今日去咗鮨千壽食lunch，見到佢出咗新嘅丼飯set，仲有得自己揀咩要咩刺身，即刻試吓先！！！ 佢個餐可以自選五至七款配料，價錢係$108-$148，咁我就揀咗揀咗六款配料，總共$130，分別係： 🐠三文魚子（好大粒量好多，撈埋啲飯食真係一流 🐠帆立貝（超級甜！！！！ 🐠蔥吞拿魚腩蓉 🐠霜燒左口魚裙邊（入口即溶左 🐠章紅魚 🐠同埋師傅推介嘅一款時魚，好好食好推薦！ 除咗可以揀配料之外，其實佢個餐都仲包括左 前菜/ 沙律/ 麵豉湯，仲有一個甜品。 前菜同埋沙律水準都不錯，個漬物幾開胃。 個湯好正，上嚟嘅時候熱辣辣！最驚係有時啲麵豉湯太咸，但佢呢個就啱啱好。 整體嚟講，刺身全部都好鮮甜。唔使去日本都可以食到性價比咁高嘅刺身海鮮丼真係好滿足！

LUBUDS Group又有新餐廳進駐太古啦！這一次是一間充滿歐洲復古風味的意大利餐廳，裝修主要走深桃木色系，有種進入了意大利歌劇院的感覺，非常有儀式感。還要所有菜式用的碗碟都好fancy，顏色又鮮艷，來打卡絕對不會錯！ 一開始上了客薄脆片打頭陣，點黑醋加橄欖油一起食，脆卜卜的口感好像在吃薯片一樣，停不了口。再加黑醋酸酸的，完全激醒了我的胃。 Roasted Escargots 歐洲菜怎樣少得了蝸牛！之前去旅行食過有腥味的，所以都有點怕怕，誰知他煮得比當地餐廳更美味。用牛油和香草去烤的蝸牛一點腥味都沒有，反而牛油跟香草香鎖住在蝸牛肉入面，烤了以後還是係juicy不乾的，還把Q彈的肉質原封不動地保留住。烤蝸牛下面還有一層薯蓉，濃濃的奶香味加綿滑的口感係蝸牛的完美陪襯。 Wagyu beef cheek 佢用和牛自身的優勢強烈地表達給你知: 我就是和牛！原本和牛的肉質已經是偏軟腍，餐廳將其優點完全展現了出來。牛面頰被燉到軟就不用多說，基本上不用刀都可以吃，沒有牙的也可以吃。重點是他還保留了一絲絲的肉質，不會煮到牛肉全部散掉或軟爛，醬汁也全部入味，水準一流。 Lobster Ricotta Cheese Ravioli 一盤上面足足有半隻龍蝦，肉跟爪子都還要給你剝好，一口咬下去就是啖啖龍蝦爽彈的肉。還有龍蝦熬成濃郁的醬汁，感覺一口在同時吃十隻龍蝦。意大利雲吞的皮十分煙韌，吃起來像是手工製的麵皮，裡面包住了芝士，一咬開就食到了香濃的奶香。 Tiramisu 意式甜品中不能少的一定是Tiramisu。他頂層有一片薄薄的巧克力，要輕輕的敲碎它才能看到我們熟悉的tiramisu的樣子。最低層的手指餅偏濕潤，有吃到更深的咖啡味。

呢度嘅環境一流，可以喺落地玻璃睇到夜景，而且裝修整體感覺十分舒服，又幽靜，配合埋高級中菜式，好適合一家人黎聚餐。我哋同行嘅老一輩個個都讚不絕口。 蕎麥茶烘焙嘅味道好濃同好香，而且冇咖啡因，夜晚飲都好舒服。 手作糖山冰鎮咕嚕肉： 喺依家呢啲咁熱嘅天氣，呢道冰鎮咕嚕肉令我感到清涼愜意，加埋菠蘿嘅酸甜，成個感覺好夏日。佢外冷內熱嘅溫度做得好分明，令到口感十分豐富，而且一啲油膩感都有，是一道很好的開胃菜， 鮮菠蘿芥末蝦球： 這道菜將炸蝦球和芥末沙律醬結合在一起，將炸野嘅油膩感抹去之餘仲有一啲刺激。蝦球炸得金黃酥脆，蝦肉結實厚肉，咬落去唔會啖啖粉。 黑磚豆腐： 呢個一定係我食過最脆嘅炸豆腐！佢個炸皮真係好好食，驚艷左全張枱。佢完美演繹外酥內軟，咬開之後入面嘅豆腐係滑到爭啲跣咗出嚟。呢個黑白配嘅顏色都好有神秘感，就咁睇佢外表完全唔會估到佢係炸豆腐。 小炒皇： 炒得十分香口，又多材料，絕對係一道下飯的好菜，一口接一口停唔到落黎。 干煎鮮沙薑走地雞： 雞肉軟嫩多汁，啲雞油係煎嘅過程入面爆哂出黎，再加埋沙薑，有咩可能會唔香？佢下面仲要墊住好多洋蔥同蒜頭去吸味，吸收哂啲雞嘅精華，所以呢啲輔料都通通俾我食哂。 炸蠔餅： 我發覺佢呢度嘅炸野係最出色，無論係呢個炸蠔餅、炸蝦球、炸豆腐、咕嚕肉都係脆到不得了。但同樣地，佢鎖住左蠔肉嘅鮮嫩，咬落去係會爆水。而且佢炸到有一定厚度，食落係會十分滿足。

天氣開始轉涼，梗係要食啲暖笠笠嘅嘢，咁又點少得打邊爐同埋烤肉呢？但要決擇起上嚟又好有困難？呢度就可以一次過滿足晒兩個願望啦！仲要係任飲任食，無論係幾多個願望都可以滿足到啦！ 呢度最高級嘅menu係有日本鹿兒島嘅名物「薩摩和牛」放題。冇睇錯，真係*和牛*放題呀！「薩摩和牛」嘅飼養方法同生活環境都十分講究，以熊本米為飼料，飲用來自櫻島火山的火山泉水，造就咗佢完美嘅肉質，同時令佢變得與別不同。佢相對其他日本和牛嘅肉色會較紅，油分也更高，雪花脂肪豐富。由於「薩摩和牛」嘅養殖條件嚴謹，更着重牛嘅血統，所以一年產量稀少，格外矜貴。 一上枱就明顯認到佢同其他牛肉嘅分別，佢嘅脂肪分佈均勻，雪花紋理清晰，望起來粉粉嫩嫩的。食落去牛肉嘅嫩度同香氣都非常明顯，一咬滿嘴嘅油香滲出，油脂中帶有一股非常明顯的奶油香。而且肉質鬆化，幾近入口即溶，食完真係翻唔到轉頭！呢度有幾個和牛部位可以選擇，有赤肉、和牛粒、和牛薄切同埋牛肋條，仲有唔同醬汁嘅配搭，保證你可以試到唔同風味。當你食日本和牛食膩左，仲可以揀澳洲和牛、美國prime牛同安格斯牛等脂肪較少但牛肉味重嘅牛肉去平衡翻。 除咗高級嘅和牛外，其他肉類都應有盡有，如羊肉、豚肉、雞肉，仲有意想不到嘅高級海鮮！有甲羅燒、磯煮鮑魚、黃花一夜燒、燒鰻魚、帆立貝等，呢個組合係放題可以話係難得一見，極之豪華。當中，甲羅燒為我留下最深刻印象。佢嘅蟹膏同蟹肉比例適宜，每啖都會食到一絲絲嘅蟹肉，配合生蛋黃，入口綿滑和鮮味十足，而且份量一啲都唔馬虎。另外，磯煮鮑魚則煮得好入味，同時又唔會煮得過老，咬落口感彈牙，内裡鎖住陣海水味。 Shabu shabu方面，我哋叫咗個牛骨Cappuccino湯底，牛骨清澈嘅鮮味再加牛奶嘅乳香味令成個湯底好和諧，直接飲都唔會覺得太刺激，最啱就係放蔬菜落去吸哂佢啲精華。一碗熱湯連菜飲落肚，絕對係解膩神手，一定要同燒肉一齊食，強推！ 燒/淥嘢食攰到想做個懶人嘅話，呢度都有多款小食同刺身可以叫，例如炸物、天婦羅、串燒等選擇，仲可以行出去熟食專區拎啲精心炮製好嘅熱盤，當日就有避風塘魚鮫、牛舞招牌漢堡同埋炒茄子，聽講菜單會不時更換，咁就每一次嚟都會可以試到新菜式。呢度淨係食一次係絕對唔會食到哂佢全部選擇，所以佢都列入左我嘅二訪名單入面，勢必要試晒佢所有嘢！

今日又嚟到九龍城搵食，其實九龍城除左泰國嘢食，仲有好多日本隱世餐廳值得發掘。呢間渡邊屋前身係一間壽司外賣專門店，經過裝修翻新之後，搖身一變做壽司Bar，可以堂食之餘仲可以睇住師傅即場製作自己份order，係餐廳對自己品質同衞生嘅信心表現。不過座位不多，只有五個，最好就book定位先。佢位於十字路口嘅交匯點，燈火通明嘅店面令四方八面嘅人都會注意到佢，位置十分易搵。雖然店面轉左型，但當日嘅外賣order一啲都唔少，應該係街坊之間都受到一定程度嘅愛戴。 北海道刺身丼 食日本野一定唔少得刺身，佢呢個北海道刺身丼有帶子、海膽、三文魚、三文魚籽、油甘魚同間八魚，一次過滿足晒六個願望。重點係佢每樣都係厚切，講緊係起碼有一隻手指咁厚嘅厚度，食落滿足感加倍！佢嘅飯粒係偏實嘅質感，符合我個人偏好，唔會一夾就散。不過如果唔中意壓到實嘅都可以同師傅講聲，睇下可唔可以調節，能夠同師傅即時溝通就係壽司bar嘅好處。 本鮪赤身蔥吞拿魚腩丼 呢碗丼有吞拿魚蓉同赤身兩款，佢嘅吞拿魚蓉好綿滑，連埋中間隻蘭王蛋一齊食，簡直係滑上加滑，撈埋啲飯食一流！赤身部份雖然係唔夠腩嘅油脂多同香，但只靠佢冇筋同鮮甜呢兩點都已經夠哂。 火炙壽司盛合 三文魚/油甘魚/帶子/左口魚/鰻魚/赤蝦/原條海鰻 居然鰻魚都有兩款，分別係照燒汁燒同埋燒原條海鰻，燒到個表面微焦，有少少脆口，拿捏得好好，調味方面亦都好足夠。左口魚都一樣，燒到啱啱好夠啲油脂爆出黎但又唔會爆到有油膩感。赤蝦上面配左個辣味嘅醬有驚喜到我，放入口之前完全唔會估到係會有辣味出。油甘魚上面就配左個柚子醬，成件事即刻清新翻。

呢度嘅午市係專食點心嘅點小館，一到晚市就會搖身一變，變做專食烤魚嘅旺旺烤活魚。除左烤魚，佢仲有酸菜魚、雞煲同邊爐，多人嘅話可以一次過滿足哂咁多個願望。 首先，不得不提嘅係呢度嘅服務真係一百零一分。我哋對烤魚嘅魚種選擇都唔太熟悉，店員好有耐心咁逐種同我哋解釋佢哋之間嘅分別。我哋當中有一位朋友唔係好食得辣，佢又會向我哋介紹同推薦湯底，對待食客十分有耐心。 呢度嘅烤魚總共有三種魚可以揀，分別係魽魚、筍殼魚同埋沙巴龍躉。根據待應哥哥嘅介紹，三種魚都係偏少骨，得條大骨。頭兩種嘅肉質都會係滑身，而龍躉嘅肉就會厚身同彈身啲。Size黎講咁梗係龍躉贏哂，而筍殼魚就會偏細條。最後綜合哂咁多樣野，我哋揀左魽魚加香辣湯底一試。佢個湯底可以揀辣度，咁我哋就揀咗BB辣，唔食得辣嘅朋友仔都接受到。 配菜方面，我哋足足叫左7樣。佢本身個湯底入面都有白蘿蔔、豆卜、炸蒜頭、金菇等配菜。其中酸菜係佢推薦必加嘅，我哋一食就表示十萬個認同。佢個酸菜本身個酸鹹味豐富左個香辣湯底，而且勁吸湯，又可以中和到個辣油嘅油膩感，我都強烈建議一定要加！ 響鈴周圍都有，但係咪間間都會翻炸出嚟俾你？佢呢度就會！炸完之後更加香口脆口，唔會話一浸落去就冧哂，吸湯之餘仲脆身。 呢度嘅薯粉係幼身同薄身嘅，比起出邊厚身同粗身薯粉更加吸湯，唔使煮好耐都已經入味，仲要係保持到煙煙韌韌。 呢個拼盤有兩款餃子(韮菜餃、水餃)同埋雲吞，全部都係手工餃，食起上嚟皮薄餡多，入邊嘅蝦仁、豬肉、菜都好足料，仲唔會一煮就散開晒。 佢個肥牛係手切的，就算淥耐左食落都嫩口，肉味都有喺度，不錯不錯。 呢個蝦餅震驚咗我哋，我哋一致認為係食過最好食嘅蝦餅。佢係即刻炸，炸到好脆，而且佢嘅蝦肉係打到超級彈牙，好厚嘅一塊，入邊仲會有啲細細嘅蝦肉仔，俾到你好豐富嘅口感。

收工已經夜一夜，想食個宵夜同同事吹下水，但好多舖頭都收10點。附近呢間新開嘅串燒店開到凌晨2點，就算收工收得夜都仲可以有排坐。佢有一排L型6個位圍住個廚房坐，隔塊大玻璃就係廚房，一覽無遺。始終係燒烤，油煙都比較大，玻璃上有不少油漬殘留，而且煙霧好多時直接由廚房出到黎舖面，通風同環境都有改善空間。 呢度menu嘅串燒種類好多，但就未必樣樣有，點餐之後如果缺貨佢都會通知一聲。不過因為選擇多，好容易就可以揀到其他想食嘅，哈哈。仲要有季節性menu，可能每次嚟都會有新嘢食。就好似今次我哋嗌咗一個麻辣手撕雞烏冬都係Special Menu嚟。佢嘅湯底麻味好夠，但又唔會好辣，烏冬同配菜全部都好掛湯，雞脾肉又好嫩滑。重點係份量好足，唔止宵夜，當做一餐晚餐都得。 講起雞，佢哋嘅雞翼燒到好Juicy，一咬落去啲肉汁咇晒出嚟，必叫呀！雞軟骨串燒連住少少雞肉，爽脆嘅口感無疑係我最愛。燒雞腎就彈牙有咬口，調味做得好好，一啲內臟腥味都冇。但雞皮就有少少可惜，燒得未夠脆，不過雞油都正嘅。至於其他肉類，例如一口牛同埋牛舌都燒得出色，唔會燒到全熟同乾身，仲會見到中間係粉嫩嘅顏色，但因為都係厚切，所以都有啲難咬開。串燒有連埋一個類似泰式燒烤醬一齊上，酸酸辣辣咁，我同同事都覺得本身串燒已經好入味，睇自己個人喜好，可點可不點。 對於燒茄子有少少失望，個人認為燒茄子嘅精髓就喺蒜蓉度，但面頭嘅蒜蓉疑似煮得太過火，會帶苦澀味。 最後係我今次最欣賞嘅牛油燒雜菇，佢嘅蒜蓉同燒茄子嘅唔同，好香。再加埋牛油嘅香味，就算之後食食下翻轉頭再食佢，凍咗都一樣好食。仲要份量好多，食極都唔見底。

呢日收工撞正港鐵壞車，比平時遲左2個幾鐘先翻到屋企個邊，嬲嬲地決定食翻啲好野黎補償下身心。聽講太古新開左「穴」，就決定一於試新野！ 頭炮就梗係要刺身先夠消氣，所以就叫左一個刺身拼盤。佢入面有8種刺身，有三文魚腩、牡丹蝦、油甘魚、北海道帆立貝、章紅魚、魷魚海膽卷同鯛魚。佢附有一個酸汁係專門點白身魚，入口個下個酸味會一下湧上黎，但之後會有一股清新感跟上。白身魚本身帶有清爽嘅肉質，個酸汁令佢更fresh。整體刺身都好幼嫩鮮甜，夾埋佢底下個啲海草食仲會有多層口感。講到口感，咁多樣刺身入面最出色嘅莫過於個魷魚海膽卷。魷魚爽脆嘅口感再加軟綿綿嘅海膽，一路嚼魷魚一路有海膽味滲出來，加長左海膽嘅賞味時間👍🏻 之後就上熱菜，首先係天婦羅拼盤，入面有天婦羅蝦、蟹鉗、魚同蔬菜。佢嘅炸粉做到好薄一層，就咁肉眼睇都可以穿過炸衣睇到入面，但食落都係脆脆的。而且入面仲保持到好juicy，好似蒸出嚟嘅效果咁，每樣食材最原始嘅味道都仲喺度，唔會俾油味冚過左。 串燒部分我哋叫左2串，分別係燒雞腎同埋鵝肝釀雞翼。佢提供左三種鹽俾我哋點，有普通海鹽、綠茶鹽同埋咖喱鹽，後者對我黎講好新穎。綠茶鹽真係會有淡淡嘅綠茶味，但係理應更加重口味嘅咖喱鹽我反而就食唔出咖喱味。佢嘅雞腎好爽脆，唔會話好難咬，幾香口。燒雞翼個雞皮燒得好脆，仲有好多肉汁，一咬落去入邊鵝肝啲油湧晒出嚟。鵝肝好香同好肥美，係釀滿晒成隻雞翼，一啲都唔輕手，但加埋雞翼釋放出來嘅油，對我黎講有啲太Heavy。 最後就梗係要食啲主食先夠飽，我哋叫咗明太子松葉蟹肉石鍋飯，明太子同蟹肉嘅份量都好足，撈勻之後啖啖都食到料。不過蟹肉味有少少俾明太子味搶左，唔係太出。明太子嘅咸味好適中，重點係咬爆佢個口感好正。另外個飯因為係石鍋上，仲有飯焦痴左喺底，燶燶地仲香。

呢間新開嘅燒肉店喺旺角同油麻地交界，有一人套餐、二人套餐，亦都可以單點。單點嘅話仲可以揀唔同重量唔同價錢，可以少食多款，啱晒有選擇困難症嘅人。店內仲整左啲一人位，有塊木板隔喺枱中間，咁同對面嗰個就唔會你眼望我眼咁燒。啱哂突然想食燒肉又搵唔到伴嘅時候，就算自己一個燒都唔使覺得尷尬。
我哋2個人就叫左極上二人盛合，牛豬雞都有齊，牛肉仲要係A4級和牛，仲有牛油雜菇、2個沙律同湯、飯，都相當豐富下。佢嘅醬料有黃金燒肉汁、鹽味燒肉汁同胡麻汁，同埋有岩鹽同胡椒提供，試哂咁多隻，隻隻都同啲肉好夾。呢度仲有Sake飲，一瓶仔都係$48，仲可以揀熱上，配埋燒肉成個人暖笠笠。

A4日本黑毛和牛肉眼
好大嘅一塊肉眼，差唔多有2隻手掌咁大。啲雪花紋理好靚，分佈得好均勻。雖然係大塊，但由於係薄切嘅關係同埋佢嘅油脂好搶火，一放落去基本上就燒熟了。佢嘅油脂好香，入口即溶。不過建議最好點燒肉汁食，如果唔係油脂入口嘅時候可能會覺得有啲膩。

A4日本黑毛和牛牛小排
新店開張做緊個優惠，Like舖頭社交平台免費送牛小排2片。雖然係免費，但一啲都唔係hea你，都係A4級和牛黎！食落同頭先塊肉眼好似，感覺係肉眼嘅縮細版

A4日本黑毛和牛肩胛
牛肩胛嘅油脂部分就相對少啲，而且肉色都偏深紅色，但口感都仲係軟冧嘅，包飯食一流。

極上美國牛小排
雖然唔係和牛，但都好高質，照有雪花紋理。

牛板腱
食完咁多有油脂嘅，輪到呢款冇油脂，肉質偏硬身，但勝在重牛味。

日本黑豚腩肉
佢嘅脂肪同瘦肉嘅比例幾乎係2:1，豬油喺口入面冇牛油溶得快，所以帶黎嘅罪惡感比牛油大好多，個人黎講覺得太肥。

雞腿肉
雞肉好嫩滑，但冇乜調味，要另外點醬食先好食。

和風湯
居然唔係上味增湯，而係雞蛋海帶湯。味道偏清淡，可以中和翻燒肉嘅油。

煙三文魚蕃茄嘅油醋汁沙律
呢個沙律有啲配搭失衡，煙三文魚本身都帶油，個油醋汁係油上加油，令到沙律冇左佢嘅清新感。

胡麻醬豆腐仿蟹柳沙律
又係嗰醬有啲出事，主要係落得有啲重手。配豆腐都還好，但滲落啲沙律菜度就有啲鹹。

久違地想大食一餐，最佳選擇就梗係食放題啦。喺放題集中地旺角入面，今次揀左呢間喺正地鐵站出口隔離嘅御滿屋日本料理。等左一陣已經可以入座，一入去會經過一個沙律bar、炸物bar仲有日式湯，喺等第一輪野食嚟之前出去拎一轉就啱啱好，可以食下啲清新嘅沙律開開胃。佢啲沙律菜好新鮮，口感爽脆，味道又帶清甜，再加少少魚籽同海螺，唔使任何dressing都好好食。佢另外仲有甜品櫃同飲品櫃可以任拎。 個人認為食放題最緊要係魚生，呢度淨係魚生都已經有11款，仲要有係一般放題都好難見到嘅吞拿魚同大赤蝦，當然唔少得我最愛嘅三文魚、油甘魚同埋帶子。我每款都有叫哂嚟試，而佢上嘅數量同我哋叫嘅一樣，冇話偷工減料。而且刺身全部都好肥美，件件都厚切大大件。食落係有魚生嘅鮮甜味，絕無腥味或雪味，入口又滑脫脫同冰震嘅涼快感，我滿足到encore左三轉呀！ 除咗魚生，炸物都係唔可以缺少嘅一環。佢嘅炸物上到嚟都仲係熱辣辣燙口嘅，脆就唔洗講啦，佢仲要係外脆內軟，無論係炸蝦定蔬菜天婦羅，佢都keep到軟軟又juicy嘅內在。仲要配埋蘿蔔蓉同埋天婦羅醬汁，幫助解膩一流。我個人極度推薦佢嘅芝麻雞翼，佢炸得脆得嚟但係個雞皮一啲都唔厚，皮入面嘅雞肉又可以保留住啲雞油，真係好正。 串燒都唔遜色，有厚切嘅燒牛舌，係厚切呀！燒完都仲好軟冧，好易咬開。仲有燒蝦，鹽燒鹹鹹地咁再加彈牙嘅蝦肉，同刺身完全係兩種唔同嘅享受。 熱鍋叫左個牛肉壽喜燒同埋清酒煮蜆，壽喜燒嘅汁略嫌有啲太甜，但清酒煮蜆有驚喜到我。佢啲蜆肉粒粒都好飽滿又冇沙，而且個湯底好清好鮮，我見到隔離枱仲誇張到一次過叫三碗，嚟到必試呀！ 鐵板燒料理我哋食咗和風炒雞腎同埋牛柳粒，兩隻嘅醬汁味道有啲相似，都偏比較濃味。不過食下清淡嘅嘢都需要啲濃味嘅去衝擊下，所以感覺都唔係太差。 最後甜品淨係食咗雪糕。佢呢度有Häagen-Dazs雪糕食，仲要冇quota限制，又唔會剩係得雲呢拿、朱古力、士多啤梨呢啲咁單一又行嘅味揀，我食左個salted caramel cappuccino，成件事好滿足。