有次約左朋友食飯，但又唔想去咁遠，見到綠楊坊開左He She Eat ，以前成日經過都覺得間鋪好少女系，應該好啱同女性朋友過黎食飯打卡，於是就試下呢間鋪整野食既味道如何啦！

我地叫左個套餐「脆薯格配酸忌廉，泰式辣醬」，坐左一陣，薯格就到左啦。薯格一入口，發現係啱啱炸好，好新鮮，雖然睇落有少少油膩，但食落一啲都唔會咁覺得，食落好乾爽好脆口。
另外仲配埋酸忌廉同埋甜酸醬，令到成個薯格唔會太單調，可有試下配唔同既醬料試下。
扒虎蝦芝士汁鮮蛋意大利麵，我極力推介，意大利麵吸收哂芝士汁既味道，啖啖都有香濃既芝士味同蛋味，而且芝士汁令到個麵唔會好乾，個虎蝦都好大隻，配埋意大利麵，口感更佳。
後來我地仲叫左燒鰻魚滑蛋意式紅飯，一上枱除左大大塊鰻魚係面外，仲有好香既蛋味，佢地意式紅飯係用左鮮蕃茄黎煮，令到啲飯有淡淡既蕃茄味，但又唔會覆蓋燒鰻魚既味道，配埋滑蛋，成個飯有入口即溶既感覺，都值得一試再試。
之後我地仲點左慢煮BBQ豬肋骨配薯條，配菜同薯條一樣咁出色，都係好新鮮好脆，相信應該都係炸完就上碟，而個豬肋骨更加有驚喜，一黎到個份量大到唔敢相信，一切落去就發現肉同骨已經煮到分開左，唔會怕啲肉係哂啲骨到呢個情況，食落口食到好濃好濃既BBQ醬，而且又啖啖肉，真係好想叫反幾碗白飯配就一流啦。

飲品方面，我同朋友分別叫左燕麥乳酷奶昔同埋柚子沙冰配綠茶雪糕，燕麥乳酷奶昔味道比較偏淡，唔會好甜，飲落有淡淡牛奶既味道，好適合食飯既時間清一清個味蕾。而柚子沙冰就比較甜少少，柚子味都好足，配埋綠茶雪糕，酸酸甜甜咁攞黎開胃消暑就一流啦。

好耐無打個邊壚 星期二約左個朋友刷餐勁 我自己就好鐘意食放題/任食 貪佢消費無壓力 今次簡左間係荃灣大鴻輝既日式火鍋 一坐低就叫左個鴛鴦湯底 我食麻辣 朋友食日式甜鼓油 跟手出去攞野飲 飲品種類都算多 除左可樂仲有幾種唔同既罐裝飲品 跟手睇埋d丸類都算多 大大話話都十幾二十種 另外不得不提 佢d菜種類真心多 而且勁新鮮 牛肉質素唔錯 豬肉都幾好 雞肉就最正 無油 但都幾juice 另外仲有炸物食 炸物香口 脆漿薄身 整體唔錯 而且環境幾好 鐘意打邊粒既可以一試

荃灣既車仔麵出名多選擇 其中仲有兩間係米芝連一星級 所以係得荃灣開既車仔麵 質素都唔會差 今日行過大壩街 見到有間新開既車仔麵 決定試試 裝修有懷舊既香港特色 綠色鐵籠同舊海報都好靚 野食方面都好多選擇 我簡左牛雜、咖哩魷魚同豬大腸仲加埋個孖寶辣汁 份量超夠，內臟食落無異味，牛雜十分入味 辣汁唔會一味死辣 好香 咖哩魷魚爽口 咖哩味濃 我朋友叫左咖哩魚蛋、花枝條同牛柏葉 朋話咖哩魚蛋味道好濃 牛柏葉爽好 花枝條超好味 我試左一條好覺得好鮮味好食 整體感覺幾好 荃灣又開多間唔錯既車仔麵 又多一個新選擇

今日同朋友黎到荃灣最多野食既街 見到咁多人排隊就去試下 我地一坐低就叫左杯青檸梳打同咸檸梳打 而架出去飲一杯青檸梳打都成二十幾蚊 但越味皇價錢平 都係十三蚊一杯 仲要係全罐梳打 因為我好鐘意食越南小食 所以毫不猶豫地叫左雜錦拼盤 佢既春卷炸得好脆口 而個餡都好足料 蒸既只係個外皮有唔同 個餡都係一樣味而個蔗蝦全部都係蝦肉 好香好濃 我同個朋友大家各自叫左一碗粉 叫左豬扒湯檬同埋越味皇火車頭湯河 火車頭湯河好足料 裏面有牛丸牛肉生牛肉蘿蔔牛筋 每樣材料都好好味 而且湯粉分量足夠 最後叫左越式燒魚 外皮燒得好香脆 內裏魚肉嫩滑 魚味香 食落去冇腥味

今日黎到屯門食全雞脾餐，第一次食雞脾餐，仲要一次過食三款唔同口味既雞脾，分別有皇牌生炸雞脾、滷水雞脾、沙薑雞脾、脆薯角、燒汁炒烏冬、水蜜桃紅茶。 
今次食雞脾有d驚喜，因為食雞脾好怕有種雪藏味，但呢三款雞脾食落係完全冇雪藏味，非常讚。冇雪藏味之如仲要食落好juicy ，仲要係有肉汁漏出黎，滷水汁同沙薑汁雞脾都好夠味，唔會太咸至於皇牌生炸雞脾，表面睇落好靚仔炸粉又夠薄，又冇炸到過火，炸完又唔係油淋淋，雞脾成隻手掌咁大，食落又冇油淋淋既感覺，味道好好
食皇牌炸雞脾最緊要配埋水蜜桃紅茶，水蜜桃紅茶又唔太甜岩岩好，兩個好夾

脆薯角好脆，平時食個表皮表較硬，呢度食既竟然唔硬，食既時候仲有幾種調味粉可以配答
本人就揀左香草辣粉、海苔椒鹽，香草辣粉既香草好香又冇蓋過左種辣味，海苔椒鹽唔太咸，仲有幾種辣味既調味粉選擇。燒汁炒烏冬亦十分惹味，係9點半前叫套餐仲可以有台式飲品，我今次就係蜜桃茶
另外一題唔熟路既可能要睇一睇地圖搵先搵到，鋪頭門面雖然細，但服務態度好，真心推介食雞有雞味，唔係食雪藏味，一定會再食。

難得約左個好耐無見既朋友係旺角聚下，想搵個可以坐住慢慢傾計既地方，無意中搵到呢間Urban café，見到就決心試下啦。   我同朋友兩個人叫左個二人套餐，套餐包括兩碗沙津、兩碗湯、一個前菜、一個飯麵加兩杯飲品，如果唔夠仲可以加少少錢叫多個小食拼盤。   佢既沙津比我既感覺好清新，有唔同既菜之餘，只係用少少既沙津醬點綴，沙津菜既味到依然係到。而佢碗湯十分之濃郁，一入口一啖一啖既粟米味係口入面，好香好濃郁，雖然外表睇唔出咩特別，但一定要試下。   前菜我地揀左西班牙黑毛豬肋骨，份量好多好大，而且好入味，相信佢地應該燒左好耐先會令到塊豬肋骨咁入味，啲肉質咁鬆軟，我最討厭啲豬肋骨太硬同埋乾，但呢到完全無呢個問題。   之後係黑松露野菌大啡菇露荀配忌廉意大利飯，我就特別喜愛呢個，一黎到枱到已經聞到淡淡既黑松露既香味，入到口更加不再話下，個陣黑松露既味道好食到難以形容。我更加留意到佢煮呢個意大利飯既時候，刻意煮到啲飯大幾9成熟，令到啲飯有一陣陣淡淡既米香。我十分喜歡呢一點。   飲品方面，我地分吃叫左Oreo脆脆特濃朱古力及拖脆特濃朱古力，兩杯既朱古力都好濃郁，拖肥特濃朱古力就比較甜，我就比較喜愛自己個杯oreo特濃朱古力啦，飲飲下有少少oreo餅乾碎咁，oreo同朱古力有幾配我相信大家都唔需要多講。   最後我地都叫個小食拼盤，個拼盤既野食都係即炸，熱辣辣，薯角係我食過咁多間最脆最好食，脆到難以置信，好似食緊薯片咁脆，而啲雞球有少少芝士味，都相當惹味，加少少錢絕對值得。   呢到環境其實幾熱鬧，但好輕鬆，好適合同朋友黎個聚食，食下tea。呢到既環境一定包你充滿驚喜。

第一次試呢間燒肉放題，入到去同一般燒肉店冇咩分別 坐低冇耐未開始點餐，服務員除即就拎左一碟肉黎，先有幾樣野可以試食左先再點餐（都幾貼心），呢碟肉有五樣野，份量唔多每樣兩件，有一口牛、雞翼、唐辛子豬頸肉（推介調味料濃，又唔會太辣，好爽口）、同埋兩款豚肉。呢到係利用電子屏幕點餐，方便又易用，出餐快。 刺身壽司類：分別有帶子、北寄貝、甜蝦、三文魚、蟹柳彷飽魚等，雖然種類唔多，但刺身新鮮鮮甜，甜蝦肥美。壽司細細件，一啖一件口感岩岩好。 炸物：炸蕃薯、炸鮮奶、炸雞、炸多春魚等，炸物又唔會太厚炸粉，食既時候又冇成口油，炸蕃薯同炸雞（好juicy ），鍾意食炸雞可以encore 。 海鮮：蝦、元貝、廣島蠔、錆魚、蜆等，本人喜燒食蝦同廣島蠔，蝦新鮮爽口蝦頭有少少膏，廣島蠔size唔係好大，但食落口感好鮮甜，食完一定再想食。錆魚燒完都唔乾身，食落重魚味唔腥。 元貝、廣島蠔、蜆，金菇菜....都會用個小盤仔網住，燒得方便食得開心。 野食種類都算多，最重要係食完燒肉，身上面都唔會好大燒烤味，又冇乜煙霧瀰漫，值得一讚。

今日同兩個朋友行過荃灣最多珍珠奶茶既地方 見到新開既沐白小農 對於好鐘意台式飲品既我 當然要試一試 飲得台式飲品當然要試呢排好出名既黑糖波霸鮮奶 啲黑糖珍珠食落去仲係熱 係大珠好彈牙 同埋牛奶好濃好香滑 配合埋黑糖珍珠唔會好甜 又唔會太大杯👍🏻 另外一杯係大甲芋頭鮮奶 我見到佢一大匙既芋頭等於半杯 真係好足料 飲落去仲有好濃既芋頭蓉細細粒 對於芋頭愛好人士 呢個飲品係一大享受 除左呢兩杯特色飲品 叫左沐白紅茶鮮豆乳 佢個味道同我之前喺台灣試過嘅紅茶豆漿係一樣味 我仲叫咗微甜 口感好清新唔會好濃既茶香 反而豆乳味比較強烈 但整體來講係好味嘅 我覺得反而適合早餐嘅時候飲 試過幾杯飲品都覺得沐白小農出左唔同既特色飲品 除咗外觀睇得 味道都好好味

同朋友仔都好想食泰國菜，行行下街醒起最近置樂新開左間泰國餐廳「象泰宴」，所以就決定去食下嘢。 
餐廳入面好有泰國氣氛，而且啲坐位好闊，唔洗逼住逼住。我地一黎就先試左個蝦片，唔會話好多油既感覺，但夠蝦味，仲好鬆脆。
 之後到冬陰公，係超足料，入面仲有大隻既大頭蝦，呢個冬陰公好夠味，同香港一般唔同，唔係好奶個啲冬陰公，而係偏酸辣既冬陰公，係好似泰國個種。
 之後我地食左必食既生蝦！
好新鮮，蝦係好大隻好肥美，唔會有雪過既感覺，而紅色係比綠色既辣，但都一樣好好味。
 另外我地仲叫左焗黃咖哩包軟殻蟹。咖哩係偏甜的，配住外面脆內面軟既面包再夾住軟殻蟹食係好滋味。好味到我同朋友仲食曬個包！ 
仲叫左個馬拉盞通菜，平時通常都會偏鹹，但係今次係岩岩到，唔會偏鹹，一啲都唔會話食完好口渴，仲有落左炸左既蒜頭，加左唔少香味。
 最後我地叫左芒果椰汁糯米飯，芒果無酸，係好甜，而且糯米飯係紫糯米，配上椰汁，係超好味，有係泰國既感覺呀。

行下行下街俾餐廳的霓虹燈吸引左，就揀呢間餐廳打邊爐。住屯門咁耐都好少有d好有特色既餐廳，餐廳由內到外都有懷舊的海報同霓虹燈設計，可以同朋友等緊位或者食完野影d靚相，係唔錯既選擇。 我同朋友兩個人，七點半左右等一陣就有位，入到去環境都好懷舊，連餐具都係懷舊風格，有回到舊時香港的感覺。 醬料方面都有不少選擇 我地雞煲叫左bb辣之後，竟然有餐食小食炸燒賣同炸魚蛋！！新鮮熱辣辣炸出黎超好食！ 雞煲到既時候同以往食雞煲唔同，係會有個計時器同時職員會提醒你唔好開蓋，一陣會再過黎。 一開蓋係超級香，職員仲會夾d花膠俾你食左先，服務超好！而且雞係超入味仲一啲都唔老，雖然係bb辣，但係都食到辣既香味，超正，仲有重點唔係得雞，係仲有豬皮同豆卜，豆卜唔洗講入曬味好食，連豬皮都好入味但係仲保留到爽口既感覺，係之前食既雞煲都未試過係咁爽口，一定要試下！ 食緊既雞煲既時候，職員都會提醒你揀個湯底同d野食，咁就唔洗等咁耐，佢地仲會不定時幫你睇下個雞煲，驚你會痴底，超窩心！
同平時既雞煲唔同，並唔係用翻雞煲個湯底，而係另外揀湯底，我同朋友就揀左特濃花生沙嗲湯湯底。 一黎其實已經聞到好香既沙嗲味，仲夠曬濃郁，配牛真係一流，無得輸，仲要安格斯牛肉係任食！ 仲有餐廳都會因你既人數而上適當數量的食物，減少浪費真係要一讚，上菜亦都夠快！ 而我同朋友另外再試左頂級牛小排，我同朋友都私心推薦大家一定要試一試，因為真係好嫩滑一啲都唔酥，係好好食！好味到係唔洗沾醬汁食的。 而野飲係有汽水任飲的，但我同朋友試了餐廳的咸檸七同冰糖陳皮燉檸檬，都不錯，係打邊爐既餐廳真係好難搵！ 最後提提大家記得留一留肚食甜品呀！