今晚家人突然想食海鮮粥底火鍋，並指明想幫襯位於朗屏站附近的鍋心粥底火鍋。 既然已經有目標，咁就打電話去確認是否需要訂位，好彩訂到位，同埋原來星期五係分兩輪，第二輪由8:15pm, 我地到達的時間啱啱好。 餐廳根據人數提供套餐 (並非放題) ，叫咗二人套餐，肉蟹 + 沙白蜆 (是日龍蝦賣晒)，再選擇5款海鮮。另外，再每人各選擇4款火鍋配料。 海鮮方面，肉蟹，鮑魚，海蝦，帶子，元貝，蟶子各樣都新鮮而且鮮甜，其中沙白蜆有3隻唔開，職員都主動同我地換過，而且專登揾3隻較大及新鮮的。 8款火鍋配料，整體水準都達到合格以上。尤其以手打雞軟骨丸，，台灣芋頭丸，潮汕牛丸，手打雞滑等較有驚喜。其中一款配料我地加錢要牛小排，份量雖然並唔算多，但咬落都夠牛味。 品嘗完所有火鍋後，職員就幫我地準備潮州粥，粥完全吸收各海鮮及其他食材的精華，幾好味。 職員整體服務滿意，樂於幫忙及解答問題，而且服務十分有禮！ 餐廳環境舒適，冷氣夠，最重要係唔會太嘈吵，可以慢慢享用美食。 埋單二人共500元，整體食物新鮮，價錢十分合理！

一早已經於Sabatini訂好枱同家人慶祝生日，而當我考慮訂邊一間餐廳時，見到Sabatini的負面食評時，確實某程度上令我有猶疑，不過我最後都決定訂Sabatini，因我個人認為Sabatini係具代表性的餐廳。 餐廳為我地安排好較為自成一角的餐枱，了解到我地唔飲酒，唔食羊肉後，侍應提供建議後，我地揀咗2款前菜，一款湯，一款意粉，主菜二人都要牛扒，再加甜品。侍應服務十分貼心及週到，幫我地每道菜都分好兩份。 前菜 48個月風乾西班牙黑毛豬配蜜瓜 - 48個月的iberico ham都算夠濃，而且蜜瓜亦算甜美 八爪魚帶子薯仔沙律配蕃茄及意大利檸檬 - 八爪魚入味而且夠嫩，帶子亦有鮮味，檸檬底的沙律亦唔錯 湯 意式蛋花牛肉及雞清湯 - 今次無揀龍蝦湯，因想家人可以試下蛋花牛肉，而且呢個湯亦較清淡，等我地的味蕾可以準備享受唔同的食物 意粉 西西里紅蝦扁意粉配香草蕃茄 - 侍應推介呢道菜，同埋亦於上菜時，提議我地用匙羹先將蝦頭的汁迫出到意粉，直係有好多汁，而且亦香味撲鼻。紅蝦肉新鮮，扁意粉亦煮得啱啱好。 牛扒 (Medium well) 家人的香烤澳洲M5和牛西冷配時菜 - 肉質相對較嫩，品質滿意。 我的美國Prime ribeye, 雖然無M5和牛咁嫩，不過由於係直接grill，所以牛扒除咗賣相更加靚，而且更加香。另外ribeye咬落亦唔算韌，口感一流！ 甜品 餐廳為家人準備咗小小的生日糕點。 另外，我地亦再揀咗2款甜品，燉蛋及傳統意式蛋糕，2樣甜品都美味，再加上朱古力及餅點，完美的一餐生日晚飯。 整體食物美味，服務週到又貼心。 唯一小小美中不足，當晚某枱的客人比較大聲，稍微影响咗整體氣氛。另外，我同家人都留意到，侍應們有好幾次跌餐具落地的情況，作為高級餐廳，呢方面要改善！

今日生日，家人於Palco訂了枱同我慶祝。 準時到達，餐廳預留了一張舒適的枱，我地研究好Menu後，決定品嘗餐廳的Tasting menu，另外加多一份炒八爪魚及墨魚，因見OpenRice有好的評價。 首先廚師送咗各人一份吞拿魚他他作為開胃菜，美食巡迴正式開始！ 另外叫的炒八爪魚及墨魚 - 煮得夠淋及夠入味。 西班牙紅蝦他他配柚子醬 - 紅蝦鮮甜，配以柚子醬酸酸地令胃口大增。 北海道帶子配魚子醬，配以自家制醬汁- 帶子咬落口感豐富，一粒真係絕對唔夠。 椰子湯 - 由侍應於現場用湯壺上菜時，已經即時椰子香味撲鼻。湯味夠濃。 到意粉呢道菜時有2個選擇，我選擇配以蠔兩食，上菜時蠔味濃烈，擔心會好腥，不過食落口時竟然完全無腥味。家人選擇加錢配以北海道海膽，海膽夠鮮甜。 主菜我同家人都加錢要宮崎和牛配露筍(因對乳鴿一般)，平時同家人食牛肉唔可以太生，呢個和牛都好生，但竟然接受到！另外露筍亦煮到啱啱好，唔會太老。 芒果甜品 - 侍應即席加入fusion的元素，而甜品的質素亦絕對無令我地失望。 全個Tasting Menu由開胃菜開始，至最尾一道甜品，整體質素我同家人都認為滿意，食材新鮮，食物美味，而其中都有幾道菜特別出色。 餐廳並非fine dining, 不過整體職員的招呼都令人滿意，感覺舒服。 家人特別訂咗份拿破崙作為生日蛋糕，蛋糕質素雖然並非十分突出，但都好好味 (不過就真係貴咗啲)。 總結有美食，又有美景，超級滿足的一餐。 備註： 本身Tasting menu並無咁貴，因我地後加咗一道菜，另外亦揀選Menu內加錢的項目 (例如和牛代替乳鴿，海膽代替蠔)。

今日放假出去荃灣買嘢，順便於荃灣食埋午餐。生記未轉名前 (雄記) 都曾經有幫襯過。 家人叫咗魚肉春卷加牛筋米粉，魚肉春卷好香，牛筋亦富有口感。 我叫咗牛丸四寶米粉，牛丸彈口美味，魚皮餃肉味香濃，魚蛋及墨魚丸都OK。而米粉的口感亦同樣滿意。 另外叫咗腐乳通菜，份量及味道OK，通菜都算新鮮。 同家人叫咗一支豆漿，而並非店舖自制，感覺就稍為甜咗小小。 生記轉名後再營業，繼續提供優質高性價比的粉麵，而且店員的服務亦良好。會繼續支持！

今年的周年紀念晚餐決定試下位於元朗富達廣場的Chef's Stage Kitchen。 訂枱及上網揾menu遇到小小問題，FB揾唔到menu，打去訂位問原來IG有full set menu。但無論於FB或IG查詢，都係無回覆，呢方面相信餐廳係可以做得更加好。 至於晚餐當晚，整體的體驗係滿意的，我地點咗個2人餐，然後再加咗個藍青口頭盤，主菜方面就upgrade要12oz US ribeye。 黑松露磨菇湯都算香濃 煎帶子煙三文魚OK 藍青口肉質較細，味道OK Main course: Ribeye要medium well, 肉質都算夠嫩，12oz份量滿足 Main course: 鮮藍蟹肉露筍risotto, 陣陣香味撲鼻，份量亦OK 正價叫甜品，餐廳可因應要求而準備朱古力慶祝句語於碟上，整得好靚。甜品的質素都算OK。 餐廳整體的服務亦滿意，我訂枱時有註明2人再加1架BB車，而餐廳亦預留一個較為寬敞的位置。另外，上菜時間方面亦算用心。 對於晚餐整體的體驗係滿意，會繼續支持！ 希望餐廳於social media方面的溝通會做得更加完善。 備註：周末務必訂枱

今晚同太太幾位朋友晚飯，慶祝生日。 朋友選擇粵軒，坦白講，平時真係好少幫襯。7點到達時基本上已經full house, 雖然係星期六，但今時今日未必可以有好多餐廳可以做到。 陳村粉焗龍蝦煲，色香味俱全。 蜜汁叉燒，半肥瘦，肉質鬆軟而有口感。 椒鹽焗肉排，較為一般，肉質相對較韌。 竹笙上素，蔬菜的比例可以多啲。 瑤柱蛋白炒飯，炒得好香，瑤柱的香味出晒來，如果可以少啲油就好。 壽包如果可以大隻啲就好。 免費的陳皮紅豆沙都绝不馬虎。 如果菜色的份量可以略為增加少許，賣相及性價比會更好。 職員的服務主動殷勤，滿意！

今晚一家三口加埋姨姐到尖東欣賞燈飾，順道食埋晚飯再返屋企。 現時夜晚大約9點要揾餐廳其實唔係咁容易，因好多餐廳都定於10點關門，即last order或早於9點截單。 最後我地揾到位於尖東海邊的Namo Avant，如果坐露天座位可以欣賞維港夜景。 職員雖然大部分外藉，但相信居港已有不短時間，所以廣東話絕對無問題，整體helpful. 食物質素滿意，份量係較為小，所以可能要點多幾款。 價錢方面，當考慮到餐廳地理，食物品質等，都算合理。

家人同我到Regent Hong Kong的The Steak House慶祝生日。 知道The Steak House過往無論於Regent或Intercontinental時期都係咁出名，不過今次係第一次幫襯。 雖然家人都有提早訂枱，不過可能因有太多booking，所以並未能安排window seat俾我地。當時係有小小失望，後來餐廳安排的另一位置，其實又自成一角。 食物方面： 麵包及牛油已經有驚喜，好味，不過要提醒大家唔好食太多。 King Crab cake - 蟹肉的份量多，香味撲鼻。 Classic onion soup - 洋蔥味香濃而甜，Emmental芝士濃郁。 主菜我同家人都選擇食牛扒：， Spain braised short ribs - 呢款菜式的肉係全熟，肉味香濃而肉質都好嫩。 US Rib eye (medium) - 香濃碳燒味，肉質都尚算嫩及juicey。 Side dish方面，我地叫咗Potato Au Gratin及Sautéed mix mushroom，2款菜式都滿意。 甜品方面，由於我地唔要朱古力，唔要有酒精，所以選擇並唔多，我地決定叫Apple Tarte Tatin。蘋果好甜，配埋個homemade雲呢拿汁都算為晚餐加上完美的句號！ 服務方面： 貼心的服務及中肯的意見，對整體評分加分不少！

今日放假，下午同家人到元朗教育路食飯，然後再去買餸及補充日用品。呢幾日天氣炎熱，我提議食餃子及麵，所以揀咗維港灣餃子坊。 入到餐廳職員見我地出晒汗，建議我地改坐入啲會涼啲。即時叫咗支黑豆漿解渴先。 家人唔太肚餓，叫咗大白菜鮮肉餃，8隻餃子雖然並唔算好大隻，美味而口感都OK。附帶的例湯 - 赤小豆粉葛老火湯，餐廳標榜無落味精，幾正！ 我叫咗3拼餃配刀削麵，餃子每款有2隻，即共6隻，加上麵其實都幾豐富。除大白菜外，韭菜及香芹都唔錯。 另外再叫咗個椒鹽粟米，呢個就較為一般。 食物質素OK外，職員的整體服務主動及熱心。 餐廳的座位亦算舒適，夏天聽職員講，盡量坐入啲就無問題

最近2日無意中留意到，牛大人已經於Yoho開咗一段日子，但都未同家人去品嘗過。用牛大人的網上訂位系統，成功訂到今日下午1：30。 準時到達餐廳，無需等候就攞到枱，家人及自己都未幫襯過牛大人，初次品嘗，我地揀咗極上和牛餐配濃香蕃茄鍋，食物分開自助區取及用QR code點餐。 肉類方面：澳洲和牛M5的質素唔錯，主打澳洲和牛再加配其他肉類，例如西班牙豬肉，安格斯牛等，整體滿意。 即食食品我地叫咗鹽酥雞，味道及口感均OK，其他食品下次有機會再試。 自助區有多款的火鍋丸及台式特色水餃，各有特色，可以小試，並唔係一般火鍋配料可比較。 醬汁方面，都有多款可以試，我今次就只係豉油加配特級辣椒油，夠香。家人就認為腐乳醬幾特別，感覺無咁油膩。 飲品方面：我試咗2款冷泡茶，較為特別及清新，如果冷泡茶唔太鍾意，仲有多款飲品可以選擇。 午餐甜品有一款雪糕，試咗一杯，味道尚算OK。 整體90分鐘的午餐會較為趕，未必有時間可以試晒大部分的食物 (今次並無加$30添加海鮮)，希望下次可以試下。 根據自己食過其他日式火鍋的經驗，牛大人台式火鍋的CP值高，食物選擇豐富，下次再幫襯我地會選擇晚餐，因為晚餐時間為120分鐘，可以品嘗多啲食品！