呢間主打燒烤+日式放題嘅餐廳位於地理位置超方便嘅尖沙嘴，而且環境闊落好坐，非常適合三五知己聚餐！ 呢度食物嘅種類超多，包括刺身、燒肉、以及多款熟食，一大班朋友仔肯定唔洗擔心搵唔到啱食嘅嘢！ 呢度嘅壽司選擇好多，當中嘅火炙壽司賣相不錯，而卷物都好好味！ 燒肉方面，豬、牛、雞唔同部位都有，當中嘅和牛同牛舌更加係回本之選！啲牛好新鮮，牛味十足！ 一品料理同樣有驚喜，例如豚肉生姜燒、肉鬆菠蘿炒飯、炸天婦羅等每一樣都係有水準之作 飲品選擇都唔少，最正係啤酒無限暢飲，好適合成班friend聚會！

自從通左關之後無再喺香港食過Omakase，原因係我有個錯覺，覺得香港食omakase 嘅入場門檻非常高。但最近朋友帶我去嘅呢間位於天后嘅「榊原」打破左呢個印象，尤其係佢午市做緊嘅壽司壽司15貫+卷物omakase真係非常抵！ 呢間「榊原」位於天后地鐵站旁邊嘅一棟高級大樓入面，裝修非常新淨同精緻，而且店員、師傅都殷勤有禮，整體用餐感覺係好高級嘅！ 當日omakase 嘅15貫壽司，其實係有13款可以試，而每人可以encore當中 2件！以下係我當日最鍾意嘅幾款： 「膠原鯛」：顧名思義，呢條魚骨膠原慢慢，口感好滑好rich！ 「墨魚」：師傅特登將啲墨魚起左塊皮，再切粒，所以口感非常好，而且更加鮮甜爽口！ 「北寄貝」& 「赤貝」：師傅話呢兩款貝類都係喺我地到餐廳之前先啱啱劏，所以上碟時仲識郁，真係超新鮮呀！咁新鮮，味道梗係一百分啦！ 「粟蟹」：呢款蟹喺香港好少見，師傅整呢件壽司係要好考功夫咁生拆啲蟹肉！特別一讚係上面加左醋啫喱令味道酸酸甜甜，非常開胃！ 「黑鯥魚」：本身呢隻魚嘅鮮味十足，師傅再專登喺表面加左烏魚子粉，再用火槍燒過，所以更加香口！ 「北海道瀨尿蝦」：師傅好細心咁剝埋殼，隻瀨尿蝦大大隻，勁鮮甜，超正！ 「海膽」：呢度提供兩款海膽，分別係北海道同俄羅斯嘅海膽！北海道海膽一如以往咁creamy，而俄羅斯嘅就非常鮮甜！兩款都各有特色！值得一提係我由於試曬兩款海膽，喺encore quota入面扣一件嘅！ 「雪花拖羅」：油脂感滿滿，而且賣相一流！

見之前公司班港漂為食同事好鍾意介紹啲內地過江龍餐廳都好出色，今次就試埋呢間位於尖沙嘴嘅「柴夫人魚館」啦！ 餐廳好近地鐵站，交通方便。雖然鋪面唔算好大，但都坐得幾舒服。 睇番個menu，呢度除左有主打嘅豆花魚鍋之外，亦有啲特色小食同埋煲仔飯。我地一行四人都幾擦得，所以咩都叫左少少黎試下。以下係當晚我地叫嘅食物： 「梅菜扣肉煲仔飯」：見只係$56以為好細份，點知店員攞到上黎係頗大份量嘅，淨係扣肉都有五六舊！啲扣肉好入味，口感唔會鞋。梅菜嘅味道亦唔會太鹹，可以話係相當出色嘅一煲飯！ 「蝦仁粉絲煲」：賣相一流，而且香氣撲鼻！啲蝦都幾新鮮，配埋粉絲一齊食好正！ 「番茄豆花魚」：朋友怕辣唔敢叫辣湯底，原本我個人對呢個番茄湯底無咩期望，點知出奇地好味道！啲蕃茄味好開胃，而且唔會過酸。值得一讚係魚肉份量好多，而且好滑、唔腥！富順豆花嘅豆味十足，同番茄湯底亦好夾！ 「爆漿糍粑」：炸得金黃香脆，裡面嘅紅糖唔會太甜。正！ 「豆漿」：豆味十足，甜度啱啱好！解膩一流！ 臨走先見到原來有雪糕免費，不過太飽啦，下次再試！

呢間「一喜·涮涮鍋」餐廳位於康怡商場裡面，連接地鐵站B出口，可以話係非常方便。呢度嘅檯與檯之間唔會太窄，坐得幾舒服嘅！ 呢度嘅菇類、丸類、小食都係喺出面同任攞，擺得好整齊企理。值得一讚係佢哋啲蔬菜係一兜兜擺喺雪櫃，既衛生又新鮮！ 我同朋友都係牛魔王，我地一致覺得「美國CAB 牛肩肉」同牛小排都好新鮮，牛肉同脂肪比例唔錯，相當好好食！我地encore左好幾碟。 湯底選擇有辣有唔辣！ 甜品有個專門嘅甜品雪櫃，啲泡芙、蛋糕仔、布甸都唔會太甜，幾好味！ 雪糕櫃裡面除左有明治雪條任食，更加有Cocoberry嘅特色口味雪糕，例如海鹽味雪糕，正呀！

觀塘裕民坊商場雖然無apm咁多商店，但作爲公共交通交匯處黎講都可以話麻雀雖小，五臟俱全。日前同女朋友等小巴怕無聊怕餓，為食嘅我地就決定黎呢間位於G層嘅連鎖茶飲店“春芳號“買杯茶飲同小食！   “春芳號“茶飲店出名啲杯同poster嘅設計非常靚，好適合打卡！   紫薯珍珠鮮奶綠：可以熱飲，也可以凍飲。我地兩個都想試呢款飲品，就一人一杯，一凍一熱！ 配料方面，我地分別加左寒天同埋豆花，兩款都幾夾。杯奶綠本身好滑好香，非常好飲！ 紅豆/芋泥芝士肉鬆吐司：兩款吐司味道好出色，芝士味十足！而且份量啱啱好，作為小食唔會太飽肚。 讚好facebook仲有得送精美禮品

早前同家人去東薈城名店倉行街，見到呢間門面裝修好精緻嘅「羲和小館」，就決定試下。 餐廳主打片皮鴨，當然有好多鴨嘅畫啦！ 當日我地雖然四個人，但較早前行街嘅時候食左少少下午茶唔太餓嘅關係，就決定唔洗叫四人餐，而係叫個二人餐，再加$260 叫多一碗湯、一份主食、一份主菜同埋一份甜品一齊share！ 套餐選擇頗多，以下係我認為好值得推薦嘅菜色： 「半套片皮鴨」：店員喺我地面前即時片，睇見都流口水！唔同部位點唔同醬，各有特色！ 「老上海熏魚」：每舊都炸到外脆內軟，外層嘅甜酸醬好惹味！ 「鮑魚雞粒燜飯」：炒飯唔會太油，米飯粒粒分明，而且非常香！最正係雞肉同鮑魚粒都頗多頗足料！ 「櫻花蝦海味蒸飯」：賣相好吸引，荷葉香滲曬入飯度，配料嘅魷魚都幾爽口。 「孜然羊架」：油香味十足，而且煎得啱啱好，肉質仍然好juicy！ 「煙燻叉燒皇」：店員一打開蓋啲煙燻即刻湧出，成個presentation好fancy！叉燒肥瘦啱啱好，煙燻味令啲叉燒味道更加有層次！正！ 「芒果布丁」：造型好可愛，味道亦好好！芒果肉都幾多，而且好甜！

前排班港漂同事好興奮，話佢哋最愛嘅內地知名連鎖湖南農家菜餐廳「農耕記」黎香港開分店，終於可以好方便咁解決思鄉病咁話喎！見佢哋咁吹捧呢間餐廳，一於帶鍾意試新嘢嘅女朋友去試下佐敦分店啦！ 餐廳好近佐敦地鐵站A出口，交通方便。另外，餐廳裝修好有特色，而且環境闊落舒服。 一坐低店員就好殷勤咁招待我地，仲特別同我地介紹話餐廳最近推出左幾款特色春季時令農家菜品。正所謂不時不食，難得撞啱季節，咁就梗係要試下啦！ 「小筍炒臘肉」：呢度嘅臘肉好肥美，配合嫩綠嘅小筍一齊食，口感真係一流！ 「香椿炒蛋」：香椿芽有一種獨特嘅香氣。據講香椿除左健脾祛濕，仲可以殺菌除痢，提高人體免疫力。更重要嘅，係佢同炒蛋好夾，令蛋香昇華左！ 「雪豆酸菜肉沫」：啲雪豆好甜，而且口感係軟糯嘅，配合肉香十足嘅肉沫一齊食，絕對係非常下飯嘅。 「糍粑油條」：賣相吸引，口感外脆內軟！值得一讚係唔會太油或者太甜，啱啱好呀！ 「手打檸檬茶」：好大杯好滿足，味道不錯，解辣一流！ 臨走前見到原來餐廳開幕嘅時候視帝陳山聰都黎過！

前排女朋友去完四川成都公幹，返到香港之後成日都話好掛住嗰邊嘅美食，所以呢樣就帶咗我嚟呢一間位於將軍澳Popcorn嘅過江龍「炊二哥圍爐」食晚飯黎回味下喎。依間餐廳位於大型商場入邊，所以交通非常方便，而且裝修好企理舒服。 呢度除左有主打嘅四川麻辣火鍋，都有好多四川特色嘅小食、主食、甜品等。既然今餐係女朋友要回味佢成都之旅，咁梗係叫佢食過嘅嘢啦： 麻辣滑牛肉鍋：賣相一流，香氣撲鼻，而且非常足料！除咗有牛味十足嘅滑牛肉之外，仲有好豐富嘅配料，例如午餐肉、蟹柳、脆皮腸、鵪鶉蛋、蓮藕、豆腐。每一樣都同湯底好夾好入味，非常過癮！ 烤魷魚串：呢度嘅魷魚串係用咗魷魚鬚，細細條好彈牙。特別一讚係調味好香口好惹味。 正宗麻油醬料：女朋友話呢度好正宗嘅一點，就係可以自己調配成都人食麻辣火鍋會點嘅麻油，果然好香，而且可以解辣。 啤酒：食麻辣火鍋梗係要有凍冰冰嘅啤酒啦，呢度有我至愛嘅藍妹Light啤酒，正！

天氣乍暖還寒，而且潮濕到死，食火鍋係最啱啦。日前經過尖沙嘴寶勒巷，俾呢間「九五至尊狗毛」嘅裝修氣派吸引左，就決定試下。 呢度應該係新裝修，而且好闊落，比市面上大部分嘅火鍋店都舒服同精緻。 我地一坐低，店員就殷勤咁介紹話佢地最近做緊湯底優惠，麻辣湯底、胡椒豬肚湯底、蕃茄薯仔湯底都免費，仲可以鴛鴦鍋！而其他原價貴啲嘅就做半價～由於我地想去下啲濕氣，就選擇左胡椒豬肚同麻辣鴨血湯底。值得一讚係呢度嘅湯底用料好足，尤其係胡椒豬肚湯底用左好大舊豬骨去熬！ 打邊爐梗係要食牛肉同海鮮啦，當晚我地order嘅安格斯三角肥牛可謂牛味十足，而且脂肪比例唔錯。 海鮮拼盤好大盤，有齊鮑魚、大蝦、帶子、蟶子同蜆，非常豐富新鮮。 手打墨魚丸好彈牙，而且裡面真係一舊舊墨魚肉，絕對係高質之作！ 飲品選擇頗多，日本生啤仲做緊優惠，但我地怕熱氣就選擇左王老吉！甜品嘅楊枝甘露唔會太甜，芒果肉新鮮，正！ 醬料區好企理，而且配料選擇多。

觀塘成業街出名多隱世高質樓上小店，今日就同女朋友朋友來到呢間主打手打和牛漢堡扒嘅「牛霸王」試下。 呢度裝修企理，店員服務態度良好。聽店員介紹，呢度嘅招牌係手打和牛漢堡陪日式泡菜、蘭王蛋飯，咁梗係要試下啦！ 果然無介紹錯，碗飯賣相吸引，和牛好juicy好有牛味，珍珠米粒粒分明，配合埋醬汁、泡菜一齊食真係好正！ 女朋友點嘅番茄牛肋條飯都同樣賣相一流，我試左兩啖覺得牛肋肉唔會太韌，番茄蓉好開胃，相對唔錯。 另外，我地跟餐order左一份雞皮餃子小食。我地第一次試用雞皮做皮嘅餃子，估唔到口感原來係咁香脆，有啲驚喜！ 飲品嘅柚子蜜都沖得好好飲！