小妹諗住買杯渣男檸檬茶試下，講明要少冰，但最終全杯都係冰 問職員點解要求左少冰都咁多，得到解釋係已經將個杯茶面層既冰撥走了，小妹即時O晒咀心諗：唔撥走都吸唔度個杯蓋啦 職員另一個解釋係渣男味道比較濃郁，所以要多冰中和返先會好飲啲，咁不如直接唔好俾客人揀冰既份量，咁咪唔會有呢個問題囉 小妹突然諗起“食神”既經典對白，“飲管有咁粗得咁粗，冰有咁大嚿放咁大嚿，杯汽水咪雀一聲飲完買過第二杯囉‘’小妹只可以話認真便輸了😵‍💫😵‍💫

小妹由裝修等到開業，終於有時間試下喇！今次係外賣自取，點知就出事了...... 皆因小妹返到公司，發現叫薯粉就俾左米線，叫冬菇就俾左金菇，叫生菜係無出現過添 可能係電話叫外賣，所以職員聽得唔清楚啦！唯有打電話落去同職員講聲出錯，職員好好話可以重新做過俾小妹，但一來一回實在無時間食，只好叫職員退返部分錢俾小妹就算 落到餐廳，職員知道小妹既號碼，就好迅速退返錢俾小妹，仲表示好抱歉呢，抵讚 新店仲有不足，只怪小妹黑仔啦！附上餐牌方便大家叫外賣

小妹好耐無出旺角呢個熱鬧既地方，難得約左朋友出去傾計食飯，就花左啲時間揀左呢間cafe。。 開頭揾呢間餐廳都花左啲時間，去到大廈既大堂係玻璃門，小妹諗緊係咪要按制先入得時，保安叔叔就出黎幫我開門，但佢就講錯左樓層俾小妹知，好彩自己記得係1樓啫 入到餐廳會經過條走廊，呢個一定係少女既打卡位，玫瑰花佈置既電話亭同巴士站，再轉灣先有職員帶位 餐廳係要自己出去點餐，同埋即時付款既，呢樣小妹就麻麻地鍾意，因為人多要排隊等就唔岩懶惰的我了 兩個人撐枱腳叫左2杯髒髒飲品，建議飲返原味，因為少甜左之後既紫薯鮮奶就有啲失真 不得不讚下個龍蝦汁意大利飯，軟硬適中又唔會太腥，值得推介 蟹肉包都唔差，賣相特別，但個包身就有啲淋左，但整體都合格既

小妹好耐無打食評，疫情下真係少左出街食飯，今次同朋友揀左呢間小店，轉下口味試下特色既素菜先😌😌 主要係想揀荃灣區既餐廳，方便大家食完搭車返屋企，咁岩又見到優惠話食滿$200用OP PAY可以減$50，所以二話不說就訂左枱喇😅😅 餐廳環境簡約（忘記拍照），本來想食招牌既彩虹健康沙律，點知職員話賣晒（晚上7點已經無得供應），即時有點失落囉😓😓 小妹叫左3個餸，分別係黑松露薯蓉大啡菇，百合杞子豆乳浸時蔬和悠蔬食小食拼盤。 推介呢個大啡菇，咬落好juicy，薯蓉焗完香口，Yummy😋😋 賣相無咩特別，但味道不錯，值得試試☺☺ 菜名令小妹覺得係招牌菜，感覺就一般但都香脆既😉😉 整體感覺不錯，但覺得價錢略為貴左少少囉😅😅

一直都知道老虎堂係出名，但坦白講小妹連邊樣飲品係推介產品都未知🤔🤔 唯有去到直接問店員～請問波霸係咩呀？虎虎生風二款有咩分別呀？邊款多啲人揀呀？我係店員可能都覺得有人黎踩場囉 但係個男店員都好有心機講解我知～波霸係大珍珠黎，虎虎生風就有齊大細珍珠......坦白講呢啲服務已經唔係周圍有架喇 最終揀左杯虎虎生風凍鮮奶（加奶霜），原來真係好好味架喎，有齊大細珠口感一流，唔怪得之前咁多人排隊買啦～我會冒住增肥既危險再返去幫襯你地架

荃灣既呢間泰國餐廳已經開左好多年，以前黎親都 好多人等位，今次黃昏5點打電話去訂張9人大枱都話無問題，心諗咁好彩既。。。 去到餐廳未齊人都放我地入去，小妹仲諗住係時間尚早啫，點知食到走個刻都無人等枱 食完就知道係咩一回事了。。。 泰式生蝦好一般，好似自己係7x9買既雪藏蝦咁，個汁係好普通，食落又唔辣又唔鮮 咖哩雞配蒜蓉包條 - 咖哩係甜度連少少辣味都無（朋友評核差過大x樂），蒜蓉包上台已經即食，但都係淋左既失敗 泰式豬脾 - 真係唔知點樣去形容，好似係豉油豬肉咁，完全唔知食緊係泰式豬脾囉 炸蝦餅 - 難得可以維持水準，依舊咁彈牙 流心芝士蝦餅 - 唔覺得有咩咁特別，芝士係唔會流出黎，可以唔駛試都得 海鮮冬蔭湯 - 呢個keep度水準，不過小妹就覺得辣左啲，鍾意食辣既朋友們，就十分推介喇 仲有馬拉盞炒椰菜苗同燒豬頸肉就不過不失啦！ 最後小妹習慣俾錢一定check單，估唔度餐廳依家會每位收$3白開水既錢，朋友好後悔話一杯都無飲過呢！

今日同屋企人去左荃灣行街，本來諗住去食西餐，點知黎度間餐廳已經轉左做泰國餐廳，企係門口望過餐牌，價錢都唔貴所以就入去試下了。裝修同前西餐廳無咩太大分別，連卡位既擺設都一模一樣。

若果無睇錯大部份員工都係泰國人，所以開頭想落單係無咩反應，個老闆提左二次先有人過黎，我地4個人叫左3個午餐，同時再升級叫多3個小食（一個餐只可以加一個小食）。

飲品同小食好快就到，柑桔蜜係香但飲落就淡口左啲。小食方面有炸蝦餅，呢個真係值得一讚，香脆可口，肉質尚算彈牙

另外，仲有泰式鳳爪同飛天通菜，鍾意食辣既話，泰式鳳爪都係推介，屋企人仲讚配菜既洋蔥好入味添飛天通菜就無咩特別，好似鹹左少少啦！

主菜分別叫左海南雞飯，菠蘿炒飯，同埋海鮮乾炒河。海南雞飯係要劣評，油飯係無飯香味，雞亦唔夠鮮嫩，全枱人都覺得麻麻地。

菠蘿炒飯唔記得影相，但整體感覺係可以既，若果再多少少肉鬆就更加petfect喇

海鮮乾炒河係三個最好既選擇，味道唔會太鹹或太淡，不過配料好似多過河粉，若果可以平均啲就更加好喇

總括黎講，咁既價錢既午餐真係唔錯，有機會可以揀下午茶時間黎食，應該會仲優惠添

今日同屋企人諗住去荃灣AEON超市掃貨，shopping之前當然要醫下肚先啦！

唔評論酒樓既乾淨程度係幾唔得，茶杯又裂邊飲邊漏水，估唔度作為一個經理既回覆都咁唔得。

我地叫左個孖寶點心，其中一款係蒸鳳爪排骨，上枱得一隻鳳爪都算，下面放底既全部都係肥膏（如圖）。同經理反映後既答覆係，裡面有1-2件係瘦架，下次叫廚房執返均勻啲啦！我個下O左咀，只可以話你咁講無辦法啦！ 心諗我叫排骨，你就俾肥膏我，仲要話無辦法真係嬲到震囉！

總括黎講，呢間酒樓真係唔得，十分後悔再次幫襯佢。

老公同小妹補祝西方情人節同預祝中國情人節, 所以一早就訂左枱黎呢度食晚飯。由於小妹收工唔定時, 所以老公早幾日訂左8點枱食飯。當日皇恩皓蕩, 小妹居然可以準時收工, 老公知道就致電餐廳希望可以提早食飯時間, 接待員都好好地表示仲有1張枱可以留俾我地 (因為早幾日訂枱, 話夜晚比較FULL)。收到消息後, 小妹同老公未夠7點已經抵逹, 接待員很快就帶領我地前往一張卡位枱。

餐廳係地庫, 落樓梯已經聽到餐廳好熱鬧, 而且煎緊既食物亦好香, 令度小妹都突然肚餓起黎。去到卡位, 職員已經放好晒餐具 坐低後就馬上遞上各款前菜同沙律, 感覺職員們好熱情既招待  前菜方面...小妹推介茄子; 其他就不過不失啦!!睇完menu後, 本來老公想叫漢拏山特選2人餐 ($560), 因為有豬, 牛, 雞, 鮑魚, 拼盤, 湯, 壽司同飲品, 諗住等我有多D選擇; 其實呢個餐都幾抵食, 不過見到牛既佔比都有2款, 所以小妹就要求揀另一款SET (因為老公係唔食牛架);小妹發現另一個SET係純豬肉餐 ($385), 有豬肉既唔同部份, 而且仲有拼盤係裡面, 所以就二話不說揀左呢個餐喇  既然係慶祝情人節, 老公當然有驚喜俾小妹啦  係我拆禮物之際, 職員已經好快送上成個SET既食物上枱了; 第一層係拼盤, 裡面有午餐肉, 腸仔, 蝦同年糕; 第二層同第三層就係五花腩, 豬排骨, 護心肉同梅花肉;職員見我地掛住影相同拆禮物, 就好好人咁幫我地開始放食物落鐡板; 首先係放左五花腩同梅花肉, 大約燒左一陣又主動過黎幫我地翻轉食物;  最後仲會幫我地將食物剪開細份俾我地享用, 真係感到好窩心呢 五花腩香脆可口, 梅花肉就較淋身,  二款都好味...值得推介   其他既食物黎講都唔錯, 只是豬排骨較難控制, 容易燒燶變黑 (可能小妹開始飽, 所以成日唔記得反轉卦)

飲品方面正常應該係啤酒配燒肉, 但小妹叫左杯柚子檸檬梳打, 味道無咩特別, 飲左二啖就俾左老公;整體服務係一流, 二個人坐卡位好舒服; 豬肉餐其實都好豐富, 而且叫SET既話, 芝士圈同雞蛋圈係可以無限添加, 所以唔駛額外再加食物都得;  最後有少少破壞左既感覺, 話晒張枱可以坐2小時, 未夠鐘店長見我地食完就叫人清枱同準備埋單; 雖然店長都係有禮貌, 但係都覺得有D趕客既感覺囉

今日同老公諗住去荃灣行山, 經過愉景新城決定食D野先起步; 新裝修後商場多左好多新既食店, 經過一輪選擇後, 決定去呢間食評不錯既日式餐廳。 今日撞岩有間韓國連鎖店開張, 所以吸引左好多人黎愉景新城, 間間餐廳都要等枱, 我地大約係呢度等左20-25分鐘度就有枱了。

打開MENU, 全部都係SET黎既, 比較失望係唔可以額外加小食, 只有刺生可以添加; 最終就叫左牛肉烏冬鍋配六件壽司定食同金助日式炸豬扒定食;

首先上菜係牛肉烏冬鍋配六件壽司定食 ($90), 由於小妹太肚餓既關係, 即時就食左壽司醫肚先 (壽司普通, 無咩特別), 跟住先輪到主菜牛肉鍋烏冬, 以小妹喜愛烏冬既情度黎講, 呢度既烏冬真係唔錯, 尚算爽滑彈牙; 而且湯底唔會太鹹, 牛肉亦唔會太老 老公就揀左金助日式炸豬扒定食 ($100), 豬扒炸得香脆, 入口唔會太油 (同隔離個間黑XX相比, 呢間真係好食好多); 呢個定食有好多配菜, 小妹就鍾意食蒸蛋, 老公就喜歡刺身, 大家可以各取所需 餐廳職員服務幾好, 不過比較差少少係要客人提醒先會加茶;  可能太多人等位既關係, 所以埋單速度都幾快; 整體感覺很好, 下次一定會再幫襯