凍凍地又係打邊爐嘅時候嚟，重慶邊爐我地首選都係方叔叔，服務態度好，啲火鍋料又可半份半份咁叫，好方便！今晚見佢出咗羊肉鍋湯底我又鍾意食羊肉嘅，就一於試下！ 先食一啖湯底，好清甜！唔會有過重嘅胡椒味，羊肉大約有四大舊，肉夠淋，鍾意食羊嘅會好鍾意佢嗰浸天然嘅羊味，我就好滿意🤭🤭 除咗半份火鍋料呢個選擇，餐廳仲新推出咗鮮拼九宮格拼盤，每款小小份份但一個價錢就可試晒，鍾意食肉臟嘅不妨試下；除咗肉臟，拼盤都有手工丸、珊瑚蚌、竹笙蝦滑等大眾化啲嘅食材，一班朋友share總搵到所好～ 我地叫開嘅手工萵荀片、燕餃、炸酥肉等依然保持水準，今次鮮淮山我地叫夠一份！呢個潮濕天氣要食多啲淮山健脾胃🤣🤣 另外推介大家嗌杯巨型嘅鮮橙洛神花茶，好解辣🙌🏻

呢兩日氣溫驟降，出去食飯首選有個爐喺枱面嘅餐廳，取暖緊要嘛😂😂 嚟到T.O.P.頂層嘅柞木炭家，早嚟有得安排窗口位望住個空中花園食，正～ 叫咗佢新推出嘅春之石海鮮盛饌套餐，$1088兩位有燒海鮮又有壽喜燒定價都合理，而且套餐仲有前菜、頭盤、石鍋飯同埋牛肋肉/豬五花拼盤，最後仲有兩款甜品添，想食好啲嘅呢個set真心推介～ 一坐低就有前菜同芝士粟米，前菜款式唔少調味唔會太鹹太辣，泡菜甚至係成罐上，好大方🤣 店員先上攞滿石頭嘅燒烤網，第一次咁樣燒海鮮好新奇🤣店員仲會幫手燒埋擺埋盤，鮑魚帆立貝更加切埋一口size，服務超好～ 唔止服務好，食物嘅水準亦都好高，海鮮新鮮又冇沙，壽喜燒嘅質素拍得住某啲主打壽喜燒嘅專門店，尤其係重叠嚟燒嗰一塊，店員最後將塊牛卷起放落蛋汁度，個口感超正😍😍😍 另外牛肋骨同豬五花水準都唔錯，石鍋赤身海蝦飯有脆卜卜飯焦味道亦都不俗，加埋焦糖香蕉同昭和雞蛋布甸兩款甜品都係誠意之作，呢餐飯真係大滿足！！

大家對潮州菜嘅印象都係停留喺舊式打冷，但而家食潮州菜都可以好型格，甚至擺盤接近fine dining嘅格調！位於iSquare嘅潮藝館，座位唔多但闊落，有酒吧區亦有大枱，無論飯局大細都係唔錯嘅選擇～ 今晚我地兩個人，散叫咗幾個小菜加炒飯，話梅涼瓜中和咗大部分苦味，作為開胃菜唔錯；碧綠川椒雞賣相吸引，味道惹味但完全唔辣，就算唔食辣嘅都絕對handle到 見隔離枱叫咗菠菜蟹肉羹我地又跟隊試下，係逐位上嘅，下面有蠟燭點住湯嘅溫度keep到好熱，蟹肉一梭梭好好食～ 蔬菜方面我地叫咗個懷舊春菜煲，春菜選料比坊間其他餐廳好，比較嫩冇咁多難𡁻嘅纖維，啲蘿蔔條都好清甜。 炒飯係薄殼鵝肝炒飯，而家少有餐廳用薄殼入饌但呢度似乎就係重點食材，超迷你嘅蜆相信處理上都幾晒功夫，味道唔錯，飯粒夠乾身，推介～ 最後甜品都有驚喜，我地揀嘅燕麥一口薯係用紫薯整嘅，焗到好香脆，配上燕麥碎口感豐富。

平時嚟bedu多數係夜晚食a la carte menu，原來weekend brunch menu係以人頭收費，臨近聖誕仲有festive menu添。 Starter係一個有齊hummus, dip, fresh veggie, olive嘅拼盤，當然唔少得呢度嘅招牌flatbread，smoky hummus依然保持高水準，第一次試lentils豆泥味道都有驚喜。 Second start係pita bread配菠菜同乳酪，pita bread比flatbread熱，味道都唔錯，食到呢度都飽咗大半，可想而知份量幾多🤣🤣 Main係2人份起跳嘅，我地揀咗lamb shank，肉質好淋，鍾意個飯粒粒分明又有香味，仲有裝飾添。 甜品都係拼盤形式，最特別係個chocolate konafa，係一種中東酥餅配開心果碎，好食！

香香宮煮嘅大名成日都聽朋友提起，見佢開咗新店今晚就去幫襯下～ 叫咗卜卜蜆鍋，蜆嘅數目唔少而家隻隻都又大又鮮甜，湯底唔會太濃味食完都唔口渴👍🏻 欣賞店家醬料盤數量充足，有足夠時間慢慢調個醬，唔駛趕住俾第二枱用。 肉類方面叫咗個細嘅花花公主牛魔王拼盤，款式多賣相精緻；伊比利亞橡果豬夠淋又夠肉味，推介。 香香宮煮響鈴拼盤賣相相對冇咁壯觀但味道不俗，鹹蛋黃嗰款食得出鹹香但唔會太膩。 蔬菜拼盤份量足，唐生菜爽甜好食。 幾欣賞呢度嘅蝦丸，真材實料夠晒彈牙，冇刻意加好多配料影響口感。 打邊爐少不免要嗌野飲，我地叫咗一榨竹䉀矛根味道相當清甜，同時都欣賞店家有俾水顧客，唔似其他餐廳唔供應水逼客狂叫野飲👍🏻👍🏻

以前成日去孔夫子飲茶，原來而家已搖身一變成張公子，環境依然舒適，座位闊落，除咗增添送餐具嘅機械人之外，整體服務同食物依然有水準。 今晚嗌咗唔少炸物，因為呢度嘅出品真係唔油膩又夠脆，八味豆腐炸漿薄身豆腐嫩滑，椒鹽沙𩺬魚連骨食都冇問題，最出色係招牌菜艷影蝦球，酸甜醬汁配上彈牙蝦肉不得了。 食完炸野都嗌返啲健康小菜，火焰松露野菌文昌雞有大量野菌，黑松露味道突出，雞肉新鮮醬汁惹味。 鮮腐竹蕃茄浸菜苗係今晚最清新嘅菜式，上湯帶啲蕃茄味幾開胃。

Espresso Alchemy向來有質素保證，美麗華店座位夠多啱晒食個early dinner，今日嚟到食咗個light d 嘅牛油果多士，留肚試埋佢嘅生酮黑芝麻卷蛋，再加杯flat white，大滿足🤤🤤🤤 因為自由搵位嘅關係，我就揀咗出面光猛啲開揚啲。招牌清晰易搵，而且店外佈置都精緻，以唔少咖啡豆去點綴。 牛油果蓉好幼滑，而且仲有大量沙律菜伴碟，好健康嘅選擇。 卷蛋好有黑芝麻味，就算係生酮版本都唔會乾澀。 Flat White一如以往香濃奶泡幼滑👍🏻👍🏻

仲讀緊大學嘅時候已開始幫襯悠蔬食，當年新派素食餐廳唔多，悠蔬食水準出色，咁多年都仲keep到👍🏻 今晚揀咗一個set dinner同埋散叫兩個小食，set dinner $200幾蚊包咗兩個前菜、手卷、餐湯同主菜，加$5仲有埋甜品，超抵食，如果第一次嚟好推薦嗌呢個set。 前菜開胃，手卷用苜蓿芽代替飯，以為會好乾但入面加咗醬汁，苜蓿芽本身都有水分所以食落其實幾refreshing。 餐湯有中西湯選擇，西湯非常creamy。 主菜揀咗個南瓜芋頭啫啫煲配羽衣甘藍飯，啫啫煲醬汁惹味，全部配料我都好鍾意，羽衣甘藍用嚟做菜飯幾有新意，而且煮淋咗嘅甘藍其實比沙律更好食。 泰奶茶cheesecake茶味出色，值得加$5一試嘅👍🏻 另外孜然腐皮卷同沙爹都唔錯，沙爹有個醬汁相對濃味啲。

連鎖餐飲嚟講首推樂天皇朝，見到佢喺airside有新分店超開心，終於唔駛搭車就食到～ 餐廳喺4樓，相對人流較少清靜啲。餐廳面積都幾大，有大玻璃望到入廚房睇師傅整包點。 食過好多次八色小籠包今次試下其他菜式，水準一貫中上，烤麩大大粒調味開胃，蒜蓉菠菜有少鹽少油選擇，揀完果然有返幾分住家菜嘅健康感。 包點方面今日嗌咗蒸素餃同埋生煎包，前者菜饀切得夠幼細口感出色，後者比想像中多肉汁，而且包底煎到金黃色但唔硬，感覺冇咁熱氣👍🏻 肉類方面試咗呢度嘅京醬肉絲，肉絲份量比薄餅多，所以食嘅時候都唔駛就住就住，相對嚟講呢個餸最濃味，比起薄餅如果用厚身刈包夾可能更理想。 最有驚喜係甜品，我地叫咗酒釀芋圓，呢個配搭幾新鮮，而且啲芋圓係超迷你版，又難得地細粒到咁都仲食到絲絲芋味，推介～

今晚嚟L Square覓食，冇訂枱好在夠早到，侍應帶我地去咗中間嘅一張二人枱，有置物籃坐得都算舒服。 餐廳有$888嘅二人餐，會有齊晒沙律、湯同兩款主菜，選擇都多但因為我地唔想食太飽就散叫。 北海道帶子三文魚子龍蝦汁扁意粉：先讚餐廳真係對得住佢「Mano」呢個店名，手工意粉口感非常出色，龍蝦汁唔會過份濃味。 意大利傳統烤腩卷：好邪惡嘅一道菜！但又比想像中冇咁膩，真係需要切走嘅肥肉唔算太多，豬皮微脆連埋啲肉口感非常嫩滑，欣賞佢嘅配菜，沙律菜個汁好開胃，辣肉腸炒lentils有驚喜，好惹味食唔停口。 最後order咗個tiramisu，意大利餐廳出品嘅tiramisu真係冇得輸，手指餅夠濕潤，cream又夠滑👍🏻