星期六晚下大雨，差唔多9點，得呢間未last order , 於是試吓啦，坐低拿拿聲落單，點了叉燒蛋飯和煎肉餅飯，有例湯和飲品。先飲例湯，當日係花生雞腳淡菜湯，有唔少湯渣，味道非常好飲，佢聲稱不加味精嘅老火湯，其實我好想encore多一碗，不過唔好意思問！至於碟飯，擺盤幾靚，茶餐廳格局來講，算係有心思有格調，賣相好，叉燒滑蛋飯，啲蛋顏色好靚，炒得好嫩滑，叉燒個樣都好靚，食落唔韌，只係略嫌白飯比較硬，如果用珍珠米就更好啦！煎肉餅飯整出來好似豬扒咁，但其實係肉餅，外脆內軟，幾香口㗎，伴碟仲有少少沙律菜，中西式fusion ! $5x-$6x 晚餐，有湯有飯有杯飲品，都算經濟實惠啦！住附近的街坊又多個選擇！ 味道 環境 性價比

冇意中見到南記推出1人火鍋，牛乳湯底，新嘢喎，就試吓啦！一人火鍋有個明爐仔，眼見店內唔多人食火鍋。肥牛有6-8片，半碗米線、我揀牛乳湯底，裏面有一條蟹柳兩片南瓜片少少腐皮一片仔粟米兩片白蘿蔔一條春卷，配豆漿，一人唔大食的話份量剛剛夠。牛乳湯好鮮味、香甜有啲似椰子湯底，未落牛肉之前比我飲咗好多🤣，其他食材平時南記都有，keep 住水準！ 我覺得重點係湯底個度，如唔係過下打邊爐癮，食返南記招牌嘅小窩米線仲豐富啦！ 味道 性價比

廟街出名食煲仔飯、大排檔小炒外，原來新開左間食羊專門店，店子不大，只有幾枱桌，個晚去廟街夜繽紛時經過，順便快快手醫肚先，有羊腩碟頭飯、羊肉麵、仲有羊腩煲、羊排等。我地點了一個羊腩煲1人餐，加碗羊什麵。 羊腩煲1人餐$98，有1細煲羊腩、白飯、油菜、甜品，羊腩煲味道正宗，羊腩夠腍，份量充足甜品好好味，椰汁底有些蒟蒻之類東西，煙煙韌韌好好食！ 羊什麵份量相對少D D，不過就第一次食羊內臟，羊肺好好食，口感像牛肺，仲有羊腸，羊肚，爽口唔勒，羊湯亦好好飲，食完麵連湯都飲埋！ 可能新開張，服務員不太純熟，畢竟座位少，客人唔多，招呼唔夠周到都可接受啦！難得有間羊肉專門食店，唔係度度有架，羊迷要試吓啦！

星期六OT完攰攰地唔想四圍搵食，於是近近地試吓香港地，平時成日經過都冇試過，只係見佢裝修有啲特色懷舊港式風味，以為都係一般茶記食物所以冇諗過幫襯。今次第一次嚟食晚餐，晚餐都有好多選擇多數都係家常菜式，價錢七十幾至80幾蚊，但冇包嘢飲，加杯嘢飲都差唔多$100其實都唔平喎！ 揀咗一輪，我哋都係選擇一個二人晚餐$162，因為性價比最高，有兩款小菜兩碗白飯仲有一個原盅老火湯，我比呢個老火湯吸引，佢都幾大堡架，仲有湯渣，每人飲四碗仔！小菜份量原來都幾大份，一個女仔未必食得哂。我哋點左茄子煎倉魚，魚都幾大條，醬汁入味，另外芋頭排骨煲都十足料，味道都有大酒樓水準。勝在唔洗加一，當去咗小菜館食下住家餸，唔洗自己煮同洗碗，都唔錯呀！ 今次咁啱Eatizen 有$20 coupon , 用埋佢又慳廿皮！

又係打邊爐🍲 點解一年四季都要打邊爐？因為抵食囉！一粥麵前排推出粥底火鍋，我哋未試過粥底，原來沒有鴛鴦鍋底，味道都唔錯噃！今次試咗椰子雞豚肉同埋鮮牛肉雜錦粥底火鍋兩款，一人一鍋，份量都唔少喎，椰子雞嗰款主要係嫩滑雞肉，拼豚肉片，菜底、雪耳等，仲有幾條椰絲，將椰絲早啲放入粥底裏便煲一陣，咁個粥底零舍香有少少椰子味嘅香甜，雞肉六一陣就食得，好嫩滑。 至於牛肉火鍋，配料鮮牛肉、仲有雞肉魚片，肉丸，樣樣有齊，絕對滿足打邊爐嘅樂趣！滾完D肉，再飲啖綿滑靚粥晾下個胃，係好充實啊！ 椰子雞豚肉鍋$79 鮮牛肉雜錦鍋$75 街坊價，份量足，味道好，性價比

突然想食泰國菜，唔洗下下都去九龍城。屋企附近原來都間正宗嘅泰國餐廳，「泰cool」將軍澳分店由泰藉師傅主理，所以菜式比較地道正宗，而且份量都足料唔馬虎架！呢晚兩個人點三道菜，差D食唔哂，各款主菜大致上$88至$200，炒粉麵飯$78-$88呢個價位，但睇落幾大碟架，四人share 我覺得都夠！ 首先食我哋至愛嘅海鮮冬䕃功湯，明爐上熱辣辣，仲好足料，有蝦、青口仔、魷魚仔，叫咗少辣，酸酸甜甜帶點微辣，如果多啲椰奶更正！ 明爐泰式烤魚，有粉絲鋪底，湯汁滾起，我哋連汁都飲埋，不過條魚冇乜味，好似未落鹽咁，唯有問侍應拎D豉油加味😜 芒果燒牛肉沙律🥗— 好好味，成$88碟，不過份量多，芒果甜，牛肉惹味，有啲蔬菜點綴下，感覺好健康😜 仲有其他菜式想食，下次再來吧！

稻香每年都有一蚊羊腩煲優惠，今年都唔例外，星期一至四晚市8:30後宵夜時間二人可叫1煲羊腩煲，只需$1，非常非常超值！ 份量方面都交足功課，唔會將貨就價，$1就比少啲你。羊肉炆得夠腍，都有五六舊大大件，有皮有肉，冇乜骨，我就最鍾意食皮😋配料有支竹冬菇，筍、馬蹄、豆腐片都充足，我哋仲叫多碟脆肉腩，魚+羊=鮮 。兩個人食極都有，就證明足料！ 唔夠食可點火煱配料，宵夜有六折！食完羊腩煲，湯底仲可打邊爐，記得8:15前好拎定飛，早食早享受！

朋友聚舊食晚飯，有人介紹呢間食羊腩煲正，於是跟大隊一齊試吓，餐廳係樓上鋪，唔顯眼，唔知訂嘅真係唔會嚟呢度！我哋平日去，估唔到都滿座，大部分係一班後生仔女，非常熱鬧！原來鋪頭會同你慶生，邊枱有人生日都會播生日歌，全場一齊歡呼，氣氛高漲！ 講返野食先，叫咗加大羊腩煲成四百幾蚊好似好貴，上枱好大盤，份量足夠7-8人食，羊肉都大大舊炆得腍，配有支竹，幾好味😋，淨係食羊腩煲梗係唔夠喉，所以叫咗其他嘢打邊爐，有豚肉、本地肥牛，千頁豆腐，呢度嘅好處，係有小菜可以點，唔太喜歡打邊爐嘅都有熟食揀，我哋叫咗炸大腸、皮蛋、凍豬手，味道有水準，每道菜$88至百多元一碟，性價比合格，要多人來食，就可以試多幾款，除開每人3百零蚊，已經食到飽飽！酒樓以外嘅小菜晚飯好選擇！ 味道 性價比 服務 環境

新加坡馳名的胡椒蟹在香港都食到，而且有特價好抵食！中午和家人四人來聚餐，點了二人餐，再加了一份星州黑胡椒蟹，那時做特價＄288（原價＄468），非常之抵食创蟹也蠻大隻，蟹酣大隻有肉，啖啖有肉汁，很juicy很香滑，黑胡椒味不太重，適合不吃辣的我們。這個優惠價不是常常有，趕快把握機會！ 二人餐可揀前菜一款，熱炒1款，蔬菜1款，飯麵1 款，甜品2客，飲品2杯。超級推介必食星馬金磗豆 腐，1客有十件，只是＄68，炸得金黃色，豆腐嫩滑，好好吃！ 另一款小食椒監香鮮淮山很香脆，不過沒什麼味道。秘製燒汁排骨王原來是豬排，沒有骨的，看來很平凡，食落有點驚喜，好惹味又夠腍。金銀蛋浸時蔬分量蠻多，海鮮馬來麵也很出色，略嫌味太淡，我們以為有喇沙味原來沒有。 甜品試了清心丸綠豆爽，糖水很清甜，清心丸煙韌。 我們也點多 2客甜品，楊枝甘露和紫米露，楊枝甘露好香芒果味，水準俾一半糖水舖更好。 這裡小菜價錢親民，平日午餐更抵食呢！ 味道 性價比 環境 服務

澳南Monterey 樓下有好多西餐廳，雲集不同地方菜式，最近新開張的Crust surrento 別具特色，藍白間條設計充滿歐陸希臘小鎮風情，店內坐位不多，布局令人坐得relax ，causal 地食下野飲下chill 下！沒有那些懶高級嘅西餐廳咁令人拘謹！ 中秋節當晚用餐，好彩唔算多人，可能當晚多數人習慣食中餐做節吧🤭我哋點左三道菜，先來個南意特色 「脆脆長薯餅」-蕃茄乳清芝士烤茄子。佢係一條長麵包咁款，但內含芝士，上面舖滿茄子蕃茄，識落好煙韌，食完已飽左－半🫢。 主菜點左米蘭特色炸雞扒配沙律，雞扒炸得好香脆，好大塊，配沙律好清新，食完又再飽到八成，仲有香炸軟殼蟹燴飯，有整隻軟殼蟹，好香脆，仲有蟹肉碎舖在飯上，其實好好食，而且份量都大碟，4個人分就啱啱好，我哋食唔晒，唯有打包。 總括而言，以呢個價位，佢哋份量都算多，如多幾個人－齊share 可以試多幾款。我哋下次要試埋個甜品🍧 味道 性價比 打卡位