🥢荃灣新開話題店 乒乓波咁大 超爆汁 瘋狂世一爆汁生煎包 🥢最近發現荃灣新開一間人氣話題店，門連紅紙都未搣就已經超多人等位及買外賣，每個人為咗嘅係佢哋的即叫即煎生煎包，今次就特別過去睇下，門口已經成堆人等位，好在都好快手可以就坐，上菜速度都好快，一陣間就有得食 🥢招牌生煎包 ,迷你雞絲酸菜湯套餐 (送豆漿 )$59 見到每檯都點呢個招牌生煎包，就知道幾咁受歡迎，上檯時仲熱辣辣出曬煙，每粒都非常飽滿，成粒乒乓波咁大，輕輕一夾就已經爆曬湯汁噴出嚟真係好誇張，每一口都係鮮甜湯汁味道，外皮上層軟熟下層煎至香脆，脆卜卜咁好惹味，內餡用上新鮮豬肉製作而成，散叫一碟$45 /6 隻 ,除返開都只係$7.5 一粒，認真高質又抵食 🥢排骨蔥油拌麵$42 排骨蔥油拌麵，排骨大大片夠曬份量，咬落鬆脆口感，係上海排骨嘅風味，細心位已經切開一件件方便食，拌麵用上爆過的蔥油拌成，每條都充滿蔥油香，麵質爽口 🥢酥炸小雲吞 $25 一碟好多粒的炸小雲吞，細細粒一口一隻剛剛好，即叫即炸熱辣辣的每粒都係脆脆口感， 🥢手工豆沙鍋餅$28 豆沙鍋餅表面香脆，內餡放了香甜軟滑的豆沙，甜度剛剛好，口感香脆 🥢估唔到呢個生煎包真心好有驚喜，每隻都灌滿湯汁，味道真係好鮮香，底部脆脆的好有層次感，今次真係連碟上面嘅汁都飲埋，唔怪得新開就已經成為區內的人氣話題店，落嚟荃灣嘅話一定要嚟試吓 📍 劉興記生煎包專門店 (荃灣) 荃灣街市街37號地舖

🥢新蒲崗台式火鍋放題 任食多款台灣夜市小食 養生大紅袍醉香麻辣鍋湯底 🥢最近去咗一間幾唔錯的台式火鍋放題，提供可以飲得嘅火鍋湯底，多款台灣夜晚小食，台式冷泡茶同任飲啤酒，價錢由肉類款式多少分3 個價錢，最平$198 就有交易 🥢無敵吃火鍋 $359/ 位 🥢今次點了最多嘢食嘅套餐，淨係火鍋湯底已經有六款， 包括大紅袍麻辣鍋，番茄牛骨紅燒鍋，清醇椰子滑雞鍋，滋補藥膳排骨鍋，養生花膠雞湯鍋，淸醇椰子排骨鍋，今次點了麻辣鍋，先小試一口飲落好順喉，係飲得嘅湯底，完全係台灣食到嘅味道，溫和辣度而且係香為主 🥢台灣夜市小食 超多款夜市小食無限量供應，鹽酥雞，炸地瓜條，台灣腸，鹽酥雞翼，滷肉飯，仲有最正嘅係成份即煎蛋餅，全部都係即點即整，夠曬美味 🥢肉類 美國嚴選安格斯，特選美食牛五花，西班牙穀飼豬梅肉，牛肉質素都算唔錯食落都幾軟熟，由其牛五花，油脂平均，配上麻辣湯夠惹味而不膩 仲有新鮮沙白蜆，隻隻無沙又飽滿，另外仲有蝦同鮑魚，反而滷大腸及雞腎都真係幾入味，鐘意食呢種滷水可以一試 🥢自助區 提供多款新鮮蔬菜及丸類，麵類方面有我個人好鐘意的王子麵，甜品係香港牌子的雪糕杯，每人仲有超甜西瓜，飲品好多款，除咗汽水，重點一定要飲佢地嘅冷泡茶，味道超香又夠濃，一飲就知用上靚茶，今日試咗炭培烏龍，高山翠絲，見到樓下層可以單買$18 支都覺得值，仲有無限量供應啤酒，可以瘋狂暢飲 📍 台北東南台式火鍋 新蒲崗寧遠街10-20號渣打銀行大廈地下F號及閣樓A-B號舖

🥢旺角無限時日式火鍋放題 $298起任食美國牛肉日本豚肉海鮮套餐 🥢成日都好想搵一間可以任食又要無限時，仲要有酒飲可以坐得舒服，同朋友傾到計嘅，終於俾我哋喺旺角搵到間日式放題有齊以上條件，仲可以+$99任飲雪櫃入面嘅酒，啤酒，清酒sake ,日本紅酒，自助調配chu - hi 仲有我哋成日喺日本都會買返香港飲嘅果實酒，真心抵飲 🥢+$98 啤酒．清酒放題 雪櫃入面嘅酒通通都可以隨便飲，有超多種類果實酒選擇，比較推介嘅係易入口啱晒女仔飲嘅蜜柑酒，沖繩菠蘿酒同埋柚子酒，另外發現到一支幾得意嘅鯛魚燒酒，味道甜甜鹹鹹的竟然係小丸子醬油味咁樣超有趣 🥢啤酒提供罐裝Sapporo ,清酒類別都非常多，純米吟釀，純米酒等等有廿幾隻款選擇，仲有經典燒酎ichiko 同其他我不太認識嘅酒，自助bar 到仲有自助調配的chu -hi 提供梳打水機俾你自製不同口味，以上酒類通通都可以開嚟飲，呢個飲之放題開心過日，仲要唔限時啱曬同朋友來試多幾款 🥢 嚴選美國牛肉、日本豚肉、海鮮套餐 $298 套餐包括以下任食：美國肥牛，牛舌，美國小牛排，美國牛板腱，日本豚肉，豬肉腩片，海鮮及蔬菜 🥢黑毛和牛拼嚴選美國牛肉、日本豚肉、海鮮套餐$598 套餐包括：黑毛和牛牛胸腹，黑毛和牛無頸肩胛（一客各四片） 任食美國肥牛，牛舌，美國小牛排，美國牛板腱，日本豚肉，豬肉腩片，海鮮及蔬菜 🥢最好可以兩個套餐可以一人叫一個，我哋二人叫咗$298 同$598 餐，價格分別在提供一碟黑毛和牛牛胸腹拼黑毛和牛無頸肩，每款四片夠曬矜貴，油花好靚睇輕輕一灼就已經散發住和牛油脂及香氣，雖然唔係任食每人試少少就夠 🥢而其他肉類及菜都係可以自由任食的，就算美國肥牛質素都算唔錯，由其係日本豚肉幾軟滑，個人幾鐘意日式魚板同福袋，自助區有醬油俾你調味，跟返日本咁提供蘿蔔蓉可以帶出清新感 🥢小食就有枝豆，唐揚炸雞，菜肉餃子，忌廉蟹肉薯餅，炸雞軟骨，當佢居酒屋咁食，主要係飲吓各款唔同類型嘅酒，傾吓計咁已經好夠開心 📍 天心 (旺角) 旺角奶路臣街17號THE FOREST 1樓114號舖

🥢深水埗 實測新開米線店即炸雞件豬扒米線 🥢在網上見到深水埗有一間新開嘅米線店，咁啱去開呢頭就過咗去試吓，入到店見到佢哋一有五樣嘢係招牌，香炸豬扒，鴨血，溏心蛋，雞件，厚切豬潤，有曬排行榜咁樣應該都唔會差得去邊今次就點了幾款試吓 🥢麻辣小鍋米線$34豬頸肉+$12墨魚頭+10 炸雞+$12 凍檸茶+$8 🥢今次點了三個餸飲埋嘢已經$76 唔算抵食，首先炸雞係非常標準，脆卜卜的夠香脆有少少似日式炸雞嘅味道，雖然好乾脆但味道唔算有驚喜應該都係叫貨唔係自己整，墨魚頭係非常但同時常腥，好似完全無處理過咁，有陣街市味，豬頸鍊本身已經在湯中浸住，已經唔係脆味道平平無奇，最重要係個湯底，點了小辣麻辣，味道只係10小辣咁，湯底一啲麻辣味都無，比較似煳辣湯或濛古湯但唔辣而且淡，非常失望搞到只係食曬餸就停手，米線難食到爆 🥢凍檸茶唔係講笑，根本就係溶咗雪的凍檸水，完全無茶味，冰又唔夠仲要溶曬，唔識沖茶水不如唔好做，只提供汽水無咁嬲 🥢酸辣小鍋米線$34 +炸豬扒 $14 滷水豬脷 +$10 酸辣湯，同樣都係淡但係會比較似返個米線，但酸味係好搶喉嘅感覺，酸味感覺就咁落白醋，毫無層次感，米線來講都真係幾差，上面仲有落花生，硬嘅鮮腐竹，搞到不倫不類，有少少似食酸辣粉咁，豬脷味道正常，豬扒亦係即炸，幾脆熱辣辣，不過無醃到無咩味 🥢整體來講，食米線就係鍾意食好龍尾嘅湯底，呢度就完全俾唔到，好浪費咗食物同時間，金錢例外，最尾係有同店員講凍檸茶同奶茶都係非常淡，唔使淨係話：係咩？等我試吓啦 雖然餸方面正常，但米線完全唔入流，如果唔食辣的朋友可以會鐘意，但對於鍾意食米線，濃味嘅朋友就一定係失望 📍雲中川小鍋米線 (深水埗) 深水埗元州街1E號地舖

🥢昂平 著名景點天壇大佛下$150三餸一湯素食套餐 🥢身為一個肉食係系人，似乎同齋菜係毫無關係，今日一早上到天壇大佛，就係為咗買一隻限量版，上到去天時暑熱，買完影完相先至發覺，原來我係早餐都未食，大佛下邊有一個收銀處姐姐推介食唔食齋，$150就有一人套餐三餸一湯感覺都幾抵食，有啲肚餓同埋覺得好熱，所以就幫襯吓 🥢成日聽人講上大佛嗰度食齋都唔知喺邊度，原來就係附近嘅寶蓮寺，餐廳內外所有嘅員工都非常之好人，仲好細心咁樣叫我入到去嘅時候飲少啲茶，記得飲晒啲湯，因為今日係青紅蘿蔔湯可以消暑，真係夠曬細心，好耐都冇試過一間咁有人情味嘅餐廳（可能我個樣好似中咗暑咁） 🥢貴賓齋 $150 (1人餐3餸一湯跟白飯） 🥢古法老火湯 (青紅蘿蔔湯） 青紅蘿蔔湯，一人份量俾咗一大盆，雖然冇肉去煲，但係飲落去又幾舒服，就係蔬菜嘅甜味，由其是係今日呢個狀態好熱嘅時候，一大盆湯我竟然飲得晒 🥢脆皮春卷拼鮮竹 春卷查得非常之香脆，入邊全部都係菜咬落幾爽口索索聲，另外一個炸枝竹口感酥脆，底下醬汁係青檸雞嗰個檸檬汁幾開胃 🥢碧綠如意炒 係一個雜錦菇類同埋豆類炒埋一碟，味道幾清新，始終係齋菜嚟，唔會奇望有咩特別 🥢花菇扒時蔬 厚肉花菇有三大隻，時蔬今日係生菜，喺我心目中生菜一定要落蠔油，差啲叫人俾蠔油，但係諗深一層蠔油應該唔係素，不食落菜上係有花菇香氣都幾夠味 🥢總括來講味道唔算好出眾，但係清清地又覺得清吓腸胃唔錯，尤其是喺大熱天時，佢哋會煲唔同嘅湯，今日主要飲曬佢嘅湯覺得好舒服，即時解暑，而且鍾意呢一個環境好古色古香之餘冷氣都非常之足夠 📍 寶蓮禪寺齋堂 (大嶼山) 大嶼山昂坪昂坪路寶蓮禪寺

🥢粉嶺 $140全包無限時麻甩任食卜卜蜆煲鮮甜大桶蠔火鍋 🥢繼上次去咗沙田店非常後悔超熱34 度爆汗咁打邊爐，想起粉嶺街市熟食入面都有間分店，上次去隔離舖頭食都見到呢一度有蟹等海鮮提供，街市呢啲飲食檔口，一定要早去食，因為夜咗咩海鮮都俾人拎曬，今日同樣係6:00 星期日到達，有幾抵食先 🥢潮爆卜卜蜆煲火鍋 $140 /位（全包） 🥢火鍋 最平$128 起就可食到任食火鍋，包曬任食火鍋飲品自取配料，及一碟是日海鮮，，今次好想食卜卜蜆煲，湯底係好多蒜同芫荽的味道，就同澳門的卜卜蜆煲一樣，充滿蒜香，如果想再蒜味濃啲可以醬料區自取蒜蓉及炸蒜加入，蜆肉粒粒非常飽滿肥美，一粒沙所無非常高質 🥢是日海鮮 上次經過佢地當天提供花蟹，今日變成了大大隻桶蠔及大蝦，海鮮由是按人頭分配，但份量都夠曬多，有六隻大蠔，隻隻都好新鮮飽滿甜美，蝦是新鮮爽彈的口感 🥢火鍋配料 用上經典的紅筲箕裝住丸類及肉類，可以隨便自由取，肥牛味道正常，平時街市買嗰啲質素咁上下唔會太韌，丸類類別非常多選擇，另外鐘意蔬菜全部都有洗乾淨 🥢今日提供現包的韭菜餃子同新鮮魚仔，餃子係用雲吞皮薄薄的幾滑，滿滿的韭菜餃香氣，另外魚仔肉質超甜，不過有d 骨，如果識食魚先至好攞，攞完一轉之後就冇見到佢再提供啦，見到一定要攞左先 🥢啤酒汽水 啤酒有重本日本麥啤超市買都唔平，另外數過共有7款啤酒，喜力嗰d 都有，仲有大部分汽水茶飲都有，可以一班人暢飲大聲傾計都唔怕，而且無限時貪夠麻甩熟食市場就係爽 🥢鐘意呢個卜卜蜆煲的味道就係澳門食隻味，價錢經濟好多，而且係任飲任食，不過環境係街市熟食，雖然唔太衛生但比其他熟食市場乾淨，而且有冷氣比較舒服，另外每日提供不同的海鮮，就要睇運氣當日提供，而且是先到先得，非常建議5:30至6:00過去人流不多而且會比較多海鮮提供 📍 新廣發 (粉嶺) 粉嶺和滿街9號聯和墟街市2樓熟食中心CF7號舖

🥢荃灣石圍角 裝修在即隱世老字號大粒手工魚肉燒賣 🥢要數到我哋心目中最鍾意食嘅燒賣一定係呢一間位於荃灣石圍角牛雜粉麵檔的燒賣，呢間店舖開業咗好多年，主要係店入邊食牛雜粉面，而最出名嘅係佢哋每日即刻包嘅手工燒賣 🥢因為呢度嘅石圍角商場全個商場都會圍封重整裝修，今日膽粗粗上去，睇吓佢哋而家仲喺唔喺度，好彩仲有營業，問過店員幾時要裝修佢哋都話未知雖然全部附近都已經為晒版得返佢哋，佢哋需要收咗通知信之後先知道幾時會裝修，未知會唔會再重開，根據以往咁多間重整嘅商場之後會大幅加租好大，可能都未必會再重開，所以要每次過去都要懷着最後一次嘅心情去食 🥢手工魚肉燒賣 $20 /10 粒 燒賣係店員姨姨每一日手工包嘅每粒都好似乒乓波咁大粒，圓波波咁樣好飽滿，今次就買咗20粒，因為粒粒都好飽滿，魚肉係呈少少透明狀態咬落好有彈性，最正係佢哋嘅豉油加自家製辣油，佢哋嘅辣又會係非常之辣，但係同時都非常之惹味，係燒賣的靈魂 🥢今日買完之後唔捨得食，要係咁影相同拍片，店員阿姨仲喺度講話點解我唔即刻食掛住影相啲嘢凍晒，但絕對係想我快啲食，唔好攤凍晒真係好可愛，呢啲就係屋村入邊嘅人情味，真心希望佢哋可以繼續留喺石圍角，因為我仲想以後繼續食佢地嘅世一燒賣 📍 冠華粥麵 (荃灣) 荃灣石圍角村石芳樓地下7號舖

🥢沙田 霓虹燈冬菇亭內嘆抵食麻辣烤魚火鍋放題 🥢以前成日都好鐘意一大班朋友入沙田大排檔食麻甩任食邊爐，貪佢價錢抵食任食之餘又可以任坐唔洗限時限刻，可以隊啤傾計慢慢食，原來而家沙角邨的冬菇亭大排檔而家裝修咗，變到好新潮，有打卡霓虹燈裝置，乾淨企理而且冷氣夠凍，仲有滿$200 free兩個鐘泊車，今次特別揸車入沙田試吓 🥢任飲任食火鍋 $188 /位 +串燒拼盤 $88 +升級雞煲 $20 +升級泡椒烤魚 $68 🥢天氣咁熱特別好想食辣嘢，所以點了泡椒烤魚，估唔到烤魚本身係炸過表皮香脆，魚皮吸收麻辣湯精華變了好膠質感，Q 彈軟滑的感覺，而且大大一條好厚肉，肉質幾香滑而且無咩碎骨，重點香辣味道夠強夠濃幾夠正宗，麻香泡椒香剛剛好，如果唔食得辣嘅就直接點原味蔥燒烤魚，因為真係幾辣吓 🥢食完魚已經飽咗一半，可以剔紙仔加其他火鍋配料，丸類，肥牛，豬梅肉，個人鐘意加入嘅蟹柳響鈴同午餐肉，吸收麻辣湯的精華，最後加返個公仔麵麻辣味，係辣到好爽嘅感覺 🥢飲品 任食包括百事及烏龍茶，罐裝汽水之類，另外可以加錢配生啤塔，不過今日有揸車就下次先 📍 嚐聚 (沙田) 沙田沙角邨沙角熟食中心9-12號舖

🥢銅鑼灣超抵食$398感謝祭新推出全日供應15品御膳刺身壽司或鐵板燒 🥢位於銅鑼灣的鐵板燒日本料理，最近新推出超抵食的15品御膳 , 一個價錢包曬前菜刺身壽司天婦羅及西京燒，另外仲有同樣價錢的14品鐵板燒套餐，同大家試吓究竟有咩食 🥢感謝祭十五品御膳 $398 刺身用上新鮮梭子魚刺，經過火炙滿滿魚的香氣，順便放置紫蘇花，帶來清新香氣，是比較清爽淡口的魚類，壽司左口魚，真鯛，伊佐木，中卜口，赤蝦，由淡到濃咁食，個人最鐘意左口魚，師傅將魚片握成壽司後再放上燒過的魚一次品嚐兩種味道，真鯛同伊佐木口感清甜帶少少爽口感，天婦羅炸功了得好薄脆，西京燒味噌甜味突出，魚油感豐富 🥢前菜、沙律 🥢刺身三款 🥢壽司五款， 🥢天婦羅 (蝦．野菜） 🥢西京燒 🥢湯 🥢甜品/咖啡 🥢感謝祭鐵板燒十四品 $398 🥢刺身三款分別是赤身，油甘魚及北海道帆立貝，印度最深是帆立貝非常新鮮，軟滑而鮮甜味道有驚艷到我， 南非鮑魚香濃而爽口，大蝦用了蝦頭膏煮成的醬汁，蝦味超強又爽口，今次點了法國鵝肝，油膩感強烈，師傅煎到入口表面香脆入面軟香，牛肉係美國薄燒，如果鐘意可以再加錢升級其他和牛，薄燒配上香脆蒜片，牛肉中央包裹蔥花香氣充足 🥢前菜、沙律 🥢刺身三款 🥢南非鮑魚 🥢大蝦 🥢帶子、白鱈魚、鵝肝（其中一款） 🥢季節野菜 🥢美國牛肉薄燒 🥢套餐包括炒飯、漬物、麵豉湯、甜品 / 熱咖啡 📍 板神鉄板燒日本料理 (信和廣場) (銅鑼灣) 銅鑼灣告士打道255-257號信和廣場1樓103號舖

🥟尖沙咀 拉絲芝士牛肉拌飯参雞湯抵食$18巨型泡菜餃子 🥟位於尖沙咀韓國街嘅一間韓式湯品餃子專門店，之前曾經嚟食過都覺得好啱食，但見到有討論區講到唔抵食，又話好難食等等，今次又特登過嚟實測一下，睇吓而家嘅質素有冇唔同 🥟參雞湯 $168 熱辣辣的參雞湯，乳白色的湯底好香帶雞湯味道，原隻bb 雞，雞肉雞骨已經燉到超軟熟，用湯匙一篤就可以食到，軟腍腍連骨都食埋，雞殼中間仲有米飯，面頭仲有兩條參同紅棗等藥材，記得食埋補身，食曬成鍋都幾飽 🥟牛肉芝士拌飯 $138 石鍋上的牛肉芝士拌飯，玩起上嚟都會見到拉絲芝士，經過石鍋拌完飯係會多咗鐘焦香的香氣，飯底加入了紫米食起上來更健康，而且蔬菜都幾多，食起上來都幾有口感 🥟餃子王 $18 🥟泡菜餃子王 $18 次次嚟到呢度食都會點佢哋呢兩隻餃子王，餃子王本身入邊係好多蔬菜同埋肉大大隻一隻蒸餃，餃子皮好軟熟一咬即破，另外泡菜餃加入了泡菜同肉，食得辣嘅人先好嗌 🥟當日6:30過到去都已經坐滿晒人，唔使一陣間門口已經有條小人龍排隊，店舖位置不多所以遲咗過嚟都需要排隊等一陣同埋真心覺得呢度嘅嘢真係唔錯好啱食，無網上講到咁差，我覺得有啲嘢好唔好食，要自己親身試過先至知道嘅 📍 韓屋 (尖沙咀) 尖沙咀金巴利道69-71A號美園大廈地舖