今日一個人自己早收工，即刻諗起石門沙田一間燒味店，記得疫情時我差唔多一個月都會嚟一次，佢嘅叉燒我真係覺得全香港最好食，每次同朋友講起燒味店，我一定提議佢哋過嚟試一試。 由於好耐冇食過，今日再過嚟買一個叉燒飯同埋一個燒鵝鵝頭，返屋企自己飲杯啤酒食飯。 返到屋企一打開盒叉燒飯我已經呆咗，究竟俾咗啲乜嘢？係肉醬定係梅了嘅叉燒？ 成盒飯好似打咗風咁亂七八糟。 先唔講味道，味道嘅嘢好個人，所以我淨係講賣相同埋肉質，叉燒食落去毫無質感，好似食緊肉泥，佢嘅肉質真係十級難食，唔知道係咪落咗好多肉鬆粉之類，有一半叉燒並不是齊整的，好似係將啲肉用刀背拍到爛咗，然後搽上叉燒醬，咁就當叉燒，如果叉燒有問題，唔明白點解斬叉燒個師傅，會拎出嚟賣，咁樣真係害死佢。 記得佢開業初頭我真係來得好密，而且我都有係Openrice分享，希望如果老細見到留意一下。 另外我都嗌咗一個燒鵝鵝頭，唔知點解佢嘅切法同以前唔一樣，佢呢個好似係滷水鵝嘅切法，但係因為燒鵝嘅關係，佢啲肉係比較乾身，咁好難食。 另一方面佢嘅顏色亦都唔一致，懷疑係合成出嚟嘅。而且咁啱得咁蹺我食頭兩件感覺有沙粒！究竟係運送途中唔小心跌咗落地下，定係其他問題就不得而知。 總括而言，如果呢個叉燒質素，我係以後唔會再幫襯。

今日去新商場行街，行過見到呢間餐廳，見好多人排隊，咁我就攞一張飛試吓，最終排咗個半鐘先有位。 今日同阿媽嗌咗兩個飯和一杯飲品，豬軟骨飯同埋排骨麵，另外加一杯芒果綠茶。 先講一講豬軟骨，嗰啲肉好鞋口．明顯未夠火喉，唔知道係攞貨定係自己做，呢個真係要餐廳留意吓。 另外，個排骨麵，一個字好Q鹹，而且似乎是用牛肉麵個湯，好彩我食牛，但係如果吾食牛的人要問清楚。 排骨應該係新鮮炸起，但係好薄身，上面好似沾滿好多老抽，搞到我一啖麵之後要一啖水。 芒果綠茶就一般般。 整體來說好一般，價錢就正常。服務良好。 如果唔係喺呢個商場，應該冇人會排隊。

今日收工經過帝國中心．發現有一間新餐廳，之前喺旺角食過，見佢價錢來說，喺尖沙咀都好吸引，所以嚟過男人的浪漫，之後先返屋企。 叫咗個好似燒魚的定食，有一個湯同埋兩個前菜，好似$100左右，以日本菜來說，CP 值好高。 條魚燒得個皮好脆身，而且仲有肉汁．唔會乾爭爭，正評。 另外，佢兩個前菜都好好食，有一個好似係牛蒡，心機野，出邊好少見到。 嗰個白飯應該係日本米，唔係其他平價日本餐嗰啲泰國米，唔夠可以再添加，啱晒大食人士。 呢度最好就冇限時，可以一路食飯一路玩電話。

今日放工去開紅磡拎嘢，到食飯時間肚餓， 行過見到呢間， 見到蔡瀾張相即刻衝入去。 嚟到滷味店一定係食滷水鵝， 所以我諗都冇諗就叫咗滷水鵝飯，上到枱時見到係鵝脾，內心即刻充滿驚喜。 之後店員好有禮貌送個例湯給我，其實呢啲滷味/燒味嘅店舖，嗰個例湯一定好好味，每日大量頭頸，根本就唔需要加味精，個湯已經好飲，呢度嘅例湯亦都係，飲完唔會有口渴嘅感覺。 講返滷水鵝飯，我嘅數量唔算太多，應該有7/8件左右，開頭我以為係滷水鴨，仲諗住叫個師傅對一對，但望多兩眼應該係滷水鵝飯，相對其他嘅滷水鵝飯，份量係少咗啲，而且亦都冇豆腐同埋酸菜。 味道方面，我食第一口，已經感覺超級鹹，我唔知點解，佢係有滷水嘅香味，但比鹹味蓋過了，雖然叫做鵝髀，但係都比較偏瘦，最重要一樣，係師傅沒有將佢起肉，因為之後每一件鵝肉，都充滿細骨，而且啲骨仲跌咗落啲飯到，食嗰陣時要非常小心，而且嗰啲飯仲好似唔係好熱，食落去嘅感覺唔係太好。 一碟滷水鵝飯多謝$55，對比一間咁有名氣嘅滷水鵝店，係一個合理價錢，但係味道就真係有點失望。 可能因為有蔡瀾嘅原因，所以大家對呢間店舖嘅期望值都會提升，如果呢間是街市或者無名氣嘅舖頭，我相信一定冇投訴。

今年和太太結婚20週年記念，諗住搵一間好少少的餐廳，同太太食飯慶祝，在 Open Rice 找了一間意大利餐廳 ，見評價不俗 ，所以同太太決定一試。


在酒店網上訂位時，本來諗住訂晚餐 ，但原來網上有 Menu 看，發現星期日也有 Lunch set 供應，所以在有限資源的情況下，改為食 Lunch ，價錢經濟少少，留返啲錢買禮物。而且人大了，太夜食飯不是太好，食得太飽，瞓覺時好容易胃酸倒流。

Lunch menu 有 4 款選擇，（ 估計是每星期不同 ) ，而每星期的 Lunch menu 之下，也有不同的選擇 , 例如牛 , 魚 , 豬 , 羊之類 ，一定有一款啱你心水 。



Lunch set 的價錢比 Dinner 平 ，而且不用點 al la carte ，相對可以用一個經濟少少的價錢去用餐 ，每一個 Lunch set 由 $ 388 起，如果要選擇龍蝦湯就要另外加 $ 150 ，酒水另外加$ 138 有 free flow ，free flow 有紅酒 ，白酒 ，氣泡酒 ，啤酒 ，汽水 ，果汁 。

如果在一間酒店內的意大利餐廳來說 ，這個算是十分合理的價錢 ，$ 138 已經可以任飲 ，雖然呢啲一定唔係好貴嘅酒，但係酒店嘅提供，應該都唔會太差。

當日的Menu是倫巴底， 入去前已經諗了食什麼，我們分別也 Top up 了一個龍蝦湯 ，而我自己再加 $ 100 Top up 了牛扒 .   


1. 頭盤選擇了意大利凍肉芝士拼盤 和 意大利海鮮沙律
2. 主菜選擇 自家制意大利雲吞配豬肋肉 和 烤肉眼扒
3. 甜品選擇 意式合歡花蛋糕 和 Tiramisu


先說意大利凍肉芝士拼盤 ，因為一人的份量 ，得幾片cold cut 和生果 ，火腿有豐富的鹹香和油份，在有限的食材下 ，個擺盤叫做好靚下 ，但食落就無咩驚喜。



而另一份是意大利海鮮沙律 ，有蝦 ，皇帝蟹腳 ，帶子等 ，Buffet 的質數 ，但作為頭盤份量也合適。



食完頭盤就上湯 ，我們2個也轉了龍蝦湯 , 飲得出個湯好重龍蝦味 ，而且幾 creamy ，入面有少量的龍蝦肉 ，不會只有死鹹 ，但如果要另外加 $ 150 我就覺得不值。（我看到隔離台的蘑菇湯好似重正 )



跟湯有一份麵包，呢個麵包絕對唔係配角，而是今餐嘅主角，非常之好食，小麥嘅香味，熱辣辣同埋配上意大利醋，簡直一絕。



之後上主菜 ，先講件烤肉眼扒，一定不是什麼好的肉眼 ，無咩牛肉味 ，但有一份炭燒的香味 ，可能酒店嘅廚房爐頭比較好，所以整出嚟嘅食物都會好提升少少，肉質就比較乾身，如果肉眼扒肥多少少會好D ，始終呢件不是西冷。




而另一份的主菜是自家制意大利雲吞配豬肋肉 ，太太落單時 ，以為是豬肋肉 ，原來是幾粒雲吞 ，入面的肉係豬肋肉，她食了一口 ，就說超級鹹 ，即刻吐返出嚟，不知咩事 。



之後我也試了一口 ，的的確確好鬼死鹹 ，之後我們叫了個 waiter 說明 ，他二話不說就可以同我們換 ，但說雲吞入面的肉，是之前準備了 ，如果重新做的話也會差不多，建議我太太叫另外一個菜式 。（題外話， 唔係個個樓面都知道廚房的運作， 呢個同事可以好快咁指出問題，並作出建議，值得一讚）

所以太太改了個野生深海活魚鷹嘴豆，後加的深海魚很快就上枱，我太太話魚皮煎得很香脆 ，魚很新鮮，有魚味 ，魚肉是一疏疏的 ，感覺好似食緊 COD，好食過之前的意大利雲吞好多。




在我們用餐時 ，Waiter 不停同我們斟酒 ，而他在第一次斟酒時 ，有介紹到酒名 ，但我自己不識飲酒 ，所以不太明白 ，但見汽泡酒的泡好多下 ，而且可以 Keep 到一定的時間 ，聽人講好似係好野，而紅白酒我也飲了 2 杯 ，比較乾身，仲未計啤酒汽水果汁，如果喜歡飲酒的人一定要加錢 ，完全值得。




最後Waiter 禮貌地問我們可以上甜品未 ，之後就上 2 個甜品 。因為早前我同餐廳講咗係慶祝20周年結婚紀念，所以喺意式合歡花蛋糕放了一個牌仔 ，賣相就一般 ，但味道是唔錯的，質感好得意，而Tiramisu 用杯裝出嚟，也好好食 ，咖啡和朱古力 balance得好好。






食完個甜品後 ，原來仲有 2 杯飲品 ，分別點了咖啡和檸檬水 ，咖啡另外跟鮮奶和 4 粒朱古力。



總結今日的午餐食得很開心 ，服務方面是超有 heart ，每個Waiter / Waitress  也盡心服務每一台客人 ，而且充滿笑容，酒店的服務始終有保証。


食物方面就可以講係穩穩陣陣 ，可能個價單比較平 ，食材方面要作一個平衡。
裝修方面 ，看得出有一段時間 ，但每一樣也 keep 得好好和整潔。

希望下次有機會，試一試佢哋嘅晚餐。

呢期 OpenRice 做promotion ，外賣自取仲可以減＄5， 今日行得成身汗，上OpenRice 找有咩飲，就選擇了這間。 Oreo芝士奶蓋，上面的奶蓋比較少，無咩奶味，飲品味道比較一般，但絕對對得起呢個價錢，如果下次有機會，也會來幫襯！

今晚經過附近 , 又是晚飯時間 , 記得呢間拉麵係旺角好出名 , 現在荃灣有分店，所以來會一會. 大約8:00到 , 不用等位 , 呢到 Menu 簡單 , 得拉麵和沾麵 , 價錢商場來說不算貴 , 最平好似 68 -98 之類 . 我見個沾麵個賣相好似幾好 , 所以叫了個魚介沾麵 . 麵質可以簡凍 / 軟硬之類  , 另外有冰水供應 ( 呢個是日本拉麵的慣例 , 不知點解來到 HK 之後 , 會改為溫水 )
上菜後 , 香氣好重 , 份量合適  ,  應該足夠一人飽肚 。 麵質方面 , 有彈性 , 曲麵 , 但掛湯一般 ,  有小麥的味道 , 但不是好夠凍 , 可能只是用水候水過水，不是用冰水過水。 另外，叉燒有炭燒的香味 , 肥瘦適中 , 有油香.
雞蛋就爭d , 是一隻普通的流心蛋 , 但是合格的 , 差過佢仲有好多.

反而個沾湯就相對失色 . 沾湯上有一個 $5 size 的魚介粉 , 但完全沒有魚介的味道 , 沾湯沒有起膠質 , 很流質 , 使到D湯很難掛到麵上.
我不知是否用拉麵的豬骨湯做基礎上 , 再做呢個沾湯 , 使到呢個沾湯和一般的湯水差不多.

我懷疑我自己叫錯了 , 我見呢到的客人 , 多數食拉麵 , 可能拉麵先是呢到的皇牌 , 下次再試。 題外話，呢度d服務好好，每一個waitress waiter 即叫即做，加分。

今日午餐唔知食乜嘢，見到嗰度好多人食所以我又排下隊，入到去時個感覺已經唔係太好，店員呼喝我要scan bar code 或者填紙仔，其實個個都知道呢一樣野，我都未入舖頭，你點解要大聲呼喝我呢 你都台灣嘅店舖，一定要食牛肉麵，一碗好食嘅牛肉麵，湯底濃烈得來唔會鹹嘅，而且麵條煙韌，即係台灣人講嘅Q彈。 上枱嘅時候，我先來一啖湯底，已經感到不妥，點解會好似入滿死咸嘅滷水湯？ 跟住我連埋啲麵條一齊食，鹹嘅感覺仍然充滿在口腔之內，但係我見到其他人唔係食牛肉麵，我已經知道咩事，呢度牛肉麵唔係最出名，應該係炸豬扒嗰啲，為咗唔想浪費牛肉麵，我慢慢慢慢咁食咗你碗麵，離開店舖之後，我買咗一杯台式嘅飲料，但係飲完之後超級口渴，我懷疑湯底有師傅🥺 有時我都好鍾意支持小店，希望佢哋可以對抗大財團，但係佢哋嘅品質方面真係好唔穩定，希望改善一下，有機會我都會再試，不過應該係食炸豬扒，😂

因為疫情的原因，差唔多兩年冇去過韓國，10分懷念韓國的食物，所以今日去咗尖沙咀一間老字號的韓國餐廳。 因為得兩個人，又唔係好想燒食物，所以叫咗一個韓式排骨湯，再加一個大蔥燒餅同埋啤酒， 入座已經有10碟韓式小菜，大概都係泡菜，鹹魚，菠菜，蘿蔔呢一類，但係就冇咗魚糕。 大約等咗10分鐘，第一個蒽餅已經到，廚房好細心咁已經切咗16件，方便進食，但係大蔥嘅數量我自己感覺就比較少，因為我喺韓國食嘅，蒽嘅數量係非常之多，呢度似乎唔係我哋用緊嘅大陸蒽，似係韓國入口嘅韓國蔥，可能因為成本嘅問題所以要減少份量，始終呢個只係賣緊$120嘅食物，冇辦法之下要作出取捨。 再等多5分鐘左右，韓式排骨湯已經到，呢度嘅排骨唔止韓國嘅排骨，呢度係比較細件，而韓國機係比較大件，份量亦都比較多，呢度嘅排骨湯，應該係用韓式辣醬，乾辣椒，同埋洋蔥做基本，感覺上味道比較單一，對比起呢個價錢，我自己覺得就比較偏貴，反而沙田有一間叫馬場X ，佢哋做嘅排骨湯真係好好食😋 服務方便呢度非常到位，成日有人閒嚟睇吓你有冇需要清潔或者執拾，如果擬香港嘅標準來講，呢度服務算唔錯。 但願香港疫情快啲完結，可以安心出遊

呢一間沾麵，可以說是比較早期小小嘅沾麵，開咗咁多年，仍然屹立不倒，一定有佢原因。 上幾次經過深水埗，我都特登過嚟呢間餐廳，但係幾次都見好多人排隊所以放棄，今晚放工再比次機會佢，見佢出面得五六個人所以就排隊，排咗大約30分鐘已經有位。 入到去好有日本小店嘅味道，只有吧枱，大家可以望到師傅喺度煮麵，店舖面積很細，如果我冇記錯應該得10個位左右，可能呢度因為煮麵嘅關係，店舖安裝左四部冷氣機，入到去好似雪房一樣，而且仲有兩三把風扇喺度運行中。 呢度只有一個樓面同兩個廚房 ，應該係一個大師傅和一個師傅仔，師傅仔就準備面上的 topping，如果師傅就係淥麵同埋煮湯。 今晚我叫咗個味增沾麵，店舖入邊有一個水杯比你自己裝水，應該係一般嘅過濾水，但，係如果係正式嘅拉麵店舖，應該係凍水。 一入座，有一個小食俾你，未到正常，但唔知點解佢用一個不鏽鋼碟，賣相一般。 等緊食麵期間，見到呢度嘅沾麵係熱食，另外有一點愕然，因為地道的沾麵應該係凍食，咁樣嘅話可以食到麵嘅爽彈，可能因為要遷就香港人的原因，所以佢就 default 出熱麵，我見到咁嘅情況即刻問師傅可唔可以凍食，師傅話可以，咁樣嘅話梗係轉啦。 因為呢間麵嘅湯底係蝦湯，所以一上枱已經有濃烈的蝦味，因為我顧住玩電話，所以冇留意佢加咗啲咩喺上面，但係我估計係蝦油，係個沾汁上，再有一啲蝦乾，湯底無可挑剔。 呢度有叉燒佢係用火槍燒過，誠意十足，因為我見過好多間拉麵店，好多時佢都係就咁將塊叉燒擺喺拉麵上面，沒有將叉燒的味道發揮到極限。 呢度有蛋充滿醬油的香味，完全唔係死鹹嗰隻，有蛋香，而且蛋黃好似啫喱一樣，如果我知道咁好食嘅話我一定另外嗌多一隻。 對比起湯底，呢度嘅麵條我覺得就遜色咗少少，佢嘅掛湯能力一般，同埋麵身比較幼，唔似係沾麵專用嘅麵條，我冇食過呢度嘅拉麵，唔通係用同一隻麵條? 總括來說，呢度嘅沾麵可以話水準之上，而且呢度嘅夥計10分有禮貌，價錢來講CP值都算高，下次有機會我會試埋佢呢度嘅蠔拉麵，聽聞都好出名下。