今日去會展行旅遊展，行到夜晚七點幾去搵嘢食，最後行行下見到有氣鍋雞，以為會好貴，點知原來係灣仔都有平民價，咁就即刻決定食佢啦，餐廳裝修走簡約風，座位好闊落，坐得好舒服 餐廳主打食米線同氣鍋雞，地點同環境都好啱同朋友食飯傾偈 見到佢有二人氣鍋雞套餐，店舖推介嘅都有得試齊，所以我哋就揀咗個二人套餐，喺灣仔黎講，呢個價錢好親民 頭盤小食我哋揀咗涼拌皮蛋，少少辣好開胃，皮蛋冇苦澀味，加上佢辣醬加咗麵豉，味道好易入口 之後就係我最期待嘅氣鍋雞，雞嘅份量好足，仲有配料竹笙同菇，最驚喜係佢個湯好濃好好飲，而且冇味精，飲咗完全唔會覺得口渴我哋兩個人好快就清晒成煲湯 米線我哋試咗兩個唔同款，金牌小鍋湯米線辣度同酸味唔會太搶，唔想食太過辣同酸嘅朋友好啱食，想食清清地嘅就食豬骨清雞湯米線，我哋試晒兩個都覺得好有水準，連湯都飲埋 碟哈尼牛肉真係有驚喜，外表好似唔太靚，但食一啖之後就想講唔好比佢外表呃左，牛肉調味恰到好處唔會太重手，而且煮得好冧，入口唔使點咬就吞得👍🏻真係要推介 甜品揀左玫瑰冰粉，賣相好靚，味道清香唔太甜，冰粉本身冇咩味，主要係糖水調味，但控制得好唔會太甜，而且唔係用個d玫瑰香精味，好值得一試

同朋食生日飯，想揾個地方靜靜地坐低傾吓偈，所以想食居酒屋，朋友知道呢間居酒屋係尖沙咀係第一間，旺角呢兩個月新開分店，我哋就黎試下 分店地點好方便，係旺角信和隔離，要約朋友食飯呢度都好啱，電梯上到5樓一開門就係餐廳餐廳環境企理，座位闊落，係飲酒傾偈嘅一個好地方我哋揀咗窗台位，望到出邊個景，好chill 睇吓餐牌有咩食，原來主打壽司同刺身，仲有牛舌我哋見到有個超抵食嘅一人套餐（ $103 ）已經包一杯酒同三個串燒或者小食，好抵食 套餐我哋點咗 1.威士忌High-ball 2.日本魷魚串 3.忌廉蟹肉薯餅 3.鹽燒雞翼串 價錢平，質素又唔錯 朋友飲開酒都讚佢威士忌High-ball唔錯👍🏻我哋單點嘅帆立貝刺身（ $68 ）好快就出現，肉質鮮甜，有水準，唔怪得知刺身係主打 一人套餐既忌廉蟹肉薯餅熱辣辣香噴噴，忌廉味好香濃，外面炸得好脆好香口，配酒真係一流 之後燒物陸續上枱，睇得出係即叫即燒，上菜時串燒有陣焦香味，咁先夠風味，串燒比我想像中出色，尤其係串燒魷魚，外皮燒到少少焦香，以為會好乾，點知咬落好彈牙好Juice，醬汁唔會係死咸，反而味道較清淡，突顯返魷魚本身嘅鮮味 鹽燒雞翼都唔錯，雞皮燒得好香脆，少少鹽吊味已經好香口 仙台厚燒牛舌（ $148 ）真係要讚吓，牛舌大細切得偏向大粒，一啖一大粒，外皮燒到有少少金黃香脆，一咬裏面好多汁，好嫩滑好惹味又有少少爽口唔使調味都已經好好食，餸酒又係一絕，食過一次真係返唔到轉頭 海膽炒飯（ $108 ）又係令我覺得好驚喜，海膽新鮮，味道鮮甜，絕對唔係一般貨色，加上居酒屋用嘅咪全部都係日本米，呢個海膽炒飯價錢低質素好，唔食就走寶 飲酒點少得魚乾我點嘅梅酒（ $48 ）配埋日本味醂魚乾（ $88 ）唔使我講都知正 來居酒屋點少得明太子玉子燒（ $58 ），蛋味香濃，加埋明太子醬冇得輸，要讚吓佢玉子燒唔會燒到好乾，蛋入面好Juice ，賣相都好出色 最後真係要讚吓店家好用心經營，特登擺咗一台夾公仔機響門口俾食客玩 所有顧客都可以玩一次，仲要係包有禮物攞，我哋就換到一碟枝豆，又有得食，又有得玩，成個用餐體驗好開心😀最後要讚吓佢就算嗰枝豆係送嘅，佢都會特登整熱先送上嚟，每樣嘢都係認真對待

今日去旺角行街shopping，朋友話上次食左間石板燒牛肉麻麻地好失望，唯有揾返間有質素既滿足下佢，上openrice 見到原來御石燒可以自己燒，想幾成熟都係自己話事，就同左佢一齊去食門面簡單，一睇就知食石燒牛，午餐有午市推介又平又抵食，但我地今次為石燒牛而來，當然食返石燒牛午餐時間黎到坐滿晒人，咁即係唔使驚中伏，我地發現每個人都係點鍋物同石燒，即刻睇下餐牌先，呢度可以用QR code點餐，方便我地跟大隊，點左一個野菜牛肉鍋同一個御燒極上級吉列牛，咁就可以試晒兩款一上菜就感受到火辣辣既温度，牛肉鍋因為只需要等湯底滾起就食得，我地就動手燒牛肉先因為用石板係長時間保温，所以熱得慢，唔怕牛肉一放上去即刻過熟佢會比一片牛脂肪等食客塗係石板，一陣燒牛肉就唔會”痴“底，夠貼心 我地即刻動手塗滿油就放上去燒，牛肉睇顏色好新鮮，肥瘦相間但肉佔大部分，呢個部位先係最嫩最好食，外皮香脆，内裏肉香又有油脂，諗起都覺得正，我中意食熟d，但朋友嫌太熟肉會好”鞋”，所以各有各燒，但都食到自己想食既野如果唔識點燒，佢有圖片指示教食客，簡單易學成個餐有成十一塊牛肉，牛肉新鮮又厚肉，呢個價錢真係好抵食燒完配埋個燒汁真係食多兩碗飯 燒好牛肉，個野菜牛肉鍋剛剛好可以食，牛肉份量不算好多，但肉質都可以，主要係野菜配料份量多，有菇類，有菜，有芋絲，只食肉不食菜都唔太健康，兩個人點兩個餐一齊食就可以平衡返 呢間既質素同份量都唔錯，好欣賞佢牛肉可以完全係食客決左點燒，滿足唔同人既要求，值得下次再黎

今次坐五點機，攪掂check in手續唔食d野頂唔到落機，所以即刻去揾野食，係機場都唔敢諗有咩平靚正嘢食，但求正常就算，去到food court個位比我見到霸嗎拉麵，去望下價錢同餐牌，發現價錢係機場黎講算合理，就決定食返碗拉麵 拉麵一共有四款，都係一啲比較岩大眾口味嘅款式，有辣有唔辣，我就揀咗個唔辣嘅炙燒豚肉味玉拉麵，跟餐仲送枝豆一份同飲品，可以揀汽水或水，配料可以另外追加，價錢算合理，整體性價比都幾高，如果係搭廉航嘅話食完先上機就啱啱好跟餐有枝水，連買水都慳返 因為下午機場人唔多，好快到可以取餐，拉麵未食都聞到好香，叉燒好厚肉，煮得好入味好”淋”，油脂分布剛剛好，唔會食兩啖就覺得膩，味玉水準都好高，蛋味好濃，流心好正呀 麵質方面唔算太硬，個人唔中意食煮到淋晒嘅拉麵，呢碗麵硬度剛剛好配埋湯底食到停唔到口，湯底係豚骨湯，好濃好香，成碗麵嘅份量都好夠，食完之後好夠飽，如果鍾意食辣嘅朋友，可以試吓佢將個辛辣湯底，應該都好香濃 跟餐送咗一份枝豆同飲品，枝豆味道正常，喺機場黎講呢個價錢有拉麵，又送小食，仲有嘢飲，份量又足，性價比真係好高 另外再試多個新出嘅小食，一個係北海道芝士薯餅，仲有一個雞肉軟骨串賣晒無得試，有d可惜 芝士薯餅好有驚喜，外皮熱辣辣，炸得好香脆，薯餅蓉好滑好重芝士味，咬一啖個芝士餡爆曬出黎，好正，食絕對值得一試 雖然好想試另一款拉麵，但一個人食唔到咁多，唯有追加一份雞肉叉燒試下，雞肉叉燒肉好紮實，肉好嫩好有咬口，食落好滿足， 加埋佢落拉麵湯度食好惹味，幾有水準臨上飛機食飽飽，岩晒性價比高，推薦大家一試

趁Happy Friday，放工去咗荃灣搵好嘢食，今次食泰國船麵，估唔到舖頭細細間唔起眼，但嘢食都幾有心思，服務好貼心我哋嚟都已經八點，咁晏唔使等即刻有位門面裝修簡單，用色好有泰國色彩我哋見好少食船麵，所以決定今晚就試下佢 餐牌有好多唔同嘅配搭，兩個人可以食套餐，食量細嘅又可以淨係叫船麵或者晚市套餐，價錢唔貴，但份量好足 我哋兩個人叫咗一個正宗海南雞飯套餐，一個一set三碗嘅細船麵，再加一個小食拼盤，已經飽到食唔落其他嘢 服務方面真係要讚吓侍應姐姐，海南雞飯最先上菜，我哋兩個人share一齊食，侍應姐姐見到即刻主動拎咗個碗仔俾我哋，服務貼心認真，抵讚 原本以為海南雞飯冇咩特別，點知雞肉比我想像中出色，最重要係雞皮同肉之間唔會好多啫喱狀嘅油，雞肉好嫩滑，雞皮又好薄，唔會凍冰冰，d雞肉唔會整到唔夠熟出血水，質素比起其他海南雞飯專門店好好多，呢個真係有驚喜 跟餐我哋仲加咗一個小食，酸辣鳳爪沙律，酸酸辣辣咁好開胃，仲要去埋骨，唔使自己慢慢咬重點係晚市套餐加配小食係‘’無限追加‘’㗎，超級抵食 之後嘅重頭戲係船麵，好欣賞佢呢度嘅細船麵一set三碗，可以自由配搭湯底，面同餸，一次就可以試晒唔同嘅款式，真係一次滿足晒你三個願望 第一碗：魚蛋米粉船湯 第二碗：豬肉丸金邊粉冬陰功湯 第三碗：泰式扎肉米粉麻辣湯 可惜今日去嘅時候冇河粉，可能已經售罄，所以冇得試，唯有下次再試啦，最有驚喜係麻辣湯，配米粉又香又惹味，食完覺得唔夠喉，船湯都好特別，湯底睇落好清，但香料味都好出，唔食辣嘅人除咗清湯都可以試吓船湯，冬陰功湯底比想像中辣，但椰奶味好重，湯底落足料 最後我哋試咗個小食拼盤，有蝦餅、魚餅、春卷同雞棗，一次過試咗咁多款小食，蝦餅好彈牙又紮實，絕對一試難忘，魚餅都好出色，入面加咗泰式香草，配埋甜酸辣醬真係冇得彈，食得出唔係一般溝大量麵粉整既魚餅蝦餅，用料足 飲品我哋點咗青檸梳打，梳打水自己加，鍾意Soda勁啲可以自己調節食飽飽之後飲番一杯解油膩啱啱好

深水埗真係一個搵食好地方，今日放工去咗深水埗搵朋友食飯，我地好晏先去到呢間石板燒牛，因為唔係喺大街，所以可能冇咩人知道，但食物同環境質素絕對有驚喜 門面好闊落，裝飾簡單乾淨，門口餐牌都好清晰 一入門口見到裝修風格好和風，但環境都好乾淨，座位都好闊我哋成餐飯都坐得好舒服 所有套餐都會包埋沙律杯，羅宋湯，日本珍珠米任食，呢個價錢真心唔係好貴，重點係食物質素絕對唔求其，唔會將貨就價 任食既沙律杯，醬汁，日本珍珠米，羅宋湯，全部都係放係自助區任拎 沙律醬有麻醬同蘋果醋，蘋果醋好少餐廳見到有，味道有少少酸酸地好開胃，唔係一般餐廳嗰啲訂貨嘅級數，見到店主真係好用心 沙律分一杯杯裝，既衛生又方便，食客可以放心食用 羅宋湯質素好高，湯嘅用料好足，而且唔係好似成一般西餐嗰啲羅宋湯咁煲到湯料冧晒，呢度湯料好新鮮，少少蕃茄酸好開胃 石板燒肉有三個汁，蒜蓉汁，黑椒汁，蜜糖芥末汁，估唔到三個汁都好有驚喜，配肉食真係提升左幾個層次 而且唔似一般鐵板餐廳死鹹嘅醬汁，呢三款食完都唔覺口渴，抵讚 我哋叫咗一個黑草羊架，一個和牛，每款都會薯菜同粟米🌽同樣份量都好大，食完已經食唔落飯，試唔到佢嘅珍珠米下次一定要再去試 一上菜嘅時候，鐵板熱到出晒煙，上菜嘅時候要上下翻多幾次，唔係和牛就會好容易過熟，咁就會冇咁好食 羊架肉質比想像中嫩滑，又多肉汁，又香，喺鐵板上邊燒到金黃色，見到流晒口水，鐵板夠熱，燒到羊架金黃色，油脂烤到香噴噴好好食呀 一份食完已經飽到上心口，飯都食唔落下次一定要試埋其他

今日去左深水埗覓食，福榮街全部都係食店，行左一圈見呢間上海菜好多選擇，價錢又唔貴，就行左入去，入到去發現全場坐滿，睇嚟應該無揀錯 餐廳裝修唔係行誇張路線，簡單撲實，但環境光線足，用餐氣氛好熱鬧， 餐牌選擇好多，而且好多招牌菜都有圖片參考，唔使估估下，最好係佢牆上有個人氣菜式排名，有選擇困難症可以睇下咩係最多人食就叫咩我地見到餐牌有個涼拌自由拼，餐廳好貼心，比食客揀拼幾多款，款式又可以按個人口味隨意揀，我地就先黎個四拼揀左蒜泥白肉，鎮江餚肉，雞絲粉皮，醉雞 一上菜，估唔到份量多到咁誇張，講真呢個價錢好抵食，唔怪之得我地見每枱客都有叫呢個菜 醉雞數過有成8件，酒味好濃，雞皮好薄無肥油，雞肉充滿酒香，仲好嫩滑，真係超級正 雞絲粉皮都有水準，雞絲份量都算充料 鎮江餚肉真心有驚喜，肉唔會雪到凍冰冰無味，反而好札實好有肉香，配上啫喱狀既高湯汁，融化係口真係好滿足呢款菜真係要花功夫先做到 蒜泥白肉好惹味，配個汁真係食到停唔到口，份量又多 相思骨都好推薦，酸酸甜甜好開胃，配白飯真係一絕，餐廳揀既排骨一d肥肉都無，用料實在，每粒排骨都有汁包住，但又唔會成碟都係汁浸住，真係抵讚，睇得出廚師功夫 雲腿津白比想像中份量多，一般食店食菜都係又貴又少，一碟菜可能得幾條，但呢度真係成碟放滿，份量好多，味道清得黎又有雲腿既咸味，配飯都可以食多碗正最後當然唔少得招牌鮮肉爆汁小籠包啦，小籠包size比平時食開大好多，最正係餡入面無咩肥豬肉，但一咬又爆晒汁咁，最怕食小籠包一半都係肥豬肉，食兩個就膩，食唔落其他，呢度個小籠包抵比個like 我地一路食就一路有食客入嚟，基本上無空位，外賣都無停過，未夠8點已經要等一陣間先有位，深水埗果然真係多人黎揾好野食呢個價錢兩個人飽到行唔郁，真心扺食

難得早收工又喺屯市，路經一直想食嘅榮少喇沙，點都入一入去食番碗摻摻。 店舖已經用QR code揀餐，好方便。既然黎到，就梗係食碗喇沙啦。 依到嘅喇沙好特別，佢除左有傳統嘅油麵+米粉外，竟然見到「瀨粉+米粉」？！依個配搭真係第一次見啊！（以我食喇沙多年嘅經驗）🤣🤣 今次我暫時點番傳統嘅肥牛滲滲先，再加碟小食。 小食上，睇左好耐，見到Encore炸粟米。咦。。。encore咁犀利？試下先 喇沙嘅味道係水準上！濃厚嘅椰香味再帶點微辣，好惹味，如果唔怕肥嘅，真係要飲埋個湯底。 肥牛嘅口感恰到好處，薄薄一塊又唔會煮得太老。 Encore粟米上場啦！有咩咁特別呢～仲以為係用炸粉醃住粟米拎去炸，誰不知佢真係無咁簡單。佢既調味料係用糖同紅椒，食起上黎係十分香口，唔怪之得寫住Encore啦 最後點左杯凍咖啡，十分欣賞佢地係用冷凍嘅分法而唔係加冰，令咖啡味唔會變淡，真係十分有誠意。 如果再一次路過，我都會入去食多次！到時一定試下瀨粉溝米粉嘅喇沙

一個人唔想出街食，唯有揾下外賣返屋企解決，上黎見到荃灣有呢間花甲粉，其實聽都未聽過咩係花甲粉，所以好奇去睇下岩唔岩食，去到門口覺得呢間小店幾特別，同週圍既食店氣氛好唔同 花甲粉係咩可能唔係個個都好清楚，但一黎到門口見到有詳細介紹，即刻明白晒 裝修好特別，仲有好復古既風格黎到已經見到有唔少人買完坐低食，雖然小店無堂食，但唔介意企或者坐木椅就可以買完即刻開餐 餐牌有主食，小食，糖水，湯，飲品，食物種類都算唔少 揀左一個自選麻甩粉再加花雕雞扒同煎蛋，再加左個雞槌同木瓜雪耳糖水，一個人返去慢慢歎 店舖內好乾淨企理，因為落單後先即整，等左大約10分鐘就拎得，落單時問左句雞槌會唔會好辣，老闆即刻話可以整唔辣真係要比讚 湯底好鮮甜香濃好欣賞佢唔會好重口味好死鹹，配粉絲味道好夾 煎蛋真係好驚喜，原本以為普普通通無特別蛋一隻，但煎到燶邊，蛋黃剛熟又咁香軟，真係好好食花雕雞扒都好正，花雕味好香濃，肉腌得好入味，雞肉又嫩又滑又入味食到唔停口成個粉真係好配得好好，湯底配粉絲係絕配雞槌好惹味，其實好欣賞店舖咁有心去做好食物，每件雞槌都會𠝹開，令到雞槌更入味，食既時候都方便啲最後飲埋個滋補木瓜雪耳糖水就無得彈，糖水唔會好甜，但用料好足，木瓜好軟𣺉，雪耳又多，飲完好滿足

朋友約左今日食飯派手信，揀左太子區揾好野食，呢區其實真係好多平靚正餐廳小店，好食又唔使排幾個鐘，今次就揀左呢間越南餐廳，因為日本野通街都係，越南餐廳就越開越少 門面簡約，一睇就知食咩，餐牌放晒係門口比食客參考，睇岩就入去，值得讚揚下食店跟上時代步伐，坐低就比個QR code用手機點餐，唔會再好似其他舊式食店咁，用左幾年都係同一張膠餐牌手機點餐版面簡單，第一次去都會識用 餐廳乾淨企理，坐位唔算闊，但老闆無為左放多張枱整窄條通道，算係行出行入都好闊落 叫左豬頸肉撈檬，香茅豬扒河粉，紙米卷，仲有即叫即炸既炸蝦餅食完飽到上心口 豬頸肉撈檬，一上菜我就諗”豬頸肉會唔會多左啲?”又大塊又多，女仔食真係有點多，但豬頸肉好爽好入味撈檬魚露係靈魂，酸甜惹味好開胃呀 香茅豬扒湯河，湯頭真係好驚喜，味道好清甜，淡淡既芽菜同蔥香，唔同出面既味精湯底豬扒份量又係一大碟，真係使唔使咁抵食咁抵既價錢，唔怪之得成晚爆場，外賣單keep住出 越式紙米卷，原本以為小食係細細啖一件，點知一黎，嘩，唔講以為係主菜，兩啖都食唔完一件，食落好明顯會知係即叫即包，因為生菜仲係爽脆新鮮，唔係一早包好焗到淋晒先上菜 餡料又多又新鮮既紙米卷，扎肉大大條 最後到炸蝦餅上菜，一黎就聞到好香既炸嘢味蝦餅炸得岩岩好，色澤金黃好靚，用料一d都唔求其 見到炸蝦餅加左好多唔同嘅料，惹味彈牙又香口，調味都係以越式香料為主，手法正宗 餐飲跟餐只係加2元，太抵了質素正常無問題 成晚見到客人不斷黎就知無黎錯，味道正宗份量又多，姐姐好有禮貌，上菜快，跟得足，絕對有下次