雖然我唔係特別鍾意魚湯，但以前食過魚米家，鯛魚湯拉麵等等既鋪頭都覺得ok，平日經過見呢間店見係用稻庭烏冬，又喺外賣平台做緊100減50優惠，所以試下，點知就中曬伏。 去攞外賣既時候一入鋪頭已經出奇地腥，又無咩堂食客，已經心諗今次大鑊了...攞到番office 一打開，好大陣奶臊味🤢，加上魚湯腥味，我直頭驚臭親其他同事。本身個烏冬都唔平架，成100蚊，唯有夾番起所有烏冬，再落街買枝麻辣鮮露，當撈烏冬食。不過，最後都只係夾硬食左一半就算🤮。

相信睇過上兩篇有關牛排廚師發板既食評，大家都會心思思想去試，而我就係中左伏既一位。經Togeda 預訂去食生日飯，點知大失所望，食到一肚氣。因為6點嗰輪已經滿座，訂左8點，去到其實得幾枱，不過所有野食都等左好耐。首先牛他他係份量十足既，但係味道上無咩特別。然後齋啪薯條半個鐘，先上一個屋企罐頭忌廉湯都好味過佢既餐湯。經催促後，就好似茶記咁，上左餐湯30秒就上牛排。你以為配搭牛排會好似上兩篇食評咁有曬鹽盒，薯條有6款醬汁？咁精緻既服務得賣廣告既打手先有。我地得到既只有一碟鹽，而且牛排多筋，質素絕對唔可以稱之為omakase 之後到第二部分炭爐燒牛排。啲牛既質素同去食放題打邊爐款式差唔多，超薄切，好鞋，而且無牛味，亦無人黎講解唔同牛既部位。明明其他枱一人一爐，我地就3人兩個爐。其實都唔緊要，燒得起咪得，點知一塊薄薄既牛要燒5分鐘😓，問下負責人，佢竟然話今晚實在太忙唔好意思(得少過5枱客)。到最後，因為呢度唔肯安排喺甜品上面寫生日快樂，朋友唯有特別叫左呢度既斑蘭蛋糕同我慶生，點知上既時候蠟燭都無，唯有我特登問佢攞。唉，好後悔比食評呃左，訂左既祝大家好運。

岩岩喺網上面搜尋旺角周邊cafe, 介紹呢間黃店諗住，見野食外觀唔錯就想黎試下。當時12點半，座位尚有，外面零個人等緊，我一入去店員知道我兩位就叫我番出去等人齊先入，因為我亦都未知我朋友位置，所以好合作咁出去問左先。之後再入多次去，表明朋友都喺附近，差唔多到，佢都堅持要我企喺出面，人齊先比入。其實佢可以比我喺bar 枱側邊坐住先，齊人先坐落枱，態度可以好少少。好啦，既然你咁堅持我都唔勉強，祝你日日生意都好似今日咁。

首先，餐廳分兩大部份，可能因為人手關係，佢地將所有午餐客人都安置喺同一地方，令人覺得去左酒樓咁嘈，窗邊亦無咩枱係容納到4位，所以享受唔到靚境，而且玻璃窗亦幾污糟。另外如果佢願意開放埋餐廳另一部分，係有比較大既枱可以比我地坐放埋袋，咁就唔使去到一間中上定位既餐廳都坐得半張櫈唔太舒服。 另外上前菜前，侍應漏左我地個麵包，到我朋友個湯都飲埋先上，我估呢樣野都唔應該喺呢間叫Prime 既餐廳發生。 上甜品前，唔知點解收曬我朋友既碟又唔收我既就開始上佢地既甜品，服務真係麻麻 一間本身sell 環境既餐廳，境又無，坐又唔算舒服，服務又麻麻，野食亦平平無奇， 所以唔會推介任何人黎呢度聚會。

而加去食飯當然想支持下黃店先，不過有陣時作為一個消費者，真係撐唔落 疫情初期想食晚市，無訂枱，當時眼望有一半吉枱，但係職員就話已經full 左，等位要半至一個鐘，咁當然無等啦，但係當我同朋行去日常料理嗰邊(大概5-10分鐘後)坐低之後，桔梗就打番黎問我地要唔要枱🌚 自此之後都心入面有少少芥蒂 今次喺旺角附近，諗住比多次機會試下， 揀完野食，出到去counter 岩岩好2:00 問位黑面女收銀仲有無得加10蚊要咖啡，佢就一臉不耐煩，望下個電腦mon, “嗯...”然後就係咁到左2:01分”已經過左鐘喇喎” 嗌完野食已經一肚氣，意粉同咖啡之後仲等左半個鐘先到。 其實已經唔係rush hour，會唔會係場地係真係太大，open kitchen 太細handle唔到咁多單呢？負責人可能要諗下辦法 然後意粉賣相就唔錯既，不過overcook 杯Dirty 都正常好飲 其實其他樓面職員都好禮貌同helpful, 好可惜一粒老鼠屎就會壞左成煲粥 唔會特別再去

話說一路都無留意呢間舖頭，但係自從見到小店有參與罷工之後，就記住左之後要黎試下。下午茶時間無咩人流，另外枱同枱之間有距離，坐得幾舒服。今日order 左下午茶既蒜香炸雞翼同加多左份黑松露薯條。蒜香炸雞翼唔係落粉炸嗰隻，比較似煎雞翼，味道同pizza hut既一模一樣，好好味！另外雞翼仲跟左沙律菜，係羅馬生菜嗰類，唔係普通西生菜加生洋蔥絲，非常有心。黑松露薯條都非常有驚喜，估唔到本地西餐小店會有咁重黑松露味既薯條賣！我好好彩食左最尾一份，之後入黎既人無得食🤣！

其實我從來都唔食egg Benedict，今日諗住試下因爲有我鍾意既蟹肉同牛油果，真係令我大失所望。menu 上面係寫住Avocado crab meat egg Benedict 一上菜，係一粒牛油果肉都無，得奇怪酸甜味既牛油果汁，仲有一大舊未變成絲既蟹柳。係！係蟹柳！仲要係最難食最cheap 嗰款魚肉蟹柳🤢🤢雖然我都唔期望你有好多蟹肉，但係你都唔係用啲咁既蟹柳黎敷衍我呀？一間環境咁好，收費亦都唔平既餐廳竟然會上啲presentation 咁差既野食，真係有好大落差。而且，egg Benedict 個蛋黃竟然係全熟。 仲有，我地有向經理反映番 佢黑住面咁回應: 係呀我地係用蟹柳架，都有啲蟹肉既。你做服務業架，可唔可以答得好啲講句唔好意思令你既客人就算食緊啲好難食既野，但係個心都舒服啲？另外，朋友們都叫左all day breakfast 同綠茶卷蛋，都係麻麻地。下次唔會再幫襯🙅🏻‍♀️