呢一餐真係要好好記錄，就係離港前帶阿囝同婆婆去撐枱腳。婆婆口味好西化，指明要食西餐，仲要至愛食生蠔。我哋舊地重遊，去咗荃灣海之戀嘅 Odelice 一嚟就叫咗半打法國生蠔俾婆婆嘆下先，雖然唔係好大隻，但勝在夠新鮮，婆婆好滿意。 婆婆呢期瞓得麻麻地，叫咗一壺舒緩花茶比佢，希望佢有覺好瞓。 我自己就要咗Pomegranate Mojito ，酒味勁濃烈。爽呀！ 前菜：法國香草蝸牛 波B哥最初話disgusting, 但又不斷密密食。🤣之後又話原來蝸牛咁好味。比佢激死！😓 主餐：馬賽龍蝦海鮮鍋、法國油封鴨腿。 婆婆好鍾意個海鮮鍋，好多海鮮好豐富，好味到冇得頂。 甜品時間，阿囝好鍾意呢件法式蛋白霜檸檬撻，唔會太甜，酸甜配合恰到好處。 輕輕鬆鬆嘆咗一餐，珍惜與婆婆相聚美好時光，大家要保重身體呀！

離港返澳之前要同我的好姊妹聚聚，搵到間有情調傾到計又好食嘅餐廳。喺旺角市中心嘅Lab Eat，佢有個露台戶外位好正，嗰晚仲有現場live表演，氣氛一流。感覺演唱者用心嘅歌聲傳遍整個旺角天空。 姊妹一邊傾偈，一邊聽歌，傾到好多家庭童年趣事，聽住歌特別掛住身在外國留學嘅姨甥女，佢都好鍾意彈琴唱歌俾我哋聽。 坐低已經送上Welcome drink，唔係講笑，呢杯好濃烈嘅 Cocktail，空肚飲有少少醉。 我哋叫咗生𧐢：Gigas 、 Black Pearl 我最鍾意嘅沙律係有烤芝士喺上面，Raclette cheese嗰陣鹹香，正！食芝士梗係要叫返杯紅酒配襯返。 海鮮意粉好出色，食材極豐富，個汁味道香濃。 妹妹唔食牛，另外叫咗伊比利亞黑毛豬扒都唔錯。 甜品係French crepe with crushed pistachio Yummy Yummy! 今次一聚又再分離，要明年再會了！

問阿囝哥：「就嚟走啦！回歸香港仲有乜想食而未食㗎？」佢即刻話：「日本嘢！」壽司我又食咗幾次，就同佢去食日式燒肉。朋友介紹咗一間佈置有趣，有晒宮崎駿動畫角色模型嘅燒肉餐廳。 阿囝勁like龍貓巴士站嘅大模型。全間食店好有氣氛。 燒肉一番嘅午餐好豐富抵食。三個人叫咗兩個set, 再加啲小食已經好足夠。 套餐包餐前小吃、味噌湯、同珍珠米飯。 安格斯肉眼扒套餐 牛三角套餐 個紫菜流心蛋飯好正，佢一次過食晒碗飯，仲叫我返屋企整呢個飯比佢，可以食兩碗喎！

呢間日式廚師發板新貴只有兩個set: 鮨、悠，我試咗以壽司為主的「鮨」set

令我好有驚喜嘅係餐前有個免費嘅茶道體驗班，真係既新鮮又有趣。原來茶道係江戶時代招待貴賓嘅禮儀。邊學習沖茶嘅技巧，邊吃着和果子嘆茶。導師仲非常有耐性咁解答我每一個問題，而家終於知道抹茶同綠茶嘅分別。


前菜三品：
黑糖仙人掌、清湯蟹肉羊羹、汁煮白梅貝
前菜外觀同味道已非常出色，令人對呢一餐充滿期待。

自家醃製嘅漬物非常可口，最欣賞味噌蒜頭，只有香味而完全冇辛辣味。

到咗最期待嘅壽司十五貫：
伊佐木
左口魚
北海道帆立貝壽司 配上柚子皮
深海池魚
金目鯛
赤貝
松葉蟹 蟹肉伴蟹膏
針魚
鯖魚 配白板昆布
牡丹蝦 配火炙燒蝦頭膏
梭子魚 配芝麻碎
野生銀鱈魚BB 配味噌
吞拿魚赤身醬油漬
北海道海膽飽滿鮮甜

中途廚師送上靑桔jelly 蘿蔔夾cream cheese，清一清味蕾。

拖羅手卷肥美甘香
今日甜品是晶瑩剔透嘅蝶豆花水信玄餅配上紅豆蓉，味道非常之夾。

每一道菜，廚師都會喺你面前精心泡製，並詳細解釋食物的出產地及烹調方法，呢樣就係我最享受廚師發板嘅地方。
估唔到餐廳最後仲送上驚喜，為每一位客人送上祝福。so sweet 🥰

終於到我同阿囝帶公公去撐枱腳嘅時間，佢唔係一般嘅公公，勁鍾意食煎炸嘢。所以今次帶咗佢試日本過江龍——金子半之助。呢間嘅天婦羅非常出名，平日都排長龍，所以我哋6:00前已到。 幫公公叫了幾豪華嘅江戶前天丼，因為有穴子。希望佢老人家滿意。 大佬！一上枱見條穴子天婦羅長達30cm, 超厚肉身, 食落仲肥美軟滑，真係正！ 最初見咁大碗飯佢大叫糖尿一定飆升，原來個碗係有秘密嘅，丼碗是運用了源自江戶時代的陶瓷工藝，碗中間專登嘅空心設計，為更能保持碗中食物的溫度，所以其實都唔算太大碗，一個人都食得晒。 天婦羅飯中間道配上留心溫泉蛋，送飯一流。 我同阿囝都叫了迷你天丼加稻庭烏冬set, 一冷一熱。 我勁鍾意佢烏冬嘅煙韌彈牙，凍烏冬配嘅湯汁清香唔會太鹹。 新鮮炸起的天婦羅放上飯面，然後再均勻淋上天丼醬汁，每件天婦羅都沾上美味嘅醬汁，真心好味。 公公食完問咗價錢，佢話佢遲啲一個人都會耐唔耐自己來食一次。證明佢覺得相當滿意，呢碗野嘅質素對得住個價錢。

多謝家姐之前請我食咗餐勁正嘅Omakase來洗塵，今次輪到我請客。行完荃灣Donki Donki，去呢間新派居酒屋飲番杯啤酒，食下鐵板燒。重點係飛起個仔，就可自由自在，連飲兩大杯啤酒🍻爽爆！ 居酒屋嘅好處就係每樣分量細細地，但係可以不停嗌，食暈好多款小食。 前菜最有特色係冰頭漬，好爽口彈牙開胃，原來係三文魚頭軟骨。 每一款海鮮都可以只嗌一隻來試，幾正。燒蟶子皇、日本原隻帆立貝、北寄貝都好鮮甜，爽口又彈牙。清酒煮蜆好趣怪，上枱時用一個袋袋住，好似拆禮物咁，啲蜆非常鮮甜，啖啖肉而且一啲沙都冇，個湯仲好香清酒同蒜味，我都飲咗好多。 個芝士御好燒非常濃芝士味，好鍾意食重味芝士嘅先好叫。 鐵板疏乎厘幾有特色，坐吧枱就可以睇住師傅喺鐵板度燒俾你食。

介紹番，好食又抵食Fusion Thai 菜 —- Ann mama Thai Kitchen 就係荃灣香車街街市外的地舖。我未移民之前一兩個月就會心思思嚟食一次，順便去買李太餃子，可惜餃子舖已經光榮結業。荃灣街坊美食買少見少，所以Ann mama列入我回歸香港美食精選之一。唔好以為喺街市附近，佢舖面同裝修靚，坐得舒服，大件夾好味。 今次帶媽媽嚟食，佢一眼就昅中咗個泰式滷水豬手，肥騰騰滑嘟嘟個皮好鬼正！ 紅咖喱牛腩略帶香甜，唔辣，連冇牙阿媽都食到，個咖喱汁用嚟點薄餅食簡直一流。 小食拼盤好鬼正，尤其個蝦棗彈牙有蝦味，飽都一定要食。 青檸梳打唔太甜啱晒婆婆！👍 希望走之前可以食多轉！

返到香港捱左三日藍碼，終於轉左黃碼，可以出去食餐好嘢。今次家姐真醒目，一早book定好正嘅「阿媽家姐」比我嘆！呢間廚師發板幾正宗，味雷感覺返晒嚟。 今餐一共有25道菜，好彩每件份量少少，食到最尾剛剛好。 師傅好有心機，睇住佢製作每一道菜嘅時候都係一個享受，佢仲會好詳細咁解釋食材來源、烹調方法。 1.沖繩水雲配松葉蟹肉 味帶微酸，作為第一道開胃小食，最好不過。 2.北海道鱈魚白子 3. 剝皮魚卷著魚肝 我太鍾意這一道菜，剝皮魚嘅鮮味，加上肝臟嘅香濃，配合得相當完美。 4.蒸鮟鱇魚肝 5. 蟹膏豆腐 呢件豆腐好細滑精緻，每一啖都有濃厚嘅蟹膏香味，令人回味無窮。 6.龍蝦刺身 啖啖肉，好鮮味，正！ 7.活北寄貝刺身 8.活赤背 9.黑鯥魚 燒過表皮帶出油鮨香味 10. 鰤魚 配上炸蒜，微帶鹹香，幾特別。 11. 京都湯頁 腐皮味香濃 12. 日本粒貝 師傅話即係香港叫嘅新鮮響螺，好爽口清甜。 13. 牡丹蝦刺身 蝦膏燒熟份外香 14.岩手縣山田灣生蠔 15.北海道象拔蚌 16. 北海道喜之次 正宗魚王之王 油香豐富 17. 根子 即帶根嘅三文魚子 配上鮮柚子皮 18. 赤身Tuna背卷著馬糞海膽 19.北海道紫海膽 20. 慢煮南非鮑魚 用咗香濃嘅蟹膏味噌醬長時間蚊煮，味道香濃。 21. 金鯛 高溫熱油爆香令魚鱗彈起，食落 脆卜卜。 22. 特級拖羅 燒過魚脂香味四溢 23. 松葉蟹肉飯 配上蟹醋啫哩，絕對能提升蟹肉鮮甜。 24.北海道白海膽配燒鱈魚乾 25. 玉子布丁 以為25道菜完咗，點知仲有後續，師傅用咗剛才嘅小龍蝦刺身個瑕頭做咗龍蝦頭舞菇湯，鮮味十足。仲有一件日本溫室赤肉蜜瓜作為全晚嘅總結。全晚食材來自日本不同地方，令我舌尖暢遊日本一周，滿足非常。

今日去左銅鑼灣做完嘢之後，同同事一齊去燒肉酒場食咗各式各樣嘅燒肉🤤 每一樣燒肉都好特別，仲有其他小食附上。 椰菜絲沙律用咗佢哋特有嘅醬汁同炸起咗嘅蒜片，酸酸地好開胃👍 呢個羊湯茶漬飯啲羊肉真係好香，高湯都好濃 好暖胃！同沙律加埋一齊簡直係完美嘅前菜😻 第一款燒肉係壺漬牛肋條 ，一放落去煎即刻香味四散🤤 將佢燒到五成熟，入口即化 。 另一款係伊比利亞梅頭，脂肪嘅紋路好靚，咬落好有勁度，有脂肪但係食落又唔會油膩。 仲有一款紐西蘭羊西冷，用咗特別嘅醬汁醃製 令到羊肉本身嘅味道有所提升🤩但係又唔會搶咗羊肉嘅香味。 唐楊雞軟骨炸得好鬆脆，熱辣辣，食唔停口🥰 一杯雜果燒酌同埋西柚燒酌，酒味唔算太重，果香一流，食燒肉送酒最好味😊

前幾日同朋友去咗銅鑼灣行街，掃完貨之後特登嚟蟹慶食晚餐🥰 聽個名都知，呢度可以食到好多新鮮嘅蟹👍 第一個前菜係海之幸刺身沙律，附上一個鹹鹹酸酸嘅醬汁，沙律菜好fresh ，加埋冰凍嘅刺身同醬汁，真係好開胃！ 另一道係三點刺身，有帶子三文魚同埋蝦，另外老闆再加左蟹腳俾我哋 ，都好新鮮冇得彈❤️ 嚟到蟹嘅部份 呢個係雪場蟹腳浜燒，喺腳入邊啖啖肉，而且燒得好香，十分鮮味👍 呢個就係松葉蟹腳及海鮮天婦羅，有原條嘅松葉蟹腳天婦羅 ，其他海鮮都炸得好香脆。 呢個晚餐嘅重頭戲就係佢！松葉蟹甲羅燒，蟹殼上面裝滿咗好濃嘅蟹膏 淨係香味已經好吸引 另外再附上蝦片好鮮味，齒頰留香。 最後仲有松葉蟹肉蟹膏炒飯，每一啖都會食到蟹肉，而且成個炒飯都係蟹膏嘅味道👍👍👍 老闆仲私人醒咗兩杯自家釀成嘅燒酌，一杯係鳳梨、一杯百香果，兩杯都好香果味 ！ 好耐冇食過咁豐富嘅蟹宴，超級大滿足！