順帶一提，萬家燒餅皇係山東街以前築地章魚燒既三份一舖位開左分店
質素一樣咁好

食過幾次，不過剩係食過武大郎同燒餅皇

武大郎裏面 D 肉 juicy D，份量好似都多 D
肉味十分之香，睇黎香料功勞真係好大
而汁亦都搞到個包皮濕晒，令到個包冇咁寡

燒餅皇... 個餅底好脆，肉相對冇咁多同埋冇咁 juicy
不過肉勁香，D 香料比武大郎應該落得更多
食落去都幾 match
相比起會比武大郎食得冇咁 lei hea，因為唔會勁流汁

下幾次試埋其他野食先

下午四點幾五點先黎食下午茶，人當然唔多啦
叫左個雙層芝士蛋漢堡 (沙律汁) 同埋薯條
好快等到我

一拎起個包，我 D 沙律汁同埋肉汁已經搞到成手都係... 唉呀我冇 tissue...
唔緊要... 多汁應該好好食

咬落口... 牛肉好有肉味，好 juicy
蛋... 唔會煎得過火，幾 OK
沙律汁唔太酸，芝士 OK，為個包作一個完美點綴

總之個包都有 80 分啦

至於薯條... 真係好一般... 首先D 鹽落得唔均勻
而且又炸得過火少少，好脆但好熱氣...
我諗下次我唔會再叫薯條啦....

Overall 黎講都幾 OK

早幾日食完澳牛，之後又食華星，哈哈
又講多次唔好意思因為我冇影相...

由於屋企冇人煮飯關係，我又係對面海
所以特登係灣仔食埋飯先返屋企

一入到去，舖頭得好少人，咁樣幾好，可以慢慢食
果度 D 裝修好新淨，又有好多畫、poster 掛左出黎可以慢慢欣賞
當然好過澳牛
而呢度 D 員工絕大部分都好後生，後生仔 D 服務態度當然好好多

去到叫左常餐，叉燒意粉、火腿炒蛋、多士、熱奶茶

炒蛋好滑，好有蛋味同埋牛奶味。
用牛奶炒果然係好好多，D 蛋都幾 juicy 架
要比較澳牛同華星既蛋，我鍾意華星，味道夠濃同滑。

而火腿同澳牛都一樣，只係大路野
多士... 論軟熟程度澳牛一定好 D... 不過華星都唔差

至於叉燒意粉... 好得意，叉燒放晒係低... 亦都因為咁味道唔太好食
同埋叉燒咬到有少少un，同埋唔太新鮮 (可能夜晚...)
而意粉冇咩味，但唔會太稔，湯底淡淡地冇咩特別
由於上次去澳牛係食牛通，今次食叉意，所以比較唔到...

奶茶 D 奶味好香，可能用北海道牛奶沖係特別唔同
茶味算係唔錯，只可惜自己手多落多左糖...
飲得出佢地真係好用心沖好杯奶茶

食晒都覺得唔夠喉，再叫多個奶醬豬 (花生醬點都抵食兼飽肚過牛油啦)
個豬仔包真係好脆 !! 我用刀切係咁切到好多包碎出黎
奶同醬又唔會太少，我每一啖都食到粒粒花生同埋奶
而且我成個碟都流左唔少奶醬出黎...

呢餐真係好滿足
而且員工服務態度超好，又冇多人，又唔會好似澳牛咁食得超趕
呢個係一個可以比大家 hea 時間既好地方

雖然澳牛都有唔少野好食過華星
但華星 D 蛋好味 D，同埋服務都好好多

又講句唔好意思因為冇影到相。

我份人本身唔鍾意食豬潤，因為唔鍾意佢 D 血腥味
不過見到咁多位都話佢 D 豬潤麵好食，所以我都試下

由於又係一個人去，所以好快就搵到位
一落單叫左潤牛麵同咖央西多

先黎咖央西多
一咬落去，咖央好甜好香，蛋味同椰汁味幾夠
而且咬落去又唔杰唔稀，質地剛剛好
係咁一塊一塊咁放入口好快食完

之後黎埋潤牛麵
唔鍾意食豬潤既我懷著戰戰兢兢既心情去食
哈，一咬落去，雖然自己知道都係唔鍾意豬潤既腥味
但我食得出呢度豬潤既腥味已經減到好低，比其他餐廳優勝
再飲埋用薑煲既湯底加食幾條薑絲都已經覺得腥味唔係 D 咩野

雖然維記仲味說服到我鍾意食豬潤，但佢令我呢餐冇再抗拒
我食晒 D 豬潤再食返牛肉
牛肉比我既感覺係唔會太稔，又有返少少咬口
不過麵就擺明煮得耐左 D，軟左少少
而麵既薑味湯底就幾好飲幾清甜，最適合連埋豬潤一齊落肚

總結，呢餐真係好滿足好飽好味呀
不過始終個人都唔太鍾意食豬潤，下次黎都係叫牛肉麵(米/通)算 ...

我諗我唔駛影相咁多位都知道呢度有咩野食啦...

今日想早少少食下午茶。

係網上面見到澳牛咁出名，諗住特登去食一次。
見到個個都話呢度食野好趕，於是睇定有咩食，到時去到即叫。

1430 去到排隊，前面有十幾個人，由於我 1 個人，1436 已經有位。

一入到去見到打仗咁款，真係覺得好特別。
原來呢度都有好多員工，我諗都有廿幾個，估唔到都要打仗...

位都未坐定即刻叫「牛通 炒蛋 厚多 熱奶茶」
20 秒後已經到左牛通，再多 30 秒炒蛋+厚多都黎埋，真係高效率。

炒蛋好滑，好有蛋味。
聽人講係用牛奶炒，仲以為會食到牛奶味，其實冇乜，我咁諗真係傻...
不過都算係咁啦。

牛通同火腿冇咩特別，不過個厚多都幾軟下。

當我食晒碟牛通同炒蛋，得返厚多時，我係度奇怪點解我杯熱奶茶仲未到...
呢個時候有個伙記走黎問我飲咩，我叫返熱奶茶，30 秒後就黎左。
其實個效率都算高，不過遇著我呢 D 位都未坐就嗌野食既人，漏單唔算出奇...

奶茶冇咩特別，算係 above average 啦，未係最好飲。

當我飲晒杯野飲之後，佢就寫左張 28 既紙比我
收銀果度都要兩個人黎收... 唔通真係連收銀都要快呀...?

出門口只係 1448。

其實今次我食得比較慢，可能 D 野比較熱啦
呢餐真係一餐名副其實既快餐。

講好食其實又唔係真係值得比人捧到天咁高
不過我想讚既係員工既效率。
另外好好彩我都冇遇到 D 好有性格既員工。

我每試一間台式飲品店，第一樣野一定試珍珠奶茶
因為呢 D 係最基本既野，間間都一定有
我第一次飲貢茶係佢新開張冇幾耐...
飲落... 覺得佢 D 茶味好香，係我飲過咁多間之中奶茶最好飲
果種香係我到而家都仲記得
唔係一味得個甜字，奶茶味好出
但 D 珍珠係咁多間之中最唔好食果個
冇乜咬口之餘味道又怪

好啦，隔左好耐又見口渴，又走去買杯飲，諗住試下睇下佢地有冇進步
點知佢地奶茶既味道已經差晒
冇刻意叫少糖，杯野真係得個甜字，奶茶味好淡，又唔香
珍珠... 比果次更難食，又係冇咬口，我食完第一粒已經好想嘔
食左幾粒決定淨飲奶茶
不過... 因為奶茶太淡太甜，飲左半杯已經掉左
我咁大個仔都未試過咁樣掉一杯珍珠奶茶架...

我係度都見到唔少人比哈哈笑，可能又係我叫錯野飲...
但係佢已經比左一個好壞既印象我，搞到我以後都唔想再幫襯...
我以後都係去返我最愛的 Come Buy 算...

先講唔好意思，因為冇影相...

有朋友話蔡瀾推介呢間麵店，一行 5 個人一齊去食
請我食，當補祝生日飯
原本去總店，但因為等左一陣都冇位，店員帶我地去分店坐
一落到去試食佢既酸蘿蔔...
可能我個人唔太鍾意食酸菜... 食左一件就唔想食
但同行有 2 個朋友食左好多...
到叫野食，大家都係叫 蝦子 雲吞/水餃 撈麵
我就叫左雲吞
五碟麵，竟然發覺五碟既麵同蝦子份量都唔太一樣
可能呢 D 真係睇下個店員有冇比中大份既你
我呢個算係少麵多蝦子，諗住咁多蝦子食落口應該好香
點知... 蝦子係冇咩味... 只係得少少鹹，唔夠香
食左一啖真係覺得好失望... 食某牌子包裝蝦子撈麵竟然仲香過佢...
可能係我期望太高......
不過好彩個麵救左... 冇鹼水味，蛋味重，夠彈牙，都算收貨啦
至於墊撈麵底既芥蘭... 我平時唔鍾意食芥蘭... (怕苦)
芥蘭食落唔苦，爽脆，佢令到我對芥蘭改觀
到雲吞，有 3 粒，一啖一粒剛剛好
料夠新鮮，食落蝦味好濃，味道比其他雲吞更加好
湯底都夠鮮甜，連埋雲吞一齊飲都覺得幾正

其實我食落唔係太夠，不過既然係朋友請，
費時係咁多 fd 面前再叫過就唔好啦
埋單 $140 ($28 x 5)，朋友請所以唔駛比錢

可能係我期望太高，在此奉勸各位千祈唔好抱太大期望

呀妹係網上面見到Outback咁多個笑，於是介紹屋企人係度為我慶生
佢已經一早睇定晒有咩食物係最好食，落單全部交晒比佢負責
先來一個必食黑糖麵包... 4 個人去但都係得 1 個...
雖然知道可以再要，但驚太飽所以都係作罷
一咬落去，好香好軟，甜甜黑糖味係個口度滲出黎
可惜兩啖就咬完，下次可以再黎一定會叫 waiter 比多幾個...
洋蔥湯... 飲落成家都覺得幾鹹... 定係味濃呢...? 呢 D 我飲唔出
不過最後個個都唔太想再飲落去... 唯有我飲...
洋蔥花... 其實係得個樣靚，味道其實幾一般，食落當然覺得好熱氣......
芝士薯條... 呢個成家人個個都搶住食...
D 芝士好好味，好香... 但食完都覺得飽飽地...
主菜來了...
可能我個人唔太鍾意羊既"so"味，羊架食落果陣覺得麻麻，自己唔太鍾意
口味呢 D 野人夾人，不過我屋企人都話羊架比其他冇咁好食
但佢既賣相又差左少少，切件上都可以唔駛整到咁亂既...
至於西冷，五成熟，未至於話好出眾，食過幾間都好過佢
但我都仲食到血腥味，感覺上都係唔係太好咁...
不過豬肋骨食落甜甜地 BBQ 味，幾鍾意呢個味道
我地驚食唔晒叫半份其實係蠢左，食一份一定抵好多...
竟然我同呀妹食晒都仲未覺夠，想叫甜品...
叫左個 chocolate thunder
下面有塊熱朱古力糕，上面有個雲呢拿雪糕，再上面有個 cream
一凍一熱，熱力令到個雪糕融少少
一放落口，一凍一熱，一軟一"硬"，口感豐富到不得了，非常特別，好好味
原本爸媽都冇諗住食甜品都一齊食
呢個甜品為呢餐生日飯劃上一個完美句號
4 個大食既人總共食左接近 $800

雖然呢度野食有好有唔好，但係比我我下次都會再黎，只要唔好叫錯野就得