要搵間餐廳傾偈又可以坐得耐，cafe最好不過 旺角嘅恒威商業大廈全橦都喺Cafe, 總有一間啱你！ 我今次就揀左Little Fresh Cafe 揀坐窗邊，18樓望落去景色都唔錯喎！ 見到門口嘅飲食專欄文章推介火魔醉蜆 $88, 我地都要叫一個試試佢 上菜時侍應貼心提醒我哋相機準備，因為佢會為蜆點火！ 吸睛指數高、打卡位嚟喎！ 湯汁應該喺白酒洋蔥汁，蜆肉唔算肥美但勝在新鮮無腥 食完小食，我哋就一人叫一個set dinner 是日餐湯喺忌廉煙肉湯，唔喺好厚實好杰嘅口感，味道正常 主菜一：法國紅酒燴牛面肉 $238 牛面肉燴得好透徹，肉質好林，筋位都軟化晒，紅酒醬汁味道恰到好處，配搭薯蓉及蔬菜 主菜二：墨魚汁海鮮燴意大利麵 $188 烏捽捽嘅墨魚汁鮮味十足，麵條軟硬適中，仲有蝦肉、青口、魷魚及大蜆，食到個嘴黑蚊蚊 飲品羅勒士多啤梨沙冰 $58，為今天嘅晚餐劃上甜甜嘅句號

. 黎到荃灣又忍唔住要排隊食雲家小鍋米線 . 涼拌墨魚頭 真係好正，必點小食！墨魚頭處理到口感好爽，涼拌汁勁多蒜微辣，拌勻好惹味食唔停！ . 炸春卷（5隻） 係網絲春卷，炸得非常之香脆，中間餡料係芋泥黎架 . 主角小鍋米線，今次配料叫左腩肉、豬膶（溫提：豬軟骨都好正！） 湯底照舊麻酸辣小辣 份量好大碗，男仔唔使驚唔夠飽！ 每碗小鍋米線都係即刻煮，湯底好濃郁又麻香又有肉碎芫茜蔥芽菜（我係芫茜蔥控，唔鍾意食既朋友仔記得落單時走青） . 豬膶厚切，咬一啖中間口感係juicy既，肉質完全唔鞋 . 腩肉係條狀，瘦的冇乜脂肪，醃得好入味又林 . 總括依然水準高！果然係當區人氣小鍋米線店！

慶祝紀念日，當然要去中環地區搵食 今次揀左呢間日本餐廳，晚餐食北木島直送牡蠣放題每位 $598 . 首先係品嚐一壺熱住既海鮮濃湯，滿口鮮味全因湯料豐富，有蝦、蜆、元貝！ . 跟住就係小食 - 炸牡丹蝦 最緊要係已經剝晒殼，入口啖啖肉又香口 . 喜多嬉懷石八品 - 呢個八款特色小食，款款都係廚師精心炮製 由味道最清淡但鮮味既木魚汁蟹肉羊羹開始順時針，然後係醬油漬鮑魚，好林既鮑魚肉醬油入晒味 仲有燒牛肉沙律、月見照燒雞肉軟骨棒，我好鍾意既串燒，因為蛋香同雞肉真係好夾 接住有紫菜炊飯、炭燒鰻魚、秋葵漬 最後係吞拿魚拖羅蓉+三文魚子刺身 . 之後就係期待已久既任食項目啦 先黎半打生蠔！ 生蠔新鮮、肥美、creamy、有海水味外，配以既柚子汁啫喱同埋紅蘿蔔蓉一齊食好夾好好味 結果....encore又encore, 質素keep住靚！回本之選！ . 除左生蠔，仲有焗蠔、焗帆立貝（原味、蒜蓉味、芝士醬味 同埋 辣蒜味） 帆立貝厚肉大大粒，個人鍾意蒜蓉味/芝士味，前者濃烈蒜油、後者有芝士咸香 . 仲有10款串燒都係任叫，推介雞心、雞中翼、翠肉瓜串！ . 最後仲有一碗松葉蟹鉗手延烏冬，湯底清甜，烏冬麵質滑，出色的 . 最後既甜品，打卡位黎！櫻花餅夾住白酒雪芭，以佢做今晚結尾，清清口腔。

耐唔耐就會想食韓國炸雞、芝士排骨.... 呢間餐廳有齊想食既野，仲有雪冰，價錢又唔貴，不錯！ . 莫索里拉芝士排骨 店員主動詢問需要幫手整，有專業人士處理當然比較好！我們當然乖乖等食。 等芝士略溶後，先將辣椒醬汁與芝士拌勻，待芝士完全溶掉後，便用芝士滿滿的包住豬肋骨，然後就可以食啦。 . 一大口咬落去，先係拉絲芝士濃香，再係豬肋骨肉質感好好，骨肉相連，加埋好夾好好食！ . 白切五花腩 好大碟排到滿滿既厚切豬五花肉，肥瘦適中，就咁食或者夾埋新鮮蔬菜、生蒜片，蔥絲同埋辣椒醬，又係另一番風味。 . 驚喜二重奏（頂級肉眼牛扒、炸雞） 想一次過品嘗到牛扒同埋招牌炸雞，叫驚喜二重奏就岩晒啦 . 已切好左肉眼牛扒放係炙熱的石板上，兩邊烤烤就要夾起，唔係就well done架啦 . 呢間招牌炸雞用72小時醃製、2度低溫熟成，炸完的雞肉外皮超脆但肉質仲係嫩同埋好有肉汁，果然係專做炸雞！真心推介必點炸雞！ . 朱古力雪冰 呢個雪冰真係不得了，冰點解可以咁幼滑，綿綿口感，入口即溶，而且仲係濃郁的朱古力味，超好食。

616牛肉火鍋 專食一頭牛不同部位既火鍋店！ 最緊要係佢有埋牛雜湯底，真係全牛火鍋！不得了！ . 牛雜湯底真係最抵嗌！因為佢有好足料！牛大腸小腸、牛膀、牛肺同埋牛肚，仲有蘿蔔！岩晒鍾意食牛雜既我！ . 入座後發現餐廳主打推介由日本長野縣直送既信州和牛，價錢仲要係平民價，咁就要試下啦！ . 先叫左碟信州和牛肩胛 $78 唔好睇佢細細塊，油脂分布平均，淥完好有牛肉味，當然日本和牛係唔同d! . 之後當然叫番幾碟本地手切牛肉啦！ 牛朴肉 第一次食，睇樣就覺得口感、味道會似牛肩胛咁，食落口就覺得佢既油脂不及肩胛香 . 匙柄 呢個部位近大腿肉，又真係脂肪比例低，肉味好濃，仲有少少食緊肝膶既感覺，幾特別 . 除左食牛，餐廳仲有海鮮、丸類餃類等等 扇貝 係幾大隻，但應該係冰鮮既 . 水蓮菜 好少火鍋店有新鮮水蓮菜，淥好秒就食得，口感好爽脆！

黎海港城食野既好處就係可以享受維港景色！祥仔辣辣當然係其中一間啦！
.
見到佢地出左新餐牌，有烤魚火鍋，要試試佢啦！
.
我想食辣但同行朋友唔得，餐廳可以揀自選鴛鴦烤魚口味，岩晒啦！
我地揀左金波羅酸辣味 + 魔鬼地獄味😋
魚就揀左冇咁多骨，魚肉嫩滑既江團魚。

.
將魚分為兩半，每邊各一款湯底，未食已經聞到魔鬼地獄湯底麻香好惹味。
.
而金波羅酸辣味就係酸菜魚加上菠蘿塊，何唔到咁夾。

.
我地仲叫左兩款火鍋配料淥黎食。
三國演義 - 墨魚三色滑 (半份)
墨魚滑整成3層咁，偏向係似魚片咁既質感
.
火鍋一定要配肥牛，呢碟雪花肥牛肥瘦適中，質量不錯
.
之前黎親呢間餐廳食飯都會叫涼伴川味小食，餐廳新出左咕嚕咕嚕元氣九宮格，一次過俾我地食勻9款招牌小食，讚！
.
新餐牌仲有一樣野要讚，就係勁量1.3公升既飲品！我自己係一餐飯要飲兩杯飲品既，呢個勁量size就岩晒我！
推介自柑墮落，係柑橘檸檬x菠蘿x可樂，呢個配搭有驚喜又解渴！
.
唔食埋甜品硬係爭d野咁，呢個咕嚕咕嚕圍爐肆甜，賣相打卡一流
.
打開原來係珍珠冰粉，仲有炸到香脆既糍粑，滿足的。

. 任食火鍋我都食唔少，呢間除左主打潮州鹵水外，仲有手搖海鮮袋，一於試試佢！ . 未食火鍋先食海鮮！ 店員會係你面前將醬汁倒入袋shake，shake完龍蝦、鮑魚、扇貝、蜆都充滿香濃蒜蓉味，好惹味呢！ . 食完海鮮就上湯底食火鍋，湯底揀左招牌鹵水鍋 本身都有d怕唔知係咩味，好似會太濃郁咁，但原來好好味！配搭肉類特別夾，好似食緊鹵水小食咁 . 火鍋配料有美國安格斯牛肩胛、牛頸脊，海鮮有新鮮海蝦、蜆，仲有冰鮮鵝腸、脆鯇腩 . 熟食既麻辣豬手、普寧豆腐又係正！好似餐廳出品咁，絕不欺場 . 自助區域有熱食拎，仲有好多款甜品 鹵水鵝件 - 餐廳泵本，原隻鹵水鵝供應！ . 自制台灣直送仙草芋圓 紅豆、芋圓、黑糖珍珠，配上黑糖薑汁 .

原來荃灣開左間親子餐廳，誤打誤撞見到，大人可以食韓燒、小朋友又有兒童餐又玩足成晚，好正！我應該會成日帶小朋友去幫襯。 . 先講有咩食先，先照顧小朋友，揀左韓國公主蛋包飯城堡，蛋包飯好似公主既裙擺，小朋友心心眼，好鍾意食。 . 我地大人就梗係食韓燒、炸雞 頂級霜降牛小排- 牛肉味濃，最後食得最多係小朋友 . 韓國鰻魚 - 原條鰻魚，燒到半熟再剪成塊，皮脆肉厚 . 芝士炸雞全份 - 呢個好邪惡！炸無骨雞件，仲要鐵板芝士，不得了！ . 然後食到咁上下我就陪小朋友去左玩，個遊樂區好大！ 有粉色系波波池、滑梯 又有大粒積木俾小朋友砌、成個迷你街市野菜、魚、生果、麵包，我小朋友同我購物左好多次呢！ . 玩完番埋位有d餓意，叫左甜品食 水果迷你班戟 - 一口班戟，岩晒小朋友一啖一塊，仲有提子、藍莓等，健康 水果忌廉三文治 - 整左個熊仔出黎，咁可愛點捨得食呀 蘋果香蕉窩夫 - 大人就嗌左窩夫食，窩夫整得幾好脆邊，中間蛋糕又鬆軟 . 總括，呢間親子餐廳可以邊食邊玩，係俾小朋友放電好去處

. 去完城門水塘行山，留低係荃灣區搵食，做完運動食肉補體力最好！ . 呢間主打石板燒牛，有多款牛扒種類選擇，加配套餐有齊湯、沙律及罐裝飲品。 . 橫膈膜腹肉（封門柳）200g $178 封門柳本身只係四邊煎過，等我地可以按自己喜好，牛肉既厚薄、熟既程度，放在超熱既石板上煎，牛肉邊煎邊聞到油脂香，搞到人好心急想食！ . 煎好既牛肉擺入口好濃郁牛肉味，仲可以配搭秘製烤肉醬汁或者海鹽，又係另一番風味！ . 唔好睇小加配套餐既飯，飯面加左飯素，好好味！ . 牛県燒肉海膽丼 $168 除左要自己煎既石板燒牛扒外，仲有兩種刺身海鮮牛肉丼，呢款有大大條海膽，仲有三文魚籽同埋蛋黃，最緊要係燒好既和牛肉而海膽都好新鮮！ . 仲想嗌小食？呢度有日式串燒！ 鹽燒白鱔串 $68 白鱔好厚肉，外皮又烤到香脆。 . 天下第一豚肉串 $52 豚肉串相對一般，有大驚喜。 .

幸圓 . 位於鄰近太古坊一桎商業大廈既意法fusion日式居酒屋，先要欣賞佢地既裝修，有一個充滿藝術氣息既打卡位，原來係本地藝術家既作品。 . 幸圓海鮮丼 $238 大大碗刺身海鮮丼 有原隻赤蝦、海膽、吞拿魚、三文魚、北寄貝、帆立貝、吞拿魚腩蓉 同埋 三文魚籽 刺身好新鮮，咁就唔使多講，食啦！ . 鹽燒加拿大保濕豬鞍 $218 係日式居酒屋食到西餐，幾新穎！ 豬鞍扒用慢煮方法烹煮，然後再煎烤過，令到豬鞍內層仲可以keep到肉汁 . 佐酒小食 唐揚炸雞 $58 炸雞係日式做法，雞皮好香脆而雞肉仲好嫩 . 原味牛角包窩夫 $62 點都要甜品先至滿足，但因為真係飽，所以冇叫刨冰。唔好睇小呢個窩夫，佢似法式牛角包咁酥脆，加埋雪糕同蜜糖一齊食，簡直係完美。 . 特飲 Belgium Chocolate $46 朱古力控既我叫左杯特飲，係香濃朱古力再加上忌廉，邪惡呀！