見OpenRice comment ok，係附近返工就試試佢lunch set。$98+10% 又唔係好貴，但以一間專門做牛扒嘅餐廳黎講就真係好普通。同行十人，一致覺得個包嘅質素可以更好，薯條好似老麥。話晒灣仔都有N間burger店，呢個價錢嘅burger lunch set 真心一次就夠。 同事食roasted beef sandwich，簡單啲來講就係甜餐包夾牛肉，味道仲差過subway😩😩 再加上出餐慢，order左30分鐘乜都冇，即使有coupon都未必會再食。重點係餐廳冇乜客都搞咁耐，做office客就要改善🙏🏻

近近地係觀塘搵間cafe食lunch，二人餐半價就即時有位就試試佢。 半價二人餐包餐湯，麵包條，一份意粉一份主食，甜品同兩杯餐飲。每人除開$160，係同區黎講嘅價錢偏貴但質素真係普通。 餐湯就比較稀，淡身冇料。 麵包條好硬，似一包即食嗰啲餅乾咁。 餐前沙律係蜜桃鴨胸跟黑醋汁，全部都係現成料，好難唔好味🤣 主菜意粉就正常d，蝦算幾新鮮，茹同蒜頭炒香左，意粉質感岩岩好唔太淋有咬口，但偏油。 油封鴨脾好淋，完全冇外面煎封嘅感覺，唯一可取就係個肉唔老身嘅。配菜個三色汁真係色素嚟，冇味之餘，d色好嚇人。 個扒order七成熟，上碟得五成咁，而且好韌，勁多肥肉。 甜品係芝麻奶凍，餅底超厚但好淋🤣 味道不過不失啦 另外就係d service好麻麻，侍應全情西臉，叫十次先應咁。呢個質素試一下真係夠哂！😢

新蒲崗不嬲都多小店，今次呢間日系cafe細細間，喺正彩虹道巴士站前，超級方便！而且仲有醫護八折優惠，支持前線，一齊抗疫！👍🏻 菜式價錢唔算好貴，大概都係$100左右。不過整體來講中式定食比較出色。 帶子明太子意粉，最容易煮得好食，但今次反而覺得麻麻。意粉太淋過軟，明太子同忌廉味都唔算出，帶子又冇乜點煮過煎過，好普通好似自己屋企煮咁。 中式定食變咗兩款，第一就係個個都推介嘅拔絲咕嚕肉。外脆內軟，麥芽糖脆皮唔會好厚，排骨好淋又冇骨，唔錯！ 另外仲有三杯雞定食，好味到連相都冇影。同正宗台式餐廳差唔多，d雞好滑，但少少辣同鹹，仲有啲香葉味！ 仲食定食仲有跟飯同涼拌木耳同蓮藕，兩個嘅味道都唔錯。 另外仲買咗兩杯嘢飲，第一個就係打卡富士山特飲。上邊嗰層唔係cream好輕新好滑，但係冇乜味，似蛋白。下面就係藍色色素梳打，有少少波子汽水味。面頭放咗啲爆炸糖，下面嘅氣令到佢有少少火山爆發嘅咁，影完相就已經流晒。 紫薯latte就普通，有啲紫薯味，但感覺上都係用咗有色素嘅紫薯精。不過抵讚嘅就唔會太甜，咁樣唔會好漏。 最後就食過抹茶紅豆窩夫，自家製來講紅豆蓉唔算太甜，黑糖啫喱有驚喜。但係個窩夫就係夠香脆，有少少酥皮嘅感覺但又未做到一層層咁，可以再進步。

咁難得嚟到香港仔，梗係要搵間好食嘅黃店。 細細嘅鋪頭仔全部都係文宣，門口仲有口罩同消毒洗手液比有需要嘅人自取。 下午茶Menu有3款，都係$45。揀咗個炸魚柳，仲可以免費轉番薯條，再配埋汽水。我魚柳啖啖肉，完全唔係得炸粉。番薯條好好味，質素完全同beef Liberty個d貴burger店有得揮，好厚身但唔油，外面仲好香脆，内就有蕃薯嘅口感！ 另外仲order左個burger share,每款漢堡都配汽水。今次試余均益蛋黃醬牛脷漢堡，$75超大個好足料。雖然咸左少少，但牛脷好淋又厚，絕對唔係呃秤！

油麻地樓上cafe多到暈，要又靚又好味價錢又合理真係好少。💛 老闆話個舖頭名咁長 - 走過十萬八千里找到你，其實係因為啲食材全部都係唔同地方咁遠運黎，浪漫得來又好有意境。舖頭仲播住「想見你」首主題曲，成個感覺都好舒服。 由本土花藝師設計嘅乾花為主打，成間cafe都好特別，好似花園咁靚。晏晝就係文青cafe，夜晚就好有情調好浪漫。💐 晚餐分兩段時間，分別係兩個鐘。但如果人多只要提早同店主講，就可以留耐啲。主食、意大利麵同意大利飯分別都可以加$35跟多士同餐湯，連一杯<$40嘅餐品(可補差價)。 餐湯好出色，係三文魚海鮮章魚湯，超級足料，唔會係好水好淡，反而仲啖啖肉。雖然唔多但係就啱啱好夠開胃，不過個多士就好普通，只係普通一塊麵包。 餐飲揀咗呢個玫瑰抹茶latte，餐廳標榜用小山園綠茶粉，朋友揀咗焙茶，兩杯都好好味。飲到底仲有好多綠茶粉，feel到小店真係落足本。 大部份嘢食都好出色，特別要推介明太子貓耳朵，creamy得黎唔會好鹹，再加埋d飛魚子好有咬口，貓耳朵唔會好淋好麵粉，煮得啱啱好好煙韌。黑松露長通粉好creamy，同明太子一樣好味😍 蜆肉意粉嘅大蜆好fresh，但d洋蔥蒜頭可以炒香d再撈埋，依家好似分開哂同冇乜白酒香🤣 特別要提嘅係意大利飯，主廚話因為跟咗歐洲方法，所以會比較偏硬身，食唔慣會覺得有啲太硬。 我哋點嘅就係鵝肝南瓜意大利飯，啲飯粒就全部都有南瓜蓉（黃色唔係平時橙色）。 另外推薦香蒜豆醬，香煎挪威三文魚，超有趣！中西fusion得好好，雖然有啲似豆豉鯪魚嘅感覺，但真係好特別，三文魚煮得啱啱好。呢個定食仲包左配菜同蒸蛋，不過個配菜手拍青瓜就唔夠入味，可以再酸辣d。 另外都有試到羊架，因為係慢煮，所以就限量供應。一碟有三塊，調味比較輕，記得要問佢攞個汁，汁係自己調，有啲芝麻蒜香味嘅燒汁。 小食方面，推薦柚子蜜糖單骨雞翼，個皮薄得黎好脆，加啲青檸香味好fresh👍🏻 薯條就普通，黑松露鹽唔太均，得上面幾條有。🤣🤣 另外就介紹芝士年糕，外脆內拉絲，share食唔會太漏。不過就剩係得三塊，唔會話太多嘅。 基本上試哂成個Menu，覺得大部份都唔錯。建議大家都跟餐，因為啲嘢飲全部都唔錯。😍💕

山長水遠入MegaBox買嘢，梗係順便食埋晚餐。Food court 10/F有好多間餐廳，見到呢間日本野幾特別，而且價錢又好合理喎！ 主打竹筒飯，今次就試咗個鰻魚竹筒飯定食。老老實實個飯都幾失望，好淋，但又唔係話因為太多鰻魚汁，只係師傅煲飯放得太多水。鰻魚就普通貨色，就咁蒸熟，都係偏淋。而且呢個定食上菜速度勁快，order完5分鐘之後就有，感覺一早整定。 定食$89 入邊仲有茶碗蒸、冇味嘅湯、兩條枝荳，全部都好普通，抵就係抵食嘅。最好味就係紅豆糯米糍🤣🤣 另外仲order咗甜蝦、北寄貝、元貝同甲羅燒，元貝都新鮮，$68甲羅燒就剩係得啲即食蟹羔咁，係咁易燒左兩下。 Overall真係覺得好普通，係幾抵但係一次就夠。

Omakase平時食真係偏貴，見佢新開張有優惠，二人同行第二位半價就即刻book位。平日都要早成半個月之前book，假日更加要成個月！ 雖然Book位嘅時候request左要坐吧枱，但而家一張吧枱淨係比坐一半客，冇計要坐廂位。但欣賞嘅係佢唔係普通餐廳咁得枱，係似返日系餐廳咁要除鞋個款。 今次試咗Omakase 12貫，連前菜同甜品。 前菜就有茶碗蒸、麵豉湯同埋茶，但係侍應完全冇介紹係乜菜黎🤣不過茶碗蒸係真係唔錯，入邊嗰個茹味幾出。 壽司就分咗兩碟，每碟六件。上菜嘅時候今次就有介紹翻係啲咩魚，應該要喺邊件開始食起等等。老實講壽司就真係普通，只係得個帶子配橙皮碎比較清新，其他魚都唔算話特別有口感，但總括嚟講都係新鮮嘅。不過個海膽壽司就有少少失望，海膽嘅質素只係普通，而且紫菜就好淋，似係擺咗好耐。 之後個手卷係吞拿魚茸，成舊都係紫菜包住，如果魚生就真係冇乜鮮味，比較普通。 甜品係紅豆雪糕，雖然偏甜但係牛奶味都幾重。 買單除翻每人三百多d，以omakase 嚟講lunch真係好抵，但質素就唔算太突出。

💕旺角樓上咖啡室，蟲二喺活化左嘅上海街頂樓，順便可以行吓618，感覺有少少似南豐紗廠。 餐廳入門嘅時候要先量體溫，然後再由員工帶位，就算平日下晝去露天位置一早坐滿。 一開頭聽從而呢間cafe都係因為佢係上環3rd place嘅分店，對佢嘅pancake充滿熱切期待。 同一般空氣咁嘅厚pancake唔同，呢度sell嘅係比較實在嘅感覺。 今次order伯爵茶麻薯pancake，感覺上牛油味偏重，咸味竟然做出，相反雞蛋味唔係好出，有少少似加厚版嘅熱香餅。但個麻薯就好煙韌，連埋個pancake食有小茶香，overall都唔錯嘅。但佢得壹塊要$89就有啲貴，而且嘅伴碟只係一片片嘅提子，連平時嘅士多啤梨、藍莓都冇得食，感覺上有啲頹。 總體而言可以一試，但依家有太多主力sell pancake嘅Cafe選擇，下次反而可以試吓佢午市晚市嘅主食。

屋企人生日飯，父母未試過，決定近近地去新蒲崗食蒸海鮮。 有幾款套餐可以選擇，第一次食就是佢最抵食$368餐，都有成九款海鮮，最後係海鮮粥同甜品。 頭幾款海鮮都係由waiter姨姨serve，但有時佢會太忙，唔得閒幫我地拎出黎，搞到啲帶子同原條無骨東星斑就蒸過熟。 而呢間餐廳同其他嘅蒸海鮮專門店唔同，主要係食鮮味，唔會外加調味料等等。最好味就係星斑片同超大隻嘅瀨尿蝦。 主要食蟹嘅時候，老闆會好細心講解，又會問大家鍾意食公定乸，硬身嘅蟹膏定係軟身等。仲會介紹佢哋喺邊度入貨，點樣洗同埋點樣準備啲食材，睇得出真係好有心去經營。 最後已經勁飽，連最重要吸晒精華嘅海鮮粥都食唔落。已蒸海鮮黎講，性價比真係算幾高，值得一試。

芋圓小店，設每人最低消費$20。 本身打算食最signature二人share刨冰，但最後太凍放棄左，order左嫩仙芋奶凍，即係平時嘅仙草芋圓一碗$34，加芋頭，再加肉鬆蛋餅。 芋圓份量比較多，配料基本上有齊哂薏米、紅豆、花生、三色芋圓，同仙草底。如果鍾意芋頭可以好似我咁加$5額外多三大舊，不夠就偏硬，似就咁煮熟咁，唔係芋泥。芋圓都係有咬口，唔會淨係得粉咁。旁邊送一舊coffee mate奶精，但我冇加到。 之前d食評話主色一般，但蛋餅又幾香口同足料，未食飽仲有quota 都可以一試。