旺角逛完街找食肆都排滿人，避開排隊人潮唯有行去廣華醫院附近搵食，今天試了這間小店，很好吃談不上，不過就有小店的味道。 獅子頭，上海必試名菜，肉嫩入口即溶，味道啱啱好，下面有小棠菜，跟一碗菜飯，一個女仔份量啱啱好。大食d就應該要配小吃。 紅油抄手，微辣加小許蒜味及蔥花鋪面，味道不過不失。 酸辣湯，中規中矩，一盅只夠一人前。 炸排骨，肉炸得唔錯，味道亦可以，普通大塊，見圖可切開5件。 小籠包，皮極厚，咬落好似食緊豬肉包，雖然入面依然有肉汁，但皮太厚，和小籠包是兩碼子的事。 生煎鍋貼，底部煎得不夠脆，咬落去有先蒸後煎一下感覺，這個比較失望。 晚上9時入座都有大半滿坐，應該搵位不難。

行完銅鑼灣、其實知道有間食龍蝦好耐，但未試過，入去侍應先問你有冇book位，場內有兩張得枱，我哋坐咗係廁所門口。叫咗一個黑松露忌廉磨菇意粉、另一個牛扒龍蝦組合。 意粉味道合格，但份量太少，一個人吃一定不飽。價錢都要＄138。 龍蝦牛扒組合，龍蝦去咗殼之後個尺寸比一隻蝦仲要細，而且比較鹹，我覺得唔值呢個價錢，牛扒要medium rare，係ok taste。 重點係服務，食到一半個侍應跌咗碟芥辣落地，果盤芥辣向前飛、我頭髮及衣服都沾滿芥辣，坐我鄰座的男生更慘，白色恤衫及冷外衣一身都係，意外嘅嘢，有時真係冇辦法，但個侍應見到完全無動於衷，一句道歉及遞紙巾都冇做到，當冇事發生，果下真係火都黎，同個侍應講，你哋倒瀉野，都比張紙巾個客抹下，可以完全冇反應。個侍應隨即叫倒瀉野嗰個行埋黎，於是又同一番說話同佢講一次，佢話我都一身芥辣，我同佢講你倒瀉野見過客一身都係乜都唔理有冇搞錯。事件發展到呢度，都唔想再同佢講啲乜，話埋單比嗰啲九折, sorry, 無囉。 論價錢、座位舒適度、食物質素、垃圾侍應服務、不值得去。未倒瀉芥辣之前，已經有另一個侍應打爛玻璃杯，另外倒瀉芥辣一地都係，亦都完全無人清理，任由啲客踩。

旺角買完野去搵食，路過門口見到張爆丼相片，被吸引入咗門口，一坐底個位極窄同迫，張枱細到無朋友，望下個餐牌相片好爆，d刺身一碗都係，再望望個價錢就有啲標冷汗😁，不過入到坐低唯有硬着頭皮試吓佢個三色海膽飯及火焰盛丼。 海膽份量都算合理、三色海膽意思有三種唔同國家入口海膽，喂我食唔出有咩分別，都係海膽味囉，夠新鮮，牆身鬼咁大隻字寫住他們只用日本蛋，海膽加蛋撈埋飯食，正，我全程乜都冇落。 火焰盛丼，有帶子、三文魚、蟹柳、左口魚、全部都用火燒過表面，所以刺身入口即溶，都ok。 我就覺得好味，但埋單嗰位就非常不同意，因為座位舒適度、服務、都好有迫大飯堂感覺，而且食完你一定冇興趣再繼續坐，因為實在太迫，佢話四百幾蚊買盤刺身返去慢慢嘆好過。

黑布街甜品我次次都會揀轉角位pancake , 今次特登帶朋友試吓米之蓮，食完都係試過就算，下次應該唔會再揀。米之蓮推介拿破崙，本來諗住試吓栗子拿破崙，不過冇栗子所以揀咗芒果拿破崙，我嘅評語係OK啦，因為我心目中好食嘅拿破崙只有在黃埔花園的海逸酒店，仲要係特登去訂嗰隻，因為即製。呢間明顯啲芒果浸過糖水，酥皮、吉士不過不失，同其他甜品店出品差不多。 伯爵茶奶凍，食落去以為港式奶茶奶凍，沒有伯爵茶的香味，改名為港式奶茶奶凍貼切得多。 菠蘿金寶配菠蘿扒雪糕，這個有驚喜，燒菠蘿加糖漿點雪糕很好吃，菠蘿金寶即菠蘿批, 都不錯，這個沒有米之蓮推介卻比米之蓮更好吃。 金橘檸檬梳打，正常，夠大柸，夠我解喝。 食完服務人員會不停執枱趕你走，想坐喺度傾下計的，請另作他選。

原味疏乎里班戟，伴碟有脆焦糖面香蕉，雲呢拿雪糕，因為冇所以轉左豆腐雪糕，側邊有個檸檬雪芭及瑪利餅乾碎，淨係睇過碟加食物賣相已經滿分，放入口眼淚直流，疏乎里加入班戟煎餅元素，實完美配合，軟硬適中，甜度啱啱好，這個質量可以媲美酒店甜品。 拿破崙檸檬吉士班戟，拿破崙餅皮放在底面，中間一塊班戟，餡是檸檬吉士，伴碟是檸檬雪芭，食落比較清冇咁甜，稍嫌個拿破崙比較硬，所以我叫這個是拿破崙餅。 鋪頭比較細不過服務滿意，其實佢仲有分店在旺角，旺角我經常幫襯，因為價錢相差很遠，原因旺角店只給外賣盒，出面有兩三個坐街座位。而銅鑼灣店就可以入鋪頭進食。二間都值得推介。佢哋不定時有新產品推出，有陣時跟隨生果，所以你每次去都會有唔同驚喜。

我是麻辣fans, 今次特登走去奧海城三期，我可以吃小辣的人，叫了三個全部同辣有關的食物。第一個酸辣土豆絲，夠酸但唔夠辣（因為得一隻辣椒）土豆絲切得太粗及太油，我去過詠黎園吃過同一菜式，幼絲不油膩，有比較下這個土豆比較一般。 山城辣椒雞，材料除咗辣椒、雞、重有腰果，兩樣都炸得好乾身，雞味夠辣又唔多油，辣椒入口唔算太辣，唔錯。 經典香辣鍋（1隻辣椒）可以向餐牌自選五款材料，我揀咗燉牛肉、五花腩、腐竹、去骨鴨掌及薯粉，這個有啲失望，唔係隻隻食物都可以入味，鴨掌雖然已經起骨但係好多筋咬唔開，特登叫個薯粉諗住將啲麻辣味索入個粉到，但入唔到味。一隻辣椒菜式太BB辣，啱BB級人仕，下次我要揀2至3隻。

自己懶得煲想飲啖湯，去咗幫襯，九點鐘大把位，一行三人，叫了一大一小湯、兩個煲仔飯、一碟油菜及雞翼。椰子烏雞燉湯（大），好香椰子味好足料，呢個份量可以飲到四個碗仔，不過冇試湯渣。 蟲草花鱷魚湯，呢個大概分到兩碗左右，味道重蟲草花味道，一個人份量已經好夠。 豉汁白鱔飯，白鱔得5件，餸太小，白鱔好入味，全程冇用豉油撈飯，要讚嘅係佢啲飯焦，飯焦依然係白色，火喉掌握得好好。 土魷鹹魚雞柳飯，相同問題太少餸，最後又係食晒啲餸剩返啲飯，好彩叫咗雞翼及芥蘭 。 食完屋企人eeoo, 埋單三百幾蚊、唔抵食、餸又小，去酒樓食好過，老人家都是酒樓控，我個人應為啲湯好OK，係價錢貴咗啲。

Happy Friday 搵位好難, 唯有去啲唔使等位嘅地方，因為唔想諗食乜嘢，所以叫咗個二人套餐，第一次幫襯，其實冇咩期望，因為只有幾枱客就知道。冬陰公湯，味道可以，有蝦、番茄及勁多秀珍菇。 春卷及蝦餅，春卷皮唔夠脆囗、蝦餅好味，夠蝦味及彈牙。 泰式鳳爪，數量不多，味道可以。 咖喱牛腩，未食前夾起牛腩覺得硬，食落都OK，我本身好鍾意食椰汁，呢個落咗好多椰汁，撈飯吃一流。忘記影個油飯，油飯唔係好油，有點味道，鍾意食濃味應該唔啱。 主角去骨海南雞，雞好滑，唔食雞皮嘅我、都忍唔住食咗一件，入味好香。 加＄10要了一杯青檸梳打少甜、加$28叫了一個椰青。冇期望下都不錯。 姐姐服務很熱誠，係本身環境比較污糟啲、地下好多食物殘渣。

星期六下晝三點半，去到已經冇人，沒有午餐所以散叫，兩個人只可以叫兩三款菜式，先來個小碟齋滷味，正常味道，不過不失。 鐵板燒鰻魚，食開齋鰻魚知道一定用紫菜，呢個除了紫菜以外，入面仲包住一舊齋火腿及馬蹄，功夫菜式，用三色椒及雜菇炒，熱辣辣上鐵板，十分野味。 最後一個羅漢齋炒麵，面炸得好脆囗，上面鋪滿餸菜，餸多個面，冬菇都至少有四件以上，好飽肚。 餐廳食物餸菜賣相不錯，味道濃郁，不過食完出門口唔夠10分鐘已經覺得非常口渴。

星期四，8:30去到不用等位，座位舒適，室內有好多大象圖案及設計，環境不錯。服務員遞上一本高級的餐牌，入面內容、顏色及構圖豐富，有酒店的感覺，看到圖片樣樣都想叫，最後二人叫了六個餸。 芒果冰特飲，好多冰、好多水、好多糖、好小芒果汁。 椰青，可以再凍d，夏天飲落去缺少了消暑解渴降溫的效果。 生蝦刺身，每隻生蝦獨立放在小酒杯上，一盤六隻，入面有一片蒜頭、辣椒及涼瓜，用椰菜及紅蘿蔔墊底，賣相令人注目。不過出面泰菜通常都有八隻。 焗蒜蓉包，味道各方面都沒問題，但點解個法包好似縮左水，有啲營養不良感覺。 串燒雞及豬，見到已經覺得燒到過咗龍，食落去乾爭爭，沙爹醬一般。 泰式蝦球炒金邊粉，酸甜咸味道調校得啱啱好，師傅炒得夠鑊氣，賣相味道10分滿分。 炭燒豬頸肉，燒得入味啱啱好，唔似串燒乾晒，當然吃豬頸肉那個醬汁才最重要。 鹹肉椰菜苗，夠鑊氣，入味。 呢間餐廳最大特色，廚師十分注重食物上碟賣相，每碟都細心設計，未吃已經要給手機先吃，整體味道不錯，服務員有禮貌。 後記：食完之後返屋企覺得好口渴，飲左大柸水依然覺得唔夠，最後要開一支可樂。