上年知道元朗廣場附近開咗呢間土耳其菜嘅小店之後，一直都想搵個機會去試下，因為從未食過土耳其菜，好難得今晚終於有機會嚟試食。我哋係大約八點十分左右入座，當時舖入面未滿座，可以任揀坐邊。我哋揀個靚位，可以望到成個餐廳環境，我覺得呢間店啲裝修真係好靚好有特色，一抬頭仲可以見到上面有閃閃發光嘅土耳其吊燈添！ 侍應識講廣東話，都會講英文，落單嘅時候係用英文點菜， 我哋睇餐牌都揀咗一陣，先決定到食咩，因為見到有好多特色小菜，樣樣都想食， 最後叫咗4樣餸～ 個餐牌我覺得好靚好中意 同餐廳門面＆啲裝修一樣，充滿曬土耳其特色。佢個餐牌顏色係藍mix紫，封面印有一望就會諗起係土耳其依個地方嘅城堡 呢個沙律個名好特別，叫做浮雲沙律。 有好多菜啦，青瓜，蕃茄仔等等， 仲有一啲類似脆脆嘅嘢，沙津上面本身已經有好多醬汁，侍應仲另開畀咗三支唔同顏色嘅醬汁畀我哋調味。個沙律食落好清新呀，啲菜好新鮮好爽脆，食到嗦嗦聲。味道酸酸甜甜，而且仲有少少辣，食完即刻勁開胃好吊癮！ 重點係佢份量真係好多！呢個碗好深，我哋兩個都食唔曬啲沙律囉 因為我怕辣，所以專誠叫咗杯解辣嘅飲品，呢杯係薄荷茶。下面綠色部分係薄荷，飲落勁清涼，即時解到辣兼非常消暑！加上我見依杯嘢嘅顏色好靚咁，影相打卡夠晒靚靚，有黃色＆綠色，望落已經好夏天feel好清新，我都畀推介依杯飲品，怕辣嘅人大家不妨一試 跟住呢個係烤野雞肉卷餅，用錫紙包住啲肉卷等佢keep住熱度唔會咁快凍。呢個真係要趁熱食啦！凍咗嘅話就冇咁好味。重點嚟啦！佢嘅份量又係好鬼大份，都冇諗過呢個雞肉卷會咁大份，食咗3分2已經飽飽地！雞肉卷入面有好多椰菜，包住好多雞肉塊，啲汁係咁滴出嚟，包住d肉卷嘅皮又整得煙煙靭靭，咬落口感好creamy，感覺好似食緊薄餅咁，而且佢啲皮薄得黎又唔易穿，有少少燶燶哋好香口， 名副其實嘅皮薄餡靚。雞肉卷入面仲有啲 應該係土耳其特色嘅香料醬汁，食落令到成個卷好惹味好香呀！ 呢個叫做～草原牛肉水稻飯 啲牛肉細細粒，切成一條一條，上面灑咗好多味道好重嘅香料粉，令到d牛肉好惹味，食完一嚿會想食第二嚿。我就係咁夾啲牛肉嚟食，直情連飯都唔想食啦哈哈，不過撈埋飯食嘅話其實就剛剛好，因為佢始終比較偏濃味，太重味道嘅話食返啲白飯會好點。另外上面仲淋左一啲類似沙律醬咁嘅醬汁，我覺得就可以中和返少少比較濃味嘅香料粉啦～ 最後就到依道 鬆化咖哩角 食落真係好鬆化，好脆卜卜，咬落去入面啲餡就熱辣辣，而且啲咖哩多到係咁跌出嚟， 佢啲土耳其特色香料，令到入面啲餡真係好香好引人繼續食落去，呢個咖哩角係辣嘅，但佢辣得嚟又唔會過份地辣到食唔到。同之前幾道餸都一樣，又係好大份！呢間餐廳嘅特色 係每樣菜式嘅份量都好大份，真係唔使驚食唔飽人 我哋叫咗咁多食物，埋單加埋一，都只係300蚊多ddddd咋！個人認為性價比十分之高！食物有水準、有特色！真係好抵食，下次再來試下佢其他菜式先

唔知點解晚餐突然好想食日本嘢 所以同男朋友諗住試下新餐廳，就嚟咗呢間 見到餐牌啲丼飯好吸引，價錢又平 所以就決定食海景丼 個定食有大大碗丼飯，擺得好靚 顏色鮮豔好搶眼，哈哈 麵豉湯 唔算好大碗，細細碗咁但係都幾好飲 入面有好多豆腐，味道啱啱好，唔會太鹹 至於碗海帶 就幾有驚喜，因為望落普普通通咁 本身都不以為意，純粹覺得份量好多 點知食落又幾清新，勁fresh嘅感覺 佢加咗柚子汁，所以有好大陣 好清新嘅柚子香味 呢個海景丼飯一共有六種刺身 有三文魚，北寄貝，熟蝦，帶子，希靈魚 ＆蟹柳肉，上面都有好多蟹子做伴料 碗飯超多料！擺得好靚之餘刺身都幾厚身一片 尤其是係三文魚同埋，蟹柳肉 食落去啖啖肉，都還算新鮮嘅～ 不過d飯就有啲硬，而且飯醋味唔夠濃 如果再改善一下嘅話會更加好 男朋友食嘅係鰻魚芝士蛋包飯 個飯真係超級大份睇到眼定定 條鰻魚好大件夠曬長，不過食落就比較濕 如果再乾身啲就好點，同埋d肉煮得有點太過腍 味道就不過不失，未去到難食但又未稱不上好食 個芝士蛋包飯份量就夠多，不過味道反而 令人有點失望，一般般啦，都ok嘅～ 芝士味唔夠濃，個蛋包飯味道偏淡囉 勝在大件夾抵食，咁大條鰻魚！！ 個四色刺身拼盤，一樣都係擺得都幾靚 有三文魚， 北寄貝 ，甜蝦 ，帶子刺身 前三樣刺身好大件又肥美，都ok新鮮 唯獨是啲帶子刺身就麻麻地，比較薄身 食落唔夠新鮮囉 最有驚喜就係依個芝士帆立貝錫紙燒 好大陣好香嘅芝士味，燒得有啲燶燶地咁先 過癮，食落好香口熱辣辣 性價比亦都係最高嘅一樣，抵到爆$28咋！ 一共有六粒帆立貝，每粒都大大件好彈牙 啲芝士好creamy，用個叉一筆起見到拉絲 而且有好多薯仔粒添，粒粒都癡滿曬芝士 口感好豐富，一邊食好腍又焗得香脆嘅薯仔 一邊又有芝士拉絲嘅creamy口感 飲品跟餐嘅話就半價，我哋一人嗌咗杯 打卡影相好靚嘅梳打 我係青蘋果梳打，男朋友係巨峰梳打 值得一讚嘅係佢唔會落好多冰囉 都係得三四粒冰，唔會溝淡飲品嘅味道 兩杯都有好香嘅青蘋果＆ 巨峰香味

食完晚飯突然好想食糖水 男朋友話帶我去九龍城呢間好出名 嘅糖水舖食甜品， 究竟有幾好食呢 我都抱住好期待嘅心情想試吓～ 個menu真係有好多選擇，花多眼亂 成幾十樣糖水 我哋揀咗好耐都唔知 食邊款好，淨係想每款都想試下，哈哈哈 最後一人揀咗一款凍嘅糖水 熱辣辣嘅天氣食番碗透心涼嘅糖水 真係好爽 我嘅係 44.冰花蓮子雪耳清心丸 男朋友嘅係 51.冰凍菠蘿馬蹄沙 一上台真係o咗嘴，我冇諗過會咁鬼大碗 哈哈，心諗～咁多點食得曬 我碗糖水加冰加奶，冰就有好多 真係夠曬凍，奶都有好多，撈勻嚟食 勁大陣奶香味啱曬我呢啲鍾意奶嘅人 啲雪耳真係超級爽口，食落去索索聲 勁爽脆㗎！ 蓮子亦有勁多，食得出好新鮮 清心丸亦有好多沉曬底，每一粒都好大粒 好煙韌超彈牙， 咬落去彈下彈下好有口感 男朋友呢碗菠蘿馬蹄沙都好好味 啲菠蘿又係沉曬底，有好多塊 每一塊都好大嚿，亦好甜好爽好冰凍

今晚同男朋友＆佢屋企人嚟呢間 試下佢啲藥膳雞煲 煲咗一陣，終於食得啦！呢半隻雞好新鮮 啲肉真係好嫩滑，滑到直情唔使咬咁濟 就咁吞落肚都得啲湯有好濃嘅藥膳味 食得出啲藥材係好新鮮，有好多桂圓同紅棗 啲紅棗真係好甜桂園亦都好腍好香 啲湯好味到我哋飲咗好多碗，飲完之後 成身曖曬興烚烚呀 響鈴脆卜卜，係新鮮炸出嚟㗎 所以真係好脆，就咁食又得＆浸落啲湯度又得 就咁食嘅話就好辣口，所以我浸咗少少 藥膳湯先食，吸曬啲湯味超正 牛肩肉好新鮮，啲花紋好靚，肥瘦均勻 淥熟之後食落又唔會話太靭 而且一碟有好多片， 每一片都好大塊 絕不偷工減料 手打芝心蝦丸 係我嘅心頭好 啲丸最正， 食落去好彈口呀！爽口彈牙 一咬開啲芝士係咁流出嚟 好似流極都流唔完咁呀！ 不過只得六粒，少咗啲咁囉，多番幾粒就好 最後呢道鱔，就最令我哋失望 雖然佢望落好新鮮好靚咁 你睇～啲色水都唔差咁…… 但係食落啲肉係鞋嘅，淥咗一陣 都冇話好耐，已經即刻食架啦，但係 啲肉都係唔彈牙唔爽口，明明鱔嘅肉應該 係要彈牙爽口㗎嘛所以我食咗兩片就冇再食

之前同男朋友專誠過黎想試佢地果個 流極都流唔完嘅心太軟 但兩次都撞正師傅落場食唔到 今次專誠book左台終於都食到啦！ 一人嗌咗杯凍檸茶，咁啱兩個都飲一樣嘅野 哈哈， 佢連啲凍檸茶都特別好飲過人 好有茶香味， 而且又唔會落好多冰 仲有啲糖漿畀你自由調教甜度，好細心！ 啲餐湯都唔馬虎，係南瓜湯黎 湯嘅份量好多，裝到滿曬咁濟 而且啲顏色好靚，影相呃like一流 飲第一啖已經覺得好好飲，好香甜嘅南瓜味 熱騰騰又好暖胃，我係個麻麻地南瓜嘅人 但都覺得佢啲湯好好飲，最後全部飲曬 佢個餐包 亦都好好味，烘到有點兒燶燶地 夠香口，搽塊牛油落去食更加正 我嗌左呢個芝士煙肉豬扒配蘋果沙律 個賣相望落好高級，好興奮好期待 抱住一試嘅心態，點知味道一樣都係好掂 啲豬扒煎得啱啱好，絕對唔會韌，腍腍地咁 恰到好處，夾住塊鋪滿芝士嘅煙肉一齊食 口感好豐富，可以食到豬扒嘅肉香味 同時又有煙肉嘅味道＆濃濃嘅芝士香 對於我呢啲好鍾意食芝士嘅芝士控嚟講 真係食指大動，食多幾件如果覺得 有點油膩嘅話，可以食幾塊隔離嘅菜 同埋d好爽口嘅蘋果中和一下油膩感 男朋友嗌嘅龍脷柳，亦都好有水準 完全係色香味俱全，個賣相真係好靚 靚到我第一時間影相打卡 啲伴菜有蕃茄仔，西蘭花＆薯仔 啲薯仔炸得好香口好脆，勁好味 龍脷柳上嘅醬汁亦都起到畫龍點睛嘅作用 龍脷柳啲魚肉十分之新鮮，食落好嫩滑 啲魚肉亦好有魚香味 將魚肉切成一舊舊，再點滿曬d醬汁嚟食 真係冇得輸呀 最後就係重頭戲，專誠黎食嘅心太軟啦 佢嘅外型望落雖然好普通，但真係好食到爆 而且睇得出小店好用心，喺碟上面畫咗 個公仔，係隻貓貓嚟，超可愛呀 心太軟外脆內軟，出面係正常溫度 但入面食落去，暖笠笠，啲朱古力漿超暖呀！ 一切開，入面啲朱古力漿係咁不停流出嚟 流極都流唔完咁，勁誇張個畫面好震撼 而且啲朱古力漿又唔會話太過甜喎 隔離啲生果點少少朱古力漿嚟食都好正 呢個朱古力布朗尼配芒果雪葩一樣好高質 除咗賣相同樣係好靚之外 味道亦都好令人一試難忘 碟上面一樣又係畫咗個公仔，好得意呢哈哈 個布朗尼細細粒四四方方 一食第一啖，第一印象係～出面嘅甜度 係恰到好處，但食到去中心位果度就再甜d 一樣都係甜不過係果種甜而不膩嘅feel 食到咁上下，如果覺得太甜、膩嘅話 又可以食番粒生果，中和一下 再咬一啖芒果雪葩，凍冰冰涼透入心 真係超正，一凍一熱口感交替 而且雪芭比雪糕健康，佢啲芒果味雖然唔出 但一樣係好好食

同男朋友入開佐敦，食完法國三文治 就行過對面呢間餐廳 我哋諗住繼續食越南菜 諗都唔使諗，決定食生牛肉河粉 因為我一直想試呢個特色越南菜好耐㗎啦 平時見人食得多，所以都有點興奮有點期待 好想試下係點嘅 色香味俱全呀，聞落去香噴噴 啱啱整出嚟，碗河粉非常之熱辣辣 攤咗好耐先食到，上面鋪滿咗好多蔥花 超正，啲生牛肉仲未轉色 個色調好靚呀，慢慢望住佢畀啲湯淥熟 啲牛肉好薄好腍，基本上唔使點咬都食到 個湯底好香，雖然味道唔算濃～ 但都令我忍唔住係咁飲 啲粉嘅份量非常之多，我一個人嚟講 係食唔曬嘅，食落好彈牙好爽仲好滑添 食一啖粉撈一匙羹湯，筆住邊食邊送黎飲 再食一片牛肉，好夾呀成件事 再配埋個熱檸茶，真開心 男朋友嘅檬粉都好好味 倒咗支醬汁之後撈落去食，酸酸甜甜超級開胃 食完令人食指大動， 真係完全開胃曬 呢片香茅豬扒又超大塊，勁好食 咬落去一啲都唔韌，肉厚又多汁

天陰陰一直落住毛毛細雨 男朋友帶咗我入嚟觀塘呢度食蛇羹 佢話蛇王娟嘅蛇羹 好好食 見佢講咗好多次話想食蛇羹 所以就陪佢嚟試下 由於時間尚早，四五點嘅時分 所以舖頭一台客都冇，淨係得我哋兩個 鋪頭都算大，寬敞明亮 又夠光猛 而且娟姐嘅服務態度亦都好好 親切又nice 一坐低不及待就叫咗 蛇羹同埋糯米飯 其實我本身係麻麻地蛇依樣野嘅 至於 蛇羹呢啲嘢，我就唔會主動去食 但如果有得食嘅話， 又唔會話唔食嘅 佢啲蛇羹雖然唔算話超好食 但勝在夠足料，都睇得出用心嘅～ 而且都有眼見超大一碗， 我同男朋友 一人裝咗一碗嚟食，到最後我都係食唔曬 碗糯米飯亦都好足料 連我呢啲平時好少食臘腸同埋花生嘅人 都成碗飯食晒，皆因佢啲飯夠香 好鍾意佢陣糯米飯香味，而且飯上面鋪滿咗蔥 配埋啲蔥花一齊食感覺啱啱好 至於啲蛇湯……一開始我有啲抗拒嘅 因為飲第一啖覺得陣味怪怪哋 即刻畀我嘅印象就唔係咁好 但由於食碗糯米飯嗰陣好口乾 所以陸陸續續，都繼續飲咗幾啖湯 越飲越習慣咁，開始覺得都唔係咁難飲啫 到最後又係成碗湯畀我飲曬囉～ 食完之後 真係飽曬，有飯有湯 同埋個人即刻冇咁冰凍，暖返少少囉

終於有時間 嚟佐敦呢度 試下呢個 法式三文治啦，因為男朋友講咗好耐 想帶我入嚟試，但幾個月黎都冇機會 所以心情難免有點期待，有點興奮 我哋order咗一個大嘅法包，價錢有點兒貴 要$78一個，不過食完之後都覺得係值得既 個法包 好大嚿，同埋好長！ 呢個大法包又真係幾大吓， 本身仲驚食唔曬㖭，包嘅樣子望落好靚 入邊好足料呀有好開胃嘅酸蘿蔔絲， 青瓜 ，扎肉片，豬肉碎，同埋d腩肉片等等 啲酸蘿蔔絲鋪滿曬喺面，色水好靚 而且食完後仲勁開胃添，啲青瓜都係 食落好清新， 中和番啲豬肉嘅 肥膩感 由於入面實在係太多料，所以食到 係咁跌曬啲肉出嚟哈哈哈 而且個法包真係好脆好脆，脆到係咁 跌曬啲麵包碎落嚟呀 所以我哋食到成枱都係麵包碎 今次學精咗，下次再食嘅話 要帶定啲紙巾嚟墊住啲碎 同埋包嘅面都灑咗一啲胡椒粉 令到個包更加惹味，不過亦都搞到我打乞嚏哈哈哈

mikiki新開咗依間自助式嘅 日牛扒餐廳冇幾耐，所以專誠黎試食 佢係1g/$ xx 咁黎計嘅～ 因為始終係新開嘅，所以好多人 我哋大約八點半嚟到，餐廳已經滿座咁濟 好難得先搵到個位坐低 我同男朋友分別一人嗌咗西冷扒＆後腰三角肉 啲配菜有5樣，可以揀其中三樣 我揀咗飯，沙律，味噌湯 同埋又有得畀你揀係配咩汁，有幾款揀嘅 我哋兩個都揀咗蒜蓉牛油，因為會好味d！ 一上台件西冷扒係有3，4成熟嘅 所以切開嗰陣仲係血淋淋，有啲血水嘅 但唔緊要，因為塊鐵板會幫你慢慢地 燒熟塊牛扒，所以會越食越熟 件西冷扒真係勁大塊， 啲紋路好靚 切開嗰陣唔會話好韌好難切～ 加上個鐵板慢慢燒熟啲肉，所以切做一塊塊 嗰陣，呢張相已經係冇咁多血水嘅時候 我食牛扒習慣咗食飯，因為要配飯先飽肚 佢啲咪係日本米，大大粒好有飯香味 個味噌湯 反而令人失望，望落好好飲咁 但係味道實在係太鹹，難頂到試咗幾啖 就唔想再飲啦，所以畀咗男朋友飲 個沙律反而望落平平無奇，但又幾好食喎 個蕃茄仔＆菜好新鮮好新清 個西冷扒味道唔算太鹹，都夠味嘅 好有牛肉嘅香味， 而且食落完全唔會話好韌 啖啖肉，最鍾意食啲唔韌嘅扒㗎啦 亦唔會有任何肉渣，最邊果塊筋位好肥美好正 送飯一流，重點係～邊食d扒果陣 記得要點佢嗰啲醬汁配埋啲醬汁嚟食嘅話 真係好正，可以話係錦上添花 啲粟米蒜蓉牛油又勁香，好食到我連啲 粟米都一粒粒咁食曬 可能我鍾意食牛油配蒜蓉啦，真係好好食！ 男朋友嗰塊後腰三角位，都勁大塊 好正呀， 佢同我一樣 揀咗飯 唔同嘅係，佢嗌咗飲品（可樂），溫泉蛋 肥瘦均勻色水靚，完全做到色香味俱全 食落一樣又係冇肉渣 塊扒好大件， 所以切開之後 一樣係大大塊一片 溫泉蛋好靚呀！佢好鍾意食溫泉蛋的哈哈 配埋個溫泉蛋撈落碗飯度食 成件事perfect晒

一直想去呢間餐廳食，講咗都好耐好耐 但一直冇機會，今晚終於有機會試到啦 同男朋友出完九龍返番嚟，時間都唔早了 都成大概八點九了，星期五嘅晚飯時間 我地兩個入座果時，餐廳都已經七八成full了 我哋點咗個二人餐，因為見都幾抵食咁 價錢又唔算貴，食物選擇又多 我觀察到，餐廳嘅特色係～啲菜式 係一道一道咁上嚟，等你食完之後 先上第二第三道餸咁嘅模式 依樣好值得一讚因為我覺得咁樣嘅話 可以令你用心慢慢欣賞每一道菜嘅特色 唔會上到成枱餸，食唔曬之餘又唔知食邊樣好 第一樣係刺身，樣子十分之精美擺得好靚！ 一共有四款刺身，每款都好大片 雖然唔算好厚一片但勝在厚薄十分適中 我好鍾意嘅希靈魚同埋三文魚都好肥美 尤其是啲白魚刺身，勁香呀，超正！ 食得出d刺身係夠新鮮嘅，尤其是係啲蝦 只係我覺得佢啲蝦刺身有少少細嚿囉～ 第二樣係，醬燒三文魚腩壽司 每一嚿都大細均勻，樣子望落燒得好靚 上面鋪滿咗蟹子同少少蔥花 口感豐富食落有一種入口即溶嘅感覺 三文魚腩燒得好香好滑 味道十分之好，每人得兩件真係唔夠喉 好想食多幾件，哈哈 第三樣係壽喜燒，其實比我想像中要大碗 真係超大碗唔係講笑，我仲心諗：死啦， 我哋兩個點食得完，不過好彩最後都清晒 依碗壽喜燒真係好足料，有菇有粟米 又有超多娃娃菜，啲娃娃菜仲要好甜添！ 仲有隻生雞蛋啦，同埋勁多牛肉 啱曬我啦，我最鍾意食肥牛，所以食咗好多 食完之後啲湯底仲要好好飲好鮮甜 第四樣就係天婦羅，估唔到佢連d炸物 都做得好好，每樣都大大件絕不馬虎 有炸南瓜，茄子，秋葵，蕃薯＆兩件炸蝦 平時好少會食茄子秋葵呢啲蔬菜 不過佢炸得好好食，同埋唔會話感覺上 食到淨係得一團炸粉咁樣 而且啲炸蝦，佢真係做到外脆內軟囉 脆卜卜嘅炸物入面包住又腍又爽嘅蝦肉 呢個天婦羅嘅口感真心正 最後一樣就係呢個芝士烏冬 雖然食到第五樣餸，已經飽左九成 但真係太好食，成個烏冬都畀我哋清曬 佢啲烏冬可以話係我食過嘅烏冬入面 最彈牙嘅一間，因為真係好煙韌好有咬口 d烏冬喺口入面好有彈性，感覺就 好似個波咁，彈下彈下，好得意 雖然個烏冬d芝士味，相對地就冇咁出 不過份量就好多，而且上面兩件炸蝦 都炸得好好味，係腍到連啲蝦殼都可以食埋 總括嚟講呢一餐真係好滿足 食物都幾有水準之餘，而且份量又多 我哋 都只係食咗45分鐘，每樣餸慢慢咁上 可以試真啲味道，慢慢咁食，唔會好快就飽 所以每一樣嘢我哋都清曬