呢間鋪嘅前身係「十二味功夫」，現在叫「十三少」，我留意到佢嘅餐牌跟「十二味功夫」幾乎一樣，好奇之下走嚟試試。 食物味道: 叫咗酸菜魚、乾煸四季豆和紅糖糍粑，酸菜魚跟前店不相伯仲，不過加多咗一啲菇，又幾好食，而最特別之處在於「十三少」隨酸湯魚附送兩碗「脆米」，比客人將酸菜魚湯淋上去一齊食，「脆米」雖然簡單，但浸喺酸湯一齊食，脆脆口感加上酸湯，好味到難以形容，爆燈之作👍🏻 食物份量: 非常大，四個人一齊食最啱 價錢: 以份量和味道嚟計，物有所值。 環境: 店內大約有十四張枱，雖然唔算大，但因為店舖舖面係全落地玻璃，感覺寬躺，坐得舒服，裝修簡單但絕對唔老土。 服務: 店員服務殷勤有禮 回頭指數(10分滿分): 10分

食物味道: 食客對酒店日式餐廳嘅期望通常會高啲，不過我覺得對「灘萬日本料理」嘅午餐定食唔好期望太大，因為質素只係一般，令我最失望嘅係日本產豚肉炭火燒，肉質真係幾差，令我懷疑係咪真係日本產豚肉，至於雪糕嘅選擇，我自己嘅小小意見: 灘萬現時提供綠茶、朱古力和雲呢拿，其實綠茶雪糕係日式餐廳最具代表性嘅甜品，餐廳何不只供應綠茶雪糕，並提供一，二及三級綠茶濃度嘅選擇，豈不更為普通的午餐定食加點特色？ 食物份量: 日式定食嘅份量通常唔多，女仔可能覺得夠，大食嘅男仔可能會覺得太少。 價錢: 以質素嚟講，實在太貴 環境: 普普通通，無咩日本風格 服務: 殷勤有禮，亦經常幫我哋斟茶 回頭指數(10分滿分): 因為質素實在唔到水準，加上價錢唔平，都唔會再幫襯，我比零分。

食物味道: 之前喺呢度飲過茶，覺得點心都幾好味，賣相亦甚具心思，今次特登試吓晚飯小菜，我覺得非常有水準，味道之外亦著重賣相，簡直係舌頭與味覺嘅享受。 食物份量: 份量適中，主菜嘅份量一般都能夠滿足四個人食 價錢: 一般酒店中菜廳嘅價錢，唔會特別貴過人，但一定比出面酒樓貴。 環境: 裝修環境一流，加上黃昏嘅窗口景，實在係和三兩知己或家人食晚飯嘅好去處。 服務: 五星酒店服務，殷勤不在話下，服務員禮貌週週，無得彈。 回頭指數(10分滿分): 10分

食物味道: 味道中規中矩，但並非與別不同，提供相似或相同菜式嘅餐廳亦不少，唯一係秘製海南雞燴意大利飯，以意大利飯代替雞油飯，的確特別，可惜意大利飯煮得太濕，似杰粥，這是失敗之作，特別一提呢度嘅用餐時間係90分鐘，不過現場所見，90分鐘之後餐廳只有七成滿，但侍應非常準時拿著單子要求埋單，以餐廳嘅價錢，只給90分鐘用餐時間，在非繁忙時段，仍堅持這種「做多幾轉」嘅手段，我就覺得做法唔夠大方，基於食品只屬一般水平，價錢不便宜，用餐經驗不佳，決定給予劣評。 食物份量: 偏少，兩個人食還可以，四個人的話，每碟只可食得好少，到喉唔到肺。 價錢: 偏貴 環境: 普普通通，未見驚喜 服務: 只是一般，侍應毫無笑容，流水作業式服務而已

食物味道: 作為米芝蓮二星餐廳，對每道菜都會要求更高，我覺得各道菜都有一定水準，個別菜式未盡完美，特別係「南瓜中式煎牛柳」中的南瓜太冧又有根，而「自製蕃茄乾蒸博多茄子」係我覺得簡單之中別具誠意的菜色。 食物份量: 初初以為呢間屬於貴價嘅中菜廳，份量一定好少，但事實上份量適中。 價錢: 以高級酒店中菜廳嚟講，價格合適。 環境: 樓底高兼有落地玻璃海景，冇得輸。 服務: 殷勤款待，每道菜式上枱，服務員都會簡單介紹，值得一讚。 回頭指數(10分滿分): 10分

食物味道:大部份嘅點心無論味道或賣相都只是一般而已，山城口水雞可說是離題萬丈，除了雞肉滑，麻辣味欠奉，只能叫「麻油滑雞」，其中XO醬炒蘿蔔糕、椰香脆麻花及砂鍋香芋火鴨粒炒飯就做得比較出色。 食物份量: 大部分都係正常份量，山城口水雞只係得幾件雞頭雞尾，雞皮厚厚的，不值得推介，到於砂鍋香芋火鴨粒炒飯就十分多。 價錢: 正常酒店中菜廳的價錢 環境: 裝修普普通通，但地方企理，不過樓底好低，可能由於機場附近嘅建築物唔能夠起得太高所致。 服務: 服務員都有禮貌，但未算殷勤。 回頭指數(10分滿分): 1分 茶位: $22/位

食物味道: 大部分食物都能夠保持舊店嘅水準，只是泰式燒鱔就令我大失所望，肉質有啲「梅」，和舊店出品具有彈性嘅泰式燒鱔相去甚遠。 食物份量: 份量充足，三至四人食的話都夠分 價錢: 似乎比舊店加咗些少價，但喺Pacific Place 呢個地方仍具吸引力 環境: 新店以橙及綠色作主調，大膽而又擺脫傳統泰式餐廳嘅風格，幫襯開嘅客人一定會覺得有新鮮感。 服務: 似乎將舊店嘅服務員全部更換過，新店嘅服務員態度殷勤好多，非常有禮貌，值得一讚。 回頭指數(10分滿分): 10分

食物味道: 味道及肉質只算中規中矩，我叫八成熟，廚師亦準確交足質素，不過呢度嘅牛扒係屬於薄切牛扒，對喜歡厚切風格嘅客人，可能唔太滿足，而是日餐湯(松露忌廉湯)反而有驚喜。 食物份量: 正常 價錢: 合理的酒店餐廳收費 環境: 燈光偏暗嘅格調，輕工業風嘅裝修，感覺舒服，不過人多嘅時候，加上樓底唔高，就會顯得相當嘈吵。 服務: 相當有水準的酒店服務，服務員態度殷勤。 回頭指數(10分滿分): 我俾2分，並唔係覺得Flint唔好，不過純粹諗住食牛扒的話，我覺得其他酒店餐廳有更好美味嘅選擇，但如果諗住食其他食物，Flint仍然係一個好地方。

食物味道: 味道原本應該唔錯，不過以放題形式供應，食物難免係先預備，保溫，再上枱，原有嘅味道就唔能夠保持，有啲食物上枱只係微暖，味道大打折扣。 食物份量: 放題任吃，按人頭每次奉上嘅食物，份量適中，試啱可以再叫。 價錢: $368 可以任食餐牌裏所有嘅餸菜，唔算貴。 環境: 中西合璧嘅佈置加上全場西式嘅音樂，而且唔多客，感到寧靜又舒服 服務: 服務殷勤，不過唔知係咪因為少客人，現場得一兩個侍應，有時好難搵到佢哋。 回頭指數(10分滿分): 3分，雖然價錢唔貴，但係放題形式嘅食物處理，令好多食物失去原有嘅美味，唔再試放題喇，乾脆下次嚟逐樣散叫好啲。

食物味道: 雖然牛扒和豬扒算不上好高質素，但煮功恰到好處，牛扒嘅medium well 交足功課，豬扒亦十分鬆化，附上嘅蘋果醬做得似食蘋果一樣，值得一讚。 食物份量: 份量十足，無偷工減料 價錢: 以酒店嚟講，相當抵食，主菜奉送湯/前菜，飲品另加$20至$40 環境: 樓底高，感覺闊落，裝修形格，不過窗邊位外面空地有工程進行，有啲礙眼。 服務: 服務一流，豬扒第一次上台我哋覺得有些少「生」，要求廚師再整熟些少，點知廚師重新再煮過一份俾我哋，可見佢哋對食物質素嚴謹。 回頭指數(10分滿分): 8分