呢間舖嘅招牌裝滿哂燈泡，bling bling咁閃，仲有好多旗插放左喺門面，好有日本味，夜晚黎到一眼就會見到佢最搶眼。 餐廳有兩層，我哋被安排左坐上層，我哋個邊有四張檯，另外有一道門隔開左另一邊。我覺得呢個設計幾好，令每一個area嘅客都唔會太多，保持到環境清靜又坐得舒服，最啱同朋友黎飲翻杯傾下計。佢哋嘅服務仲好貼心，事源我哋叫左個辣味拉麵，佢建議最後先上，因為怕拉麵嘅辣味會蓋過其他幾樣食物嘅味道，令我哋食唔真其他菜式嘅味。平時啲餐廳多數都係快快手一次過上哂就算架啦，呢個細心位好加分。 炸日本甘粟餅- 上到黎仲係熱辣辣，差啲燙親口添呀。即炸嘅炸得脆就一定架啦，佢啲紫薯蓉好足料，好香紫薯嘅蜜甜味。外面脆入面就軟綿綿，再加上中間不時有啲粟子粒彈出黎，係三重嘅口感呀。 大分直送火炙平目魚邊- 師傅用火槍燒左一下表面，為平口魚邊增添一陣焦香味，亦都順帶出左佢嘅油脂香味。個底用柚子醬油汁去浸住，再有wasabi 喺面，兩者聯手減少左整體嘅油膩感。平目魚邊嘅肉好滑，好似啫喱咁一下就滑入喉嚨，想放喺舌尖感受多下都難，好蠱惑。 半熟龍蝦加龍蝦粥/龍蝦湯- 今餐嘅重點出現啦~ 首先龍蝦身嘅肉拎左黎做半熟。點為知半熟呢？就係稍為炙燒左一下龍蝦刺身，令到佢有啲位熟左，有啲位仲保持住刺身嘅狀態。熟左嘅部份會比較彈牙，而未熟嘅部份則會比較滑身，有啲似帶子刺身嘅口感。連埋面頭嘅海膽一齊食，一大陣海洋味喺口入面散發出黎，好鮮好甜呀！餐廳唔止用料靚，仲要處理手法都好強大。唔洗郁手都食到啖啖龍蝦肉，係王的享受。 食完之後，侍應會收翻個碟又將龍蝦頭煲粥或湯。咁我哋就分別揀左一湯一粥去睇下有咩唔同。其實大致上都一樣，不過湯會多啲配菜，而粥會多左米飯。佢啲飯冇煲到好爛，所以比起叫做粥，我覺得更接近係湯飯。龍蝦頭入面嘅膏入哂個湯入面，仲要入面都仲留有唔少龍蝦肉，好濃龍蝦味。啲菜同飯又吸哂陣味，好似食緊成隻龍蝦入肚咁。 極辛地獄拉麵- 呢個拉麵有50倍辣度揀，加錢仲可以去到100倍。我係一個愛辣人士，原來諗住挑戰下50倍啦，點知侍應同我講5倍已經係平時譚仔嘅中辣，於是我就嚇到縮左下，揀左5倍算。上到黎啲煙多到又再嚇多我哋一次，原來佢喺碗底放左舊石，受熱所以出咁多煙。呢個又係另一個貼心位，為左令碗麵保持溫度而花嘅心思。佢個湯都真係幾辣，有灼喉嘅感覺，而麵質就偏硬身。

九龍城除左泰國餐廳多，其實日本餐廳都好多。咁我同朋友今次就搵左呢間新開主打omakase嘅餐廳。佢由日本人主理，成間舖都係坐吧台位，大約有10個位度。細細嘅舖面拉近左我哋同師傅嘅距離，可以睇到佢準備野食嘅過程同埋由佢親自上菜同講解。雖然日本師傅嘅廣東話同英文唔係好好，但佢都好盡力咁解釋俾我哋聽，又會同我哋傾下計講下笑，好親切。呢度嘅節奏較慢，每道菜之間個銜接時間比其他omakase餐廳長，因為佢要你食完一道先再即炸另一道俾你，咁可以慢慢享受同朋友相聚嘅時間。 佢lunch有三個價位嘅set選擇，分別為$480/$680/$980。呢個價錢嘅omakase午餐黎講算好平，性價比一流。我同朋友就分別揀左$480同$680。兩個set雖然差左$200，但就足足差左三道菜。 佢檯面有preset 左五種醬，有胡椒、豬扒汁、白醬油、胡麻醬同埋柚子汁，師傅喺上菜個時會建議你點咩醬或者叫你唔好點，咁當然你都可以跟自己喜好點。一黎就俾左先付，有醬油醃牛蒡、醃黃蘿蔔同芥末淮山。三樣野都好爽口，當你等緊下一道菜嘅時候可以止下口痕又清一清口腔。 前菜上左一個蕃茄同菠菜嘅冷盤，佢將啲菠菜排到好似一條竹嘅形狀之後再喺面鋪左層芝麻，十分有心思。不過就咁食就比較淡味，要點胡麻醬先好食。佢碟中已經有醬墊咗底，不過對我黎講唔太夠，咁佢preset嘅醬就喺呢個時候發揮到作用啦，唔夠嘅人可以自己再加點。 前菜之後就上左個鹹梅湯，佢湯嘅味完全係來自粒梅，都幾濃味，但如果就咁單食粒梅就會偏鹹。 之後就輪到刺身嘅環節。 北海道帶子刺身- 師傅就話唔洗點任何醬汁，佢加左少少青檸皮喺上面，加埋帶子本身嘅鮮甜，成件食落好清新。 吞拿魚- 選用左赤身，厚切食落個口感好軟綿綿，不過略嫌有啲啲血腥味。 炙燒深海池魚- 佢淨係燒左層皮，但都已經將油香帶哂出黎，上面個幾粒魚籽咬開又多一重口感，呢個好出色。 燒大拖羅- 拖羅油香重已經唔洗多講，仲要燒佢，好犯規。佢本身有芥末喺面，可以去一去油膩感，令個人醒一醒。佢塊紫菜好脆，形成两種口感。 完左刺身就到串揚，第一次食omakase有炸串食，通常都係壽司多，幾有特色。仲要佢全部炸串都好好好好食！佢哋做哂主角，中意食串揚嘅朋友仔一定要黎試。佢會放塊包喺碟，但千其唔好食左佢呀，人哋係有第二個用途架！其實佢係攞黎吸油嘅，呢個位幾細心。 炸沙錐魚- 佢炸到外層酥脆但內層嘅魚肉仲keep到好滑，唔會乾哂溏，仲有肉汁出黎。重點係一條骨都冇，唔會杉口。 炸希靈魚- 本身我唔太食希靈魚刺身，因為食極都係腥，諗住試下佢熟左會唔會唔同啦，點知真係好大嘅驚喜。佢上面舖滿木魚絲，視覺上已經好靚。咬落去，佢上層嘅魚肉滑身，下層嘅一排魚籽有咬口，成個口感勁得意。重要一啲腥味都冇，令我對希靈魚改觀。 炸松葉蟹鉗- 佢有少少蘿蔔蓉喺面幫助去油膩，食落啖啖飽滿嘅蟹肉，仲要好鮮甜，唔係雪味黎。 半熟龍蝦配海膽- 表面有經灸燒過，海膽同龍蝦都好大舊好奢華，啲精華入哂個湯度，一定要飲哂個湯佢。龍蝦肉十分彈牙，一路咬陣鮮味一路出。 食事可以揀茶漬飯或者烏冬，咁我就揀左烏冬。佢用左好簡單嘅蔬菜做topping，再配讚岐烏冬。由於冇任何肉或腐皮等出油嘅topping，所以個湯頭好清澈。 最後甜品上左靜岡縣蜜瓜，依家應季所以好甜，仲要每人有三四塊，係一個好完美嘅落幕。

一個朋友想食串燒，另外一個朋友想食川菜，why not both then? 正所謂小朋友才做選擇，我全部都要！原本去左砵蘭街地舖個間，但個度好細，我哋四位等左半個鐘都冇位。之後就去對面樓上嘅另一間分店睇下爆唔爆場啦，點知即刻有得入。之前食過印象中冇串燒食，所以以為要放棄串燒嘅時候，佢居然有個串燒menu喺檯面！我哋就嗌左一輪串燒、水煮魚、辣子雞同埋鐵板肥腸。 呢度嘅串燒啲肉全部都燒到好乾，keep唔到啲肉汁，再加埋表面個啲調味粉更加係乾上加乾。啲菜可能因為本身都多水出就好啲，尤其係個茄子，上面鋪滿蒜蓉同調味粉，有軟綿綿嘅口感得黎又有少少咬口同香味，我哋轉第二場嘅時候都專登再叫多份外賣拎走。 而水煮魚入面可以食嘅料得大豆芽同埋魚片，仲要两樣材料嘅比例係7:3，大量嘅大豆芽喺入面。魚肉都嫩滑，但可惜有骨。大大條骨雖然係容易挑啲，但同埋大豆芽一齊食嘅時候因為口感相似，有一次差少少哽親，所以一定要小心啲咁食。個湯底係幾香幾濃嘅，不過見到好多油浮左喺面，令我有啲卻步。 辣子雞可以揀有骨同無骨，我哋懶人就梗係叫無骨。佢嘅雞肉好細粒，同雞軟骨差唔多大細。加上佢好多辣椒，食到個底用肉眼比較難搵到啲雞，要用筷子摸索一番先搵到。佢用左雞胸肉，但炸到好乾，加上佢嘅應該用左啲香料去做醃料，食落有種講唔出嘅怪味。好在佢量唔多，每人食幾粒都clear到佢。 最後鐵板肥腸可以用一個字形容：鹹。無論係肥腸定青椒洋蔥都係好鹹，當下酒菜食都接受到嘅，要就咁單食就勉強左啲。佢好在啲肥腸因為淨係得外層嘅關係，唔會好韌咬唔開，全部都好柔軟易咬又唔痴牙。 我哋最尾臨走都有再嗌少少串燒外賣，嗰一轉啲串燒全部都好辣，辣到食唔到。唔知係咪師傅喺两個鐘之內心情起伏大變啦，但質素控制下一致啲會好啲囉。最後每人食左300左右，都唔係平架。

收工想同朋友去居酒屋坐下傾下計，於是上網搵到呢間「朝」，據說係新開嘅，都想測試下質素。一入到黎已經有啲嚇親，呢度嘅音樂聲大到呢，仲要係播啲好hyper嘅日文歌，打破左我哋想靜靜地傾偈嘅期望，所以決定食少少野再轉場慢慢傾算。叫左一個牛肉壽喜燒、邪惡玉子燒、炸蕃薯甘條、西京鱈魚燒、燒雞泡魚乾同埋燒雞肉串。就咁睇都叫左幾多樣野呀，但最後都食唔飽咁走人，每樣嘅分量少之餘又冇主食，真係淨係啱啲人黎飲酒作樂，想填肚就可能唔太合適啦。 牛肉壽喜燒就咁睇中間個粒燈紅色嘅蛋黃好吸引，好想一下篤爆佢。佢入面有豆腐、魚片、菇同三四片牛肉等。想講個湯底真係好咸，啲壽喜燒汁落得有啲過多，好彩佢啲料少，食两三啖就食完。 至於燒雞泡魚乾好似燒到一半就拎出黎咁，個口感仲係軟冧冧嘅，冇燒到個面硬身，本身要慢慢咬再享受佢個香味出黎先正，呢個就咬一咬就完。不過個蛋黃醬救左佢，蛋黃醬真係同雞泡魚乾係絕配黎，两種甜甜嘅味合埋一齊令人欲罷不能。 佢個邪惡玉子燒點邪惡法呢？就係中間有夾到芝士。但我個晚食到嘅唔夠邪惡，中間嘅芝士少到唔係好食得到出，仲要拉唔到絲，視覺同味覺上都感受唔到。而且個玉子燒好甜，蛋味俾甜味覆蓋晒。 炸蕃薯甘條炸得幾脆嘅，不過每條都好瘦削，食唔到咩蕃薯肉同蕃薯香，而且同茄汁都唔太夾，反而點蛋黃醬仲好食。 西京鱈魚燒個魚皮好燶，食落唔係焦香味，而係真係有啲苦味。佢個魚有好多油脂，但魚油香出唔到黎。不過魚肉好滑又冇骨，一入口用上顎壓一壓就可以直吞喉嚨。 最後雞肉串算係最唔錯嘅一碟，雞肉嫩滑又保持到肉汁同雞油，中規中矩啦。

個日關門前45分鐘去到，啲姐姐係咁話: 我哋準時就要走架啦，起碼提左四至五次，聽起黎好似唔想接我哋呢枱咁。我哋坐都未坐低食，而且我哋都冇打算久留，都係諗住食完個糖水就起身，可以唔洗咁多番提醒。最後我哋都係關門前走左。 呢度原來有最低消費，好似每人二十蚊，我哋叫左招牌綜合芋香挫冰、嫩仙芋奶凍同埋原味蛋餅。 其實兩個甜品啲料差唔多，分別在於有冰同冇冰。料都幾豐富，有芋圓、小丸子、西米、紅豆、薏米同珍珠，挫冰會有芋頭肉添。佢啲冰係好大粒嘅冰黎，對於我呢啲牙齒敏感嘅人黎講不了，食左一啖就冇食，但個一啖都感覺唔到啲咩味，好似就咁含左啖冰入口咁。佢個仙草凍有俾個淡奶仔你去自己決定加唔加，咁梗係加左好食啲啦。佢啲芋圓同丸子類都好煙韌，但又唔會話要花好長時間去咬。整體佢嘅甜品都唔會好甜，料多到可以食飽肚，同人share實冇死。 佢個咸點蛋餅好香煎蛋味，仲食到蛋黃嘅香。個皮就有啲厚但料就有啲單薄，同出面台灣餐廳個啲冇得比，不過呢個價錢都抵嘅，喺出面一定唔會用呢個價錢食到。

因為朋友住呢邊，所以呢日入到黎冇咩事都唔會入黎嘅荃灣。呢條街一排都係大排檔，全部坐哂去室外，好旺場，要行到最尾先見到呢間韓國野。呢間舖面唔係好大，得七張枱左右，但聽講都可以坐出室外，但個晚就未見到有人坐。 我哋第一輪叫左安東燉雞、炸雞軟骨、辣雞腳同埋蔥炸雞。嗌完先發覺我哋嗌嘅野原來全部都係雞黎，笑死。雞，全部都係雞～ 安東燉雞啲雞係雞肉碎黎，唔係原件雞件，冇左啃骨吸汁嘅過程，喺口感上差左啲。佢啲配菜有薯仔、紅蘿蔔、椰菜同粉絲，全部都煮到好軟同入味，不過全部野都切得有啲碎，同喺韓國食嘅有出入，賣相都冇咁吸引。加上個汁過多，有啲變左做湯嘅感覺。 佢個炸雞軟骨有啲似港式嘅野食，面頭有灑左啲椒鹽炒過嘅蔥，夾埋一齊食一流。我哋有叫左米酒飲，佢個咸味最啱就係送酒。 我喺韓國食過嘅辣雞腳都係去左骨嘅，但呢度係鳳爪咁樣連骨煮，雖然餐廳省翻啲功夫，但食客角度就多左啲功夫啦。佢嗰醬十級辣，同辣雞麵個辣度有得比。我食左一舊都頂唔順要叫野飲，中意食辣或者自認食得辣嘅可以挑戰下。 咁多樣野佢個炸雞最好食，雞皮炸得好脆，而且雞件偏細，易食得黎啲雞肉又實在喎，唔會話得層厚粉。雞胸都唔會柴，仲保持到少少肉汁。炸雞上面有好大坨蔥絲同一個酸酸地嘅醬，同炸雞一齊食可以中和油味，一戰幾件都得呀。 食飽飽之後因為我哋想飲下酒傾下計但又唔想轉場，於是我哋叫多左個炸薯角同芝士粟米做下酒菜，佢個芝士粟米嚇親我，啲芝士拉哂絲仲要多過啲粟米，邪惡到一個點。不過就咁食會太甜，甜過糖水，送酒會好啲。 呢度嘅待應同老闆全部都係韓國大叔黎，想感受下韓國服務同家庭式料理可以黎試下，我見隔離枱叫咗烤肉都會幫手燒埋，服務唔錯。

呢間一睇就知係老字號嘅麵店喺公司附近，次次經過都坐滿哂人，舖面又有金剛同小儀拍飲食節目嘅相，難得今次行過有位就梗係要坐低試下。話哂都叫麵家就梗係要食麵啦，我就叫左個雞腸河粉。 佢呢度嘅湯頭好濃，仲要有陣油香，好似飲緊呀媽煲嘅雞湯咁，絕對唔係味精幫手整出黎嘅味。河粉本身又吸湯，每食一啖都有帶到啲湯入口。河粉其實一唔小心就會好易煮到斷開哂變左做河粉碎，但呢度嘅河粉煮得啱啱好，每條麵仲keep到同雞腸差唔多長度，可以享受到吸麵嘅樂趣。 佢碗麵嘅重點都仲未出黎就已經讚不絕口啦，哈哈。重點係啲雞腸呀！爽口得黎又唔會韌，一韌起上黎隨時咬唔斷直通你喉嚨，係一樣要細心處理嘅食材黎。佢仲要薄到同河粉差唔多，差啲分唔出佢兩個呀。廚師將雞腸清洗得好乾淨，唔會有內臟嘅腥味，要洗嘅洗走左，要留嘅又有留番喎。雞腸嘅油脂香散發晒出嚟，為湯頭增添一翻風味。 同行嘅同事話豬手飯都好好食，等我下次有機會再嚟試吓先。

約左一大班friend上party room玩，就梗係要買啲野食上去助下興啦。咁啱附近有outdark，就打電話叫左三隻炸雞外賣自取再行過去拎。十五分鐘左右食物已經準備好等緊我哋添。 我哋叫左最原始嘅原味、韓式甜辣味同埋蜜糖蒜蓉味。佢每隻雞送左一罐汽水，四個醬汁同埋一個醃蘿蔔。醬汁分別有甜辣、醬油、芝士粉同蜜糖味。其實叫個原味再點醬都已經可以，反而叫啲撈左醬嘅味仲貴啲啲，仲要原味跟啲醬同我哋另外叫個兩隻味一樣嘅 佢呢度嘅炸雞係無骨嘅，唔洗郁手整污糟隻手，尤其呢啲敏感時期，避免用手食係好啲嘅。食落啖啖肉好爽，仲要全部都係雞髀肉，夠哂滑，食雞就梗係食髀同翼架啦～ 佢啲雞脆就唔算好脆，個雞皮都唔厚，但啲肉夠實在，好滿足。我哋六個人食三隻都食唔哂。不過佢除左雞塊，仲有啲薯格同薯條跟埋，薯仔蓉好多，唔知我哋係食呢啲飽定食雞飽啦，因為就咁睇落去就薯仔配菜仲多過啲雞，啲雞差啲被淹沒左睇唔到。 食完雞再食啲醃蘿蔔會冇咁膩，因為有啲酸酸嘅味去清下你個口。但呢度嘅醃蘿蔔有啲乾水，冇咩酸味出，所以發揮唔到正常作用，我哋都係靠飲汽水解膩。

呢度係我最愛嘅一人邊爐店，以前番part time放lunch就算只係得一個鐘都成日走去食，因為佢真係又大份又好食。除咗邊爐，佢仲有好多款台灣野食，個menu成日都睇到我花多眼亂。 佢呢度有好多種湯底嘅鍋，麻辣、沙茶、蕃茄、壽喜燒、酸菜，甚至養生鍋都有。佢每個鍋嘅配料都會有少少唔同，大同小異啦。基本上都會有肉，中意食肉嘅都可以再加錢加多份，可以揀肥牛、豚肉或雞肉。 然後就要揀個主食啦，飯麵都有，其中最推薦嘅係佢嘅台灣手工拉麵。佢嘅麵質其實有啲似稻庭烏冬，扁扁地身，咬落好煙韌，仲要好吸湯汁，唔洗一定要盛口湯一齊食都食到個湯嘅味。 咁多個鍋入面，我最中意嘅就係麻辣三杯雞。佢個湯唔算好麻辣，反而咸味更搶，但都好濃肉湯味。最正係佢個雞，因為係採用左雞脾肉，所以好嫩滑，一路煮都冇變老。重點係分量好足，起碼有成隻雞脾俾左你。其餘配菜就有啲椰菜、金菇、日式豆腐、豆卜、粟米等，雖然話就話係一人鍋，但我暫時都未試過自己一個食哂。仲要可以用優惠價追加台式飲品，三蚊就叫到杯珍珠奶茶，埋單都係七十蚊左右，真係抵到爛。

咁啱朋友俾左幾張海港城餐飲coupons我，諗住出去食下貴野啦，但個日已經係啲coupons嘅過期前一日，想食嘅間間都full booking，仲要連walk in都唔俾。見到呢間有人排就排下啦，等左30分鐘就入得。呢度對住個無敵大海景，自然光透入黎營造左一個好開揚嘅感覺。週末呢度淨係提供brunch menu，咁相對平日嘅lunch menu貴百幾蚊左右，不過就多一個course。 呢度係食松露嘅專門店，所以每一道菜都會有松露嘅成份。我哋前菜分別叫左一個香煎鵝肝同埋巴馬火腿配無花果。呢两樣都係要另外加錢的。佢嘅鵝肝好肥美，仲要好香油脂味，一放入口啲油就咇晒出嚟，口感都好滑。為左中和油膩感，佢仲配左用紅酒燴嘅蘋果喺旁邊，爽脆嘅口感同酸甜嘅味同份鵝肝形成好大對比，但正正係咁先至夾得天衣無縫。巴馬火腿同無花果都係用左同一set formula去配搭，巴馬火腿嘅咸香同咬勁夾無花無果嘅清新同柔軟，又係一個絕配。作為前菜，兩樣都係運用左水果嘅清爽打頭陣，設計滿分！ 餐湯我哋都揀左松露牛肝菌濃湯，佢個湯打得好滑同埋好重蘑菇香味。如果成碗都係啡色視覺上冇咁好睇，餐廳仲專登喺面打左一層白色嘅泡泡，即刻靚仔哂，擺盤上都冇少花功夫。 反而去到主菜就有啲失望，我叫左澳洲m6和牛三文治，原本喺我腦海入面想像嘅係厚切嘅和牛啦，點知原來係碎到冇得再碎嘅牛肉片，上到黎我仲以為佢上錯左添，仲要两塊包燒燶到黑哂，360度點影都救唔到個種黑。食落個包係幾脆嘅，不過燒到咁唔脆都難。仲要啲肉缺乏肉汁，本身醬汁又唔多，搞到成舊野都好乾，仲要配菜係幾塊薯片，乾上加乾。另外一份就叫左牛扒，又係澳洲m6和牛，好普通，唔值得專登加錢叫。 個日嘅甜品係朱古力慕絲，上面有啲果仁咁，甜到我食左一舊就停左手。 雖然佢每碟菜都有片幾片松露上碟，但作用唔大，只係視覺上見到有松露，味覺上就唔係好感覺到。用完coupons最後埋單都要千幾蚊，如果正價食更加唔抵。