今日去開荃灣，原本想吃的店不知是否已結業，完全找不到，行經這間拉麵店，看到有沾麵就決定這間了。 入門前人多到要排隊，前面有3人，不到十分鐘便可入內。排隊期間有點餐紙供選定吃什麼，我選了沾麵（日限30份）和一份荀，入門前得知原來午市現在有半份小吃免費，沒選擇就是燒肉，所以我選的荀也就免費了。 入座後已有水提供，只須等待食物到來。裡面的座位其實也不少，設計但跟日本一些拉麵店都很相似。 沾麵我全部都選了普通，這樣滿滿的份量很充足，一個大男人正常食量應可吃得完，但細食的人最好選減半或75%，減的只會是拉麵量，其他不會有少，不用擔心。重要的是不要吃剩浪費食物，這對而店家和對食物而言都很沒禮貌。 湯頭很美味，有飽滿的魚介味，喜歡海的旨味要試試。肉味濃，荀也相當美味，其他配菜也份量十足，是會讓人喜歡上的味道。 沾麵吃後人餘下的濃湯，可以請店員加上清湯中和，再喝下去，有着不一樣的美味。 不過有滿意也有可改善的地方，沾湯的碗相信並沒有預熱，所以沾湯來到時已不是滾湯，摸湯碗只感到是溫的，湯也只是一般熱度，能直接入口，每一次加入拉麵掛湯後，湯的溫度都流失得很快，到後半時已經快要變冷湯了。希望店家能夠改善一下，相信會更好。

今日跟Amigo慶生，兩個人去打邊爐，5點半未夠上到去，門口人員介紹有燒肉有火鍋，都喺2個鐘任食，最後決定火鍋，唔駛排隊直入。 入去食火鍋嘅我地喺第一枱，決定坐最近門口的卡位，方便拎配菜飲品。食燒肉嘅就已經有兩三枱，一開始Amigo仲懷疑選錯火鍋，應該選燒肉，但已決定就別左想右想了。 套餐選了火鍋最貴的C套餐$308，早段時間有85折，火鍋升級肉類牛雞豬任叫任食，配菜就自由去出面枱拎，當中有熟嘅凍蝦。 之後睇返其實選B套餐都不錯，差距只有一份海鮮盛合，而且跟剌身盛合一樣，一枱一份only。 選好了蕃茄+壽喜燒湯底後，一開始來了海鮮和剌身盛合，都好味，不過份量當然唔會好多，剌身作為等火鍋滾嘅前菜算不錯。 之後來了4盤定5盤牛，2種部位，2盤豬肉片，湯滾起前食了些蝦，肉質實，唔霉，這點十分重要，唔錯。 湯滾起就是正式的開始，牛的味道我覺得不錯，厚度適中，不會像紙一般薄，但又不會太厚，一盤有4-8塊，每次來2-3盤已經很足夠2個人食了，食慣A5和牛的人就別來比較了，呢個價錢別發夢了。 全程試了清酒、梅酒、烏龍茶、冬瓜茶，梅酒太甜，一杯就夠了，不合我，清酒還不錯，口感可以，飲了兩杯，配枝豆和薑片一流，烏龍沒特別，冬瓜茶清甜唔錯。 服務員態度不錯，有人主動幫手取吉碟和更換清湯壺、廚餘杯，而且落完Order很快便到，很不錯了。當然也有客席不多的因素在。 總結而言2個人是吃飽喝足了，期間漸漸多人，結帳後有雪糕選，限定一人一盒，吃完時間也到了。因言談甚歡，我們多坐了5-10分鐘傾計，因未滿席也沒有趕我們走，當然我們也不會太過份阻人做生意，跟手便走了。 食之前見到負評的內容也有點擔心，不過可能是閒日星期二，加上我們是最先一批客人，所以相對地服務最理想，吃得更開心。 P S.洗手間乾淨（廢話，剛開鋪當然乾淨😂）

日常經過這間冰室很多次，總被門口餐牌圖片上那個巨大的焗豬扒多士盒吸引住視線但每次都是趕時間或不感肚餓，直至今日終於有機會去試一試。
價錢來說不平宜亦不算太貴，始終工序較一般焗豬扒飯多，稍貴一點也可接受。

賣相方面幾吸引，跟餐牌上的圖片相近，但芝士量不算多。

$68的［焗鮮茄豬扒飯多士盒］並沒有跟餐飲（跟餐飲要另加$9起～），只跟了一碗不算很熱但相當咸的羅宋湯，我想這湯不是用來給客人渴的，而是用來沾多士盒吃的，因為太咸了。
整體味道上有點不相夾，直接講就是單純將豬扒飯放進去挖空的厚多士中間，然後再焗一下而已，兩者味道上沒有什麼交雜。
多士盒外皮夠脆，這很好！
豬扒飯的飯是炒飯，不是白米飯這點算好一點，但飯的味道不足，本身多士盒正常是沒有味道的（有味才大鑊），茄汁也不像餐牌上的圖片一樣多，那麼炒飯加重一點口味才是正確，但那炒飯還是跟一般在美心吃的焗豬飯一樣，飯沒什麼味道。
豬扒肉在肉質上沒什麼太大問題，整個多士盒面的豬扒量加埋也就一塊普通豬扒的量，肉的份量不足這點也就算了，但有骨這點就相當糟糕！！！本來肉量就不多，還有骨，相對肉量就更少了，而且吃下去時的感覺自然變差，我所吃的數塊豬扒肉當中，有一半都帶骨的，這什麼玩法？到底是焗鮮茄豬扒還是排骨？
總括而言，這個焗豬多士盒我試一次就夠了，下次還是吃其他選擇會更好。

跟久未相聚的兄弟去食晚飯，尋找後決定去試下呢間食泰菜，見不少評價偏向好，有不少菜式都想試，但當然試不完，畢竟只有２個人，太多吃不完
是晚叫左　蒜蓉包，馬拉盞通菜，雞牛豬串燒，泰式烤豬頸肉，煲雜菜，蝦醬炒飯，芒果冰，食到咁上下，見到間離枱個炸蝦餅，至醒起食評都有不少人讚好食，見得嗰幾件，決定叫埋。
芒果冰係幾美味的，大熱天真係要試一試。
之前食過一款炒飯唔記得叫咩，咸得嚟好好食，今次其實想食返，但叫嗰款唔同，雖然都好食，但無上次嗰款咸香，睇嚟要下次再試第二款。

串燒一般，豬頸肉ＯＫ，雜菜味道好但無乜特別。

炸蝦餅真係好惹味，即叫即整，熱到燙口，正
最後只食剩幾件蒜蓉包拎走，其他都掃晒入肚，大滿足。

是日家庭聚會，有大有細去這間太子酒店西式自助餐，小朋友可免費，環境氣氛不錯，服務ＯＫ，
除左三款果汁任飲，清水常幫你添加外，每位包餐飲一杯（茶／啡），別忘了要向侍應ORDER的。

6：30開始2個半鐘(還是2個鐘? 忘了)任食，基本都係食嗰Ｄ嘢，冷盤熱葷各樣都有，沒什麼特別驚喜，即開新鮮生蠔和Mövenpick雪糕任食是重點，還有各式生果及糖果corner，小朋友見到簡直開心到不得了。（自己選的前菜冷盤，下面白色的火腿最合我口味）
吞拿魚剌身頗腥，有點難接受，希靈魚都有點腥，喜歡這款魚剌身的人勉強可以接受，不喜歡的人恐怕接受不了。

各款咖喱菜式完全不辣，或許是要迎合小朋友口味？我本身是嗜辣派，所以頗不滿意。

如果喜歡吃北京燒鴨，最好吃了冷盤後盡快去試，不然待鴨冷了，皮就可能不夠脆了。

這間自助餐水準不過不失，平日人不多，全廰坐不滿一半人，所以沒有催趕離開的情況發生，基本上埋左單之後任坐都沒問題，或許正因為客人不多，是日即叫即煮小煲沒有供應，算是美中不足的一點。

走的時候生蠔也幾乎沒有了，也沒見到有補充的跡象，說不定只有一輪？

總括而言，價錢是貴了一點，但環境服務真的不錯，客人基本上都很守禮貎，沒有搶食物的情況發生，服務員服務周到，也沒有大聲說話的人（除了我家小朋友偶發說話大聲了點），所以是日晚餐很稱心滿意。

今日舊同學約我出來逛街食飯，由太子行到旺角，見到呢間野好似新開無幾耐，抱住一試的心態上去！
本來一入去覺得都幾好，閒日唔多人，又唔駛等位，仲有優惠券可以減＄２０，即係減返加一！

咁到叫野食的時候了，我同個舊同學各有所好，佢喜歡食剌生壽司，我喜歡炸蝦天婦羅同手卷，咁就落左單要五款剌身，炸蝦十隻，鰻魚手卷和軟縠蟹手卷各兩件，加埋其他野食，都有十樣八樣，落左單唔夠十秒，個侍應女仔來告訴我們今日沒有鰻魚手卷了，咁妳話無我都吹妳唔帳啦！好！
但之後奇怪事發生了，沒有鰻魚做手卷，但又有鰻魚反卷壽司送來既？不過唔好開心住，Ｄ鰻魚細到手指尾甲都大過佢，真係唔睇清楚都好難發現！

之後來炸蝦，得四隻，我要十隻你俾四隻，係咪出少左？好！我再落單要十隻，點知又係來四隻！！
今次我唔忍了，我即刻問個侍應，呢Ｄ係咪定額架？乜我叫十隻，次次都淨係來四隻呢？規定左呀？
個侍應即刻話同我跟跟，過左十分鐘，終於黎返十隻，前後計落，佢都仲爭我兩隻！算！

好了，到我個舊同學點嗰Ｄ剌身來了，一小碟裝晒五種剌身，每樣五件！無錯，係一隻細碟，由此可知嗰Ｄ剌身有幾大件呢？我見到都笑左出來，跟住我只好安慰佢，話個廚師只係切細Ｄ，方便客人入口咁啫，但我個舊同學已經笑唔出，因為佢一夾起嗰五件三文魚，同其他放題的三文魚比較，只係人地一件半咁上下！ 一啖就無左！

跟住到飲品了，我舊同學想飲啤酒，叫左兩罐，點知罐啤酒真係好似個牌子名＜ＩＣＥ＞一樣，雪到變左冰，一開爆晒Ｄ啤酒出來，搞到成張枱濕晒，仲滴到我條褲上，Ｄ侍應見到竟然扮忙當睇唔到，要我地揮手截停個侍應同佢講，個侍應即時反應唔係攞布或紙巾來抹，而係話攞過第二罐啤酒來換俾我地，跟手就急急腳走左去攞啤酒

好了，食左一個鐘左右，我舊同學留意到張單尾有Ｄ好唔尋常既字句，呢樣真係我食咁多次放題第一次見到！單尾上寫明，原來過左兩個鐘後，超時每廿分鐘計，要俾超時佔位附加費！吓？唔係吓嘛？駛唔駛咁白紙黑字呀？你寫得出我真係信你敢收架喎！你要趕客都唔駛咁下嘛？９０分鐘時已經ＬＡＳＴ　ＯＲＤＥＲ，大家都知時間差唔多啦，你當我地Ｄ食客係第一日出來食放題，唔知掟？難怪隔離枱走嗰陣好似好急咁啦！又怕客人食得多，又怕客人佔你時間便宜，你想Ｄ客幫襯你第二次都難了！

今日下午在紅磡逛街，五點幾見有少少肚餓，唔想等到食晚飯至有野食，就隨便搵間粉麵店，諗住食個麵頂下肚先，咁就入左呢間野，但真係可一不可再！

一入到去，地方細細，唔算好乾淨，但勉強叫坐得下，又剛好有人走，唔駛等有成張吉枱任坐！
跟手叫左個孖筋麵同一碟通菜，落單後唔夠十秒，我見落單阿姐俾我張單個價錢細左，我即刻同個阿姐講要大碗的，點解個阿姐已經拎住碗麵，話已經做左，唔改得！
我當堂打個突，喂！先不論我依家想要大碗，俾多ｄ錢你賺都唔賺呢樣野，我落單唔夠十秒你碗麵就做好左？我即刻Ｏ晒嘴，同佢講多句都晒氣！

跟住食碗麵，果然完全唔掂，Ｄ牛筋少到無朋友都算數，最攞命係Ｄ麵根本唔得，皂（簡）水味強勁，麵身又硬，真係貼錢買難食！咁既店真係貼錢我都唔會再去！

平日很少寫食評，今日興之所至就寫個吧！
因為今日幫兄弟慶生，主角想食日式放題，咁啱想起上個星期有個朋友提及過有間新開的日式放題，立即打返電話問下朋友個地址，然後就等兄弟放工，約左去到目的地等！

未夠七點鐘上到樓，就已經見到全店已坐滿六成人，一坐底就馬上將想食的全部寫好落ｏｒｄｅｒ，野飲最快到，３０秒就有！

朋友推介一定要試個鹽燒牛舌，兩條仔叫左勁多食物（但我無浪費食物哦），而且接二連三咁來，淨係食都根本無時間影相，所以食物相欠奉！但個鹽燒牛舌真係一絕，唔會太咸，口感味道都相當不錯，唔似得上次去松屋食嗰ｄ鹽巴牛舌，咸到爆兼乾硬化！

食過的食物仲有：
鹽燒牛舌（上面講左必食，提多次＠ｖ＠）
星鰻手卷（強烈推介，脆口好味）
各式剌身（新鮮加冰鎮，三文魚厚身美味，玻璃蝦夠鮮味，魷魚貝類都ｏｋ，螺肉因為切除腸部看似變得細小，但相對貼心）
雞翼（一般鹽燒味，不咸），
咖喱牛舌（咖喱味太重，蓋過牛舌的味，但個咖喱又幾好味），
玉子壽司（一般日式玉子，但勝在不會太甜，鬆軟度ｏｋ，壽司飯少夠貼心）
辣味腐皮壽司（真係有辣味的，而且加左少少醋，味道還好）
星鰻壽司（味道很好，無骨抵讚）
天婦羅炸蝦反卷＋軟瞉蟹反卷（一口一件！唔知係落錯單定我突然味覺失調，講真我分唔呢兩樣的分別，食落味道竟然一樣！？？）
海皇蚧肉翅（味道較清，適宜在吃完味道較濃味的食物前飲用，否則．．．）
三文魚濃湯（對魚喜好一般的人不建議飲用）
鐵板牛柳粒（適量地鎖住肉汁，半熟的牛柳粒相當美味）
黑松露炒什菌（呢個係漏單的項目，最尾追返，味道較濃偏咸，屬伴酒良菜）
綠荼係全部飲品中唯一熱飲，
海蝦天婦羅（味道不錯，炸粉都算薄，但稍稍美中不足的是蝦腸有蝦泥！）
唐揚咖喱雞（一口一件，有肉汁，雞肉夠嫩，呢Ｄ先叫做炸雞塊架嘛，老麥嗰Ｄ叫炸屍塊＝＿＝）
唐揚雞軟骨粒（偏油偏咸，試吃幾粒無妨，若嫌太咸可以伴跟碟的菜絲同吃，口感爽脆）
咖喱薯餅（老實講，唔喜歡薯餅的不要叫，因為真係幾大件，謹記必須一到即吃，否則凍左會變磚頭）
蟹肉天婦羅（當然唔會俾真正的鮮蟹肉棒你啦，但味道都ＯＫ，一試無妨）
日式蝦餅（呢個幾彈牙，但記得又係要一到即吃，凍左又係變磚頭，但比薯餅要好一點）

兩位男仕成晚食左都幾多食物，未食過的當然不作評價！
點食物時漏單的情況極少，只有一兩樣，但要追返一Ｄ都唔難！
個經理埋單時會問有沒有食物漏單可以追返，都幾細心！

要留意，兩小時任食時間裡面，只有頭一小時二十分鐘可以點食物，四十分鐘前就要Last order了！
但食完野真係無人趕你走，可以慢慢坐吹下水，兩小時係俾足你，沒有侍應頻頻走過來扮收碟想趕客的情況出現，呢樣真係要讚一讚！

到我地走的時候，有人講多謝，仲有位看來是壽司師父的男仕笑容可恭地在電梯口多謝我地，又幫我地截電梯，真係服務態度滿分！

若想約朋友去食，最好齊人準時，免得好似我地隔離枱咁，六個人中有一個遲到成個鐘，遲到嗰位得返２０分鐘叫野食，都幾慘！

P.S.食完野至記得影相，所以只有點菜紙可影了，好過無啦！（仲要有一張漏影添＝＿＝）總括而言，環璄＋食物＋服務的質素都比預期的好，以日式放題而言，每位計（連服務費）都不用二百元，是十分不錯的選擇！

放工後四點幾, 見有D肚餓, 就諗住買D野食, 行過商場茶餐廳見到有海鮮乾炒公仔麵, 就諗住試下呢個餐, 雖然話餐, 但都只係跟一杯野飲, 凍飲加兩蚊, 外賣又加一蚊, OK, 我平時喺中環食都唔止呢個價, 唔介意! 俾完錢, 喺門口等左七分鐘, 以即炒來計叫做快, 我仲以為個廚師開盡火候來炒, 應該都唔衰得去邊, 點知三分鐘後返到屋企, 一打開個盒, 成盒炒公仔麵都係濕既, 我要干炒, 你俾濕炒我仲乜? 炒公仔麵唔夠干身, 咁叫乜野乾炒? 點解唔叫濕炒? 隨左湯麵, 我從來都未食過咁濕咁油的麵, 完全係一PAT野, 跟住睇埋D配料, 少到無朋友, 搵晒成盒麵, 尤魚得兩粒? 我食一粒墨魚丸都多過佢呀, 咁既料想我再幫襯都幾難!!

剛剛去完日本旅遊回來香港，當然要送手信給兄弟，順其自然梗係食埋飯啦！
因為在日本沒有機會吃串燒，就上來找找看有什麼日式串燒好介紹，看見這間吉吉屋的評價不錯，就決定呢間！

去到地址所指的地方，找來找去都找不到，忍不住打電話一問，原來喺對面街球場隔離，店老闆話OPENRICE的地圖有問題，搞左好耐都搞唔掂，無計，咁我都試下更正一下地圖，希望可以幫到其他食客啦！

呢間店坐位雖然很少（加埋最多１０人），枱也只有三張，別想要像坐梳化椅般坐得很舒服，但氣氛跟日本小型居酒很接近，富有風味，小型電視持續播放日本錄影節目，對於喜歡食串燒的人，（及）或喜歡這種小鋪風味的食客而言，完全可以接受與諒解！

入正題！講食物！

先來頭盤，山葵八爪魚(見蟹粥旁的一個玻璃碗就是)，再加串燒蝦（頭盤？），味道ｏｋ(太肚餓,吃完蝦才記得影相,得返下面張相個蝦頭可以影)

再來烤雞泡魚干，很美味，實在係佐酒小菜的美品仲有鹽燒雞翼，串燒牛舌，兩款都唔會燒得太乾，最重要係唔會好似其他日式放題的串燒咁，一把鹽咸到爆，而是薄鹽，少少咸，咸得恰到好處，雖然我仲未食遍大江南北，吃過的串燒店也不過十數間，唔敢講佢係最好，但呢間係可以令我滿意的串燒店！

串燒牛柳粒，六至七分熟，多汁美味這間店最出名的係串燒豬腩肉和串燒雞皮，兩款都十分好味，雞皮九成的油份都被燒去，脆脆的十分美味，完全不油，而豬腩肉雖然保留了油脂，但咬落去的口感實在是相當實在，油與肉配合得很理想，好味道，不過怕肥的人可能會不敢試呢！但美食當前，還請自行決定吧

見網上有食客推介蟹粥，當然也想試一試，就吃了，較想像中大煲，一個人應該吃不完呢！我覺得味道不錯，不過兄弟就覺得隻蟹不夠新鮮！之後我們還重新點了其他串燒，重覆點也有啦！最喜歡這個鮮燒扇貝，真是不可不吃，新鮮味美又多汁（蒜溶汁），真係回味無窮哦最後兩人埋單三百幾，已經食到兩個大男人唔想行，真係比去什麼日式放題食要更好味，更開心，更滿足，老闆仲同我地傾計，介紹我們去日本溫泉之旅的地點等等，這些小情節亦只有這種小鋪經營才會出現，客人食得開心老闆同店小二也做得快樂呢

絕對會再去哦

同場加映：原來這裡的火煱是這樣子的，看來比起”Ｘ野家”的火煱要好！