小店好近新九龍廣場，離奧海城三期五分鐘步程，精緻裝修，坐落舒服，餐牌大部份都係一百蚊樓下既西餐。 餐牌有多款意粉沙律選擇，今日天陰陰，所以點了熱食BBQ 醬烤骨試試。上左南瓜湯作前菜，大約等了十五分上Main course; 第一點要讚，八十蚊既BBQ 骨份量十足，一份七條骨，濃濃既BBQ 醬焗完熱辣辣又有小許脆邊，天寒地凍下作午餐一流。同一質素，商場入面起碼賣百五。 見好多食客加錢點水牛鷄翼，我自己就下次再細嘗。 其實好多時候，大角嘴有新開好野，各位街坊都識自己搵食。 今日毛毛雨，但十二點半前後，食客都坐滿左餐廳，係有好嘢食既必然現象吧。

大角嘴四圍遊今日就去左試利得街既「泰嘟嘟」。呢間舖起碼都開左兩三年，午飯一向都要排長龍既，可能今個禮拜長假期少左人返工，我哋今日冇訂枱竟然十二半前成功搶到位！咁梗係即刻試吓喇！ 舖頭裝修寫意，老闆應該係球迷，掛滿球星波衫；餐廳卡位設計成曼谷TukTuk 車般，頗為吸睛； 餐牌列出正常泰國菜預咗既菜式，比較出眾既有煎蠔餅飯，咖喱選擇較少 （黃咖喱牛腩 / 綠咖喱素菜），亦有船河或冬蔭公湯河揀。 我點左黃咖喱牛腩飯，朋友就見隔離幾枱都點左薄餅，就試吓喎。十分鐘上菜，我嗰碗咖喱幾大下，有椰香，非常微辣，見到有八角，美中不足個咖喱較「水」； 可能我好彩，我碗咖喱較多牛腩同薯仔，友人投訴佢嗰碗乜都冇，得兩嚿肉，但就好多蕃茄同薯片喎。但我自己份咖喱又吾覺有呢個問題 🤣🤣🤣 總結：好食，會返去試其他湯河同蠔餅飯。

新城市Honbo 喺三期近希爾頓出口，L型舖頭放咗十張到十二張二人四人枱，喺新城市廣場黎講，真係蚊型舖一間。Honbo 昔日喺灣仔食過，既然擴張入到黎沙田，咁梗係去試吓。 顧名思義，honbo 當然主打漢堡包。亦可能係蚊形舖關係，佢哋餐牌只有七八種包既配搭揀，主要都係要一片定兩片漢堡同配菜 ； 最基本既Classic Burger 連薯條可樂價錢就$138； 百幾蚊既漢堡等左四個字上菜，Burger 只係微暖，幼身既薯條仍然係脆，不過都差唔多凍曬了。現場唯一既外籍女侍亦有講「對唔住」。。不過，就冇做任何野補救。咁就百幾蚊食凍包，行多步食麥記都應該都有熱野食。 星期六新開張竟然人手不足，吾關廚房吾關嗰位女侍應事，係公司人手投入既問題。星期六你都吾請夠人手，個漢堡個薯條新鮮整出嚟再好味，擺凍曬先上俾客乜都冇用喇。

本來係想帶太座去試新餐廳，新菜式；但係，從來「試新嘢」都會有潛在風險，講白啲就係食物麻麻； < Hotel Columbo> 不幸地，我會話當晚所揀既菜式冇乜特別，味道上吾覺有好精采既推介.

半島，付出左最貴既價錢，你預期最優質新鮮既食材，最優雅既環境，最體貼既服務；2023年一月，小弟終於同家人去過試過食過呢間殿堂級自助餐。 推介既有冰陣海鮮山入面既蟹腳同龍蝦，龍蝦彈牙，食得出吾係開左好耐；另外有之前自助餐從未見過既鮑魚盆，呢盆「鮑」相當豪氣！肉枱方面，有絕對值得切完再切完再切既頂級燒牛扒，燶邊而肉味超濃，加埋正宗既gravy , 好食到呢！另外黑松露芝士意式雲吞香氣撲鼻，係熱盤之選。 其他中西印式熱葷有多七八個選擇；個人意見，反而咖喱方面的確比隔離Hyatt 遜色，而熱食去到自助餐時間尾段的確有補餸添加較慢既問題，希望餐廳可以留意番。 最後，甜品既 Raspberry Mousse 美味，不太甜 非常滑，值得推薦。 吾講太多，睇相先：

天寒地凍，掌心凍冰冰，又凍又肚餓；路過新港城中心間《點煲》，個柴爐火紅咁煲緊煲仔飯，吾理佢係咪得個樣，見有位即刻衝入去叫個煲仔先！ 點左二人餐，有湯有點心併盤有小菜（揀左牛腩煲）有煲仔飯（揀左爉腸鷄煲飯）都係二百幾蚊！ 點心拼盤造型可愛，燒賣奶王包都正常；蘿蔔牛腩滾住上枱，牛腩軟冧，唯獨蘿白上菜時仍然係白色，亦未入味，可能可以煲長少少； 主角臘腸鷄煲大約十五分鐘後個煲冒住煙咁上，梗係開心喇；特備長鐵匙俾客抓飯焦，啲飯焦脆卜卜，數得出八件有骨鷄件，兩截臘腸，大人細路都食得開心；可惜煲飯只有臘腸既香，但食落冇乜應有既油感，不過行商場既家常便飯係ok 既。

好整齊既小店，位於大角嘴富多來商場，「日啡」對面。 平日主菜也有九款選擇，非常有心；選左大角嘴比較少見既西班牙海鮮飯 （小鍋）； 眼見十二點半已經滿座，廚房由一年輕廚師左右開弓，同時煮六位客人既落單，前廳就一位年輕姐姐打點一切，難得笑容可恭，服務十分好。 等左十五分鐘上菜，留意到用上正宗既 paella 平底鑊煮，熱辣辣上枱；有蝦，青口，蜆肉，魚柳，亦有chorizo粒（西班牙辣肉腸）包含在內；海鮮飯火喉適中，有如預期既濕，比較可昔係雪蝦可能雪太久了，有點乾，賣相可以好啲。 總結： 小店餐牌有平有貴 （午市做威靈頓牛柳！），食材可以改善，但味道還不錯； 座位舒適，任飲果茶，會回頭！

《Theo Randall at Intercontinental》 為全球二百大食肆，一入門口啲Top Restaurant 獎狀 同嘉許，多到冇得你睇吾到；難得香港分店周末推 Semi Buffet Brunch - 終於決定同家人一隔十年再去朝聖朝聖。 Brunch 包括 廚師 Signature table + Pasta + Main Course + Desert + Coffee & Tea. Chef Theo’s 既自助選擇真係包羅萬有，我出出入入四五次，純粹想試齊 Chef Theo 各類美食； 佢哋既芝士焗蠔真係不得了，帶芝士香，連埋掌心大既蠔係「滑」入口腔，冇得彈；另外，龍蝦湯份量較少，但一定要試；另有多款凍海鮮包括開邊龍蝦（已細心起肉），蟹腳，青口 等。 大吃大喝後先發現未入正餐，我點了《鴨肉餃子意粉》和《煎羊扒》； 既有自助餐既放任，但這份Brunch 亦提醒番大家，廚師對自己出品既堅持；呢個價位喺其他酒店，略加埋燒牛肉一定已經係 full buffet ; Chef Theo 反而邀請俾大家試埋佢哋既Signature 意粉, 同埋真係要做要煮既 Main Course ; 呢份堅持已經要讚，可況《羊扒》上菜時啱啱 well done 入口粉嫩，配紅酒 sauce 真係美味無窮 ，體驗到五星級既美食。

《阿鴻》由差不多十多年前在觀塘返工開始，已經係我心目中鹵水系列既不二之選；個人黎講，返放工之後去咗中環再去大角嘴，幫襯《阿鴻》既機會少左；突然網上傳聞老闆退休在即，亦無意再續約最後既觀塘店，立即 call 齊家人去食番餐回味再回味！ 點左蒜香雞，炸蠔餅，蔡瀾撈麵，鹵水鵝片，啫啫芥蘭煲，素鵝六款菜。 咁黎阿鴻，就梗係講講鹵水既喇。之前有OpenRice 網友提到鹵人冇味或淡；我哋都試過外賣有呢個情況；不過今次堂食水準就番曬黎。素鵝將鹵水既味道推到極致。一入口有陣甘，之後有陳皮八角既味道，口腔有陣餘韻，素鵝本身冇乜味但非常滑，好野黎。 鹵水鵝片冇骨，厚度適中，鵝片底有鹵水豆腐。 蠔餅個炸醬超級脆，熱上，成碟好多蠔仔粒，不愧為鎮店之寶。唯一不足，留意到碟底比較多油。 蒜香鷄 （半隻）上菜靚仔，差唔多已起曬骨，鷄滑又啖啖肉，好多炸蒜粒，啲鷄好似豆腐咁冧，在座老人家都讚。 七位食咗一千埋單，難得位位各有所好，今餐相當滿意。 總結： 《阿鴻》好野黎，若果真係結業，實在非常非常非常可惜。

行過大角嘴街頭，偶然見到新川菜既街招，喺Google 揾左一輪，原來棕樹街喺大角嘴道馬會既後面，咁新開就梗係要試吓佢！ 其實條街比較靜，店舖附近係汽車維修店同老人院；店舖新到花牌仲喺門口！ 店內大部份四至六人精緻卡位，應該係主打晚市一圍圍既客，室內瓦頂裝橫燈籠佈置都有心思。 午市餐牌有一人/ 二人套餐，具前菜主食，二人套餐有埋酸菜魚或水煮牛肉；見隔離枱成個大大碗咁上；睇到我食指大動，下次一定叫埋老友一齊試。我點左既干鍋可分為香辣 / 麻辣 / 孜然 味道，亦有蔥爆可選；餸菜倒離不開牛肉片五花腩；未見海鮮類，較特別有「美娃」（田鷄）作配菜。 我點既麻辣干鍋又如何呢；師傅煮左三個字上菜；上菜第一個感覺相當大碗，姆指大既紅辣椒滿佈，跟左三個餸 （牛肉，油麥菜，五花腩）份量十足； 因為午後要開會，今日只淺嘗小麻小辣；干鍋黎講我覺得比附近奧海城「十二味」較油較濕，蒜味更強；若果干鍋「爆炒」鑊氣猛少少，效果一定會更出。 跟餐送汽水，王老吉特飲略為加二蚊十蚊。 總結： 地點為先天問題；店舖新裝修整潔，午餐干鍋價錢抵食