星期六下午5點幾，趁未有太多人，提早食個晚飯。 普普通通，蒸蛋上湯味淡，亦唔係好熱。 蜆大隻、新鮮、冇沙、份量足。正常昆布湯底，烏冬唔算彈牙，一大碗夠飽肚。 海鮮鍋主要有三文魚、蠔、蜆肉和魷魚鬚。蔬菜，豆腐墊底。全部都好新鮮！追加普通牛肉，亦都淋滑，可能個鍋唔夠大，壽喜燒湯太少，一滾就要加湯了！ 厚厚的粉夾住椰菜，加醬汁和沙律醬，冇乜特別，個人喜歡有埋炒麵 同大阪燒味道差不多，章魚粒細粒但有咬口！ 所謂特製係煎法唔同，餃子餡料一般，煎得香脆，可能因為太飽，唔係好吸引！ 整體來講算唔錯，下次會再嚟食串燒

一行三人放工後搵食，朋友鍾意時代廣場，話唔使等位喎！果然7點鐘walk in都有位😂 見$788 Luxury Set 幾多嘢食，就叫呢個啦！ 韓式前菜六小碟，見份量少，多口問侍應可唔可以refill，佢話每位加$10就可以。結果因為得蓮藕好食，其他一般；泡菜偏甜、拌粉絲又淡，冇嘢要refill 醬油帶子、紅蝦：每款只得兩隻，好彩一個朋友怕食生嘢，唔使爭食。兩款食材都新鮮，冇雪味；醬油唔太濃，冇蓋過原本鮮味 辣拌海鮮飯卷：韓式辣醬魷魚煙韌惹味，加三個飯卷，個配搭唔係好夾，只為飽肚！ 以為係兩人份量，原來係一大鍋，仲有專人喺我哋面前煮熟。單點要$580。 牛肉大塊，醃料似一般韓式燒烤味道，煮得啱啱好，唔韌，菇菌索晒啲汁 每款有4塊，加兩片炸蓮藕，一隻青陽辣椒。新鮮熱辣，甜辣醬下的炸雞依然好脆；反而芝士味就似原味，淡淡哋，一定要點芝士醬。 另外叫咗呢個牛仔骨，份量足，味道同牛肉鍋差不多，亦都好淋 冇叫甜品，因為三個人食晒啲嘢已飽到上心口

食湯麵除咗麵質好之外，湯底係非常重要。 一幻係以蝦做主要湯底，亦可再加一般日式拉麵嘅湯。 今次我呢個係原味味噌粗麵餐。 沙律有雞肉、椰菜絲，配胡麻汁，好開胃！ 濃濃蝦味湯底，飲咗啲湯都唔覺口渴；麵條有咬口，叉燒淋滑，糖心蛋就一般。 餃子餡料係豬肉，普普通通，勝在煎得香脆。 呢度人流比較少，想食麵唔使去尖沙咀排隊了

試過唔錯嘅銅鑼灣三希樓，今次試吓新開張的荃灣分店。 先嚟開胃菜 - 辣辣哋爽口鳳爪 黃鱔唔係周圍有得食，見餐牌有就即刻叫。正常豉椒味道，黃鱔份量唔算少，可惜肉質冇彈力，冇鮮味！ 較健康，比一般少油、少辣；靠蔥、尖椒提升味道。五花腩片唔肥但煮得乾咗少少。 熱辣辣，好creamy，杏仁味唔濃，啱晒我 鳳爪、豬肺、排骨都好淋，飲完一盅好滿足！ 侍應不停換碟，一叫即過嚟，服務態度好。食物選擇多，川菜/廣東菜各佔一半。睇過點心紙，種類唔多，冇乜特色，唔吸引！

青衣城曾經有過泰國菜，呢間算係新嘅，裝修幾靚。 同一般泰式拼盤唔同，佢冇香葉包雞，換咗雞翼同埋炸到乾爭爭嘅雞肉燒賣其他蝦餅、魚餅味道相近，似炸完再炸，春卷就一般。 味道偏甜，有椰香，餸飯、薄餅唔錯，如果有少少辣更好。 以為好似餐牌相片用個大杯裝住，出來卻是一個類似烤魚的大盤，份量夠😂 椰子味重，雞肉算滑，有大量菇類。其實唔差，但飲一碗就開始漏！ 雞湯加$25有一碗淨金邊粉，但遲遲未到。問一個侍應，原來佢唔識聽廣東話，只係攞咗啲調味料畀我。結果要再問另一個店員，佢話要時間煮，但上枱係凍咗結埋一嚿！ 當晚見餐廳有四個侍應，三男一女，其中兩個男嘅溝通唔知講乜嘢話，負責執枱。 食物、服務都一般，好難吸引我嚟第二次呢

好耐冇喺香港食日本西餐，去開海港城，順便去食吓。 一般沙律菜，蟹肉唔多，沙律汁較少，未夠醒胃。 一睇就知好油，厚厚嘅粉包住薄薄的洋蔥，有少少油益味，結果食咗兩件就放棄 大蝦爽口，意粉軟硬適中，醬汁唔濃，撈埋明太子就啱啱好 雖然材料唔多，但有我想食的日式番茄醬味道 賣相吸引，有士多啤梨肉，所以好香，唔太甜，食完飯先飲，真係有啲飽 需要20分鐘製作的班㦸，好香蛋味，略嫌唔夠鬆軟，上面係creamy嘅綠茶mousse，如果係雪糕更好！伴以綠茶蕨餅、紅豆蓉、栗子，好滿足呢！

話去九龍城打邊爐，一定會諗起方榮記。十多年前開始去，覺得價錢好貴，今日價錢都唔平，但可以接受！雖然地方擠逼，但唔使排隊等位已經好好。 一坐低，店員二話不說就先放低一碟生菜！我哋想要鴛鴦鍋，佢就話個鍋好細，每邊得好少湯，不如分開兩個啦！價錢差少少。我哋望吓張枱，得一個爐頭，點要兩個喎呀。 呢個店員做嘢爽快，一叫佢就即刻嚟 自家調製的沙爹湯底夠濃唔夠香，多啲花生味更好。因為個鍋細，啲湯好易滾出嚟，彈到周圍都係！ 有骨的炸魚皮，鹹淡適中，鬆脆唔硬，起碼啲骨唔會整親個口！ 響鈴、芝士腸都係普通貨式；鮮魷鬚本身冇味，浸過湯變硬；雲吞水餃餡料差不多，好鹹蝦細隻，水餃冇木耳絲，所以唔爽口。 當晚最好食係星級牛肉，新鮮有肉味，滾耐咗都唔韌。因為太飽冇加個麵，下次先嚟食沙爹牛肉麵啦

終於一嚐傳說中好難訂位嘅蟹㸃！ 可能係平日，朋友當日中午訂晚飯六位都有枱 兩樣都係一般，雞唔夠滑、魷魚唔夠爽，全部靠醬汁。 炸得脆、豆腐滑，唔使椒鹽粉都夠味，凍咗唔會淋。 今日嘅主角用鐵板上香噴噴，胡椒味唔會搶咗蟹嘅鮮味，蟹蓋有羔；下面嘅紫洋蔥索晒啲汁，一樣咁好味 肉碎同豉油本來好味，可惜茄子未蒸得透，仲係好硬，失敗。 湯有鮮雞味，令到一個普通材料嘅雜菜煲升價，我哋連湯都飲埋 鐵板上夠香氣，可惜啲蠔細隻，感覺唔新鮮，雖然炸咗但係淋晒。最終各人勉強食一隻，但下面的紫洋蔥就食晒喎！ 今次山長水遠專程過嚟，必食的胡椒蟹確係唔錯，但其他菜式質素參差，環境噪，傾偈要大聲。下次都係嚟開呢頭，先會再幫襯佢

平日6點幾在唔使等位下一試網紅推介。舖頭細只得8個位。小小的煮麵位置放咗啲伊麵、幾碟roast beef和三煲湯。一男一女，男負責煮麵，女落order、送餐、收錢。 有三個湯底選擇，其他食材一樣。 湯底有蝦味，但不濃，加埋櫻花蝦同蔥，湯味較香；麵係坊間買到的普通伊麵，煮得爽口，冇乜特別。Roast beef（燒牛肉）唔知點解要寫英文😂，上面有黑椒、櫻花蝦、蔥。只見個男師傅用火槍燒吓肉嘅表面，另外一面係半生熟，碟底有啲油。肉質雖然淋，但黑椒味蓋過牛肉味。 湯底有金華火腿味，夠濃夠醎。朋友話伊麵同roast beef、櫻花蝦好似唔夾，冇食晒啲肉 個人比較喜歡傳統酒樓嘅上湯蝦球伊麵或芝士伊麵。如果要排隊半個鐘或以上，就會選擇食日式蝦湯拉麵！

行完海港城想食火鍋，見到呢間有幾多好評，就試吓啦。 我們只得三個人，所以冇窗口位，好彩仲有卡位。可惜卡位後面幅牆好似有機器，卡位的背板有輕微震動，坐得唔舒服。 當晚見到一男一女侍應，女的幫我哋落單，語氣似機械人，只得一種聲調，唔覺得佢有禮貌！ 賣相趣緻，飯團係蝦滑，上面的蝦、鮑魚和肉熟咗都冇縮水，仍然彈牙 有黑豚肉、羊肉片同豬頸肉。以豬頸肉最好，用多片肉切成花狀，成朵花放入鍋，一滾就會散開，爽口有肉味。羊肉片太薄，食唔到羊味，黑豚就一般。 可能我哋揀最平的，兩款牛都好細塊，又冇牛味，要點佢哋提供嘅汁；口感差不多，分唔出邊款。 魚皮餃正正常常，唔特別。只不過當晚冇嚮鈴，又唔見有想食嘅鳳梨酥，所以叫呢個。 水餃皮厚，餡料一般，唔值呢個價錢！ 其實講咗咁耐，所有火鍋料到齊，我哋個湯底同水果茶仲未到，都有20分鐘 問女侍應，佢話幫我哋追吓，再問個男侍應，佢話架機出單問題，即刻叫師傅整 水果茶到了，一jar溝淡的橙汁，冇茶味或水果味，失敗。3個人飲，只俾兩隻杯，叫佢攞多隻，又要等。 由落單至個湯底嚟到，足足30分鐘，其間侍應只係放低食物，冇理我哋有冇湯，真係奇怪 珊珊來遲的麻辣+剝皮椒蛤蜊雞鍋 麻辣鍋啱晒我朋友鍾意有少少辣又唔麻。更可以添加鴨血，豆腐。我覺得蛤蜊雞鍋清甜，有幾嚿雞、肉丸和幾隻蜆；冇味的肉索吓啲湯汁都好好多。 後來多一個較好的男侍應，同我哋斟水果茶，又同隔離枱傾吓偈。 總括來講，食物價錢同服務唔成正比，令人失望