路過呢間好多次都冇食，今日11點幾見佢冇乜人就同屋企人入去試吓。我是日茹素，冇叫拉麵，屋企人叫了貝汁底豉油拉麵，牛腩炆大根，我叫了四季沙律及脆豆腐。員工記性很好，態度有善，上菜速度快，在IFC這個位置是delightedly expected. 兩位屋企人都讚個拉麵湯底清得來很香，松露味突出，可惜蓋過了貝汁的味。豆腐的miso sauce 非常非常濃！陪着炸豆腐，很有新鮮感。40分鐘不到食完這一餐，優質服務及食物是意料之內，不失為busy schedule 之中嘅一個好選擇。

去紅館體show 之前嚟呢度試吓高檔粵菜，興幸中菜可以有貴同好食的選擇。叫咗子薑皮蛋、招牌肥燶叉、鼓油雞例牌、芥蘭炒臘味、杏汁白肺湯、白兔糖奶凍，茶2位叫了雨前龍井同菊花。 非常appreciate食物每様細細份，可以試多幾樣又唔會浪費。最欣賞係個炒芥蘭，大部分係幼嫩的菜莖上段，脆口又夠芥蘭獨有的甘甜。叉燒同埋豉油雞係意料之中嘅水準，叉燒一啖一件，半肥瘦好腍，豉油雞上碟時問我哋要唔要加燒味汁，梗係要😋，撈飯一流（不過因為生酮飲食冇叫飯，燒汁點雞皮食）。杏汁白肺湯足料，湯水未及想像中的濃。白兔糖奶凍有創意，中晒本地集體回憶，可惜奶凍個味唔係咁似白兔糖嘅味🤔 壺茶一個人真係飲唔晒咁大壺，細壺茶濃就好，有機會再去會叫佢只係斟半壺水。 餐廳將傳統粵菜年輕化，走高檔年輕化路線之餘，希望每一台嘅座位有返少少私隱，同埋張凳坐得舒服啲，咁我帶外國/飲食男女朋友去食中菜嘅時候就必定會揀呢間。

屋企人以為訂咗Grand Cafe Buffet 點知原來訂咗Tiffin lunch buffet，錯有錯着。坐上樓上景觀開陽啲，又有現場樂手伴奏，加上staff 服務周到，老人家覺得環境好pleasant。個buffet 冇拿手中菜hot dish，我又唔覺得太可惜。由於生酮飲食嘅關係，見到各款salads 同埋個厚切salmon 已經覺得包咗底。值得一讚嘅係個curry section，認真做好naan 、薄脆、印度米飯同埋其他嘅醬汁。逢親去老牌酒店buffet，我都鍾意試各種醬汁同埋配料，佢哋花心機做好每一個細節，我亦用同樣嘅力度去欣賞。值得讚嘅係個龍蝦湯，不過少吃多滋味，飲半碗以上已經好飽。由於唔想浪費食物，set lunch 那部份skip咗egg dish，只係食咗清蒸龍蝦，龍蝦鉗肉預先剝好，very thoughtful. 屋企人話個龍蝦肉有點tough，well，我有龍蝦食已經開心☺️ 最後個餐茶嗌咗凍檸茶，第一次見到有鮮檸檬跟埋lemon juice with pulp ！

Lee 間泰菜食過五次以上，鍾意呢度casual、價錢唔貴，同埋有心做好簡單食材。鍾意坐得舒服、食裝修嘅朋友，呢度未必啱你。 自己食working lunch 又或者帶朋友嚟食晚飯，一定叫兩樣嘢：竹夾燒雞塊，鹹椰汁湯圓。個燒雞午飯嚟食可以跟糯米、或者白飯，多汁夠味炭燒燶邊😋簡簡單單一件雞可以做到咁，加埋個酸辣汁，送飯一流。不過呢兩年我生酮飲食，所以今餐冇送飯。另外個咸椰汁湯圓個主角一定係個汁，唔係啲湯圓（可惜我冇影相），建議有兩個人以上先好叫，個湯圓驚你食唔晒。另外叫咗未試過嘅crab meat omelette. 冇想像中咁油膩，佢俾埋sriracha ，如果唔點嗰醬真係有啲唔夠味，不過豐盛咁滿滿。仲有叫咗個柚子蝦沙律，料頭好夠（生shallots, herbs, 蒜），偏甜但開胃👍 成餐飯最弊就係個泰式檸茶，個茶底好淡，希望唔係因為我叫走甜嘅關係🤔今日係平日夜晚嚟食，全間爆曬，好在有book 位。

所有素年嘅分店我都食過，係時候寫個食評。今日食咗呢個和式鳥冬套餐，想食好耐㗎啦，上次賣晒食唔到。最欣賞佢用咗唔同嘅醬汁（酸甜汁，淡豉油、濃花生麻醬），令到人哋覺得素食都可以好精彩。我最鍾意嘅係嗰豆腐，質感非常Q彈，有啲似細個食嘅滷水豆腐乾，只不過呢個軟身及彈牙啲。甜品嘅琥珀合桃香蕉蛋糕都好正，合桃很鬆脆，香蕉糕兩邊都焗脆咗，caramelized banana 係frozen banana! 所以咬落似雪糕，但係又有一層糖脆喺頂，it’s an element of surprise! 上邊個cream 係coconut, 濃得嚟唔滯。staff 醒目友善，抵讚👍會繼續經常嚟🫶 唯一想佢哋加上嘅就係介紹套餐裏便邊隻菜用咗本地食材，令我食飯都增加多咗本地農業嘅認識。

今日特別為咖喱炒飯而來，順道到見山買書作紀念。12:15pm 到達，非常幸運有一張二人吉枱，馬上坐低落單，我同女性朋友因為怕飯太大碟，食唔晒會浪費，所以先嗌一碟咖喱雞翼炒飯同埋兩杯凍檸茶，第一碟上咗之後覺得portion size ok, 即刻嗌多一碟。呢個飯個個都知好食，令我最開心嘅係佢好多蔥白，炒到透明，咬落香甜脆，炒飯夠乾身，粒粒分明，咖喱香得來唔算辣，淨係個飯都好好食。啲雞翼比較乾咗啲，下次如果再食，我會叫淨咖喱炒飯加隻蛋。食完大概12:35，出邊已經排咗大概10個人，we are so lucky!

Weekday放工過嚟唞吓氣，上到嚟揀咗個望海景嘅位坐低。舊年佢哋啱啱開嗰陣時已經嚟食過幾次，了解到食物質素正常，所以今次上到嚟抱住食環境嘅心態，搵個靜靜地嘅地方放鬆一下。飲嘢絕對冇問題，叫咗rosé, happy hour 價錢，由於太肚餓，叫咗個紅咖喱蝦飯，食食吓後面大廳有人開始做座談會，title 係我鍾意嘅，我就靜靜地一路飲嘢一路旁聽，最後叫多個camomile tea，望住維港日落景, 聽住好有營養嘅藝術座談，體會另一個層次嘅享受。Staff 很有善，樂於解答問題。下次會揀星期五嚟，食完嘢落去睇埋展覽。

夜晚要去灣仔睇話劇，屋企人建議食呢間，十幾年前食過，慶幸佢而家仲喺度。夜晚我多數食少啲，所以今日叫大部份都係頭盤冷盤，全部細細碟，可以試多幾樣。第一round叫咗辣金錢肚、麻醬油麥菜、炸脆鱔、龍井蝦仁、松茸花膠燉螺頭。金錢肚比較辣咗啲，不過都好腍好好食，另外第一次食生嘅油麥菜，very crispy and interesting 😎 上菜速度好快，份量貴精不貴多，屋企人心思思想繼續食，叫咗一個黑叉燒，黑濃嘅醬油配薄薄嘅半肥瘦肉片，啱我鍾意重口味份量細嘅嘢。個燉湯非常清甜足料好飲，叫咗大概20分鐘先至有，明白的冇問題👍最後叫埋個酒釀丸子同埋傳統綠豆糕，綠豆糕我配埋龍井一齊飲，一甜一甘，味道很夾。部長很健談，服務快捷，最後其實食到好飽，如果真係要唔叫一樣嘢嘅話，我會skip咗金錢肚（其實都好好食，眼闊肚窄）。

何文田半路係我另外一間常去放狗飲啡嘅地方，用有本地特色嘅瓷器同埋木傢俬，坐佢門口外面嗰個小空地，同路過放狗嘅街坊傾吓偈，好休閒寫意，呢樣係隔離幾條街嘅cafe 做唔到嘅，所以就算呢度嘢食選擇唔多，我都寧願返嚟呢度。我同屋企人次次都係叫 Sun Juice, latte, Shrimp pasta, 同埋avocado toast with smoke salmon and egg。shrimp pasta 正常發揮，acidity 比較重咗啲，至於個sourdough toast 係好食嘅，沉實得來個邊夠脆，麵包個心仲係moist, 淨係食個包都已經OK。真心希望佢哋可以轉下Menu，尤其係savoury dishes, 咁就無敵了👍

區內開業多年嘅街坊小店，非常有人情味，入到去大家會認得，噓寒問暖，睦鄰關係一流，根本唔需要我幫佢哋push生意。屋企人周不時捧場食甜品，尤其是係果凍，因口感非常「彈」，令屋企兩個啫喱控為之着迷，每次我都會起碼買四份（共16件）先食得夠皮，每份$28。佢哋啫喱多數會有檸檬茶味、洛神花味，今日有期間限「茉莉綠茶味」，呢個係我嘅至愛；淡淡嘅茶甘香，唔係太甜，食完都唔內疚。佢另外仲有簡單的午餐晚餐，係比較健康嘅意粉或者飯餐，我未食過，遲啲搵機會試吓。