晚餐唔係食得好飽，口痕想食糖水。西營盤的糖水店其實唔係好多，記得德輔道西近正街新開咗間糖水店一於去試一試！糖水店叫甜家，門面較低調。睇返openrice先知原來佢喺水街搬過嚟的。德輔道西夜晚人流比較少，我地9點左右不用等位可以直入。糖水款式比想像中多，中西式都有！點左2碗腐竹薏米糖水，其中一碗加蛋白。2碗加埋$66，抵食！糖水的蛋白和薏米都好多，非常足料！味道不會太甜，啱啱好！見隔離枱的芒果甜品望落唔錯，而且價錢亦公道，下次要再黎試吓！

每次去新加坡一定會幫襯松發肉骨茶，只愛佢個湯。估唔到喺香港小店都會食到高質素肉骨茶！甚至比新加坡更好食！ 我地兩人點了一份肉骨茶，一份古滑雞飯同炸雞翼。肉骨茶湯頭胡椒味重，令人一啖接一啖欲罷不能。湯可以免費添加！正！ 肉骨茶的肉排通常都會似煲湯肉....古月的肉骨茶令我好驚喜！佢d肉好滑好淋，比我喺新加坡吃過既都好！ 古滑雞飯都好有新加坡風味！特別係個醬令成件事更perfect! 古月的價錢唔貴，性價比超高，唔怪得咁多人排隊！

有朋友生日想買個特別d的蛋糕送俾佢，見到旺角朗豪坊開左間i cremeria重有cake賣就買黎試下。之前有寫過i cremeria的綠茶雪榚，呢間野出名在綠茶同日本水果。佢d蛋糕主要係名貴的水果蛋糕，手掌咁大件的迷你水果蛋糕（有士多啤梨同蜜瓜2款）都賣百幾蚊！大D size要4百幾！好貴！除左水果蛋糕另外只有2款蛋糕，一款係栗子蛋糕另一款係我今次買左的綠茶蛋糕。綠茶蛋糕＄330，外面係綠茶cream, 中間係綠茶雪紡蛋糕。雖然個蛋糕簡簡單單冇乜花巧野，但食落綠茶味濃，囗感輕盈，我地成班朋友都好鍾意，不知不覺連cream都食晒！蛋糕味道唔錯不過我認為佢的service有好大進步空間。感覺d staff冇乜賣蛋糕方面的training....平時攞蛋糕職員將蛋糕入盒之前正常會攞個蛋糕比你睇順便核對一下生日牌上面的句子有冇錯，I cremeria完全冇呢個step, 要我特別問佢地先打開已封膠紙的蛋糕盒俾我睇下個生日牌。之後攞到個蛋糕，我又發現職員冇俾乾冰。又要再問，職員先至貼身一包乾冰上個盒（都冇問我要幾耐之後先食）…話晒呢度賣嘅全部都係cream cake, 仲要價錢都唔平，如果返到屋企先發現個蛋糕溶咗真係喊都無謂...希望職員以後注意返啦～

寫開金鐘外賣店，有一間我成日去買外賣嘅鋪頭就係simplylife。講緊唔係金鐘廊嗰間永遠都等唔到位嘅simplylife,而係要行遠少少，喺Citibank tower嗰間。我最鍾意經香港公園行過去，順便當散下步，話時話香港公園嘅景色真係唔錯。呢間simplylife有外賣又有堂食，不過我通常都係買外賣因為堂食好少位而且人好多。其實佢嘅食品種類都幾多，有燒味部、沙律吧、西餐burger/ pasta/all day breakfast、兩餸飯。我買親通常都係兩餸飯或者燒味。佢d餸都幾外國人囗味，味道比較濃，好似有咕嚕肉魚香茄子等等。味道唔錯不過油左d，間唔中食下都OK嘅。燒味我就鍾意叫蜜糖雞髀飯，雞髀滑，多菜，份量都足夠。喺金鐘返工的話不妨行多幾步過嚟買飯食，轉下口味都唔錯！

喺facebook發現Cova有semi buffet lunch,重要星期六都一樣價錢，即刻二話不說就打電話去訂位！打左2間分店，原來只有海港城呢間cova先有做semi buffet,可以由11:00食到2pm, gogogogogo!11:30黎到重係冇乜人，呢間cova座位好「開揚」…因為佢個位置原本係店出面的走廊/吉位，而且對出又有電梯，出出入入的人好多。如果想傾秘密、想私隱度高d就未必咁適合喇。我地見semi buffet都好多野食，女仔一定夠飽，所以無叫主菜。頭盤加甜品buffet$178一位，要埋主菜都只係$228，真係好扺食！頭盤有煙三文魚、parma ham with melon、各種salad、冷盤、麵包等等，d質素都唔差，只係略嫌refill得唔夠快，有時好多碟都吉左。另外會有2個熱盤，我食左蛋餅都幾好食。基本上食3-4round已經好飽！好彩食甜品係用另一個胃！cova d 蛋糕一向都係信心保證！呢度每次會攞2個蛋糕出黎，比人攞晒之後先至會refill另一款蛋糕。我地坐得近cake stand就可以每次攞一細件share,慢慢嘆試晒咁多囗味！最後最後，飲埋杯black rose tea成件事就perfect la! 咁抵食下次一定會再嚟食過！

喺金鐘返工真係冇啖好食…d餐廳唔係超貴就係超多人，令人每日lunch time 都覺得好煩惱！買外賣的話選擇都唔太多…最近比我發現海富中心開左間便當外賣店，位置都幾隱敝，見唔洗排隊就試下啦！森川有熱的便當亦有壽司。便當的選擇亦算多，便當一早煮好pack好晒喺個熱櫃度，其實都只係微温。夏天食就啱啱好，冬天自己再叮熱番會好d。我點左黑豚燒肉便當，份量比我想像中多！特別係飯的份量，食晒會好飽呢！豚肉都有5-6大片，用洋蔥、姜蓉同醬油炒過，啱晒送飯！舊南瓜係bonus, 煮得好淋，又甜，估唔到咁好食。甜蛋薄薄一片，味道普通啦。漬物我唔特別好，所以冇食。個便當味道唔錯，可惜冇乜菜，好似唔係幾均勻…好彩買便當有個免費沙律送，細細杯有椰菜絲、粟米粒同蘿蔔絲連日式芝麻醬，清清地平衡番。52蚊有菜有肉又食得飽，而金鐘物價黎講算好抵食！獨食難肥，見到個龍蝦沙律壽司（＄35）整到成朵花咁靚就買埋番去慰勞下啲同事。大家見到花花壽司都好開心！壽司有6粒，可以share食，入面包左青瓜、醃蘿蔔、蟹柳同龍蝦肉。龍蝦肉唔算特別多，不過夏日炎炎食都幾refreshing架!

上星期約唔到的朋友今日終於得閒一齊食lunch。我地又去L Place,呢邊lunch time通常有位，今次試下14樓的Y pasta。午市時段有lunch set, 價錢由$68-$98,都算抵食。唔想只食pasta咁齋，重有pizza同豬仔骨選擇。我地叫左一個意粉同一個pizza share, 套餐包餐湯、餐飲同甜品。蘑菇湯－唔係罐頭湯，睇得出用新鮮蘑菇打。同傳統的蘑菇湯不一樣，蘑菇只係打到半碎，啖啖食到蘑菇肉。個湯冇落cream,較健康但我都係愛邪惡的有cream版多d。朋友加錢叫左龍蝦湯，佢話好好味！見到有好多粒龍蝦肉，真材實料！主菜白酒蟹肉車厘茄蝴蝶粉，老老實實個樣白晒晒唔太吸引，不過食落味道都唔錯。白酒汁相對地冇咁膩又少油，飲緊肥嘅女士食就最啱啦！另外要咗個太陽蛋煙三文魚薄餅，厚厚嘅芝士完全覆蓋哂d煙三文魚，所以望落冇咁靚。溫泉蛋半熟，切開蛋汁流出來用Pizza點嚟食幾特別，有法式crepe的感覺。pizza皮厚度適中，食到最後都唔會淋晒變成一pat pat。餐飲選擇好多，成個list咁長，幾有誠意⋯飲品由1號至11號都不用額外加錢！我的感冒未清，叫咗個蜂蜜薑，飲完好似舒緩到小小感冒！正！朋友叫咗橙汁，佢話飲落有啲似果汁先生，不過唔使加錢我哋都冇expect係鮮榨嘅～買單先記得原來有甜品，個餐包咗奶凍，我地加$15 upgrade做其他甜品。我要左個樣好靚嘅蘋果玫瑰酥，真係成朵玫瑰咁，睇見都好開心！食落唔太甜有淡淡蘋果香，唔錯！朋友要佢最愛的木糠布甸，布甸雪得軟硬適中，有5層。雖然木糠布甸後已整，但要整得好食一啲都唔容易。呢度嘅木糠布甸整得唔錯，正！食完甜品我哋又充滿力量可以返公司繼續博殺喇！

約左朋友食lunch但比佢放飛機T_T 要對自己好d一個人食都唔可以食太頹！所以自己黎左銅鑼灣的The Grill Room食lunch。呢度有lunch set menu, 價錢都幾抵食。頭盤加主菜只係$100左右。病病地想飲個熱湯，叫左pumpkin ginger carrot soup。其實我本身好怕西式carrot soup，怕有菜青味。但呢個湯完全飲唔出！pumkin味都幾濃，個湯亦夠creamy。after taste先feel到輕微的薑味，飲完覺得個胃好暖，的舒服。伴湯的toast夠脆，有焦香味。主菜清清地食pan fried fish fillet, 青衣魚柳煎得香口但仍能保持肉質嫩滑！sauce好清新，連埋青豆同煙肉一齊食口感更豐富。底部有薯角做配菜。份量以女仔嚟講啱啱好，男仔可能唔夠，或者食牛會飽d。我見隔離位碟牛扒都幾靚幾吸引！

餐廳有幾張高枱，其餘大部分係豬肉枱。比較適合一大班人嚟。如果想多d privacy, 最好就request 定高枱啦！

是咁的，印度菜嚟講，我個人係好少食⋯因為有d怕好重的香料味。自從N世前喺重慶大廈食過一次就冇再食。不過今日去西營盤覓食，喺openrice見Tulsi&Wine的ranking好高就即管試吓啦。從外表睇，點睇都唔覺佢係一間印度餐廳，set dinner都係主力賣西餐。入到去睇full menu先見到有印度嘢食。2個人點左1份set dinner, 1個main, 2個appetizer。 Appetizer要左好多人推薦的香料胡椒餅，唔知有冇叫錯因為同openrice d相唔同樣。呢個餅比較鹹，因為上面灑左d味粉。一邊食上面d洋蔥同青瓜碎會一邊跌落嚟，有啲麻煩…我諗呢道小食適合用黎送啤酒多d。另一個appetizer係黑松露naan, 諗住用黎點咖喱，但就咁食都唔錯，好香黑松露味。
Set dinner要左南瓜湯，個湯比較稀，胡椒味重，有啲印度風味。set的主菜係羊肉kebab。諗都冇諗過kebab原來係pizza! 個羊肉有小小辣，pizza加左cheese好香好好食！值得推薦！我心目中的印度菜signature dish係咖喱雞，冇理由唔點！佢有3款咖喱，店主（我估佢係）話3款都唔辣，估計係椰汁份量的分別。第一次食緊係食中間嗰款最安全！咖喱好香，唔會比d椰汁味蓋過，但又唔會太重香料味,  perfect balance，改變左我心目中印度咖喱的壞印象。本身已叫左黑松露naan,無端端又送多幾塊黎⋯應該係set dinner/咖喱包的⋯
Any肥，我地今餐食左好多包！食得好飽呀！全部都幾好食，下次再嚟試下d西餐先！

Isee isee手工雪條不斷擴充越開越多分店，成日經過見到，今日終於係尖沙咀食到。食咗蜜糖無花果味，＄42 條真係幾貴！食落比想像中甜，可能係因為加咗蜜糖。中間有半粒新鮮無花果，食到無花果的texture，食下食下又覺得幾好食喎！買雪條會連埋一個紙杯，等你可以一邊食一邊墊住，唔使食得咁論盡。個紙杯好靚，店員仲可以幫你寫名添！成個experience 好少女，妹妹仔一定buy!唔怪得咁好生意啦！