我係好鐘意食辣嘅人，所以川菜好啱我口味，適逢最近有個朋友開始食辣，一於同佢食捌壹壹，因為之前試過外賣開party覺得幾好！

呢度點菜幾得意，係自己圈餐牌 先黎個麻婆豆腐long下肚先！我幾鐘意呢度嘅造法，加左好多川味嘅麻辣香料，又麻又香，但又唔會辣到無感覺，用黎送飯一流！個豆腐亦都好滑好嫩，而且唔會散哂爛哂，而係好完整一粒粒！好香豆香味！ 主角重慶麻辣火鍋魚，驚朋友頂唔住所以只係叫左小辣，一上檯視覺上已經好震撼，好多辣辣椒鋪面，面層亦都有層紅紅嘅花椒油，除左原條魽魚外，配菜仲有好多豆卜、芽菜。等左一陣就滾起就食得，魽魚走過油，食落好嫩滑有魚味，肉質有彈性唔係一夾就散，一d都唔腥！味道好面可能叫左小辣關係，好易handle，反而麻味好勁，食到後期咀唇都無左感覺了！哈哈！ 甜品叫左黑糖糍粑，即叫即整，唔知係炸定係焗，熱辣辣外脆內軟，好綿糯，糍粑本身無乜味，係靠黑糖醬同黃豆粉，我覺得係呢度必點之一！

雖然限聚令無得食夜晚，但都無阻我地出去搵好野食嘅心！今日就特登book左間聞說幾正嘅虎鐵鐵板燒，我幾鐘意鐵板燒，因為食物係即刻燒，我覺得即刻整燒辣辣嘅野係最好食，最能夠帶出食物嘅香氣！
武漢肺炎令我都著重左衛生，呢間餐廳就做得好足，量體溫，搓手液，仲好貼心俾埋信封你入口罩唔洗周圍擺！
咩都唔諗，一於豪一豪佢，食佢個二人餐！ 沙律
有蕃茄同沙律菜，調味係柚子醋，酸酸甜甜，喚醒味蕾！ 鴨肝蒸蛋
睇相就知滑！蒸蛋唔覺佢溝左其他野，好易就食得出好香嘅蛋味，其實蒸蛋最好就係咁！鴨肝味道唔霸道，好甘香，粉粉嫩嫩咁，幫蒸蛋加添一份口感！ 燒大虎蝦
另一個我鐘意食鐵板餐嘅原因就係可以見到師傅嘅細心，呢個蝦上菜時已經分成蝦頭、蝦身、及蝦尾，蝦頭嘅沙囊同腸已經處理左，完全唔洗食客擔心！蝦身非常新鮮彈牙，帶鐵板嘅焦香味！ 南非鮑魚
先講鮑魚，好大隻好新鮮，切成bite size，好易食，隻鮑魚其實無乜點調味，好輕易就食到海水味，我係好鐘意呢個處理手法，畢竟食海鮮就係食佢個鮮味嘛！不過呢度除左俾原本鮮味你，仲會調配一個醬，連同魚籽和雞冠草食，多一份美味！好有驚喜！ 日本A5和牛厚燒配野菜
燒牛肉唔難，燒和牛難，因為和牛油脂好勁，好考師父功力，一個唔小心燒過龍就會燒走哂和牛嘅油脂，而呢份和牛處理得好好，面層有焦脆感，入口係嫩滑，由於已經切細左，從而切斷左肉嘅纖維，變得好易咬，最後就係牛脂係口腔內周圍走黎走去，好鬼正！
食完牛膩膩地又可以食番舊野菜，雖然係配菜，但係都燒得好好，香脆之餘又保留到疏菜嘅水份！ 三文魚子海膽杯炒飯
餐廳做到傳統燒肉功架外，亦做到創新嘅元素，呢杯炒飯仲唔係打卡位？！用左勁多海膽及魚籽鋪面，多到就黎瀉，海膽鮮甜好滿足，炒飯粒粒分明，唔會太乾，雖然已經好飽但都忍唔住食哂成杯！ 味增湯
食完咁多野，有碗暖湯飲幾舒服，食埋甜品作結一流！

我個鐘意左食辣嘅朋友真係食辣食上癮，今日又叫我去食川菜，位於尖沙咀寶勒巷，第一次黎呢度，原來成棟都係食肆！
店內採用落地玻璃採光，好光猛好舒服！ 未叫野食店員就已經送上雨碗老火湯俾我地暖下胃，仲話飲完可以再添，叫我地唔洗怕醜，感覺店員幾warm幾有番屋企食飯嘅感覺！ 先黎麻辣口水雞套餐，份量都ok，雞肉幾嫩滑，味道麻辣，不過唔係好勁，好易入口！值得一讚係個白飯，超香飯味，應該係珍珠米！
主角梗係酸菜桂花魚啦！雖然唔係火鍋爐咁上，但係新鮮整出黎都係熱辣辣！桂花魚本身醃左，做到好滑，同時魚味好重，一d腥味都無，亦都起哂骨，可以放心大啖食！湯底有勁多酸菜，但係魚嘅清甜可以做到平衡！非常好味！呢個酸菜魚處理得好好！ 樟茶鴨係經典名菜，呢度做得好出色，一上檯已經聞到好濃烈嘅煙熏味，鴨肉呈深紅色澤，皮脆肉嫩帶鹹香，別具風，處理做得好好，一d鴨腥味都無 後記，番到屋企先醒起漏左野係餐廳，即刻打電話去，我未講完店員已經話有執到仲幫我keep起左，第二日番去拎番，店員都十分有禮貌！我覺得呢間餐廳真係幾有人情味！值得再去！

成日都覺得去酒店食飯一定好貴，今日陪友人去大角咀剪頭髮，佢話附近嘅帝盛酒店好抵食，咁就試試佢！

一睇個menu嚇親，最平68有交易，最貴都係108，生蠔都係10蚊隻，以酒店環境黎計，坐得咁舒服，真係好抵！試埋D野食再講！ 每個餐都有前菜甜品，當日有枝豆，味道爽甜、牛肚，微辣開胃、醃漬蕃茄，甜甜酸酸好開胃，本身蕃茄亦都好新鮮！ 湯係日式蜆肉湯，不過不失！ 火炙魚生飯
賣相砌得好靚，廚師有精心擺盤，睇到都已經想食！帶子厚度適中，入口鮮甜無腥味。三文魚經過火炙做到外面焦香內裡半熟，兩種口感。鰻魚都有兩三片，味道就正常。壽司飯軟硬適中，仲帶點濕潤！整體好滿意！ 友人叫左個黑松露蟹籽吞拿魚伴意粉($108)，蟹籽伴碟好精緻，吞拿魚調過味唔會乾爭爭，黑松露更加幫碟意粉加上一點咸鮮味。整體友人都好滿意！

疫情進入第四波，又要被迫WFH，大家心知肚明WFH就係蛇皇，但我又唔想咁hea，不如就清下手頭上十篇未寫嘅食評！

女友係IG開左間小店，工作上有個小突破，當然要同佢慶祝一下，今次係第二次黎到LAB EAT，相隔一年有多，上次食lunch俾我嘅印象都已經好好，估唔到今次食dinner更有進步！

一如以往，食六點，貪佢未到晚飯時間無乜人，揀左坐室內，但其實室外都唔錯，不過好似適合happy hour飲兩杯多D。食店好細心，桌上一早放低左口罩袋同消毒紙巾！



叫左兩杯cocktail，粉紅色個杯係Gin做底，配玫瑰、檸檬葉、檸檬汁同荔枝，黃色個杯係Wisky做底，配薄荷、橙汁同檸檬汁。兩杯都好開胃，幫我地醒一醒味蕾，酒味平衡得幾好。特別之處係侍應會拎住枝「衝擊波槍」係兩杯飲品上面整個霧化嘅波波，飲嘅時候吉穿佢d霧就會散發出黎，都幾dreamy，啱哂女仔打卡！
頭盤1：紐西蘭生蠔
睇樣就知肥美飽滿，食落肉質脆嫩新鮮，好creamy，加上檸檬汁，甜味好出！
頭盤2：澳洲龍蝦肉及牛油果他他配意大利黑魚子醬
呢個配搭幾新鮮，亦睇得出廚師都幾有心機研發菜色！食落啖啖龍蝦肉，好滿足，正好平衡牛油果嘅膩，旁邊嘅熱情果jam酸酸甜甜好開胃，成碟野顏色賣相都好靚，增加食慾！黑魚子醬油脂感飽滿！呢碟前菜雖然貴，但值！
主菜1：芝士卡邦尼意粉
又係女士打卡之選！上菜時，侍應會先將意粉放入大車輪芝士入面翻拌，意粉吸哂芝士d精華，每條意粉掛哂汁，翻拌嘅過程已經好香好想食！配合咸香煙肉和香軟蘑菇一齊吃，好滿足，如果係芝士愛好者一定要試！主菜2：鱸魚拼慢煮西班牙八爪魚
鱸魚肉質堅實潔白，味道鮮美，幾乎無腥味，魚皮亦都烤到脆口！西班牙八爪魚本身味道唔強烈，廚師好聰明側邊加左熱情果jam，帶出八爪魚鮮味，經過慢煮，食落口感軟滑，同平時有d唔同，唔知以為自己食緊生嘅八爪魚


甜品：75%朱古力球伴高溫熱情果汁配香草雪糕及椰糖脆脆
個朱古力波上檯已經覺得好靚，然後侍應再淋上熱辣辣嘅熱情果汁，令朱古力波融化，溶左嘅朱古力mix埋裡面嘅雪榚，好似食緊脆皮雪條咁，同時熱情果汁又可以中和番甜度，整體做得好好！
最後想提下d店員，佢地服務好好，每道菜會介紹用左咩材料同點食法，會不時換碟，好細心，面上都係帶住笑容，而聽其中一位姨姨講，佢由開鋪做到宜家，仲不停褒獎餐廳有咩好食、廚師有幾專業同用心，定全感受到佢幾寓工作於娛樂！今晚餐飯食得好開心！

行開銅鑼灣，心血來潮想食海鮮丼，即刻上openrice search到呢間豊勝手丼，見口碑唔坐即刻出發！

門面內部裝潢都好有日本風，有d似居酒屋嘅感覺，坐位設計亦都好有心，可以放袋同衫，可以食得舒舒服服！
睇睇menu，唔知食咩好，樣樣都想試，結果揀個最貴嘅海之幸丼，就係貪佢大堆頭乜都有，可以一次過試哂，大滿足！
一上檯見到個份量已經覺得值回票價，一d都唔姑寒，樣樣都厚切大大件，誠意十足，完全睇唔到剌身下面嘅飯！
油甘魚：肉厚肥嫩，魚肉甘甜滑嫩膠質，入口即融
比目魚邊：係我最鐘意係剌身，貪佢油脂夠多，輕輕火灸一下，d油香出哂黎！吃完後個份香滑的口感久久不能散去
吞拿魚腩：實好味唔洗講啦！味道甘香，肉質鮮甜味美  三文魚籽：經醬油醃製，無左海水腥味，鮮味更為突出。顏色鮮艷大大粒！
赤蝦：味道濃郁、肉質爽滑
松葉蟹鉗：肉質細緻鮮甜，仲好細心咁幫你去左殼，輕鬆一剝就能露出飽滿蟹肉，好滿足呀
日本海膽：味道鮮甜有回甘，新鮮無異味！

總體黎講，$300唔洗食到咁新鮮高質丼飯真心幾抵，唔係下下食放題先叫著數，偶爾重質不重量也是必須的！

好日都唔行官塘，今日陪女友去駱駝漆買好hit嘅tart，行到咁上下順便食埋飯先走，問個住官塘嘅朋友邊度好食又好坐，就介紹左古今二俾我，既然地膽介紹到，一於試試佢，當日6點去到，咁啱開巿，無book位都入到去，例牌啦量體溫+消毒搓手液。
日本溫室南瓜沙律
呢個前菜超好食，講明日本溫室南瓜，入面加入洋蔥絲、車厘茄、蟹子同埋蛋黃醬，口感creamy，有d南瓜係連皮，粉粉地，總體係醒胃嘅！連平時唔鐘意食南瓜嘅女友都爭住食，感覺上南瓜比薯仔更有益健康！
秋葵蝦肉天婦羅
平時都會買秋葵黎食，呢度做法係將入面嘅籽拎走，釀入蝦膠再用天婦羅炸法製成。口感幾得意，先食到外層嘅脆，然後秋葵嘅軟滑，接著係蝦膠嘅彈牙，清新鮮甜集於一身！
日式冷麵
配料有蟹柳，蛋，青瓜，蕃茄等，醬汁味道啱啱好，麵條彈牙同時又掛到汁，成件事好balanced好清新！
最後要介紹呢一個卷物，一上檯，淨係賣相已經好吸引，一定要俾相機食先啦！

富士山
入面是牛油果和鰻魚，卷物上係海量嘅蟹柳絲同鬍鬚叔叔薯片碎，再倒上燒汁而成的。牛油果夠健康，中和鰻魚的油膩感覺，又軟又脆感覺好得意，雖然係創新卷物，但一點違和感都無。
彩虹卷
顏色好繽紛嘅一個卷物，面層佈上薄薄三文魚、吞拿魚刺身，而中間就有蟹柳、牛油果同青瓜，有咁多料口感好豐富。剌身雖然薄，但係鮮甜，同埋薄身就可以做到成個卷物各樣都好平衡！
煙花卷
即係辣味三文魚蓉，辣味吞拿魚蓉再加脆片，好老實，辣味唔多食得出，可能係bb辣？層次好得意，薯片脆、魚蓉軟滑，又有魚子嘅爆裂，唔怪得叫煙花啦！

睇左一個youtuber介紹，得知大圍新開左呢間以任食酸菜魚作招來嘅火鍋放題，即刻同個friend book檯試試佢！食物分五個環節，除左剌身同海鮮拼盤按人頭只供應一次，其他都可以再追加！首先黎左4款小食：麻香雞腳、黑松露蝦多士、炸魚塊和話梅鴛鴦苦瓜，最好味係蝦多士，新鮮炸起，唔會太油膩，其他小食都算幾開胃，不妨一試！ 之後就係剌身，本身係呢類中式食肆食剌食無乜信心，但估唔到有驚喜，剌身好新鮮，解凍解得好，尤其帶子勁厚，好有滿足感，生蠔都好creamy夠滑身！之後食酸菜魚，魚肉好滑漏，無乜骨，似走過油，湯底酸酸地帶點花椒同乾辣椒嘅香麻，唔錯！ 火焰醬爆鑊仔雞，呢個超惹味，醬汁香濃，雞件雖小但好滑，送酒一流！ 之後就到打邊爐，湯底揀左胡椒豬肚湯，店家好細心用湯包入起d椒粒同調味料，唔會整到成個湯都係，入面除左豬肚仲有新鮮豬粉腸同酸菜，湯味濃郁，好味！再黎就係海鮮拼盤，大到嚇親，值得一提係d鮑魚同帶子真係勁大隻，好新鮮，超彈牙！其他火煱配料選擇唔多，但貴精不貴多，樣樣都新鮮好味，一定要試響令，係店家自己炸唔係現成貨，心機野好少地方食得到！ 最後食埋甜品就走，估唔到呢個海鹽雪榚咁好味，咸甜兩者平衡得好好，相輔相成，仲要係香港製造，一定要多多支持！

寫呢篇食評時剛好政府宣布新一輪防疫措施，令The Grill Room成為最後晚餐都不枉過。

之前友人已經食過，見OPENRICE評分唔錯所以BOOK定檯同女朋友去食，仲特意REQUEST坐吧檯，想睇住佢地用火爐燒牛扒！黎呢度梗係要食牛扒啦，但兩個都叫牛又多得濟，咁就整多個扒，不過係魚扒，平衝下！

燒美國安格斯肉眼扒配黑松露薯蓉
一上檯已經飄黎好香嘅炭烤同牛脂味！面層煎封得好好，金啡色，有網紋，齋睇樣都已經好想食！叫左5成熟，我見佢地煎完會REST一陣先SERVE客，所以肉汁依然留住哂係牛扒入面，肉質好鮮嫩，牛味重，佢地只係用左好簡單嘅SALT AND PEPPER去調味，簡單就已經好好味！跟嘅燒汁正常，反而PESTO醬有驚喜，偏咸，有好強勁嘅香草嘅，有少少港式薑蓉嘅感覺，更能帶出肉味同有新鮮感！搭配嘅黑松露薯蓉都無得頂，稠身之餘入口CREAMY，好重嘅牛油同黑松露香氣！食極都唔夠喉！燒吞拿魚扒配香草意大利黃瓜
吞拿魚經過慢煮，有客叫就拎出黎放扒爐煎烤，我好鐘意呢個做法，因為嘅可食到火烤味，同時魚肉入面半生熟，。我叫呢舊做魚扒一D都不為過，超大塊又厚身！外表煎得好香口，配埋吞拿魚嘅油脂，半生熟嘅口感，正！另外伴碟的意大利黃瓜也十分新鮮可口，吸哂魚油，點可能唔好食！

今日想同女友去下觀塘海濱個邊行下碼頭hea下，事前搵左呢間Flames食個tea。餐廳位於海濱匯一樓，係牛頭角站行過去都係6-8分鐘，都算方便！呢間餐廳防疫意識好好，會係門口set個細station放左酒精搓手液同體溫計！ 侍應安排我地坐近草地，當日天氣雖然有d熱，但餐廳冷氣好夠，一路望住靚景，背脊一路有冷氣吹送，好舒適！女友叫嘅凍Cappucino，飲左少少先記得影，奶泡打得好好，又香又甜，冷都好夠，唔會唔夠凍變左奶水！ 燒肉眼牛扒配大蝦薯條 叫左5成熟，廚師都做到我要求。一上檯就聞到好勁嘅牛油味。肉味好重，多汁、嫩滑！大蝦都有兩隻，好細心，幫你開埋邊，只要用刀叉就食到唔洗用手，大蝦烤到好香口，外表睇落有少少乾，都算爽甜！薯條正常野，一定好食過麥記！
香辣炸雞
呢個炸雞有驚喜，佢上個層炸粉好薄，有d似台式鹽穌雞嘅感覺！入口好香脆，而入面嘅雞肉仲係嫩滑多汁！點埋個汁仲惹味，應該係士拉叉醬，辣度好微！整體呢餐幾滿意，價錢都唔貴，質素都好好，食完又可以去碼頭行下吹下風！好捨意！