地方環境在一優靜街角，室內冷氣充維足，服務態度很好，令人印象深刻，店內人員全部後生靚仔靚女，午餐時間人流還可，雖然我只點一杯咖啡但一樣好態度招呼笑容滿面 一杯Dirty, 香氣滿溢，飮落香滑順喉，沒點食物，但見其他客人都食得愉快。 絶對會再光顧的小店

天寒地凍，有咩好得過食啲熱辣辣嘅嘢，知道呢度新開，馬上相約好友到此一嘗，品一品睇吓佢咩料！ 地方唔算好大，但勝在樓底高，冇侷促感，坐位與坐位空間都可以，餐具亦乾淨整潔。 等咗一陣位，入座後叫咗兩味一飯，麻辣牛脷，小辣鱸魚酸菜魚，白飯，凍檸茶走甜。 麻辣牛脷，麻辣汁味道不錯，但嫌其味蓋過食材本身味道，提議可以切厚小小以平衡整體味道。 香辣酸菜魚，魚好滑！整體上冇骨，內容豐富多彩，味道平衡，應該暫時食到過同款食物中嘅頂流嘞！ 價錢非常相宜！一定會再嚟！

朋友告知其公司附近新開糖水舖， 店仔細細，糖水唔錯，晚上食完雞煲想食碗糖水潤吓，就走嚟品一品。 愛心出行加針卡一輪後，坐好後叫咗碗凍銀杏腐竹薏米糖水 糖水入口濃滑，甜度中甜，有種好潤嘅感覺，第二口食到薏米同銀杏，🤨點解咁嘅？薏米圓碌碌脹卜卜煙煙韌韌，冇咗平時薏米旱旱哋嘅味，亦冇咗平時有小小刮口嘅感覺！好正！銀杏亦同樣韌韌哋好好味！一口接一口，無法止停！如果唔係怕血糖高，起碼5碗先叫夠。 及後買咗兩碗外賣比家人一同品嚐！ 一碗腰果露 一碗流心芒果布甸 到家放低影張相記錄一下就去梳洗，出到嚟兩碗完全被清空！ 家中兩老分食腰果露後評價：好食！好香！響邊樹買咖？係細個食到嘅味道喎！ 個女獨食咗個流心芒果布甸後問我：爸爸，下次你買多幾碗啦！咁好食我自己一碗都唔夠食，媽媽又冇得食，下次買多啲好冇？ okok. 下次一定買多幾碗。

Omakase 香港越開越多如雨後春荀，但各間師傅各施各法。與好友午間相聚，大家都愛好日式美食，友好提議公司附近新店質素不錯可一試，我地就去試咗呢間----霜瀛。入口有點神秘，可從外直接行兩層健康樓梯上或從酒店坐電梯上二樓，見招牌推門入豁然開朗，侍應招呼週到，舒適感由然而生，廚師發辦，坐低等食，menu都費事睇，與好友們傾談間，沙律到了。非常新鮮！汁調較到酸甜度剛好，同沙律菜新鮮嘅味道非常配合！準！茶碗蒸最重要有濃郁蛋香而又滑，蒸嘅時間剛好，準！

水雲醋滑而微酸、甜粟甜而爆汁、蟹肉苦瓜食到出晒力先嗒到一絲甘苦，薄得嚟好爽脆，蟹肉鮮甜。

比前菜開晒胃嘅情況下，海鮮刺身到嘞！師傅清晰講解先後食序後唔理三七廿一，手起筷子落將白魚生片送囗中。魚味鮮美！之後食八爪魚吸盤，食過後大家都討論著同一事情，就係新鮮到食完後有層薄衣吸附著在脷上。然後食池魚，嘗後魚香停留在日中一段時間，非常過癮！

好靚！金萡魚子醬磯煮鮑魚配鮑魚肝醬飯加大拖羅，鮑魚軟糯魚子醬咸香配上肝醬飯，非常上頭，大拖魚油豐富，魚香四溢。

之後手握壽司每件各具特色，每次放入口"好味"聲此起彼落，非常開心！





中身吞拿壽司此店可謂食勻全港最好味！經師傅以秘方醃製，吞拿嘅鮮魚味以倍數在口中爆發！

牡丹蝦上配海膽，配搭有新鮮感，蝦肉肥美爽甜帶點黏口，加上海膽嘅味道，不禁忘我地閉起雙眼享受味道對味蕾嘅沖擊。



見玉子就知接近尾聲，蛋味好香，蛋身好滑，比平常食到嘅再甜小小。

魚子拖羅蓉飯，在青葱芝麻點綴之下，好想再添多碗，但同時發現已經飽哂！最後嚟多個栗子雪糕收尾，完美！

師傅每道都精準拿捏得剛剛好，其間師傅有講有笑，風趣幽默，與一聚友好度過咗一個非常愉快嘅時光！

每次到坪州都一定嚟。坪州永安街，食幾個舖位就到，環境平實整潔，食客與服務員之間叫聲此起彼落，非常熱鬧，好有氣氛！坐下來掉杯茶，點心車戴著各式點心，食物非常美味！午市套餐全部熱辣辣，懷舊糯米包香滑軟糯，特別推介粉粿同燒賣，人生中食過最好味！必食！

環境:
環境陰暗, 比較嘈, 地面油滑.
服務:
坐好後發覺因枱面餐具不足, 問侍應攞, 補足後發現餐巾不足, 又問侍應攞, 侍應回應 "頭先咪比左你囉! 又囉!" 有性格.
食物:
T骨扒餐, 有少許黑椒汁(咸得嚟冇黑椒味), 15小時前炸好薯條8條, 小唐菜半棵x2, 塊扒20%肥, 40%筋, 10%骨. 菜最好味. 10分
芝士焗肉醬意粉, 夠熱, 意粉為港式意粉, 好林. 60分.
海南雞飯, 以前食過好好味所以今日encore. 油飯有 risotto風味, 有生米, 而雞冇味道之中帶一點咸魚仔香氣, 肉質煙韌, 冇去骨, 0分.
焗豬扒飯, 飯中有好多硬塊, 豬扒算厚, 300%熟, 乾, 韌, 硬, 合非常有牙力人士, 0分
雞扒意粉, 港式意粉底, 好林, 汁味道特別, 難以形容, 似KFC薯蓉面啲汁, 雞扒味道正常, 大家樂同質, 60分

行過見到裝修完，大咗！ 開心叫個1號早餐，通心粉轉公仔麵，仲包括有炒蛋，雞扒，多士，咖啡等等食物。 叫個有雞「扒」嘅早餐，就係想食一塊過嘅扒，點知嚟咗兩粒雞粒，到一個點！雞粒炸到好乾身，肉質緊緻，有咬口，如肉乾。 炒蛋還算正常，有汁，但冇嚟味道。 多士溫度非常不足，以至令植物牛油半點不溶！ 仿鮑片公仔麵有驚喜，加送火腿絲和生菜絲。 裝修漂亮，地方好大，非常整潔，話晒啱啱裝修完，食物質素就有待改善 $37蚊，貴咗啲。

一個人，去食個孤獨早餐，見呢間響呢一區未食過，決定入去try try, 叫咗個A1早餐，火腿通加錢可轉麻油或黑蒜一丁，就要咗轉麻油一丁，有炒蛋多士，ok, 8分鐘等待後，麵同炒蛋多士前後腳到，開餐！ 丁麵先，火腿ok, 仿鮑片ok, 但溫暖、林晒、要自己另外落湯粉同麻油嘅麻油一丁，真係接受唔到。既然客人加$4叫「麻油一丁」，放埋味粉同麻油去煮會好啲，碗麵真心好難食。 叫炒蛋，嚟到嘅係精緻煎蛋皮卷，仲要好咸！咸到苦。 多士微温、林、韌。 咖啡還可。 服務無，你一停手，佢就攞走。 全個早餐$38，伏。

聽朋友介紹呢度好食，仲係結業日，唔食唔知幾時有得再食！嘩，嗱嗱聲掹衫尾去！ 去到發現招呼人嘅係個幾靚仔嘅後生仔，廚師係個美少女！？得唔得架～ 係得嘅！賣相一流！碗中每樣食物都有刻意安排同擺位，做車仔麵都有擺盤心思，係對食物本身同食客嘅尊重。車仔麵嘅靈魂～沙爹醬，係我食過嘅車仔麵當中最適當最完美嘅味道！唔太咸，非常香，令全碗麵味道提升！牛腩味道香濃有咬口，唔係平時出面啲頭尾牛碎！一件件整整齊齊！扇形擺放嘅牛舌，軟糯有致，越咬越有味道！糖心蛋，必須一次過全隻放入囗享受！其他食物，冬菇、豬大腸、腐竹水準皆在期望之上！ 每一口都足以閉眼享受，每一碗麵都有堅持有態度。多謝。

友好生日聚餐, 莫過於要個可以食吓嘢、傾吓計、飲吓嘢嘅地方。響大家有講有笑加上兩分酒意時, 如果有美食就更添完美。
在友人遲遲未到齊而我哋又好肚餓嘅情況下, 要求廚師求其比啲嘢嚟食吓先, 過咗一陣, 廚師端出幾件芋角! 心想: (咁得意!? 法食餐廳吃芋角??) 要影相, 因為隻芋角個樣見到已知佢好鬆化 , 同時嗅到好香! 憑呢陣香氣, 隻芋角應該好味. 咬落去芋角, 先係脆嘅聲音, 然後軟滑濃郁嘅芋蓉, 香菇同其他炒香晒嘅餡料, 條龍又再次伴隨耀眼光輝響口度走出嚟啦! 好好味呀!~~  叫聲未完, 友人到齊, 講咗句「係咪咁好味呀!」同時一手取去我未食嗰半隻芋角放入口... 結果又放龍. 廚師求其出嘅小食都去到呢個級數, 功力深不可測! 又心想, 咁啱得咁橋啫! 邊有咁多高人吖. 入正題嘞, 先嚟個四國火腿芝士盤  英國、美國、意大利、西班牙四國火腿各有特色, 各具風味! 啱先個小食嘅關係, 心中不斷挑剔有咩唔好, 最後, 找不出半點不好! 所以, 冇得彈.
然後嚟兩個湯,  濃蝦湯  洋蔥湯呢次有得彈啦! 咁好飲嘅湯, 份量太少啦! 其實係因為四個人分兩碗啫. 蝦湯淨睇色就知濃度高! 洋蔥湯, 湯頭香甜味足. 茄子蕃茄沙律入口茄子有茄子味, 蕃茄有蕃茄味, 但因為汁嘅關係, 酸甜度及濃度剛剛好, 全部融洽合一! 過癮! 到我要求最高嘅Pasta嘞, 大蝦意粉.首先要講係廚師嘅態度, 呢度open kitchen, 可以輕易見到廚師, 廚師煮此意粉時嘅眼神, 煮好後細心夾起極專心慢慢放碟, 明顯希望做好個presentation嘅態度, 已經好動人! 到上枱見到碟 Pasta, 用叉卷起放入口... 雙龍出口! 完美熟度嘅意粉! 汁液神奇地報滿在意粉上而冇流晒落底, 呢一刻知道為何要咁慢咁有心機放碟! 主角蝦, 蝦肉入口蝦味濃, 但質感係滑口! 點解? 點解會咁滑嘅!? 又鮮又滑嘅蝦, 好好食呀!~  南非燒雞燒雞唔會龍噴啦呱! 咩燒雞未食過呀, 咪應該都係咁上下, 先講賣相, 一上枱, 都話啦! 應該冇咩特別. 但係好香好香! 狠狠地先來件雞胸彈一彈先, 點知, 大鑊! 又噴龍! 蒜香, 香草香, 簡簡單單, 但出奇好味! 一碟好食過一碟, 點呀!? 可唔可以比個位我彈下呀!?  蒜片意粉由於剛才Pasta 太出色, 點咗客比較難整得好食嘅蒜片炒意粉, 蒜片加意粉, 仲可以點出乎意料呢? 就係有! 呢次我五體投地! 冇辦法講得出佢點解咁好味, 睇相, 意粉擺到個波咁出嚟, 意粉入口熟度剛好85%! 彈牙! 不單止好味到噴龍, 全碟不用3分鐘已全到各人肚中! 推介必點! 燒豬仔脾 皮脆肉嫩, 入口不膩, 好食!
Tiramisu我最愛蛋糕係黑森林, 經過今晚之後, 加多一款嘞, Tiramisu. 全晚最精彩就係呢件Tiramisu. 不膩口, 清新, 咖啡味好好, ... 係完美嘅味道!
其實是晚各食物都可獨當一面, 每一碟 (起碼對我們四人來說) 都很完美! 環境舒適, open kitchen 抽風好, 食客唔會一身油煙味, 招呼一流, 賓至如歸之餘, 有好朋友嘅感覺!
食到間完美嘅餐廳, 就好似認識到個好朋友咁開心, 咁舒服.