知道呢間cake shop之前喺樓下. 都幫襯過1-2次, 今日行過估唔到佢搬左入舖! 間舖裝修得好有style, 同一般cake shop好唔一樣呀~
今次買左佢地新出個扭計王, 個造型好特別, 大人細路見到都好surprise!真係好少喺出面見到呢款蛋糕架!
 蛋糕入面係阿華田味, 好好味呀!又唔會太甜...只係上面個lego太實的的啦, 要慢慢食. 不過剩係影相都呃哂Like!!!整體都好滿意!!!

近期好中意去灣仔一帶嘗試佢嘅特色小店, 今日去左cocoexpress, 可惜入到去已經無咩位, 只好坐喺佢backyard張枱啦, 以為可以慢慢坐, 點知越黎越多人,其實已經過哂食飯時間, 估唔到都甘多人, 所以食完後避免其他人等甘耐, 唯有急急腳走, 希望下次可以坐耐d..

食左佢個salmon brunch set,  個salad好fresh, 麵包如果厚d就會滿足d.蛋都炒得好滑..最出名嘅coffee, 我飲cappuccino, 果然好香濃.希望香港可以多返d呢類型有heart嘅特色小店啦, 唔想要全街都係大集團經營嘅食肆啊!

整條蘭杜街星街一帶真係俾人感覺好 chill out 好舒服, 覺得自己好似喺外國一樣! O delice係其中一間想試好耐嘅食店, 2點幾去到, 人唔多, 叫左個cheese and shirmp galettes, 蒿麥味都幾濃, 不過芝士勁多, 唔夠香, 食過一次夠了...呢個香草pasta都幾好, 有d mozzarella cheese喺面, 無甘單調, 蠻配合的!下次想hea下都可以再去, 感覺不錯!

是日去左灣仔做野, 5點左右同同事決定過黎川善茶居試下, 久仰大名終於黎到, 5點都有4-5人等緊, 入去望下個環境, 開頭睇相以為只係特色, 我覺得可以用 "求其" 黎形容, 所有擺設完全唔配襯, 高枱襯矮椅, 矮枱又襯返高椅, 想點呀? 算, 可能係食物真係好特別呢....叫左杯mocha snow white, 雪糕唔滑不特止, 入面充滿冰粒, 肯定係用好大眾到唔大眾果隻牌子, 勁失望...呢個sizzling brownie 個presentation 係有gimmick嘅, 但個雪糕真係扣哂分, 仲要$78!!! 身為綠茶愛好者, 今次真係好失望呀......完全係唔值得山長水遠黎食 >.<

5點幾已經排隊攞籌, 好彩入到去食唔駛再等第二輪, 其實餐牌選擇不多, 都係食人氣推介果幾款!水冷麵麵質很有咬口, 同埋真係好冷啊!這carbonara年糕沒想像中好食, 都係傳統味道比較吸引.總結, 試過一次算係了左心願, 有排都唔會想再去...

久仰大名嘅Viatokyo 今日終於食到了, 叫左呢個sample set, 個綠茶雪糕好creamy, 好滑..抹茶味剛好, 不會太苦澀但又充滿抹茶香味, 兩旁嘅甜點令唔駛只係食雪糕甘悶, 食完已諗定下次幾時可以再黎了!

拉麵已經去到飽和, 拉麵店只可靠一些Gimmick 吸引新客, 見到雜誌都有報導呢間麵店同Hello kitty crossover, 好想去試下, 今日就去試!
店入面真係好hello kitty, 無論牆身, 細至筷子套都係hello kitty, 真係好似至身hello kitty cafe一樣。麵黎到, 個碗同塊紫菜都有kitty圖案, 呢個麵只限蝦湯底, 其實我想食佢個醬油湯底多一些, 麵有陣鹼水味, 咬口都ok, 掛湯能力一般, 湯底好清, 想食濃湯底的話, 就去錯地方了。
我諗下次佢要有更大gimmick先再吸引到我了.............

星期六, 同老公出去食個早餐, 諗起牧羊少年係個好地方, 就即刻揸車黎食, 之前食過一次all day breakfast,其實係無咩特別, 志在價錢ok, 今次試佢呢兩款早餐, 我選了窩夫配抄蛋, 個窩夫係最值得一讚, 好香脆, 入面又好軟熟, 老公果個pancakes就真係無咩特別啦, 30幾蚊一份, 我覺得都ok啦, 係份量細左少少, 不過環境加番分,想有個relax sat breakfast, 我一定會諗起佢!

聽講呢間店坐得幾舒適, 私人度極高, 最岩自己一個人去用餐,果然唔駛等位!叫左set lunch入面嘅海鮮丼, 再加個豚骨湯拉麵, 先黎拉麵, 當時在看自己的電話, 完全唔知食物已經到左, 侍應不發一言兼大大力放低食物...日本餐廳都好少服務態度甘樣。麵完全無質素可言, 無韌度, 淋"patpat",湯唔夠熱。個海鮮丼唔係用珍珠米, 醋味太多, 份量超勁(只係飯份量) 刺身還算新鮮。食完, 侍應問可唔可以拎走, 但佢只拎走d碗, 桌上嘅tissue, 食物殘渣完全無諗過拎埋走, 到我杯咖啡黎, 另一個侍應見到都唔會拎走, 照擺杯咖啡喺堆野隔離!咩事呀, 叫埋單侍應亦都點點頭, 不發一言的!呢間野喺米要保留私隱度高到侍應都唔須要出聲?

今日放假, 同老公去食, 入面多數女顧客多, 老公甘大份, 好似坐得唔係好舒服, 不過佢叫左個all day breakfast, 個樣都幾滿足.其實食物就無咩特別, 賣相幾豐富嘅,呃得下人, 不過80幾蚊, 米話唔貴!最欣賞係佢個蜜糖單骨雞翼, 好好味呀!!!個綠茶latte好靚.....不過唔夠熱,幾失望,綠茶味又唔夠, 又係得個睇字..凍朱古力個賣相幾靚..係..只係賣相靚, 米係普通一杯凍朱!HAHA佢d野甘精緻, 唔好理佢好唔好食, 心情唔好得閒去下都心曠神怡嘅... ...