淨係杯棉花糖朱古力都夠吸精啦 飯同意粉係好食 扒都係正常野 有啲fusion菜式都新穎同唔算伏 薯條都係即叫即整連埋個醬係食唔停 Burger 就一般水準啦但夠大份 喺觀塘luck time 時份比你book 位 真係唔多選擇 同時食物水準都夠 亦都坐得舒服唔會太擠迫 係可以再幫襯嘅一間餐廳 唯一美中不足係甜品選擇唔多 同埋唔夠亮點令人印象模糊 #eatwell #eatwithahdor #hkfoodporn #foodlover #觀塘美食

環境一流 102樓望住維港食飯 仲要天朗氣清 食景多過食食物😂 食物亮點唔多 最有驚喜係個酸種麵包配唔同嘅olive oil 本身tasting menu 望落係幾抵食 不過唔使加錢嘅items 其實一啲都唔吸引 所以差不多樣樣野都係on top加錢上去轉 酒水佢都好積極同你介紹 但敗筆嘅係到你差唔多食完先拎杯pairing wine嚟😪 甜品都好一般 不過個景搭夠囉 順帶一提如果你係去慶祝生日 佢比你果個甜品係隻碗鋪左塊朱古力喺面 比你敲碎佢入而有張note祝你生日快樂 我個人寧願佢幫手喺隻碟度寫番生日快樂🤷🏻‍♀️

環境開揚、闊落、光猛 地點好隱世清幽 靚料、新鮮、好食 食材特別無欺場 個炸魚真係好小地方有得食 有驚喜 同時個生蠔係有蠔味清甜 少有日本蠔咁好食 刺身都係新鮮魚味濃 招呼亦都好好 可以再幫襯

好！出！色！ 甜品好好好好正 尤其是個架央西多士 架央超足料又夠香 西多士係好棉滑口感唔會炸到硬一硬 Tiramisu 係deconstructed 版 啲mascarpone cheese 真係停唔到口 黑毛豬一定要食 個面真係燒焦咗又caramelised 啲肉juicy 又彈牙唔會「鞋」 意粉都有一定水準 個宮保雞丁意粉有驚喜 好少辣但夠麻好惹味 其他意粉都好食 係個豆漿鱸魚就失色咗少少 但presentation 搭夠 喺你面倒豆漿落去加咗醋嘅魚度 令到啲豆漿慢慢curd 好似有啲食豆腐花咁 #觀塘番工嘅朋友唔好食旺呢間我唔想等位

多一間可以book位嘅cafe 而真係要book位 Walk in 試過真係得4-6個位剩🙈 環境舒服 同時工廈唔多餐廳所以唔會要等好耐𨋢 咖啡好啱口味 唔會偏燶偏酸 嘢食更加啱口味🤤 無論係Risotto 定意粉都值叫 而個pork belly 夠哂肥但又燒香咗個面 食落好惹味

食景食gimmick Overall speaking Kids meal 係抵食同好食😂 炸蝦都出色 除此以外我無嘢補充🤭 啤酒杯同發光杯可以帶番屋企 遊客地方不過無遊客 但waiter 都係keep 住遊閑vibe

前身係the salted pig 而家叫the pizza pig Pizza 係真係出色 值得叫嚟食 意粉好普通 杯sangria 都幾難飲🤢 所以如果去食，集中叫pizza 其他嘢就唔好有咁高期望

#伏 🔥 FLAMES🔥 人如其名 食到一肚火 嘢食唔係話差嘅 但係service 差到爆 衰過茶餐廳 不停叫你還番張枱比佢 12:10到餐廳入座 12:50起身走人 係 我哋係食得快 佢上菜亦都上得好快 咁但係你收緊$100一個set lunch 成個格局懶係食緊brunch 好chill嘅環境 然後你迫我好快咁食完個晏然後比番張枱你？！ 衰過茶餐廳呀 不停過嚟叫我地比番張枱佢 到我哋12:50走果陣 出面得2枱客等緊🤷🏻‍♀️ 有必要咁樣催我哋走咩？ 真係咁趕住做下一枱嘅生意 唔該入座果時講明用餐時間係得40分鐘囉

冬天啲魚真係好好食 今次真係搞唔掂 應該要叫夠15件🤭 親愛嘅白子夠哂肥 加埋蛋黃同少少醋 食落唔會太肥膩 繼續有魚味濃嘅間八食 甜蝦加蟹膏當然係膽固醇之選 銀鱈魚肥得嚟又香又腍 無秋刀魚食但有當做肥美沙甸魚 正過一個月前所食嘅多多聲 繼續都有帶子加魚子醬 兩件拖羅都各有千秋 海膽魚子杯當然都係一貫水準 食得好滿足 最後無入到鏡嘅左口魚裙邊手卷真係念念不忘 平時食開嘅水準已經勝價比高 今次啲魚真係好高質好好食 真係食左咁多次都繼續有驚喜

Le Vow 係一間好吸精又打卡-able嘅中菜餐廳 環境超舒服, 又有D外國FEEL 入到去, 有個大圓廳, 超高樓底 然後再伸延一D偏廳喺則邊 周圍都係落地玻璃采光度極高 望出去小白鷺個湖同埋見到火車經過 同埋好闊落 枱與枱之間有適當距離 坐得好舒服 . 鹹水角啤梨仔 係因為吸精所以點咗佢 而佢又真係幾好食 皮係煙柔韌又帶少少甜 個餡有少少咸比個皮嘅甜中和番 . 玫瑰金蝦餃 即係蝦餃一隻啦😆 蝦係爽口彈牙嘅 . 流心鵪鶉蛋燒賣 真係流心, 無呃你 . 金瑤蛋白炒飯 正常發揮 . 脆脆鮮蝦紅米腸 外軟內脆 . Overall weekend 去飲個茶真係幾chill 同埋都算child-friendly 自動自覺set好哂high chair 同比膠餐具 不過飲完茶出番黎小白鷺就無乜野行同做