火紅到爆燈~ 被吹捧為神級沙嗲牛~ 本想過咗熱潮後先試，但突然消息傳出店鋪會搬舖，但又怕搬咗舖後味道有所不同，所以都想臨搬舖前試一試 當日早上七點半已到舖經排隊，目測大約有二三十人，大約等咗一個鐘頭就可以入內進餐。 點了紅腸煎蛋沙爹牛麵 早餐上枱後即時呷一口湯，滿滿的沙嗲味，配上大光麵，掛湯十足 但略嫌欠缺花生味。 牛肉大件嫩滑不柴，紅腸係煎的，加埋厚切值得加分 太陽蛋煎到金邊底，非常香脆 雖然味道不是心中所想般神級， 但的確係比一般茶記的沙爹牛出色，茶記的沙爹牛以此作標準就啱喇

平時茶記沙嗲牛就食得多，用煲仔嚟煮沙爹牛麵就真係少之又少 煲仔麵一上枱滿滿沙嗲香味，亦有花生香，牛肉嫩滑不柴，一路食煲內熱力令麵條索湯，湯底慢慢杰身，掛湯力十足，令每一條麵條都能沾上沙嗲香味，再加上煲底下的豆卜，非常濃郁惹味 睇落去$68食一個沙嗲牛麵好似好貴，但係此店能將沙嗲牛麵做到一個好似小菜般鋪排及精緻，確實出色

台灣享負盛名的段純貞登陸荃灣，新開張當然有心理準備係需要排隊，但好好彩今次只需排十五分鐘便可入店進餐。 首先有招牌紅燒鍵心牛肉麵，一上抬立刻呷一口湯頭先，湯頭帶有藥材味但不太濃烈，熱度亦足夠，麵底選擇了手工麵，麵質煙韌且掛湯，最後不得不提牛鍵心，碗上有三件，每件都非常軟淋及入味， 難怪會是這店的招牌 另一碗點了三寶麵， 碗內有牛筋牛肚及鍵心肉，配上幼麵非常一般，牛筋及牛肚看上去很上色，心想一定非常入味，怎知道毫無味道， 好像只是食緊一些物體般…… 若不是搭上兩件牛鍵心， 老實說比較一般筋肚麵都較為失色…… 最後亦點了一款小食紅油抄手， 雲吞包得皮薄紮實，但略嫌味道不夠辣，稍微不夠惹味。 疫情期間無得去旅行可以食下過江龍感覺都幾好嘅，但只能抱住期望不大的心態，否則都會有點失望……

逸東軒一路都是經濟的一星米芝蓮中菜廳，適逢現有7折優惠更加不能錯過 二弄玻璃蝦球： 一道菜有兩款口味，油泡新鮮清甜，咕嚕煎得爽脆，再配上酸甜汁非常醒胃，不愧為得獎菜式 片皮雞： 片皮鴨就食得多，片皮雞就第一次食，春餅配上吊燒雞皮，再加上海鮮醬及青瓜大蔥，非常惹味。 另外值得一提就算不是用嚟做片皮雞，齋食的燒雞都非常嫩滑及香脆 兩食另一煮法生菜包雞鬆就比較有點失色， 味道比較普通，不過亦值得一讚炒得非常乾身 逸東軒嘅名爐蜜汁叉燒真係不用多說，簡直係number one 該肥的位置有肥，非常軟淋 最後甜品有香芒糯米卷及川貝陳皮燉津梨~ 香芒糯米卷芒果香甜，糯米皮非常煙韌，非常出色的配搭 川貝陳皮燉津梨非常潤喉，配料份量十足，沒有偷工減料 總括而言在逸東軒用膳係一個非常之好嘅體驗 ，因有良好嘅服務,高質的食品以及舒服嘅環境， 再加上優惠嘅價錢，真係encore再encore

近排好少食日式拉麵了 ，原因係香港嘅拉麵質素實在參差喇， 無論好食唔好食都要八十幾蚊一碗， 未食過之前好似賭大細一樣， 但突然間都會有拉麵癮， 所以穩陣都係去返呢間拉麵店。 入到店內完全充滿日本拉麵店嘅裝修， 而且同日本一樣提供檸檬水，日本感覺返哂嚟。 今次選擇咗魚介豬骨湯拉麵，首先當然試吓個湯頭先啦，濃濃豚骨香味，而且不太油，叉燒大細適中，肥瘦均勻，而且充滿肉味，而麵底選擇咗硬麵，麵質充滿口感，美中不足係今次嘅蛋稍微過熟，但都充滿蛋香 其實好耐都冇食過咁滿足嘅拉麵，無論店鋪裝修以及整體成碗麵嘅質量都非常相似日本， 而家無得去旅行都可以過一下正宗日本拉麵癮

小弟好鍾意食燒鵝，聽聞元朗有兩間出名嘅燒鵝飯店, 一間係松記, 另一間係天ⅹ，天x之前已食過非常正 ,今日路過元朗就試下另一間 兩口子食嗌一個下庄份量啱啱好，但一上枱就心知不妙， 睇D皮就知道瀬嘢 皮係淋嘅， 再加上微暖嘅燒鵝，幸好個汁唔錯 ，攞返少少分數 相比起天x以至九江街萬發都爭好遠…… 呢個椒鹽鮮魷就非常正喇，鮮魷大大舊，炸到皮薄香脆 芥末味適中，墊底的薯仔亦炸得香脆， 但大排檔牛柳用medium rare嘅煮法， 同埋牛柳好明顯係用好多鬆肉粉，醃到毫無肉味可言…… 飲返支啤酒消下氣先

一路都聽聞荃灣有間好好味嘅手撕雞餐廳， 剛巧途經附近，終於可以一試。 手撕雞好有麻辣香，肉質都好嫩滑，份量亦很多。 另外非常驚喜係撈麵，此店使用鵝油撈，每條麵都充滿鵝油香味，非常惹味 除了馳名手撕雞外，此店之豬手亦非常出色， 炆得入味亦很淋， 豬手充滿骨膠原，再加埋我油撈麵，非常之滿足 看得出此店與其他茶餐廳或粉麵店不同， 食品真是用心製造

價錢唔算太貴，$208加一任飲任食兩小時， 一路傾偈慢慢燒都幾正 而且個燒爐係自己轉，啱曬我哋呢啲懶人 一坐低職員便會教導你如何使用燒爐 ，之後就會有個拼盤畀你， 俾你初嘗食物， 之後剔所愛之食物便可 食物方面佢哋主打澳洲M6和牛牛柳就麻麻地喇，只有淡淡嘅肉味反而荷蘭豬五花好Juice,雞類部份款款都好味，尤其是雞卷肉及雞中翼，肉質都好嫩滑 食到中途再嗌燒菠蘿， 幫助消化再接再厲 整個menu唯一敗筆就係豬大腸， 非常之韌，真係要有咁上下“韌力” 才可吞落肚 食飽飽仲有雪糕食，食咗咁多串燒下再食雪糕簡直係透心涼

一星米芝蓮的拉麵當然有所期望，而且定價都頗高， 但原諒佢座落海港城嘅關係 ， 但味道只與坊間70 80蚊的拉麵分別不大 ，只感到失望而回 嚟到梗係要試招牌醬油拉麵，首先先嚐湯頭，湯不夠熱 醬油味都幾好， 沒有口渴感覺，但之後加埋松露醬味道有點古怪，其次到麵底，使用幼直麵， 軟硬度亦適中。 配料有四大片叉燒但偏瘦， 成碗麵最好食係味玉，好有蛋味 最奇怪係我已叫了大碗，但與標準分量好像沒有分別 味增味夠濃，但偏鹹…… 唔好畀賣相呃到， 實質係暖及淋的，餃子皮完全沒有香脆感覺， 感覺好似煎起好耐 估唔到全晚最好食係呢個，醬油味好夾呢款肉， 如果係食丼飯更加美味

此店之厚切豬潤厚度簡直係同一塊扒無分別，口感爽，不乾不柴， 生熟度適中完全冇騷味，非常正 對比豬潤麵鮮牛肉麵就有點失色喇， 牛肉有啲淋， 口感麻麻， 最重要係肉味較淡…… 西多士簡直係驚喜之作， 與其他餐廳煮法不同 ，脹卜卜， 好香蛋味再加埋用煉奶加牛油， 簡直係下午茶number one 熱奶茶好飲唔出奇，而家啲茶餐廳凍奶茶真係好難得飲到茶味， 呢度就畀到你