行過見呢間野幾得意，見唔洗排隊，都接近8點。嗰個四眼疑似經理嘅男士彷彿好熱情咁話依家得返兩款恆常湯底同限定嘅麻辣，好快咁剔完佢就即刻埋黎收走。 個爐要自己開，我地揀左一個壽喜燒同一個骨膠原雞湯，要等隻熊變返做液體都要啲時間，但嗰位四眼男士見我地未郁手就埋黎話個湯都滾架喇 咁嘅樣你話滾？而且個湯未加肉已經一堆泡，感覺唔良好 食物其實一般啦，冇咩好講架喇 呢篇都係想講下嗰個四眼疑似經理，話說後面嗰枱係ABC，所以係咁講英文，佢就打斷人地傾偈，埋去問人係咪唔係住香港，又話人啲野唔好烚太耐…算啦呢啲都係人地嘅事，但聽到都會想反白眼 我地食到最後仲烚緊幾條菜，執枱個阿姐就出場，個爐仲烚緊野佢已經收哂啲吉碗吉兜，想快啲收工我都理解；但我個爐啱啱熄，個煲仲出住煙佢照收走，你唔怕熱我都驚俾你照頭淋呀呢下舉動係200%趕客，我唔係食完坐喺度攤抖，仲食緊烏冬你就清哂我枱，洗唔洗咁呀

之前就已經有留意呢間日本料理,感覺好似幾高級,所以一直都係留返特別日子先會考慮 講明先,今次經驗唔算好好,食物OK嘅,食材的確非常好,但就係唔知點解上菜好慢.... 我地唔想搞到自己選擇困難所以叫左個二人餐．梅 因為另外兩個set都有主題,一係牛一係蟹,想試多少少其他野所以揀左呢個餐 一開始前菜,刺身同沙律都好快到好精美嘅擺盤,隻蟹係令人最深印象嘅,一啖搞掂 如果散叫我都一定會叫呢個沙律,我就係鐘意食呢啲有少少頹又冇乜特別嘅野,甜甜地又有菜食 唔記得係啲咩魚,只記得都係啲常見魚類,嗰兩塊拖羅仲要未溶哂雪添;嗰刻係覺得是但啦兩塊仔我都唔執著嘅 然後我地就開始等...等....下一道菜應該係串燒,但大半個鐘之後出現嘅係炸雞 而且等嘅期間店員話安格斯賣哂轉個三文魚扒俾我,個餐我都食左3樣野,我可以話唔好咩,而且我已經等左咁耐,仲可以點炸雞之後就係嗰塊三文魚扒 係好香而且唔腥,但原本你個餐就應該係俾安格斯...坦白講係失望,而且唔係我一落單就通知我,係已經食左3樣野先出聲,其實咪即係焗我要 跟住冷麵都黎埋喇,咁中間個串燒去左邊度 其實唔跟次序出我係接受嘅,不過又唔係爆場點解仲要等多20分鐘個串燒先黎?喺差不多食完嘅時候請店員上埋甜品,因為覺得一定又要再等 於是又等左20分鐘先見到個甜品,埋單又要再等,唔講仲以為去食法國菜,前前後後3粒鐘 野食再新鮮都冇用,店員係有禮貌,環境都好舒適,但我唔覺得以上呢啲出品係需要俾咁多時間等待,就當係我份人太心急啦

自己一個人食飯,梗係要食好西啦
黎到駱駝漆個地下永遠都一堆人排隊等lift,揀啲位處低層嘅餐廳,行樓梯就到,又唔洗凍冰冰喺樓下等
餐廳門口有主廚個紙版,忍唔住笑左
其實好多款意粉都想試下,畢竟外面好少有咁多唔同種類嘅粉可以揀.唔同形態嘅粉口感唔一樣,所以即使係製成之前佢地係同一件野都好,切好哂變左樣就唔同講法餐前麵包應該都係自家製?好香口,但係只得一小件,好想食完再食 忘記左個湯係咩野,淨係記得店員拎左枝望落好高級嘅黑醋即刻加落去 因為唔係好想食肉,要左個菇麵,店員會即場加芝士,錦上添花呢 係彈牙嘅闊條麵呀,好正超正超好食,能夠喺度獨食呢種美味真係冇得頂飲品要左店員推介嘅自家檸檬汁,可以見到有檸檬榨,唔酸又飲到檸檬香,唔識形容,都係喺其他地方飲唔到嘅 甜品我就冇考慮太多,因為黎呢度重點都係食意粉,點知呢個tiramisu同樣出色 成餐飯由頭到尾都冇一樣野係唔好食,幾耐冇試過咁滿意餐飯

齋睇地址會搵唔到,差啲兜左個大圈,原來餐廳門口喺志和街,starbucks轉角行前少少就係喇因為book左比較夜嘅時段,店內嘅人客比想像中少
見到有向牆嘅自閉位,所以book枱時都指定話想要呢種枱,因為覺得坐側邊易啲傾到偈一開始都係見到個拼盤先想黎試下,最鐘意就係一個價錢食到幾款唔同嘅野 睇下啲脂肪,少食多滋味 入口即化咁滯,喺出面冇幾可食到呢啲牛,亦都證明一分錢一分貨牛舌係大人食燒肉必叫嘅,當然呢度都唔會令佢失望 食左咁多肉都要平衡返下.... 最近我就好鐘意食豆腐沙律,份量都好夠,豆腐好滑

已經好耐都冇喺大角咀呢頭食飯,今日正好有事要黎呢邊處理七點左右搞掂,正好晚飯時間
呢間西餐小店好的式,店內座位好少,起初見佢一個客都冇係有少少淆
不過見佢咁平,都唔會高期望,都試下啦

set dinner都幾多選擇,只要唔係太偏食都梗有一款揀到套裝除左有湯,仲有墨西哥粟米片 脆口野搭配牛油果醬,我呢啲平時唔會食牛油果嘅人都點唔停因為唔係好想剧扒,所以要左個肉醬意粉 呢度用嘅係扁意粉,my favourite~
肉醬份量適中,味道算係淡口,番茄味都唔會over,真心覺得非常唔錯大人要左呢個係豬,雖然唔係超大塊,不過絕對夠飽 好易切得開,亦都唔會重口味,大人對個意粉都係讚不絕口
最後仲有兩杯飲品
埋單先三舊水,有咁嘅質素已經值得喇

今次其實係第二次黎呢度
上次經驗都已經麻麻地,但都叫做坐得低有食過,但今次就完全係負面體驗....

上次係lunch time打算黎試新野,見佢有兩層都幾多位,被安排坐上層樓梯口張圓枱
我地4個人,隔左一陣搭左3個人落黎,一睇就知張枱其實頂盡6位.坐7個除左好迫之外,路口嗰幾個人其實好危險,隨時照頭淋,而且枱面擺唔哂咁多個人嘅食物同飲品
我地兩邊都各有1個人嘅食物出錯左,單係打啱嘅,但因為時間緊迫選擇接受錯誤嘅食物
然後我等左足足半粒鐘以上先有野食,遲過哂周圍嘅人

講返今次有幾負面,lunch time冇book枱入到黎,見到地下嗰層有吉位,但唔夠4個人一齊坐,店員叫我地上樓睇下有冇,仲話一係分兩枱
分兩枱咁我做乜要一齊食飯?
上到去大把吉位諗住坐低,點知有店員話後面有枱8個walk in上緊黎叫我地落返去,仲話其他枱有人book左
大家都係walk in,我得4個人就要走?
呢啲安排完全不知所謂,既然咁唔憂做都唔爭在少咁幾個客

坦白講,黎之前我都幾期待,因為以往去過嘅私房菜餐廳嘅經歷都好好,點知呢度都幾令我失望因為今日係大人嘅生日飯,我習慣預早至少三個星期就book定,但whatsapp溝通嗰陣對方都令我有少少淆底 好處係唔需要落訂,畢竟都臨近聖誕;有啲地方可能要求落訂,尤其私房菜,驚啲西客訂左枱又放飛機,備左料嘅餐廳就gg喇 事前喺whatsapp已經揀好哂菜式,個menu都好多花款同組合,真係唔怕會唔啱食大廈入口都有啲隱蔽,尤其夜晚唔夠燈,好易行過龍

入到餐廳,第一個感覺係都幾迫,二人枱其實得我同隔離枱,另一邊仲有張四人,其餘都係六人以上大枱
侍應再覆一次之前揀定嘅菜式之後就可以上菜喇雖然個menu係好多野可以揀,不過我唔食蠔,鵝肝,魚子醬,所以其實冇乜野好揀,就要左個海鮮沙律 唔係我要求高,但係點解碟邊啲醋會搞成咁架?係唔影響味道,但係扣左好多印象分大人要左個招牌拼盤,佢就話冇乜特別,叫做每樣有啲,一次食到幾種味道 要左忌廉湯,原本我都幾欣賞條麵包,但係我飲左兩啖湯佢就索到冧哂,何必呢.... 因為驚叫得太多野會食唔哂,所以只係加左個黑松露雲吞俾是日壽星 冇深究係咪自家製雲吞,皮厚再扣一分輪到主菜,我要左鱈魚,望落好細件但係油脂多,呢個份量算係咁,龍蝦汁稍為少左啲 大人要左牛小排skewer,成碟野係個薯蓉最好食,啲牛超多筋,4粒牛入面有3粒都咬唔到 最後黎到甜品,我揀左焦糖燉蛋,口味嘅野好主觀,不過我就鐘意啲糖再薄少少 至於個雪糕都唔錯,可以話係成餐飯最滿意
大人嗰個因為寫左名,我就唔喺度po出黎,佢揀左pineapple crumble,一個字---酸諗住食哂可以快啲埋單走人,點知店方話仲有個燉椰皇送,明明之前whatsapp話like左fb先會送架? 但佢又整緊,唔好意思堅持say no,好似會好兀突
用料都算幾足,但係太甜,而且之前已經食左一個甜品,依家再黎多個只係覺得too much

不至於要負皮呢度,只係每樣野都有少少扣分
當然最惡頂就係同我地只有一條走廊之隔嗰張十幾人嘅大枱,大聲講大聲笑個不停,打爛酒杯仲一啲唔好意思都冇
成餐飯就黎要同對面whatsapp先知大家想講乜..總結就係冇下次

黎之前都有少少期望,價錢唔貴,樓層又夠高,但係 一出電梯就望到哂成間餐廳個佈局,如果咁啱有人要入電梯,其實個位好窄,若然要等位就更迫
坐左喺窗邊啲二人枱,同隔離只有兩隻手指嘅距離
內部境走陰暗路線,情調黎講認真唔錯,好適合情侶或者girls talk

唔諗咁多要左個二人餐唔記得左個餐前小吃叫咩名....上碟呢個樣係好精美,但卷到成朵花咁想擺落口又有啲難度 沙律入面嘅合桃,提子乾添加香脆口感,但係唔知點解全部菜都有少少苦 主菜我都係要左個魚,煎得啱啱好,魚好夠嫩滑,配椰菜花蓉減低油膩感,只係減低啫,都係覺得油膩嘅 大人要左牛腰脊,exactly即係邊個位我就真係唔知,亦都唔識睇 幾分鐘之後隔離枱想叫但侍應回覆佢賣哂轉做第二個部位俾佢
個牛就一般,伴碟個薯餅就好好食,我地真係妹仔肚,次次都係buy個伴碟多過主菜甜品係焦糖蕉+brownie;焦糖嘅野其實好多時都令我食唔出下面舊野本身係咩味,所以我決定鏟走哂啲焦糖就咁食蕉 至於個brownie,硬到....勉強切左一個角落仔試下味就算,我印象中嘅brownie唔應該係咁硬架

服務一般,食物一般,價錢黎講都算可以,如果想平平地食西餐又想要景觀可以考慮下啊.

greyhound喺黃埔都開左一段日子,唔知係咪呢個舖位嘅宿命,開乜野都好似唔多人幫襯咁呢度一向都冇set dinner,份量算係偏少,但對於我地黎講就啱啱好柚子沙律係食得有啲麻煩,因為d料全部都好濕碎,用菜包又會滴到周圍係 味道就好正常,係一般嘅柚子沙律,唔辣呢個薄餅有少少辣,唔記得左佢全名係咩 我呢啲唔係好食得辣嘅人都食到,係溫和嘅辣,外皮又幾脆,值得一試比起之前兩樣,我覺得個意粉係比較遜色,主要係啲蘆筍多渣唔爽 帶子都算幾大隻,但係香草味就唔係好覺飲品就叫左杯香茅....佢冇中文名,就咁叫lemongrass drink 老實講係開頭幾啖會明顯少少感受到香茅味,之後我就唔知自己飲緊乜,所以都冇飲哂

今年我地兩個生日都係星期日,第二日要返工,唔想食完太夜返到屋企所以選擇左尖沙咀
有陣時就係忽然間會想食某d類別嘅野,於是就黎食鐵板燒
記得某年生日都係食鐵板燒,不過就喺山林道,都唔知嗰間野仲存唔存在

呢度大廈入面有d隱蔽,不過樓下一堆招牌好易睇到,就算真係咁不幸發雞盲,亞士厘道咁短,行哂你總會搵到嘅
呢度一人同二人餐其實計返總數差唔多,我地揀左二人餐 我不嬲麻麻地海膽,但係呢度配上山芋食起黎比平時易入口
沙律微酸,合桃增加不少口感 食鐵板燒嘅好處係可以睇到哂廚師喺你面前準備同烹調食材,而且上枱嘅野絕對夠哂熱辣辣 我揀左冬瓜湯,都係想試特別d嘅湯;另外兩款係龍蝦湯同磨菇湯 春卷少少地每人兩條,個碟仔好精美~其實我都幾揀飲擇食,蠔係另一樣我麻麻地嘅野 不過呢度煮熟左,同埋有櫻花蝦俾返d香脆口感隻蠔,咁就易接受好多 鮑魚準備中 值得一提嘅係餐廳幾乎全女班,食到呢度先見到有位男士走出黎 不過佢只係幫我地面前嘅廚師姐姐備料,同以往去過嘅好多餐廳都好唔一樣
其實只要有柚子汁我就乜都食得落咁滯,所以我覺得呢個鮑魚有加分 八爪魚難免都係擦膠咁嘅質感,好在細細碟,否則食到嘴仔軟黎到主菜其實可以揀食牛定食豬,因為大人好鐘意食牛舌,所以都冇考慮過要豬 廚師姐姐仲會問要幾成熟 左邊兩條係牛舌,好好味,唔識形容咁好味 右邊係和牛,有少少俾牛舌比下去~ 炒飯準備中 個炒飯入面到底有d咩料我就唔知,不過成碗飯個味道好平衡,落左咁多種料入去都冇搶走各自嘅味道 雖然已經好飽但係我都有食哂碗飯 甜品我就覺得太甜,係和菓子嗰種甜,好似係紅豆湯?之後兩件生果都食唔出味