其實平時喺OpenRice search下都知，中環真係冇乜幾間食日本菜，一係就係好貴嗰啲。見佢新開張咗一排，今日過嚟試試，有驚喜！ 魚生好新鮮，就算係角切，都唔係啲頭頭尾尾，有誠意👍🏻 碗碟都好精緻，好日式，欣賞佢個麵豉湯碗，平時啲舖頭只係會用膠碗，佢呢個係真搪瓷碗👍🏻 價錢唔算平，熟食大概$150，魚生/壽司$170-$250，但係質素非常唔錯，貴啲都值得嘅。雖然地方唔大，但係勝在夠cozy～ 食物：5/5 環境： 4/5 服務：4/5 CP: 4/5 回頭： 會

見到好多好評，但係親身體驗並非理想

tea time 嚟到，一入餐廳，得2個侍應，但係全場應該有超過20張檯。企咗係門口差唔多2分鐘，個侍應行過望一望我，但係完全冇理過我嘅存在，之後先施施然行過嚟問我幾位...

我同佢講話2位，想要張大啲嘅檯，因為想用電腦做嘢要啲空間，佢有咁多張吉檯唔俾，係要俾張最細嘅我😒 之後我再重複一次我想要張大少少嘅檯用電腦，佢先至俾另外一張我。落order叫咗差唔多5分鐘先有人理我，order嘅時候講明想上咗鹹點先，甜品同飲品後上，佢食物都未到轉頭就攞杯野飲嚟😑😑。

食物質素亦唔見得好好：叫咗一個散叫辣肉腸薄餅，同埋一個下午茶餐（French crepe + coffee）辣肉腸薄餅名副其實”薄“過張紙... 係literally同下面張墊底紙一樣薄 🤦🏻‍♀️，個薄餅嚟到已經唔係熱（順帶一提，間餐廳冷氣勁大，尤其埋邊sofa位）， 食落冇咩料，辣肉腸（$1嘅size）數埋6塊都唔知有冇，薄餅大概5-6”，盛惠$158，都幾略水... 間連鎖薄餅帽都好食過佢啦


French crepe (tea set with regular coffee)賣相唔差，但係🤮。Crepe 食落去係近符泥膠質地，似蛋餅多過crepe。唯一好食係vanilla雪糕，但係相信唔係自家製。個crepe都幾失望.....

總結：食物麻麻，服務亦麻麻

食物：2/5
服務： 2/5
環境：3/5
CP： 2/5
回頭：未必會

‼️如果你正在考慮book呢間餐廳，以下食評絕對值得你參考‼️ Fine Dine 三大元素無非講求1. 環境 2. 食物 3. 服務，呢間餐廳除咗個景之外，冇其他 原先為咗2021 Spring restaurant week(RW)而嚟，但係dining city full 咗，唯有book openrice (OPR)。OPR佢地有個golden hour menu，望落去嘢食同RW大同小異，價錢一樣$488。 點知原來後尾朋友book到RW，同我一齊double book咗。 去到餐廳朋友用咗RW個booking入座，餐廳話搵唔到個Booking，搞咗一輪先安排一個唔係窗口位嘅位置。之後我話其實我係OPR都有book到，有講明話要窗口位。 個經理已經好唔耐煩黑哂面咁問我哋究竟要食RW 定Golden hour menu，佢話如果食RW就唔會有窗口位... 點解❓❓❓❓❓❓❓ （後來經理自己泄露軍情話因為RW會抽佢地佣.... ）哦！原來有咁分嘅 ！🙃 所以唔好以為個景係免費，你張單係包㗎😉 好囉，咁既然兩個menu對我哋來講都係一樣價錢，咁梗係要個有景架啦！ Golden Hour Menu ： 首先，侍應完全冇解釋成個Menu點樣運作， 我哋原先以為全部都可以自選，原來諸多限制... 原來前菜同主菜成枱人要叫一樣嘅組合，粉麵飯同甜品每人可以叫自己嗰份。 下面英文寫咗 ”menu requires a minimum of two people to order” ，你話minimum咋嘛，冇話whole table 喎。我地三個人驚食唔晒，諗住叫兩份餐其他散叫，佢又話唔得，要成枱都叫餐🙄 Okay fine. 前菜：椒香口水雞、玫瑰茶燻素鵝、龍抄手 素鵝同龍抄手（辣鮮蝦雲吞）普通，口水雞個樣似雞絲粉皮多過似口水雞，最初仲以為佢上錯.... 主菜：宮保黑豚肉、老乾媽牛柳 宮保黑豚肉：味道普通，用啲染色蘋果扮菠蘿。老乾媽牛柳（冇影相）：牛柳好韌，成碟嘢完全冇老乾媽味（十幾蚊一樽老乾媽都要慳？？）。另外四季豆係散叫嘅，味道一般，完全唔辣。最後我哋另外自己落咗兩碟辣椒油 粉麵飯：手撕鴨肉炒麵 都係普普通通，有啲油膩咁... 另外有朋友叫咗炒飯，都係普普通通，有幾隻蝦咁... 甜品： 朱古力柑桔 似平時潮州酒樓食開嘅炸油粿，但係中間係朱古力。呢碟係兩個人份量，一人一粒，一啖食晒，多啲都冇。 環境： 全場都係黑黑暗暗，最恐怖係個廁所，地下紅色一達達，古代木門配銅面盤，開埋紅色燈，唔講以為自己去咗海馬公園哈囉喂👻👻 * 咁大間餐廳，收得咁嘅價錢，俾個紙袋裝口罩都冇，仲要最後收野嗰陣，收埋我朋友個口罩🙄🙄 總結：extremely overrated + overpriced ，完全係呃鬼佬 食物：2/5 環境：5/5 （*個景，唔係餐廳自己） 服務：1/5 CP: 1/5 回頭： 不了

星期日lunch食飯度度都係人，原先唸著食附近間人氣台灣菜，但係太多人，見嚟邊唔使點排隊就過咗嚟。 入去見到有2-3吉枱，唸著即刻有得入，但係侍應堅持話要俾角落頭張枱我地，話個張執緊枱叫我地等等。好啦，等左5-10分鐘都未執完....其實唔明點解唔可以安排我地坐其他枱先，之後你要執咪慢慢執囉😑 都算喇 全場大概12-15張枱，得1個樓面😑😑 帶位係佢，落單係佢，上菜係佢，埋單都係佢....睇見佢都覺得辛苦💦 1325坐低落單，1355先有第一碟野食，只見枱枱都係咁吹單，但係就得一個樓面一腳踢。之後1415先上埋第二碟，水吧個邊都係得一個人，然後廚房傳菜又係一個。 講返野食： 叫咗兩個set lunch，價錢$78-$118，包野飲（限$20內）多過$20補差價。其實$20淨係得西茶同檸檬茶，咖啡/其他飲品最平（americano)都要$24，特飲個啲$30-40。 黑松露軟殼蟹意大利飯 黑松露味好香，意大利飯夠creamy，唔算太淋有咬口。原隻軟殼蟹上都算有誠意，另外加埋蘆筍幾好食。 鮮茄牛柳粒長通粉 呢個意粉有驚喜，個醬汁好好食又夠汁，有微微嘅酒味，長通粉al dente，白色長菇朔左啲酒味好好食。牛柳粒有啲熟但唔算太韌，整體來講係好食嘅。 另外餐飲叫咗伯爵茶，都係茶包，冇乜特別。 食物來講，唔算太大碟，但整體係好食嘅，睇得出廚房有心煮，所以我都唔劣評你。 但係服務，尤其係人手方面就有待改善。始終同區嚟講，價錢偏貴，咁嘅服務質素真係唔得。前後等咗接近50分鐘先上齊所有食物真係有啲過分😠就算食物幾好食都冇用啦！ 老闆，假日請多幾個人幫吓手啦😩😩 食物：4/5 環境：3/5 服務：1/5 CP: 3/5 回頭：平日冇咁多人或者會再嚟，假日免了

定期都會返黎幫襯😋食過好多間車仔麵，始終都係文記最好食！ 今次都係叫咗兩個麵： 雞翼、酸齋、陳皮魚蛋、魚角、油麵（腩汁小辣） 全部都好好食，油麵夠彈口，湯汁香甜，辣醬惹味。 豬手、豬皮、豬紅、蘿蔔、米線 （清湯） 豬手有少少毛，其他都好入味，蘿蔔夠清甜冇渣，豬皮夠淋，豬紅冇押味，就算只係清湯都好正。 港九新界食過好多間車仔麵，都係呢間最好食，非常推介！ 味道：5/5 服務：3/5 環境：4/5 CP: 5/5 回頭：一定會😋

平日一點左右嚟食，排隊等咗15分鐘，唔算等得耐。車仔麵turn over好高，所以都冇預過要排太耐。 叫咗兩個麵： 大尊（豬紅、蘿蔔、豬皮、咖喱魚蛋、紅腸、菜）$42 個麵底叫咗米線，有啲過硬，煮得唔夠。湯底係原味，冇另外加醬，都算好濃郁，但係唔算香。蘿蔔夠甜，豬紅夠入味，咖喱魚蛋OK，但係豬皮有啲硬。 另外叫咗碗自選（滷水雞翼、墨魚丸、酸齋、五香牛腩、油麵）$50 墨魚丸好粉，唔好食。五香牛腩食落有啲紅，好似煮得唔夠熟咁。酸齋、油麵正常。滷水雞翼有毛🤢🤢 味道算正常唔太差，但唔可以話好好食。同深水埗文記對比之下，都仲有一段距離。 味道：3/5 環境：3/5 服務：4/5 CP: 3/5 回頭：都或者會

星期日嘅早餐，諗住好耐冇黎食過，好懷念佢講爆蛋鮮牛治，但質素大不如前。 去到門口見佢閂咗門以為佢冇開，佢門口係茶色玻璃睇唔到入面，正想離開之際朋友嘗試開門，又比佢開到喎🤣🤣 滿懷歡喜諗住有得食鮮牛蛋治，佢話冇鮮牛，得鹹牛☹️ 鹹牛當然冇咁好食，個麵包烘底又蝕晒氣，雞蛋煮得過老。已經冇以前咁好食😔 朋友另外叫咗個豬扒包（冇影到相），好難食.... 豬扒硬倔倔又乾爭爭，個包又硬又鞋口，醬汁又冇味。講真啦，連鎖快餐店嗰啲都好食過佢😩 質素大不如前，應該都唔會再嚟嚕 味道：2/5 環境：2/5 服務：3/5 CP: 2/5 回頭：應該唔會

第二次幫襯，今次係食下午茶，水準都唔太差同幾抵食。 叫咗兩個下午茶餐+散叫肉骨茶： 怡保雞絲湯河： 清清地幾好食，朋友唔食得辣叫呢個啱晒。 肉骨茶(腳轉彎) : 肉骨茶好重藥材味，同埋都幾燥，兩次飲完第二日都有少少喉嚨痛，所以就算佢有得免費添飲啲湯都唔好貪心飲太多，如果唔係真係會流鼻血🤣。腳轉彎啖啖肉，上次食過豬腳仔，個人唔太鍾意食太多肉，所以都係覺得豬腳仔好食啲😆 椰香咖央多士（一份） 非常香脆，侍應姐姐上菜嘅時候叮囑我哋要趁熱食，咖央份量啱啱好，顏色唔算太青BB，多士一份兩個食份量啱啱好。 下午茶奉送熱嘅白咖啡/拉茶，兩樣都想試，所以每樣叫咗一杯。咖啡同茶都偏甜，但係都幾香幾好飲😋 味道： 4/5 環境： 3/5 服務： 3/5 CP: 3/5 回頭：會 (下午茶) 後記： 見到好多食評都話佢唔係正宗馬拉菜，當然所有菜式唔係本土嘅，或多或少都要就返當地人嘅口味而有所改變。正如香港嘅泰國菜唔會好似泰國咁辣，日本菜唔會有係日本食嘅味道一樣。 至於正宗定唔正宗係非常主觀，最緊要好食啱你食就得啦😉

嚟過好多次，之前嗰排有試過水準差咗啲，但係因爲幾好抵食嘅關係，決定俾多次機會佢，今次水準返返嚟😉 海南雞飯$39 由於媽媽好鍾意食佢嘅海南雞飯，差唔多每一次去都會叫。今次認真試吓都真係唔錯嘅。 雞肉好嫩滑，唔太肥，份量都算足夠，油飯有淡淡嘅椰香味，臘腸雖然肥咗少少，但係都幾香。雞飯奉送冬瓜湯一碗，熱辣辣好清香嘅芫茜味，飲落有雞湯嘅味道。成個雞飯加例湯嘅配搭都好好😋 加埋個酸酸辣辣嘅自家製雞醬，又真係嘅好味嘅！ 乾炒海鮮河$43 之前成日都叫濕炒海鮮河，但係後來試過好幾次佢打個芡汁落得太多，成碟粉濕滴滴芡多過粉咁，對佢印象唔太好。今次決定試吓乾炒，有驚喜喎，炒得好夠鍋氣，雖然四十幾蚊碟唔好期望海鮮好多(都係雪藏海鮮)，但係都叫做有3隻蝦、3-4舊魷魚、3-4隻青口，算係咁啦。唯一係啲菜心有少少老，應該都係啲菜頭菜尾，但係咁嘅價錢都算唔錯。 之前都會叫芒果糯米飯，黑/白糯米都係$16，唔算大份，1-2個人share啱啱好，糯米好香椰汁味，熱糯米飯加埋凍嘅芒果好正。但係近排戒甜食所以冇叫，但係都推介大家😉 哩間環境唔算非常好，有啲似大牌檔風格，如果食環境嘅就唔太推介，但係勝在平靚正！ 味道：5/5 環境：2/5 服務：3/5 CP: 5/5 回頭：定時都會🤗

由佢開業幫襯到而家，水準都叫做keep到。間唔中都會同朋友過嚟食下。 疫情之前，平日中午都會坐滿人，今次可能疫情關係，午市淨係坐得四枱。 午市餐牌有好多選擇（但係好似有啲同之前唔同左），唔鍾意食包嘅，都有飯或者沙律選擇： 我地叫咗兩個餐: 2 Cheese Burger 午市套餐連嘢飲$98 （120g)，如果唔夠食可以叫180g，但係女士黎計應該120已經足夠。薯條夠香脆，沙律菜新鮮，沙律個醬汁都好好食。 朋友叫咗個Fish Burger餐連嘢飲$105（唔記得影相😅）魚柳炸得比較乾身，但係都好食嘅。個人就比較鍾意食Cheese Burger。 味道：4/5 環境：4/5 服務 ： 4/5 CP: 4/5 回頭： 會