第一次係香港食日本師傅主理嘅高級鐵板燒，以為會好貴，點知價錢同平時食開嘅鐵板燒差唔多，尤其係lunch set， $480已經可以食得好好啦😍 當中包括: 季節沙律，配嘅係自家製嘅醬，非常新鮮又開胃。 茶碗蒸，係即場用鐵板燒蒸嘅，估唔到口感咁滑，仲有粒粒蟹子增加口感。 北海道產嘅帶子，大大粒嘅帶子外層加咗脆脆，上面一層厚厚嘅tartare醬同三文魚籽，口感真係非常豐富，外脆𥚃嫩，而且醬好好味😋 鱈魚料理，餐廳會根據季節去揀唔同嘅魚，今期係鱈魚，非常鮮嫩，配上師傅特製嘅海苔檸檬牛油醬，真係好香，另外魚皮分開煎，非常香脆👍🏻 A4宮崎和牛簿燒，塊牛一睇就知係靚野，油脂分布非常平均，牛味又重，仲有肉汁，師傅用壽喜燒做法，非常好味，配上蛋汁更嫩滑🥰 食鐵板燒當然唔少得湯同炒飯啦，佢嘅炒飯係我食過最唔油嘅炒飯，通常啲餐廳為咗香啲，加好多牛油，但係呢碗居然一啲都唔油，但又有飯香。 最後嘅甜品都好有誠意，係自家製嘅焦糖雪糕，好好味，食完真係好滿足💕餐廳除咗裝修非常grand之外，服務都好好，食得非常開心，以後一定會再帶屋企人去食☺️

一直好鍾意呢間餐廳，無論環境同食物都好唔錯，係我灣仔區意大利菜嘅首選😍 最鍾意佢嘅lunch，因為有好多前菜可以任食，無睇錯，係任食呀🤩今次嘅前菜比一年前更吸引，有蟹鉗、三文魚、青口、海螺等，當然唔少得好好味嘅各款芝士💕 主菜方面，有幾款選擇，我哋揀咗特選阿根廷西冷牛扒同碳燒魷魚，另外仲有幾款意粉同埋意大利飯。牛扒要咗七成熟，肥瘦適中，口感非常嫩，而魷魚做主菜比較少見，食落有驚喜，一啲都唔韌，加入檸檬汁幾清新😆 另外仲可以加錢加份甜品，我哋試咗意大利麵包布配雪糕同大量朱古力醬，啱晒鍾意食甜野嘅朋友💕最後當然慢慢嘆返杯咖啡先走啦💕

銅鑼灣真係美食天堂，又俾我發現一間好啱我口味嘅日本菜😍午市嘅昼食餐真係勁豐富👍🏻 首先佢哋會上前菜: 多春魚同沙甸魚醬，鹹鹹哋，好香，配青瓜、蘿蔔食一流👍🏻 之後就係我嘅昼食C餐啦，沙律有火炙三色沙律，三文魚同左口魚裙邊都好好味🤤先付四點就有拖羅同油甘魚，兩樣都係我鍾意嘅肥美口感😍😍兩款漬物都好好味😋之後上蒸蛋，又係好足料。 主菜嚟啦，好鍾意佢嘅兩款浜燒--蘇格蘭蟶子同埋北海道活帆立貝，除咗新鮮大粒之外，師傅都燒得好好😌 另一款主打係美國牛小排，佢好厚身，切成粒裝，好香嘅肉味，醬料除咗wasabi 醬，仲有辣嘅味噌醬。 食到呢到其實已經飽飽哋，但係仲有湯、野菜同主食，主食可以揀特大帶子三文魚煙肉意粉或者松葉蟹丼，我揀咗後者，啲蟹膏多到，勁香呀😍 最後仲有咖啡或者甜品，真係大滿足😊😊而家午市一人昼食有9折，二人餐仲有7折添👍🏻另外仲有百零蚊嘅定食餐，選擇好多，快啲嚟試吓啦😍

終於試咗近年開咗唔少分店嘅鮨樂，奧海城分店裝修好靚呀👍🏻 lunch嘅套餐尤其抵食，定食有齊湯、沙律，有啲仲包蒸蛋，仲可以加十幾蚊多杯飲品，價錢都非常親民😌質素都好高，例如鰻魚飯定食，啲鰻魚非常肥美，啲汁滲入啲飯度，滋味十足。仲有佢嘅壽司同刺身飯定食都非常推介，我哋叫咗10貫豐洲壽司御膳同江户前丼，魚生都好厚切，居然仲有拖羅壽司，咁嘅價錢真係非常抵食呀🤩 食完嘅結論係--味道環境服務都好好，價錢又合理，可以當飯堂食呀😆

一定要介紹呢間高質嘅酒店中菜俾大家，佢位於奧運站嘅遨海酒店地下，味道、環境同服務都一流呀😍 首先推薦呢度嘅灌湯玻璃皮乳鴿，層皮真係勁脆，一啖咬落去，啲汁爆曬出嚟，真係好滋味😍佢嘅點心都做得好精緻，尤其係魚子醬賽螃蟹鳳眼餃，唔止賣相好，味道都好好，啖啖蟹肉👍🏻仲有高湯海參灌湯餃，勁大隻，啲湯好鮮甜，入面啖啖蝦肉，料好足👍🏻 呢度絕對係飲茶食飯嘅好地方，行出去就係海皮，食完仲可以散吓步👍🏻

香港近年也流行食雞煲，呢間位於油麻地嘅雞煲店，最大特色是位置好高，望出去好舒服😌 我哋試咗辣酒花螺雞煲，裡面嘅螺好入味，比雞更好吃。食完了雞煲，就加湯打邊爐😊推薦芝士響鈴，入面係芝士，比一般嘅響鈴更香。丸唔錯，好多選擇，而且都係手打，有鵝肝、蟹子、黑松露等味道，都好特別，而我最鍾意都係芝士牛肉丸。另外蔬菜拼盤都幾抵，種類好多。 餐廳仲有好多款式嘅午市套餐，除咗我哋好似所有人都食緊套餐，我估味道一定好唔錯。

平到你唔信嘅燒肉放題，原價二百幾，而家六折，無睇錯，係六折，埋單兩舊水都唔洗，會有咩食呢？ 首先牛、豬、雞都有齊，仲有羊肉，最靚嘅肉應該係雪花牛粒，豬同雞嘅種類都好多，仲有醃過嘅雞件同豬頸肉，連豬大腸都有。 以為得肉？海鮮都有，帶子、大蝦、元貝、生蠔。。。全部都有得食，我見隔離枱食生蠔，一打打咁叫，仲有得揀蒜蓉或者芝士。 熟食都好多選擇，炸雞同炸魷魚鬚都唔錯，一定要試。另外仲有冷麵、年糕等熟食，不過太飽冇試到。最後記得揀返條韓國雪條食啦☺️

銅鑼灣都開咗牛站啦😍勁抵食又高質嘅放題，午市時段去嘅，好快就坐滿，大家記得提前book位呀。 佢最出名係麻辣湯底，梗係要試吓啦，辣度有得揀，香港人揀少辣或者bb辣就好啦，唔好衝動呀，都幾辣㗎😂 至於放題，佢有分好多個level，最平嘅定量火鍋，$88就有啦，我哋見4小時無限任飲任食都唔貴，梗係慢慢食，食好啲。level 3已經食到美國極黑和牛、安格斯牛板腱、特極肩胛肉等，真係勁抵👍🏻想食海鮮仲可以升級到level 4。 除咗有好多種唔同嘅牛肉之外，仲有好多平時午市放題食唔到嘅嘢，例如haagen daz雪糕都有，埋單每人二百鬆啲，食到你滿意😆

聖誕食咩好？梗係食黑暗料理啦😆墨魚汁意粉食過，但深藍色嘅蛋包飯你食過未？仲有好特別嘅彩色豬扒，真係好有特色😍 平時都有幫襯開嘅Banchan and cook近排出咗新菜單，梗係要試吓啦，而且色彩繽紛，非常適合聖誕節食呀😍尤其係蛋包飯，入面嘅飯有味道嘅，加入彈牙八爪魚，好好味又充滿玩味。 另外一定要食佢嘅甜品，我就食咗伯爵茶布丁牛角包窩夫，呢個邪惡但真係好好味，牛窩夫好香脆，布丁茶味十足，甜而不膩，兩者結合真係好夾。 飲品都好特別，鍾意朱古力味嘅不妨一試佢嘅木星朱古力咖啡，仲有芝麻控一定要飲月球幻影黑芝麻冰沙啦😍

今日食完the grill room，性價比好高呀👍🏻食物、環境、服務都好好，真係要分享吓☺️ lunch set 選擇都好多，百幾蚊至二百幾都有，包主食同飲品，記得一定要加$48配埋湯同甜品，是日南瓜湯真係好甜好濃郁好好味🤤唔想飲湯都可以揀沙律，好新鮮。而甜品係我最愛嘅tiramisu，同樣好好味😋 主食方面梗係要試吓佢哋嘅招牌--牛扒啦，要咗medium，好香嘅牛味，好易入口，幾嫩，仲配埋薯條，咁嘅價錢真係好抵👍🏻另一份要咗三文魚，佢嘅汁底幾好味，少少酸，配魚食好啱，唔會滯。 另外仲點咗兩杯cocktail，兩杯都好吸引，smokey passion & berry well，百香果嗰杯仲會係面噴啲煙燻味嘅whisky，非常有創意😍莓果杯偏甜少少，啱晒女仔飲👍🏻