷，再放到燒爐上輕輕燒熟，食之前再加入黑松露蛋黃，呢兩個簡直係夢幻組合，入口味道超幸福，滿滿嘅牛肉香氣❤️ ​ 韓式石鍋飛驒牛肉咖哩飯 咖哩味係篇向日式煮法，唔會好辣，最正嘅係佢個牛肉咖喱飯入面都係和牛牛肉粒，入口好細滑，真心推介！ ​ #和牛 #飛驒牛 #香港 #香港美食 #香港旅行 #銅鑼灣 #日式燒肉 #烤肉 #hongkong #foodie #foodiehk #travelhk #wagyu #燒肉 #hidabeef #肉料理 #日本菜

收工同朋友到銅鑼灣很開業多年好出名既德國餐廳聚一聚，佢既名菜係傳统德國鹹豬手，脆卜卜的外皮配上嫩滑的豬手肉，極級滋味，最岩嘆番杯黑啤放鬆一下～ 12串串燒Set $168 雞肉好肥嫩，單骨雞翼香脆可口，我自己最喜歡牛舌串燒，肉質肥厚軟淋，舌根爽彈，好好食！ 匈牙利牛肉濃湯 喱款牛肉湯是濃厚版的羅宋湯，因為加入左大量牛肉粒，味道會更香濃，最傳統嘅食法就係配面包吃，牛肉用牛腩的部位，食落更嫩口。 四式芝士德式薄餅 有齊4重芝士咸香味，使用藍芝士、巴馬臣芝士、車打芝士同水牛芝士一齊焗製，德式薄餅較薄身食落口更香脆，煙韌香口，好味！

開業多年既尖沙咀人氣居酒屋鮨一，出名食材新鮮，全部海鮮刺身日本直送，價錢親民，一向都深受港人喜愛 🥗鮨一沙律 加入左爽甜嘅蕃茄、魚生、八爪魚、油甘魚等等刺身製作，每啖都是魚肉香味和蕃茄帶來的清爽口感，好開胃 上錦繡刺身 最鐘意虎蝦刺身，啖啖肉鮮甜又大隻，配埋爆膏的蝦頭，好好食！吞拿魚和劍魚腩肉質肥美，味道爽甜不油膩，最正係佢每件刺身都係大大舊份量好足，每一口都是甜甜的幸福感 甲羅燒 甲羅燒蟹肉加入特濃的蘭王蛋黃，令蟹肉的味道再度昇華，香濃的蟹膏配上鮮甜的蟹肉，夾在脆卜卜的多士，口感一絕！ 辣酒煮廣島蠔 湯底辣辣地好清爽，廣島蠔肉質肥美，半隻手掌咁大，鮮甜嫩滑，必點 和牛粒串 和牛肉質嫩滑，經燒烤後更香口 煙肉帶子卷串 香脆的煙肉包住爽彈既帶子，呢個組合都係第一次食到，好新鮮好fresh 豚肉露筍卷 清爽不油膩的豚肉蘆筍卷，配上一杯冰凍啤酒，令人好放鬆

榴槤季節又來啦，我朋友知道我好鍾意食榴槤，特登帶咗我食依間日式刺身放題店，事關佢推出咗個期間限定的馬來西亞榴槤放題，唔使$300就可以任食多款魚生和馬拉榴槤、Häagen-Dazs雪糕甜品無限續杯，真心推介 刺身拼盤（角螺刺身、希靈魚、油甘魚、挪威三文魚、劍魚腩、帶子和 阿根廷赤蝦） 我自己最鐘意油甘魚，劍魚腩同阿根廷赤蝦，劍魚腩肉質肥美，油甘魚鮮甜嫩滑，手掌咁大隻的阿根廷赤蝦，爆高嘅蝦頭爽滑嘅蝦肉，令人欲罷不能😂 榴槤 要知道全世界最出名食榴槤嘅地方就係馬來西亞，而佢地有種食法就係會將個榴槤燒烤，經過燒烤既榴槤味道會更香甜，口感更順滑，兩款我哋都有食，我自己比較鍾意就咁食（即不烤）入口嫩滑細膩啖啖肉，口感奶滑肉質偏腍，當然比起你食D24就冇咁多肉，但係你而家去超市買榴槤都成舊水仲要得兩粒仔，呢個價錢食到喱個質素的榴槤放題已經回哂本 和風牛柳粒 牛柳粒加入咗黑椒同醬汁去炒，肉質柔軟嫩滑，好食！ 竹笙瑤柱蟹肉羹 其實即係碗仔翅，味道偏淡，我幫大家試咗可以唔使嗌🥹 蒲燒鰻魚 必點，鰻魚入口Q彈，肥嫩嫩好好食 蒜蓉燒生蠔 蒜味香濃，蠔肉都幾大粒，夠爽甜，推介 燒有機菠蘿 味道偏酸，正常野～ 海膽手卷 必點，雖然海膽味偏淡，但係呢個價錢都食到海膽都真係相當抵食，而且佢一啲都唔腥，好食！ 台式地瓜球 外層酥脆，入面係芋頭蓉，幾好！ 貓山王榴槤炸彈 必點，炸榴槤皮薄餡靚，一啖入口榴槤溶晒口中，讚讚 雪花牛鍋(2-3人份） 牛肉份量都好大份，湯底味道有少少似日式壽喜燒，帶少少甜味同豉油香，肥牛肉味香濃，甜而不膩，好食 芝麻雞翼 外皮炸到脆卜卜，好香口 吉列炸蠔 外層炸到金黃香脆，蠔肉肥美，蠔味十足！ 鹽燒牛舌 牛舌比較薄身，入口軟嫩爽口，配啤酒一絕！ 御品鮑汁燴花膠 鮑汁香濃，花膠好大塊，口感彈滑嫩口，回本必點！

在香港有多間分店的佐賀燒肉谷，以日本九州佐賀農場直送既佐賀和牛肉作主打，近期佢有新搞作出左個痛風海鮮餐，除左有多款罕有部位的佐賀和牛，仲送多個海鮮拼盤俾你，仲可以食足120分鐘，真心抵食！ 🌟期間限定！痛風海鮮祭～ 只要揀Lv3既套餐就即刻送極上海鮮拼盤，入面有齊多款新鮮海鮮（日本蠔、牙帶魚、白鱔、虎蝦、蟶子、鮑魚、帆立貝） 白鱔 金黃色的香脆魚皮，包住爽甜細滑的鱔肉，原汁原味，十分香口 廣島蠔 生蠔好新鮮好大隻，有半隻手掌咁大，燒烤後蠔肉鮮甜多汁 虎蝦 虎蝦好大只，蝦肉厚實鮮甜，爆膏既蝦頭好濃味好正！必點 帆立貝 帆立貝好新鮮，大大粒好爽彈好好食，貝肉口感爽甜 澳洲穀飼牛板腱 牛板腱的部位中間橫越一條Q彈細筋，口感層次豐富、紮實不油膩，牛肉香甜多汁 安格斯牛小排 油花偏淡紅色，油花豐富，肉質軟嫩q彈，入口即化 美國和牛肩胛肉眼 咁多款牛肉入面最濃牛味，牛肉鮮嫩多汁，脂肪均勻，最岩燒烤和打邊爐！ 煙燻壺漬封門柳 封門柳封門柳肉色偏向酒紅色，食落口帶點豬潤味，肉質軟嫩，油花較少，爽而不膩 澳洲和牛-特上牛肋肉 特上牛肋肉油花非常漂亮，口感軟嫰，入口即溶，鮮甜既牛肋肉啖啖油脂感 榴蓮炸彈 外皮酥脆薄皮，一啖入口剛剛好，棉滑的榴連肉好絲滑，必點！ 另外～ 自助區都有唔同嘅小食/飲品 都可以隨意拎，有牛肉飯，湯餃，沙律BAR等等

來自北京百年老店既古琴雅苑，最出名就係佢製作正宗嘅北京填鴨，佢近排推出左個《春日尋味》套餐，人均$300左右可以嘆盡多款北京名菜如北京填鴨、鮮魚羹、花雕醉雞、松子魚等等，真心推介 烤北京填鴨 烤鴨皮脆肉嫩，用卷餅包住青瓜、京蔥和哈蜜瓜，再淋上秘製嘅烤鴨醬，鴨皮肥嫩的油脂滲透在口中，好好食，鴨肉肉味香濃口感嫩滑！ 黃金明蝦球 蝦肉炸至金黃香脆，再淋上鹹蛋黃醬，鹹鹹甜甜嘅味道配上新鮮的蝦肉，爽滑彈牙，好惹味好食！