前日係尖沙咀行完街，去左附近佐敦覓食，最後揀左Plato Cafe & Bistro。其實成日係柯士甸站行出嚟都會經過，但真係未食過。歐陸式風格設計，座位寬敞。 . 精選二人套餐 餐湯：雜菜湯 我一向唔太鍾意紅湯，因為覺得太酸，所以飲咗幾啖我就放棄。 . 前菜（三選一）：天婦羅魷魚鬚 啱啱炸起嘅魷魚鬚非常香口，一啲都唔油膩，而且份量多。 . 北海道帶子松露野菌扁意粉 大大粒帶子，意粉有松露嘅香味，但白汁稍為肥膩，而且意粉偏硬，所以有少少失望。 . 主菜（三選一）：西班牙黑毛豬鞍 黑毛豬厚肉但鮮嫩多汁，一啲都唔油膩。另外仲有配搭薯條同翠玉瓜，更可沾點醬汁食用。 . 甜品：日式芝士蛋糕 普通正常，如有需要可以加錢升級甜品。 . 飲品：朱古力奶昔+芒果沙冰 套餐只包兩杯$32正價飲品，所以如果點$32以上需要補差額。

前幾日同朋友係旺角通菜街行街時比呢間餐廳-韓川嘅霓虹燈吸引咗。原來係一間食韓國菜嘅餐廳，對比門面設計，內在裝潢簡潔。 真露焗蜆 香濃嘅牛油蒜蓉同真露嘅酒香，蜆嘅份量十足，底下更有粉絲墊底，吸曬啲精華，非常惹味。 時令生蠔 估唔到韓國餐廳都會有生蠔食，今次有兩款唔同嘅法國生蠔，食落都非常鮮甜～ 溫泉蛋虎蝦芝士湯烏冬 真係要勁讚個湯底！香濃芝士味及蛋香湯底，虎蝦新鮮彈牙，烏冬又彈牙，每次都會連埋湯底一齊飲晒食晒～ 韓川菜包五花腩 底下會用蠟燭熱住幫五花腩保溫～勁大塊五花腩，燒得好香口～剪開後包埋生菜同配料，再配上韓式秘製魔鬼辣醬，juicy又惹味～ 最特別最可愛嘅係聖誕限定版，每個瓶身均配有隨機發放嘅圍巾及帽子。薑餅人為菠蘿雪燕桃膠，星星為士多啤梨牛奶西米露，打卡影相一流！

早前同朋友去荃灣，佢話帶我去嘗試香港元祖級，由正宗韓國人主理嘅韓國炸雞店-李家。 一入座就會送上兩份小食，酸蘿蔔及椰菜沙律。 半半炸雞（去骨加10蚊） 可以根據餐牌選擇原味及甜辣炸雞，亦可以另外自選味道。我地就選擇咗原味及甜辣炸雞，炸雞表皮炸粉唔會太厚身，原味炸雞脆卜卜，甜辣炸雞則微甜。份量比較多，我諗4個人食都夠。 芝士辣海鮮炒年糕 又係一份份量超出預奇嘅年糕～除咗海鮮，年糕之外，底下更藏有粉麵，真係會好飽～芝士可以拉出絲，一啲都唔辣，年糕煙韌可口～ 韓式魚餅湯 魚餅湯非常足料，飲落口有少許辣感，天氣凍個時真係好適合～

好耐無食海鮮啦，所以夜晚同屋企人去左三聖間棠記海鮮小廚。 棠記有前後兩間舖，茶餐廳般嘅裝潢，大圓枱同卡位。除了餐牌外，牆上亦有多款食物選擇。 豉椒炒蜆 值得一讚係吐沙得非常乾淨，一粒沙都食唔到！鮮甜彈牙嘅蜆肉配上豉椒味，無論當飯前小食或送飯都一流！ 菠蘿咕嚕肉 雖然咕嚕肉每粒也比較細小，但份量足夠，而且咕嚕肉粉皮較薄，炸得非常脆口！菠蘿亦非常新鮮，鮮甜唔酸。 脆皮琵琶蝦 芝士蓋面再拎去炸，連蝦殼亦炸得非常脆！不用蝦殼鉗，亦可將蝦肉與蝦殼分離。香濃芝士再配上厚實嘅蝦肉，一啲都唔油膩。 椒絲腐乳通菜 通菜爽脆可口，加上腐乳汁嘅鹹香，非常惹味，又係一個送飯嘅菜式！

近排太熱，實在唔想周圍走，所以同朋友去咗屋企附近嘅日式餐廳覓食-鮨亭。 . 整體使用彷木設計，另外仲設有壽司吧檯，可邊食邊觀賞廚師手藝。完美呈現和風格調日式居酒屋環境。餐廳室外更設坐位，可與寵物一同用膳。 . 日式芝士年糕 雖然啱啱炸起，但表面同內在都唔油膩。外脆內軟，啖啖芝士味。 . 三文魚親子丼 飯身上鋪滿三文魚刺身及三文魚子，大大嘅滿足。三文魚味配上醋飯，鮮甜中帶有一點點酸。 . 火炙雜錦海鮮丼 一次過食多款火炙海鮮，大大粒帆立貝，數款魚類。經火炙後，帶出魚油香味及帆立貝鮮味，食落爽口帶點焦香味。 . 午餐套餐則奉上日式餃子，麵豉湯及檸檬綠茶。

係元朗圖書館打等咗半日之後，直接係附近搵野食。最後揀左健舍便當，以魚湯同慢煮營養便當出名，可惜當日魚湯售罄，無緣嘗試。 店舖唔大，因為有大玻璃窗，所以都幾光亮。 慢煮雞胸便當 推介菜之一！慢煮雞胸肉質鮮嫩且肉汁豐富，配以燒烤及中東味，即使無任何醬汁都非常惹味。飯亦採用左紅米飯，更高膳食纖維。 秘制香草烤豬便當 一樣用紅米飯，蘊含高膳食纖維。烤豬雖然唔係以慢煮手法煮食，但都唔會乾身。肉量亦非常足夠。 蒲燒鯛魚 以鰻魚汁調味，鯛魚片肉多刺少。魚肉堅實，嗒嗒肉。 另外可套餐加配溏心蛋或飲品。溏心蛋原隻上，切開後，溏心蛋黃隨即流出。 飲品則點了青蘋果梳打及乳酸梳打，大大杯！

同朋友喺屯門行完街之後，就去咗附近嘅一間餐廳食嘢！留民料理，個名幾特別，店鋪外仲寫住fusion無國界料理，幾吸引！ 店內環境有啲似酒吧，店內亦有售賣手工啤及日本清酒。入面仲有部電視播放住店長嘅心路歷程，睇完就會知點解店舖名叫留民料理。 蟹籽溫泉蛋 凍食溫泉蛋，除咗有蟹籽之外，仲有蔥花同芝麻醬。芝麻醬好香濃，掩蓋咗生蛋嘅腥味並特出咗蔥花嘅味道。 蟹籽海葡萄宮城大真蠔 日本直送！差不多手掌般大細，一啖根本食唔曬！生蠔鮮甜肥美，海水味唔重，再加上蟹籽及海葡萄，令帶出清爽口感！ 胡椒海鹽煎燒黃腳立 黃腳立並冇魚腥味，而且一條正骨，怕食魚骨嘅可以放心。魚肉嫩滑軟綿，即使唔加任何調味料亦帶有甘香。如果想重口味，可以添加附帶嘅海鹽，檸檬汁，七味粉，及特製醬汁（少辣）。 日式甜咖哩炸軟殼蟹燴飯 香濃咖哩味但唔油膩，未食先聞其香。鹽酥炸軟殼蟹，單食會比較鹹，配飯食會比較好。除咗蟹籽，蔥花仲有瓜粒，所以食落口會有爽口嘅感覺。飯量亦唔細，兩個人分都得。

當日同朋友去屯門買野時經過間路邊小食店，猫毛。店舖名好趣緻，不過店舖內係無猫嫁～能坐嘅位置不多，如果遇上炎熱天氣建議外賣拎走。 佢地主打特色漢堡，每層肉均為手打漢堡，120克（4安士）並即日新鮮制作。可以單點或跟套餐，套餐包括薯條/薯餅及飲品一杯。 我叫左超人漢堡配薯餅。漢堡包面及包底有烘燶過，非常脆口。不過漢堡好大，好難一口咬哂。豬肉漢堡非常juicy，鹹蛋黃沙律醬再配上炒蛋及洋蔥，調出另一種鮮味。 朋友則點了貝羅菇漢堡（牛肉，貝羅菇及黑松露醬）。貝羅菇燒過後，香味更甚。黑松露醬令貝羅茹及牛肉更加入味。 滋味小食點了黑松露薯條及秘製豬頸肉。即燒秘製豬頸肉，好juicy。薯條都幾大份，配黑松露醬，更係香脆可口。 飲品點了猫毛朱古力，非常濃朱古力味。

係荃灣做完瑜珈之後，係附近搵野食。見到Pickabowl，成日都經過但無食過，因為我唔太愛食生冷野，但個日望真啲，原來有熱食！ 有得跟佢set好嘅餐或者D.I.Y.自選配搭。 我就揀左佢set好嘅薑汁松阪豬，和風口味。另外飯底點了黃薑椰菜花+半糙米飯。可能因為得半邊，黃薑味並唔算重。不過可能因為飯底一早整好，所以最後只有豬肉係熱，配合和風配粒，半熱半凍。飯量唔算多，適合我岩岩做完運動唔想食咁多嘅人。 另外跟餐加錢點了冷壓果汁Red Dragon，內含蘋果，紅提子，藍苺，紫椰菜，火龍果。唔清楚份量係點，不過火龍果味好出，似係紅色版五青汁，頓時覺得好健康！

放左工之後去左中環覓食，係大館附近搵到間叫金鶴拉麵，其實覺得選址並不太好，因為附近都係酒吧，似是有點格格不入。 使用QR code點餐，但唔知係咪時間問題，當時好多都售罄，所以其實選擇並不多。 睇堆介話呢度嘅雞湯湯底出名，所以點了雞白湯拉麵。進食之前先試了湯底，濃而不膩。雞肉亦非常嫩滑，反而拉麵有點拉低評分，唔夠彈牙。 另外鰻魚亦為堆介品之一，所以點了蒲燒鰻魚串，肉質彈牙！真係值得一試！ 日本明太子雞翼，明太子過程可能添加了太多調味料，有點重味道！但好足料～ 點了Coedo Shiro (白色)小麥啤，比普通啤酒多了點果香. 而且麥味更足，可以一試。