山長水遠帶住個行動不便嘅長者去食晚飯，去到等咗大半個，等位又搞錯曬啲等候number，啲客人全部都揸住重複嘅等侯號碼，終於等到有位，點知又話地方細要搭枱，算啦！都等咗咁耐，但一坐落就話冇炸子雞，呢下真係忍唔到，可能係啲youtube kol效應，我唯有認自己黑仔，即刻起身走人，以後亦都唔會再去！ 冇炸子雞嘅時間係大約七點零鐘，又唔係啲乜嘢名店，亦都好明顯係平時冇做開咁多客人，點知畀個kol講一講，突然間爆場，所以挪手唔成勢，如果做唔到咁多客人就早啲拒絕客人等位，唔好再等啲客喺度等啦！白白浪費時間然後你連招牌菜炸子雞都冇，不單止今人失望，亦都得失曬啲客人！

本身就好想支持佢嘅，所以專登山長水遠帶住個行動不便嘅母親大人都去食返餐，點知真係支持唔落，實在係難食，而且貴得有啲誇張， 一個鱔糊客飯(碟鱔糊係好細碟嘅)，一碟雞絲粉皮(佢真係雞絲粉皮只有雞絲同粉皮加上醬汁冇任何配料)，沒有任何豪華嘅裝飾，非常之平民但係收費$250。 老實講你想人支持你，收貴啲唔係問題，但係食物質素真係唔好咁差，而家咁嘅質素真係唔會再幫襯多一次囉。 首先講下個雞絲粉皮先，我係一個唔識整煮食嘅人，但係我自己整一定會整得好過佢，簡單講句真係冇技巧可言。 講下個鱔糊啦，個鱔咬落去係爽嘅，呢個係唯一嘅好處，但係嗰啲醬汁全部傑到一pat pat，用筷子可以將個劈汁一舊舊咁夾起，入口真係有啲難受。 成日喺facebook嗰度埋怨點解冇客，首先請檢討下廚藝，然後先至好要求啲客人多啲嚟食囉，講到尾收費實在唔平，如果好食嘅就值得， 但係唔好食就唔會再有回頭客㗎啦！

價錢真係唔講得平，佢嗰啲指定嘅肉類切到超級薄，「薄如蟬翼」 切肉個位師傅辛苦曬，嗰個薄度簡直可以拎去博物館到展覽，刀工之厲害真係非常人能及🤣🤣🤣 湯底有好多個選擇但係都不離一個淡字滾水咁樣😅啲超薄肉片放咗落去淥完出嚟，係一定要點豉油先至有味道。 而所有肉(牛肉/豬肉)完全冇肉味，唔知自己食緊乜，鱔片就幾腥下 🫠 不過啲蝦唔係太差算係新鮮，另外半殼扇貝雖然唔係好大粒但係入口嘅爽度係可以接受。 總括離港咁嘅價錢我都係去返「牛角」好過！起碼塊肉都厚少少，未至於筷子一夾就溶，因為太薄筷子一夾落去佢已經爛開，未曾淥已經溶曬！🤣🤣🤣 不過有樣嘢值得讚嘅，就係收銀樓面嗰位小姐，服務態度非常好，好有禮貌，唔知係咪店長呢？ 我冇北上消費一直都留喺香港消費，但係成日啲人話餐廳服務差，但係好似呢位店長小姐咁，真係畀個獎佢簡直係態度一流。 話香港啲餐廳服務差嘅，佢會唔會只係齋講，根本都冇錢喺香港食飯呢？🤭

美味2人套餐🍽，抵食值回票價👍🏽，超滿足食到飽飽😋，太后無投訴😁 兩個人四百幾蚊埋單食到飽飽，抵食過乜乜放題大x屋嗰啲。 啲肉全部都係靚嘢，啲牛肉質素非常之高，唔會冇味唔知自己食緊乜！ 同老人家食飯最怕就係啲肉太韌咬唔到，但係太后今次冇投訴，食到津津有味👍🏽👍🏽👍🏽 而且仲有職員招呼態度非常殷勤，每一樣食材都細心解釋令你食得滿意。 疫情前都曾經去過呢間616酒場度食過飯，但係當時係屬於中高價錢 ，而家價錢調整過做咗啲特惠套餐，所以非常之抵食。

首先嚴重誤導嘅係 所有嘅地址都話係喺帝京酒店，但係當你入到帝京酒店根本就冇呢間食店嘅入口，應該要上返樓上嘅商場係由商場入，咁即係同酒店無關啦！但係每一個地址嘅介紹都話自己係酒店！令人誤以為係酒店嘅其中一間餐廳，欺騙成分嚴重！！！ 好！講到食物，刺身唔新鮮！嗰啲蝦個頭係會甩出嚟嘅，帶子吞拿三文魚又唔新鮮乾嘅，我用餐完之後當晚半夜就肚瀉咗兩次。焗嘅生蠔又過咗火啲蠔好老唔好食，羊扒啲肉唔知係咪用咗千年殭屍肉，食落去一啲味都冇淨係超級重香料味，而且亦都燒到乾曬根本咬唔落難食到死！啲雪糕黐曬碎冰，根本就係溶過再重新雪返，所以好容易有細菌我打開見到係咁已經唔夠膽食。 以前都食過其他大喜屋從來都覺得評語麻麻，今次因為係朋友訂枱而且個地址寫明係酒店嘅，以為係酒店辦理會比較好啲，所以先至去食，我以後都唔會再去幫襯任何大喜屋！

琴日外賣，買咗個越式炒飯，成盒飯最後係倒咗！ 🤮🤮🤮🤮🤮🤮🤮🤮🤮 根本就唔食得， 完全唔係人食嘅， 成盒飯都冇味！ 佢本身係個餐， 收人六十幾蚊跟一杯飲品， 所以就叫咗一杯檸檬茶， 嗰杯檸檬茶難飲到極， 比坑渠水更差又苦又峽！ 最後都係倒咗入廁所！ 因為附近一帶都冇啖好食， 較早前曾經去祥興晚飯， 食一個蒸排骨， 嗰個排骨又係健康度呢……冇色冇味， 但係就勁多油， 完全係油浸骨頭粒🥴 其實呢間嘢已經有前科人哋喺碟食物嗰度發現有隻「巨型大曱甴」屍體，好似係幾年前嘅事。

上網搵咗一輪，最後決定山長水遠入去荃灣，就係想試下呢一間「江湖小棧」嘅煲仔飯，咁佢實在係好食嘅，價錢亦都算平88蚊一煲飯， 但係要等兩個鐘頭為咗食一煲煲仔飯又真係過份咗啲，但係都話係山長水遠㗎啦，唔通走咩！因為要同個皇太后食飯，皇黃太后好L麻煩，辣又唔食得海鮮又話唔食得，白菜仔/芥菜又話寒涼，好難服侍，一坐低見到其他人係每人一煲飯而我哋係一煲飯兩份，但係佢嘅特色係落豬油落去撈啲飯係好味嘅👍🏽，佢最出名嘅就係白鱔煲仔飯，但係我落order嘅時候已經買曬，但係其實個北菇雞飯都相當唔錯，下次會喺平日再去試，因為今日實在係太癲，等兩個鐘頭！而家喺香港好食少少嘅舖頭都要等位等得咁誇張呢？

其實我唔係住喺荃灣呢一區，但係因為老鳳茶居啲點心真係好食，所以一有時間搭車都走過嚟呢度食，最大推就係腸粉軟滑口感依韌非常之好味必食之選，另外蝦餃燒賣粒粒蝦爽口彈牙，每次都一定叫最起碼其中一樣，金錢肚 排骨 牛肉球 鳳爪 芋角 叉燒包 臘腸卷 全部點心都高質高水準， 如果好肚餓就叫個蒸飯食唔算太大份，加埋點心一齊食啱啱好。 以呢啲小型食點心嘅店，茶嘅質素算係唔錯，食物嘅質素比普通嘅茶樓甚至乎啲中高價嘅茶樓還要好，而且價錢實惠。

一碗船河嘅惡夢！！！！！！！！ 難食到吞唔落！ 鹹到腎衰竭！ 謀殺長者！ 老人無牙力先至食湯河啫！點知害老人家食到啲垃圾級食物，仲要鹹到死！老人個腎唔襟玩㗎！！！ 想請教一下各位，每一次食嘢前係唔係要先上openrice度睇曬食評先至可以選擇？咁樣會仲忙過返工！ 到我中咗服嘅時候，喺openrice度先至知道，原來呢間嘢係劣評如潮！ 我見到有人話喺碗粉上面有昆蟲，當時有冇報到食環呢？如果報咗食環，可能佢唔會再危害下一個客人喇喎！ 朗豪坊容許呢啲劣質食店？

環境污糟 枱櫈地下都好污糟 餐具污糟 啲碗碟杯全部都有上一手食淨嘅殘渣黐住 點心難食 基本上難食到 全部都係咬一兩啖就食唔落 夥記服務態度差 十問九唔睬 腸粉皮厚過棉胎 質地又粗鞋 牛仔骨韌到咬唔入 牛肚鹹到腎虧 一碟得四舊 粟米煎魚餅硬到可以用嚟紮鐵餅 唯一係個薑汁糕叫做正常有薑汁味 整體嚟講九成食物係入唔到口 難食到咁嘅程度真係 不單止冇下次 仲建議各位唔好浪費金錢同時間