長輩勁有肥肥家族心，每每覓到好西都會第一時間請家人一同品評，入冬前最新就發現咗銅鑼灣有間抵玩和牛放題專門店「牛陣HANARE Platinum Label」。店子位於世貿中心十一樓，雖則樓底唔算高，但勝在用餐大堂開揚清爽，空氣夠流通。環境光鮮企理，散座間又有足夠嘅活動空間。散發出和風嘅裝潢不失時尚。正門及室內某啲角落仲流露出襌味。八人派對被安排入座其中一間廂房內。餐桌上擺有齊備嘅自用及公用餐具、調味料及日本蛋蛋。據悉，開瓶費設於$100/枝標準裝紅、白、汽、清酒及$200/枝大瓶裝，屬良心價。同Uncle食飯飲酒酒，只有一個飲法，就係杯杯都要勝，故為公平起見，每人都會備有自己嘅酒酌，明顯輸酒量唔輸陣！無限時嘅和牛放題餐牌共有兩頁。特上套餐包有無限添加汽水、前菜、主菜、副菜、甜品，價格取決於所選之主菜項目，全枱必須點同一款；另加$59/位更可升級玩埋啤酒放題！主菜分壽喜燒及涮涮鍋兩款，當中鹿兒島野崎牛可選特撰（$629/位）或赤身肉（$529/位）；如果唔想食前菜、甜品同飲汽水的話，則可選平啲嘅上級日本黑毛牛（$429/位）或澳洲長期穀飼牛（$329/位）。杯杯勝Uncle極之好客，早就點好特撰鹿兒島野崎牛壽喜燒套餐（$629/位），原來點咗依款主菜時係可以追加埋其他牛肉款式、和豬同和雞片嘅，相當豐富！追加食物只需填紙仔，環保啲可以直接同場內嘅服務生落單。應建議一開波先試勻五款刺身，當中個人最愛爽潤嘅油甘魚及肥美嘅三文魚；哥哥則鍾情鮮嫩嘅帶子及潤滑嘅甜蝦。廚房仲好有心思地砌出靚靚拼盤，放題餐廳對擺盤絕不馬虎！薄衣天婦羅頭輪同樣四種點哂，意外地，層天婦羅炸漿極之鬆化香脆，而且真如餸名般薄衣，唔會食到成口油。長長嘅蝦蝦爽彈鮮甜；大大隻冬菇芳香厚潤；南瓜都好清甜。三色小鉢料理屬輕盈之選，細細件蟹膏豆腐好軟嫩；龍蝦沙律伴配青瓜片都唔會好溜；個人會推介酸酸爽爽嘅檸檬汁漬海蜇作間場小食，可一解和牛嘅油脂。如相所示，特撰鹿兒島野崎牛嘅紅白雲石紋理分明，粉嫩吸睛！第一隻金碟連埋牛牛嘅肥膏磚塊上枱，好等燒煮牛肉時唔會黐底。或許見座上客大多為高鹷長者，駐場嘅文仔哥哥竟然主動示範燒煮頭輪。和牛件質感柔軟，沾上甜甜嘅壽喜燒汁再浸入蛋黃醬（小肥太快勝得太多杯，所以唔記得咗影）即為靚肉添上香滑，加口熱辣辣嘅白飯更覺暖胃滿足！節令野菜拼盤款式都唔少，全部都好新鮮清爽。因真心覺得和牛放題美味抵食，XO仔之後仲約咗班食肉獸酒鬼試埋個「極」涮涮鍋！用紙鍋清湯烚熟和牛，配料換上麻醬及柚子醋，感覺幼滑嘅靚肉清啲同冇咁溜，結果食多好多碟！甜品共有四款可選，除咗大路嘅雪糕之外，日本卷蛋蛋糕鬆軟香滑。紅豆抹茶凍則柔韌清甜。銅鑼灣和牛放題專門店「牛陣HANARE Platinum Label」通爽衛生，服務生親切周到，任食和牛鮮美高質，壽喜燒或涮涮鍋都一樣咁！前菜、小食、配菜等選擇多，且可口味佳，仲要唔限時喎，七百蚊有找絕對抵玩，值得支持！

舊年有長輩做咗「Mira Plus」會員，為咗要享用其中一張優惠券，所以就組咗小團過海，一試「The Mira」酒店旗下嘅「Whisk」。網上訂座必先預繳訂金，流程相當簡易。上集「不歡時光」其實已經提過西餐廳位置刁鑽，不易到達，真係冇諗過室內問題仲多！用餐大堂雖則寬廣開揚，無奈四周嘅閃閃吊燈及地毯上嘅轉圈圖案令眼睛不太舒適，加上室內氣溫奇高，冷氣開盡兼開埋冷風機連一向怕凍嘅靚靚媽咪都話熱，大家未食已感暈陀陀！另外仲有一點好奇怪，就係服務生竟然幫契妹個哥哥拉櫈都唔幫更有需要嘅契妹拉，當真令人費解！每位席上都擺有齊備嘅餐牌、自用餐具及口罩套。埋位第一時間當然係先用券券換取指定餐酒啦！深知一樽酒一定唔夠飲，大肥爸爸早就備多咗樽紅酒，眼見開瓶費乃幫襯一枝免一枝，結果梗係加多樽汽酒啦，順便可解吓熱嘛。餐牌首頁所示，主廚William Lau先生嶄新嘅料理靈感源自節令嘅日本食材及其法式嘅廚藝。得知會員可以七五折享用六道菜（原價：$980/位）或十道菜（原價：$1,288/位）廚師發辦晚餐，大家就好迅速地揀選合心意嘅份量及主菜項目。話說大食會全員準七點入座，四個字內已點好菜，不過等咗成半個鐘都未有麵包食，中途哥哥仔已經加咗幾次冰，斟添咗幾次酒酒同水，細佬就多口問句隔離枱客食緊嗰啲麵包係咪要另點啦，點知哥哥仔嘅回應係麵包要等頭盤一齊上喎！大家有眼見，全店頂哂盡只坐咗兩成客，絕非繁忙，到咗八點鐘都未有提供任何食物，餐桌上只見花瓶擺設，連小食都冇，大肥終於忍唔住向經理投訴，驚嘆難以接受此為平均千多元嘅酒店晚餐！French Brioche：八點過後終於出場嘅法式麵包又真係好新鮮嘅，皮薄包鬆軟，話哂都係啱啱出爐嘛。哥哥仔背台詞式介紹伴配嘅自家製牛油混入咗麵豉、高菜、芝麻、乾蔥等，食落頭腦簡單嘅小肥口中，即化成咸咸地嘅惹味大集匯；真心覺得靚嘅麵包好多時淨食最正，就算要點都係點原味牛油方才可保留麵包嘅特質，個自家製牛油唔多夾得黎仲有啲喧賓奪主囉。Fleur d’Or：同麵包一齊上嘅頭盤個法文名聽落好似化妝品品牌咁，優雅尤甚，中文可譯作為「金花」就可能俗套咗少少。孖碟上以金箔點綴嘅靚花橙亮秀麗，花心嘅流心鵪鶉蛋蛋原來用咗麵豉醬醃過，芬芳香濃，配上日本大根砌出嘅花瓣極之清爽，剛巧造出中和作用，契合細膩得很！Gillardeau Oyster：第二道上枱之時已經係八點四十分，平均每八個字先出一道，叫咗十道菜咪即係要食到過十二點？！因深覺不妙即同經理哥哥反映，佢竟然答話餐廳其實收十點半，叫大家唔洗擔心，廚房都要收工，之後啲菜一定會出快好多喎。半生熟嘅法國生蠔縮咗少少水後被更為量多嘅提子啫喱、醃漬海藻、青瓜片、青瓜忌廉等配角覆蓋住，故相中唔係好睇得到。平心而論，菜式清新爽潤，但細小嘅生蠔就唔似係主角囉！Sea Garden：顧名思義，色澤彩艷嘅海洋花園由多款海洋生物組合而成，上枱後先斟上油甘魚清湯，閃出海光，睇頭十足。海園主材為肥美柔潤嘅油甘魚他他，混入Daurenki魚子醬、梳魚魚籽及海葡萄即添上鮮濃與爽脆。Hokkaido Scallop：接著嘅北海道帶子好神秘咁用個波波碗蓋住上。碗蓋一打開，即傳出濃濃嘅煙燻味，賣相好似一隻以意大利雲吞皮包住隻帶子，但就被斬開一半咁，同之前嗰幾道菜嘅精美度明顯相差好遠！半生熟嘅帶子質感軟嫩，可惜層餃皮厚嚡粗糙，濃罩著嘅煙燻味蓋過咗帶子應有嘅鮮甜，旁邊幾塊炭燒竹筍片都係一樣咁煙。Iceland Langoustine：橙白紋理分明嘅冰島海螯蝦經過低溫慢煮，肉質爽脆彈牙，連同頂面嘅日本白昆布絲及浴中嘅勝瓜汁混海藻油食落去，即有效地吊出鮮香。Seasonal Winter Black Truffle：明明七月乃夏天，小肥好唔怕羞咁問點解「冬季黑松露」會屬當做季節；哈，原來答案好簡單，黑松露出產地為澳洲！黑松露薄片下暗藏日本名蛋蘭王造出嘅溫泉蛋，蛋黃鮮明亮麗，中間仲夾入咗啲炒香咗嘅舞茸菇及雜菌忌廉，撈勻哂黎食尤其香濃滑溜，超正！Sakana：話名係法國大餐喎，中段當係要多道魚魚啦！碟上貌似三文魚嘅其實係炭燒鱒魚。另上嘅海鮮湯汁上枱後由專人斟上。鱒魚表皮焦脆酥化，魚肉都好軟熟。主菜共有三款可選，其中只有羊鞍「Lamb Saddle」唔洗加錢。契妹揀嘅法鴿「French Pigeon」（另加$168）份量比較少；如相所示，配菜好似大份過鴿肉。Wagyu Ribeye（另加$238）：厚切嘅和牛肉眼扒只係焦香咗個外皮，牛肉粉嫩紅潤，鬆潤軟腍，沾上帶甜嘅黑椒果製秘汁可一解油膩感，極易入口。Summer Oasis：甜品環節共有三部曲。最先登場嘅日本香印提子雪葩以靚提子肉及透明嘅海藻啫喱墊底，食前淋上秘製薄荷清酒汁，碟上嘅綠洲清秀、清涼、清新、仲好清爽，輕盈可口。Hojicha：第二款焙茶撻品好似廚房入面整唔夠咁多份所以夾硬一開為二咁，每人得半件，感覺唔係咁大方同完整。共有三層嘅撻撻由朱古力、羊𡙡、焙茶慕絲造出，甜得黎個茶味帶點苦澀；圍邊嘅蕨餅深色嘅為焙茶味、白色嘅為麻薯味；側旁再加球煙燻過嘅雲尼拿雪糕及紅豆蓉；請恕小弟直言，材料配搭欠缺和諧性之餘，個設計好似求其砌咗啲野出黎去填滿隻碟碟咁囉！Petits Fours：諗住煙燻雲尼拿雪糕已經唔掂當啦，點知結尾嘅小點仲恐怖，師傅好似廚魔上身咁用醬油造出雪糕，另加插咗啲咸咸嘅紫菜脆片同米通加以調味同裝飾！又咸又甜嘅雪糕甜品不倫不類，分子料理絕對唔係個個玩得起，最慘係十道菜餐單最後兩道都要食雪糕，係咪暗吋緊肥肥家族個個身形健碩先？！酒店西餐廳「Whisk」除咗空間感足之外，室內空調欠奉，空氣完全唔流通，部分服務生比較生手，但態度尚算正面，十道菜廚師發辦料理大部份還好算味佳，不過廚房就出哂事！上菜速度拿捏不準，頭幾道菜實在拖得太慢，有啲菜式仲好似俾人切開咗半份咁，唔食麵包根本唔夠飽，唯一最感安慰或許係可以十點半前食得完吧。

大食會訂咗位去尖沙咀「The Mira」一試西餐廳「Whisk」，難得過海喎，出名爛飲嘅蕃薯Uncle當然係唔會放過飯前最歡樂嘅時光啦！嘻嘻，聽落好似好威咁，其實只不過係去同酒店旗下間「Vibes」，地點就喺餐廳隔離，明顯就腳要緊。話就話酒店同美麗華商場相連，入咗去卻好似個迷宮咁，轉完𨋢仲要兜黎兜去先到達，極之迂迴。或許小肥體弱，步入最後條通道時已經暈暈地，影相都對唔到焦。設於室外嘅酒吧被棕櫚樹包圍，好有泰國、越南風情。炎炎夏日溫度同濕度實在太高，酒店唯有四周添置冷風機及大風扇舒緩一番，無奈解決方案未能有效降溫之餘，唔凍兼勁嘈嘅強風搞到個個頭都痛埋，完全唔掂當！早到嘅長輩原本要求坐埋邊啲特色帳篷梳化位，有瓦遮頭睇落又嘆，可惜外籍妹妹話靚位早已被客人訂哂喎，即使七點前埋單都冇得傾！XO仔明顯好介意，留意到直至五人轉場為止，多個帳篷內只有一個真係有客坐囉，莫非佢啲大客集體玩遲到或取消？！店子定咗週日至週四下午五點至七點為歡樂時光。指定五頁酒酒及小食均可享半價優惠。以二維碼自助落單簡易快捷，減少接觸及拗撬，更可隨時加點或查數。蕃薯Uncle原本叫咗杯「Mira Negroni」（歡樂價：$69; 正價：$138），點知第一啖已嫌雞美酒過甜且含酒量低。頂唔到半杯即學靚靚媽咪轉飲威士忌加冰「Ballantine’s Whisky」（歡樂價：$59/shot; 正價：$118/shot），因深覺水吧手腳太慢，仲一次過打孖黎！飲友師兄教落，最安全一定係飲爽涼嘅生啤！Truffle Fries（歡樂價：$59; 正價：$118）：熱辣辣嘅薯條雖然唔係好油，但就比較乾身，要多啲醬先易入口啲，不過個醬除咗有黑點之外，當中個松露味就唔夠濃郁。酒店室外酒吧「Vibes」環境比熱帶地區更濕熱，最慘服務生嘅態度唔多似歡迎有客幫襯，酒酒又唔好飲，直令歡樂時光毫不歡樂囉！

外國公司作風新派，就連春茗地點都一反傳統地揀咗間天婦羅專門店「瀧」，全因晚市推出嘅六八折剛好符合預算！佔用面積全層嘅日本餐廳光鮮企理，正門身後為師傅個大舞台。多人派對包哂圍繞著開放式廚房嘅高櫈吧位，食物煮好即可享用，夠哂熱辣辣！吧位身後有條海龍升天，繪出「瀧」字，霸氣十足！晚市餐牌上共有兩個選擇，其一為指定套餐「瀧」（$1,380/位），其二為可與廚師商討自定內容嘅「雅」（$980/位起）。主人家早已訂好菜單，埋位只需揀靚杯飲清酒。每位席上擺有自用餐具及濕紙巾。細心睇多兩睇，發現筷子原來係某日本木匠曾經講過最好揸嘅五角形款式，店主似乎有啲料到喎！等待天婦羅時，先有清脆嘅枝豆送酒。前菜中嘅萵筍蟹肉清甜爽嫩，三文魚籽於口腔內爆裂，即有提鮮之效。四式頭盤應建議由左邊嘅水雲杯起，逆時針方向食。勁酸嘅水雲醒神開胃；以味噌自家醃製嘅芝士可以話係另一類嘅重口味，好芝士嘅人就勁啱；節令嘅螢光魷魚好爽脆；橙碟上嘅海膽豆腐則芳香幼滑，最合個人心意。呈奶白色嘅鯛魚湯鮮濃甜美，暖胃非常。進入天婦羅環節，Barry師傅先介紹配點嘅四款調味，下圖左起分別為天然鹽、咖哩鹽、檸檬汁、蘿蔔蓉。打響頭炮一貫傳統地由靚蝦開場！天婦羅炸漿酥化巧薄，修長嘅蝦身爽脆彈牙，簡單點上白色嘅天然鹽已能吊出鮮甜。旁邊嘅炸蝦頭卜卜脆兼冇渣，沾上咖哩鹽後好似變咗卡樂B嘅咖哩味薯片咁，送酒佳品也！魚王大讚天婦羅𩶘魚仔皮脆肉扎實，魚味仲好鮮。炸至半生熟嘅天婦羅帆立貝上枱前已一開為二，外脆內軟嫩，加點白鹽最能保持其鮮甜。半條骨都冇嘅天婦羅沙錐魚嘅魚味冇𩶘魚仔咁濃，賓客中竟然有人話食完唔知食緊魚喎，絕對有飲醉之嫌！彎彎嘅天婦羅瀨尿蝦實淨有彈性，而且好鮮甜。小肥一向對魚興趣不大，反而覺得連殼炸嘅天然大蜆有特色！據悉，師傅預先將蜆肉切成粒粒，混入冬菇碎及芡汁後焗製一輪後方才成隻喺滾油炸出，乜都唔洗點就咁就食得。意外地，經雙重焗炸過嘅大蜆爽潤多汁，鮮濃滋味得很！全晚之最必選壓軸戲肉紫蘇海膽三文治，喺廚房嘅燈光下尤其橙艷奪目！「三文治」底面兩片紫蘇葉天婦羅酥化輕盈，芳香尤甚，一口咬落去，當中澎湃嘅海膽餡心即溢滿口腔，舌上交織出香脆、鮮甜、嫩滑，成功掀起高潮！食完多道天婦羅後，每人面前即有一碗好似茶碗蒸嘅京都豆腐。滑如蛋蛋嘅豆腐擺盤精美，真係冇諗過豆腐面塊透明啫喱乃紅菜頭汁所造，頂面嘅粟米方磚清甜爽脆，組合清麗脫俗，十分可口。單尾食事可選雜菜蝦餅飯、蕎麥麵、烏冬，其中最多人揀食飯飯。XO仔就點咗個清新啲嘅蕎麥麵。甜品環節共有兩道，第一款鹿兒島安納芋師傅其實一早已經開始炸，上碟時更提點層皮都食得！紫皮黃肉嘅安納芋相當軟熟，黏上伴配嘅拔蘭地同糖後，當中嘅甜味迅即被燃點起黎，軟化咗嘅表皮亦甜美非常，吃畢一啲渣都冇，堅掂！作結嘅水信玄餅晶瑩滑溜，撈入伴配嘅沖繩黑糖及紅豆粉足以添上微甜與芬芳。樓上天婦羅店「瀧」環境時尚潔亮，室內抽氣充沛，服務生溫婉友善，天婦羅菜式用材新鮮，而且唔係咁油膩，晚市之六八折優惠直令性價比提升不少，值得一試！

閒日收咗工同家人約咗去睇眼醫，睇完先發現個個千幾度近視，放大咗瞳孔後根本行唔得遠，所以就急忙搵人做盲公竹！嘻嘻，咁橋蕃薯uncle就喺附近間「Venédia Grancaffè」happy緊，為安全起見，三口子決定去踩場。西餐廳樓底高高，光線充裕，中央吊出嘅海藍燈飾華麗有氣派。部份散座有絨造梳化位，應最為舒適。餐桌有齊備嘅自用餐具及濕紙巾，看似衛生，無奈同不潔嘅洗手間好大對比。歡樂時光設為傍晚五至七時，指定飲品可享特價優惠。如相所示，酒酒份量勁少，$70-$88/杯絕對稱不上為歡樂級！一頁晚市餐牌只有英文版。點好食物，友善好客嘅哥哥仔即呈上麵包籃。長輩食到有果仁，即提點XO仔唔食得。Homemade Tagliolini, Butter and Parmesan Sauce, Black Truffle（$380）：只屬和暖嘅自家製意粉麵條非常腍身，可以話係近乎零煙韌，最足量嘅就係舖面嘅黑松露薄片，清脆芳香，不過師傅好似唔記得落鹽咁，除咗松露香之外味道甚為欠奉。Tagliatelle, 36-hour Three Cut Beef Ragout, Confit Tomatoes（$250）：第二款牛肉意粉一樣毫無熱力，粗粗長長嘅意大利粉偏乾同硬，某個程度上可以話同嚡口嘅燉牛肉好夾嘅。Veal Chop “Milanese”, Cherry Tomato Salad, Amalfi Lemon（$680）：薄身嘅炸牛仔扒層炸皮尚算鬆化，可惜牛仔肉卻老而嚡韌，而且仲好乾爭爭，不吃也吧！中環鬧市中嘅意大利餐廳「Venédia Grancaffè」環境高雅，服務生亦相當有禮，無奈食物又貴又唔好食，暑假期間嘅週四晚都要拍烏蠅，明顯係有理由嘅！

神出鬼沒嘅影子Auntie自疫情留美後終於學識上網睇YT，無意間發現天后區有間「鐵板燒．鑄」連續多年榮獲米芝蓮一星，仲要係全港唯一有星嘅鐵板燒專門店，得知姨媽們回港，即令XO賢姪務必要安排陪同一試。乖巧嘅小肥當然係立即行動，並早於一個月前以電話訂座。八人用餐必先選定晚餐及預繳訂金（$300/位）。晚市套餐共有兩款可選，第一款廚師發辦「Omakase – Chef’s Recommendation」（$2,280/位）共有十道菜。由於長輩們食量有限，結果就揀咗少兩道鵝肝及手卷嘅「I M Tasting Menu」（$1,800/位）。名店剛剛遷往天后新建嘅食廈一樓，據悉為舊舖嘅兩倍。步出升降機門，暗黑嘅環境帶著神秘，時尚嘅燈飾及巨型嘅透明玻璃酒櫃於接待大堂剛巧照出餐廳所獲贈嘅八粒米芝蓮星星同餐飲獎狀，明顯係焦點所在！佔用面積全層嘅餐店空間感足，抽氣系統強，中央嘅鐵板舞台有氣勢得黎不失高雅。飲品牌共有五頁之多。因深覺$500/樽標準裝紅、白、汽、清酒之開瓶費唔係咁值，飯前已諗好會叫枝獺祭三割九分純米大吟釀（$850/樽），點知用餐當日被告知此酒已售罄，同牌子嘅只剩獺祭二割三分純米大吟釀（$1,388/樽），決策人姨媽話冇問題，所以就照開。晚餐有幾點好奇怪，話就話小肥訂位時已定好菜單，但同行嘅家人其實大多都唔知詳情，姨丈埋位只見自用餐具，冇餐牌睇又唔洗點菜，仲誤以為係食廚師發辦料理所以冇菜單提供。感覺好似一夠鐘開工，師傅就將啲食材放上枱度曬；冇錯係零對話，靜曬！直到第一道菜上場，先由妹妹仔介紹前菜為海膽拼三文魚籽。是日前菜：橙亮鮮美嘅海膽幼嫩鮮濃，無奈晶瑩嘅三文魚籽爆裂於口腔時滲出微腥，似乎米芝蓮粒星俾少咗個「月」字邊喎！甘鯛魚配海膽忌廉汁：交由甘鯛魚接棒時，面前嘅鐵板爐其實都仲未開過！如相所示，大廚嘅角色竟然只係玩擺盤，碟上嘅安鱇魚肝忌廉醬，甚至件甘鯛魚都係喺其他廚房煮備嘅，唔怪得知場內冇乜油煙味啦！零油煙備製嘅甘鯛魚最正係香脆酥化嘅魚鱗，墊底嘅海膽忌廉汁調味甚為討好，敗筆在於厚厚嘅魚肉只屬微暖，食落偏實且有過熟之嫌，既食不出嫩滑，更吃不到鮮甜，請恕小弟直言，完全感受唔到任何鐵板神髓嘅存在。日本活鮑魚配海帶黃油汁：第三味終於令師傅同時開爐及開金口，介紹鮑魚源自北海道蝦夷，伴配嘅汁液由鮑魚肝醬秘製而成。已預先切成一件件嘅鮮鮑厚潤有彈性，黏上濃縮嘅肝醬即倍添鮮濃惹味。龍蝦配蝦膏味噌汁：每人半隻嘅法國藍龍蝦質感爽脆，生熟程度恰到好處，配角意粉麵條煙韌有嚼勁，不過個蝦膏味噌汁偏咸帶苦，失分在個澀味。日本時令蔬菜：節令雜菜分開兩段上，其中細細粒嘅洋蔥仔最甜美多汁。炒芽菜都好爽脆。特選A-5和牛：和牛登場之時即代表晚餐已接近尾聲。有少少意外，星級鐵板嘅蒜片唔係即場由生蒜起煮出，入口時仲已經腍哂；其實都唔應該意外嘅，因為之前道甘鯛魚都係由後廚房攞出黎，蒜片應該算係小角吧！粉嫩嘅和牛粒油脂唔算多，食落鬆軟又夠肉汁，只係份量好似少咗啲啲。炒飯、味噌湯、醃菜：炒飯可以話係成餐炒得最耐嘅一味，足料且夠乾身，但就唔係好夠味。醃菜清爽脆口。味噌湯用藍龍蝦殼熬製，飲落都好甜。時令水果：結尾簡單嘅蜜瓜清甜香潤。香港唯一一間星級鐵板料理「鐵板燒．鑄」環境格調高級，服務生亦相當有禮，可惜二千多元嘅海陸晚餐冇乜火候，差不多一半菜式並非即場烹調，鐵板靈魂欠奉，講真唔係好明點解咁威可以摘咗八年星星囉！

五點半收咗工要等到七點先有飯食，飯前當然係要去尋歡啦！訂咗位喺跑馬地食，好自然地同選於跑馬地飲，地點由地膽番薯Uncle話事，一試叮叮總站旁間「Ask For Alonzo」。地舖於十八度氣溫下竟然仲開緊暖氣，好在正門兩邊有室外座，小肥先唔洗邊飲邊滴汗，唯一辛苦在不停要食路人嘅二手煙。嘻嘻，最開心係遇上生緊月嘅E先生，終於可以為爵屎契妹影相交差。餐店每日下午三點至八點為歡樂時光，兩頁餐牌列出指定優惠酒品及小食。House Prosecco（$48/杯）：第一杯汽酒上枱時明顯冇乜氣，飲落仲似白酒多啲，一向唔怕羞嘅XO仔即時同外籍哥哥仔反映，佢急忙道歉並解釋可能因為酒酒隔咗一晚夜漏咗氣，結果更迅速地開樽新嘅，態度堅誠懇！Ham & Cheese Truffle Toast（$78）：新鮮烘出嘅多士十分鬆化，夾喺中間嘅火腿芝士份量恰到好處，三文治簡單香口，美中不足就係稍欠松露香。意大利小館「Ask For Alonzo」格調輕鬆，雖然酒酒一般，但勝在服務生友善落力，小食輕盈可口，成功為黃昏倍添歡樂。

出入跑馬地時早就留意到奕蔭街上有新店「錦汶館」裝修，等到初秋終於見到佢開張，不同媒體亦紛紛報導，介紹主廚李灼汶師傅為「廚皇教父」鍾錦師傅嘅得意門生，來頭咁勁喎，大食會梗係要湊湊熱鬧見識吓啦！私房菜現階段只做晚市一輪，由於座位有限，食客必需預先訂座及定好菜單。正如門面展出嘅菜單樣板所示，開瓶費及服務費全免，啱哂酒鬼。店子樓底高高，落地玻璃窗身後有兩張四人及六人枱，據悉有需要時可合拼成一張十人枱。最中央為光亮潔淨嘅開放式廚房，貴客可任意觀摩「刀哥」汶師傅嘅廚藝。（嘻嘻，初相識即俾XO仔八到師傅咁響嘅朵，唔用實在有啲嘥，故仔就留返有心想知嘅人親自訪問刀哥啦！）用餐大堂光線充裕，簡潔企理，就連洗手間都相當衛生。十人派對被安排入座後方私隱度較高嘅位置，不過滿座時雜聲同回音都幾勁，建議可加舖厚厚嘅地毯幫助吸音。室內並無花巧之裝潢，單憑牆邊嘅酒樽及掛牆海報，已可感受到客人及店主均為好酒之人。大肥爸爸用餐當晚先決定睇菜單，竟然一野就發現列出嘅九大簋（$738/位）有齊雞、魚、豬、牛、蝦、蟹、菜、湯、麵，唯獨欠甜品一環。雖然未能成為十全十美，但可令貴客期待回頭品嚐，換個角度黎睇都可以話係缺憾美黎嘅。每位席上都有齊備嘅自用及公用餐具。場內嘅服務生友善落力，長輩應推介試咗個特色牛蒡茶，嗜酒嘅細佬少呷茶，只可以話茶品個牛蒡味好濃囉。溫泉蛋蔥油涼拌蟶子皇：打頭陣嘅頭盤好似西餐咁講求擺盤，每人一碟。預先切成細細條嘅蟶子皇鮮甜爽脆，拌上蔥油尤其醒胃；散發出天然咸香嘅冰菜脆嫩清爽；羮上嘅溫泉蛋柔潤香濃、溏心又富彈性，三個主角各具特色。特色八小碟：等咗大半個鐘，第二道八小碟終於一次過上，當中除咗冷盤，部份菜式理應襯熱食，不過等到相機食完再分哂俾十人後，食物都已經凍哂。小弟愚見，如果啲小碟續樣煮好即上，客人可一邊送酒，一邊享用，保持熱度又減少冷場，絕對係一舉兩得！特色八小碟之芝麻蝦多士：八款小碟中，個人最欣賞層次分明、香脆鬆化嘅芝麻蝦多士。特色八小碟之話梅小凍茄：凍食嘅前菜其實一早已經可以上枱，蕃茄仔酸酸甜甜，清新開胃。特色八小碟之一哥燒雲腿：意外地，賣相不甚吸引嘅雲腿片毫不油膩，亦不乾嚡，香甜脆身，送酒絕配！特色八小碟之金沙炸魚皮：平心而論，炸魚皮質感脆薄，唯一唔係好食得出有金沙咸蛋黃嘅成份。特色八小碟之鹽燒沙尖魚：此餸原本被小肥叮走咗，幸好刀哥唔覺意加返上去，因為席上嘅魚王魚后大讚魚魚燒得勁香口，仲即場表演「食魚唔𦧲骨」，魚骨直頭脆到可以吞埋落肚！特色八小碟之煎焗墨魚角：細細粒嘅墨魚角爽彈易入口。特色八小碟之雞蛋焗蠔仔砵：十人對蠔仔砵嘅評價有啲不一，正當蕃薯uncle覺得為極品時，XO仔就覺得砵中嘅蠔仔唔夠肥嘟嘟，美人姐姐雖然覺得菜式美味，但卻誤以為食緊焗魚腸。。。特色八小碟之脆皮牛坑腩：埋位時明明睇住刀哥為牛坑腩塗上秘醬後串起去燒，點知入口嗰刻牛腩卻只屬和暖，唔得脆皮，而且偏乾同嚡，估計同自己花時間影相及分餸後排到最尾先食所致嘅反效果。特色八小碟之鮑魚汁炆雞腳：鮑汁雞腳軟腍入味，吮腳趾經驗豐富嘅長輩一食就話係新鮮貨色，而並非平時飲茶嗰啲急凍雞腳，真係識貨架噃！羊肚菌姬松茸燉竹絲雞湯：一人一盅嘅雞湯清甜足料，羊肚菌同姬松茸芳香嫩脆，但係咁大碗湯湯對酒鬼黎講可能太多水，幾個人都飲剩。招牌花雕蒸海紅蟹：十人有兩隻嘅花雕蒸蟹醇香甜美，蟹肉幼嫩軟滑，精華汁液留埋黎煮單尾，善用資源靚料。薑蔥蒸鹽鮮馬友魚：十人用餐同樣有兩條蒸魚。刀哥講解魚魚別號「半日鮮」，全因佢朝早新鮮買咗返黎即用鹽餡咗半日，用餐前先用薑蔥蒸。馬友極之鮮甜嫩滑，魚油溫潤，淨睇以下兩幅食前、食後對比照應該都知佢咩料啦！蝦米醬粉絲炒花蛤皇：花蛤鮮爽惹味，蝦米醬份量適中，粉絲炒得好乾身又夠爽，簡單可口。芝麻焗貴妃鮮雞：雞雞連雜上，証明用新鮮雞整，肝腎唔夠五秒即全部消失，即秒殺咁受歡迎！貴妃雞芳香尤甚，皮下脂肪唔多，黑肉同白肉一樣咁鮮嫩柔潤，愛食雞皮嘅小肥只係略嫌皮上嘅芝麻份量過多，蓋過咗雞皮原有嘅滑溜感。鮮茄金湯浸豆苗：豆苗本身爽嫩帶脆，黏上含蛋花嘅金湯成功為嫩菜添上香滑。蟹汁撈烏冬：粗粗嘅烏冬麵條肥潤Q彈滑溜，沾滿鮮濃甜美嘅花雕蒸蟹精華，明明食緊菜菜時個個都話飽，但三兩吓手勢就清碟，美味程度不言而喻！跑馬地新店「錦汶館」環境光鮮衛生，店員落力好客，三代同堂家庭式作業絕對同心！為確保食物質素，掌舵人刀哥專注每天只做一輪晚餐，態度誠懇認真，七百多元嘅九道菜餐單用材新鮮，菜式豐富美味，貨真價實，確真做到令顧客有賓至如歸嘅感覺！

成為咗Lee Gardens Club會員後，發現多間餐廳都有九折優惠，週三晚收早，所以就好即興咁約咗三五知己試試其中一間「香江花月」。聽到餐廳名， XO仔即聯想到「香江花月夜」嘅梅姐，冇諗到餐廳大堂會選用哥哥嘅畫報裝飾正門前方嘅升降機大堂。佔用面積全層嘅火鍋店寬廣開揚，用餐大堂光線充裕，弧形嘅散座又真係幾似電視劇中嘅舞廳格局喎。最中央位置為自助混醬區，兩邊高高嘅圓柱桶均為豉油，混唔混都會收$25/位。每位席上擺有齊備嘅自用及公用餐具，感覺都好衛生。埋位每人先送一杯清新怡神嘅洋甘菊茶，細杯仔底隱約露出條肥嘟嘟嘅錦鯉，相當盞鬼！飲品牌只有一頁。爛飲鬼結果開咗兩枝紅酒。眼見六人用餐要分兩個煲，所以就應推介其中一邊點咗個包一款鮮味頭盤、火鍋湯底及時令海鮮拼盤嘅「鍋心暖意」套餐（優惠價$2,188；原價$2,988）。另從火鍋紙上多個項目加選配料。（厚本彩圖餐牌太多頁，小肥嗰日懶冇影到。）不過就冇試到啲摩登點心同甜品。鍋心暖意套餐之澳洲龍蝦刺身（原隻）：套餐嘅頭盤揀咗鮮甜爽脆嘅澳龍刺身，如果怕生的話可以灼一灼先食。個殼仲可以浸埋入去滾，令湯底更為鮮濃。鍋心暖意套餐之白湯人參鍋（原價$228）：奶白色嘅人參雞湯底其實都幾甜，不過個藥材味都幾重吓，最正係入面滑嘟嘟嘅鴨血。日本牛乳玫瑰鍋（$168）：同樣呈奶白色嘅玫瑰鍋底反而得個靚字，浮面朵玫瑰花原來係用日本牛乳冰製而成，滾湯時會慢慢溶，下面托底件木瓜就要用人手整爛。湯底係就係好滑，不過唔係好飲得出有玫瑰香，用木瓜味牛奶打邊爐始終有啲怪怪地。鍋心暖意套餐之時令海鮮拼盤：如相所示，拼盤內含爽彈嘅蝦蝦、鮮脆嘅鮑魚仔、幼嫩嘅帶子同甜美嘅花蛤，共四款海鮮，每款最少有四隻。香江拼 – 手切肥牛、牛柳粒、安格斯肥牛、牛小腿、牛白肉、牛心頂、黑柏葉、牛脷（$798）：顏值最高嘅牛肉拼盤每款分成小碟，有啲仲兩、三碟咁圍住個火鍋邊，唔洗標籤注明都睇得出牛牛嘅部位。中間有個窿嘅擺盤設計可善用餐桌嘅位置，邊食仲可以人手轉，個個都夾得到。切得夠薄身嘅手切肥牛同安格斯肥牛都好軟熟，牛柳粒最有嚼勁，個人最欣賞爽潤香甜嘅牛白肉，唯一唔係好識點煮個黑柏葉，烚極都好似好韌咁。花滿園（$238）：豬羊雙拼用架上，高雅嘅雙層賣相一樣好慳位，上格半肥瘦嘅豬肉片柔潤帶爽。下層嘅羊肉睇落都好薄，不過自己怕羊肉羶所以冇試到。蓮藕片（$38）：意外地，白雪雪嘅蓮藕片清爽脆巧。生根（$28）：脹卜卜嘅生根都好新鮮。娃娃菜（$48）：娃娃菜葉多夠清甜，最啱細佬口味！一口鮮蝦滑（$78）：蝦滑爽甜彈牙，必吃推介！鮮冬菇（$28）：肥嘟嘟嘅冬菇清香可口。碧綠萵筍（$48）：平時都幾鍾意食萵筍，不過唔知係咪唔啱季節呢，盤中嘅萵筍塊好似苦苦地。黃沙豬潤（$58）：厚肉嘅黃沙潤煮前已富光澤，煮熟咗後亦爽潤柔滑。姬松茸野菌餃（$88）、冬菇薺菜餃（$88）、自家製韭菜餃（$68）：「香江花月」幾款餃餃全部都包得好工整，餃皮厚薄適中，不過食落，用菇菌作餡嗰兩款嘅味道偏淡，反而最平嘅韭菜餃最爽嫩惹味。銅鑼灣火鍋店「香江花月」通爽闊落，服務生好客友善，廚房用材優質，菜式大多美觀味佳，睇得出各方面都花過心思設計，好迎合現今愛打卡嘅世代！懷舊嘅裝潢配上時尚嘅火鍋湯底同配料，橫跨時代嘅主題有啲似劇集中嘅穿越時空咁，置身其中都幾過癮。

為食兵團近日發現利園三期地牢原來有間中菜館「淂記」，某網購平台會員可專享晚市七折優惠，閒日黃昏四點至八點仲有歡樂酒酒飲，收工可以直落唔洗轉場，蕃薯uncle吹雞即有十人附和，私人飲食助理當然係立即登記做會員啦！經商場內嘅正門進入餐廳，食客必先行落多級樓梯。小肥會建議大家從新寧道入口搭𨋢落去，安全方便得多。「淂記」室內面積堅大，除咗私人廂房之外，用餐大堂都分好幾區，洋式嘅裝潢及合拼式餐枱似係咖啡廳多啲。酒鬼們五點鐘先喺高半層嘅酒吧區暢飲歡樂頭輪。主飲品牌共有九頁。人多最抵就係點選指定樽裝紅酒或白酒，因為打完八折仲送兩客酒吧歡聚小食。小食最平都要$68/客，即係慳多百幾蚊㗎！脆脆薯條（$68）：粗粗肥肥嘅薯條新鮮炸出，外脆內腍。椒鹽魷魚鬚（$68）：小食層炸皮就好香脆，無奈魷魚鬚本身偏韌，牙力唔夠的話唔好亂咁試。乾煸豬大腸（$68）：食落麻多過辣嘅豬大腸仍有少少餲味，個人並不推介。晚市散點餐牌共有十頁之多，中英對照，並附插彩圖，簡單易明。茶位費$20/位；前菜$22/碟。每個位都有齊備嘅自用餐具。馬蘭頭百頁千卷（$80）：以百頁包捲住嘅馬蘭頭清新爽嫩，一口一件極易入口，完全唔會食得好遴迍。香芒沙律蝦球（$198）：唔知係蝦球層炸漿過厚定係黏上嘅沙律醬汁過多呢，蝦隻偏腍同濕，毫不爽彈，敗筆係個芒果味好似芒果布甸粉開出黎咁假，堅食唔過！烤北京填鴨（$230/半隻；$450/隻）：請留意，鴨鴨只有一吃，原隻叫的話個鴨殼係可以包走嘅，環保人仕可自備大盒，唔係就要收外賣盒或外賣袋錢。北京填鴨皮脆肥膏少，鴨肉柔軟香潤，招牌菜差不多枱枱都有點。十一人其實點咗一隻鴨，但因長枱難夾餸，Apple妹妹就細心安排咗廚房分兩盤上，下圖為半隻嘅份量。雪花日本松葉炸蟹鉗（$78/位）：脹卜卜嘅炸蟹鉗個蝦膠爽脆富彈性，真係打得好靚，無奈入面隻蟹鉗未為最鮮嫩，有少少似雪藏貨，不過$78再有七折真係冇得投訴。冶味蘿蔔糕蟹（$380）：席上嘅隱世廚神狠批菜式要用辣醬黎炒全因蟹蟹毫無鮮味，師傅應該係想個辣味可以遮蓋到，拌配嘅蘿蔔糕仲好黐口，完全唔掂檔！珍珠川椒雞（$118）：舖面嘅川椒葉芳香清脆，可惜啲雞肉出哂事！兩碟雞肉加埋都唔係好見到有雞皮嘅蹤影，黑肉白肉嘅肉質同樣乾嚡，老人家直頭想退貨。威士忌東坡肉（$198）：火焰上陣嘅東坡肉夠哂熱辣辣，溶喺口嘅五花腩肉腍滑非常，食落又唔會覺得好油膩，唯一冇人食得出有任何威士忌味。淮揚雞火煮乾絲（$168）：大家對雞火煮乾絲嘅意見不一，有人讚個湯夠清，亦有人話唔夠雞味，睇價錢做人嘅XO仔就嫌雞絲份量偏少，唔知個餸係咪貴在啲火腿絲呢？！嫩雞煨麵（$78）：好少見到嫩雞煨麵有咁多湯，因為通常隻碗冇咁大，啲麵又索哂啲湯。要讚嘅係碗中嘅麵條軟腍得黎完全冇糊埋一團或者係發到過脹，不過個湯底有少少苦，入面嘅菜粒同雞肉好似少咗啲。灌湯小籠包（$88/六隻）：小籠包皮薄餡軟嫩，而且都好夠湯汁。一客有六隻，中間一點紅嗰隻用上紅菜頭汁醃紅咗層皮，據悉係設計者想令賣相突出啲嘅手法而已。高力豆沙香蕉（$68/五件）：甜品熱力欠奉，相信因為個蛋白打得唔夠鬆，所以食落好似麵包咁實，加上餡心嘅香蕉量少，大人細路都話唔合格！楊枝甘露雪糕（$38/位）：正宗地選配芒果雪糕嘅楊枝甘露不單香甜滑溜，仲要係少少酸味都冇，大肥爸爸大讚此乃整頓晚餐之最，必吃也！銅鑼灣名牌商場新店「淂記」面積寬廣，環境企理，服務生誠懇好客。餐廳所提供嘅菜式集合咗不同種類嘅中菜，當中仲混入咗不少新潮元素，質素的確甚為參差，不過平均每人四百幾蚊由歡樂時光開始飲，仲包埋晚飯喎，價位好難有太高嘅要求囉，睇得出點解要用七折吸客嘅，所以結論係一試無妨嘅OK評，希望廚房團隊可以俾多少少心機作出改善。