已經好耐冇出旺角食飯，一約朋友便想起這間印象良好的餐廳LabEat，幸好有早早book定位，否則便難有位。 免費的Welcome drinks絕不馬虎，是有酒精成份的果酒，喝了已經令我輕飄飄。 Order左兩款時令生蠔，兩款都好新鮮，帶有甘甜、海水味。Anceli $69 Gagas $69 蟹肉牛油果沙律＄298 這份沙律造型極精美，實在令人佩服廚師的心思，上面的小葉子全部可以吃得。簡直可以當一份藝術品來品嚐。 12小時慢煮澳洲M5和牛牛小排＄498 簡直就係全晚晚餐嘅靈魂，和牛帶有炭燒味，但肉質鮮嫩香濃無比。廚師把油脂部份分開切出來，鋪在旁邊，但這也是我最愛吃的部份，油甘香味十足！整份牛扒分量十足，三個人吃也感到很滿足。 意大利西西里島蕃茄意粉 ＄178 看似平凡的一道意粉，但做得相當出色，較為粗身的意粉能夠掛汁，相當彈牙。 另外order嘅兩杯Cocktail及Mocktail都非常出色，值得一試 餐廳環境舒適浪漫，而且服務非常優質，侍應會細心講解每道菜的特點。原本想order分子料理甜品盤，但原來是每天有限定數量的。小妹妹因未能吃到而十分失望，幸好經理哥哥主動介紹另一款甜品，仲請失望的小妹妹吃冰淇淋呢！小妹妹喜出望外，仲話下次要早啲定分子料理甜品，一於下次再嚟食過。 經理哥哥介紹嘅朱古力三重奏都非常之出色，同是朱古力，三件甜點無論外型、質感、甜度、配合得剛剛合宜，好有層次感。所以呢間餐廳嘅甜品亦都係非常值得推介。

政府消費券一出，感覺好似有人請食飯咁，當然係要搵啲好嘢慰勞下自己及另一半。一嚟beer下先！ 好想食日式燒肉，呢間燒肉臻之前同客人食過，今次帶埋另一半嚟嘆番餐，最好嘅係有人係你面前燒埋，完全唔使動手，足以享受一餐美食。 餐前嘅小食好多選擇，我哋食咗燒鱈魚干、薯仔沙律、甲羅燒。當然係要飲啤酒配燒肉。 燒魷魚🦑、燒白鱔，正！兩樣都好新鮮，燒得一啲都唔乾身。 再點左一份牛肉拼盤，燒得剛剛好，油脂分布適中，食落口好軟身，有入口即溶嘅感覺。一食就知係高質嘅靚和牛。 再點左燒雞心、雞頸肉、雞頸肉。肉質爽口美味。 大胃皇嘅我也點了豬肋條、伊比利亞梅頭及豬腩片，油脂滲透出來的香氣，絕對回味無窮。 今次燒肉餐確係非常豐富，另一半吃得很滿意，因為不用她動手，能好好享受一餐豐富的美食，當係慰勞她平日的辛勞。😍

廚師發板十分流行，部份餐廳因名氣大，索價甚高，.部份係名牌過嚟其實。而位於尖沙咀嘅鮨燐係近期食過最價錢合理，貨真價實嘅廚師發板之一。 鮨燐位於中間道商業場內。環境舒適。 我哋選了1480的套餐，已經豐富非常，食材用料十分新鮮。 第一道上枱嘅係冷盤三食，包括香濃美味嘅蝦仁蒸豆乳、茄子和日本螺，螺肉幾甜。 刺身共有七款 北海道珍蠔 上面舖了一層jelly ，提鮮 ！ 鯛魚薄切、 薑蔥拌池魚，以紫菜包着吃、 間日魚刺身、火炙間日魚 春魚 梭子魚 拖羅 燒吞拿魚腩 蒸金目鯛是今晚唯一的熟食，火候剛剛好，蒸得相當出色。 間場以桔味果凍清下舌頭味覺。再次開始食壽司： 北海道帆立貝 活赤背 賴尿蝦 深海大池魚 地金目鯛 所有壽司都用咗擊傷美味新鮮嘅海產。 飲完海帶蜆肉湯、最後再品嚐埋滑滑嘅抹茶奶凍，一餐美味嘅廚師發板便完結了。

邊得嚟細路仔咁鍾意食龍蝦？個仔勁鍾意食龍蝦，無論係中式煮法定西式都咁喜愛，今次專登嚟奧海城The Point Kitchen 試吓呢個聲稱係新鮮嘅波士頓龍蝦套餐，果然冇令人失望，龍蝦鮮甜美味，彈牙多肉，套餐只係5百幾蚊，非常優惠。 二人龍蝦套餐包括沙律、龍蝦湯、新鮮龍蝦海鮮手工意粉、兩杯特飲。我哋加錢叫多一客pizza，份量夠晒三個人食。 呢個沙律真係冇得頂，材料豐富，包括有鮮蝦、牛油果、芒果、蕃茄莎莎，確能令餐前開一開胃。 原隻新鮮波士頓龍蝦海鮮扁意粉非常好味，除咗彈牙嘅龍蝦之外，仲有細細隻嘅藍青口、大蜆同魷魚，樣樣都好鮮味。 只係加$98就可以加倍北海道帶子鮮蝦pizza，認真抵食！ 叫餐之前諗住會加$48叫埋個甜品朱古力布朗尼蛋糕配雪糕，點知飽得滯，真係食唔落。唯有留返下次再試。

荃灣千色有一間新開左冇幾耐嘅拉麵店，一直想試，但次次都要排隊。趁今日平日收工放早，就一家三口去試吓。 其實我從來未食過沾麵，今次係第一次食，叫咗一份魚介豚骨沾麵。嘩！又真係幾好食喎，啲面比較粗身，又彈牙，又有咬口！最緊要個湯係偏濃味，但又唔會太鹹。 阿囝自己嗌左一碗白骨豚湯拉麵，個湯非常正，成碗飲晒董事完全唔會口渴。啲拉麵係幻身嘅，有啲似日本X蘭拉麵嘅質地，呢個價錢食到呢個質素嘅拉麵，絕對係吸引食客返轉頭的賣點。 太太就叫咗一碗海老拉麵，原來面頭鋪滿左櫻花蝦，係完全鋪滿晒，密鋪平面，有冇咁抵食？麵質都係X蘭果隻幼麵。 我哋在家陪左兩份小食，一個係炸雞，令一款係雞軟骨串，兩樣都好好味。呢間食完絕對會再嚟encore。

要喺荃灣區搵一間坐得舒服、食物精緻的西餐廳，第一時間就諗起位於千色店地舖的咖啡灣，天鵝餐廳。餐廳環境佈置確有特色，充滿童話色彩，餐廳中心的摩天輪玩具佈置，相當吸引。 餐廳嘅Menu印製精美，圖文並茂，樣樣都好似好好味咁，今日揀咗軟殼蟹卡邦妮意粉同墨魚汁明太子凡立貝意粉 。 軟殼蟹意粉好大碟，軟殼蟹大大隻，好睇又好食，意粉集中喺碟中央，碟邊淋滿左卡邦妮汁， 墨魚汁意粉就樣衰衰，食到我哋一嘴都係黑蚊蚊，非常搞笑。上面放滿蟹子同矜貴的明太子，確係正！ 店員介紹可以用優惠價$40選取一客微辣煮蜆，認真超值。上碟嘅時候，係用過火爐煮熟佢，大約5分鐘開蓋食得。啲顯好鮮甜，一啲渣都冇，微微香辣，應該人人都食到。 飲品叫了一杯蘋果綠茶氫氣泡，清新可口，夏天最適宜飲用。

第一次食有25道菜嘅廚師發板，真係好誇張，每樣嘢食都好精緻同新鮮，廚師好有心機介紹食物的出產來源地及優點。當你品嚐每一道菜時，能細味每道菜的優點。 食日本菜，當然要配日本清酒。呢支清酒入口香甜清純，十分易入喉，連不同太多愛烈酒的太太也讚。 第一道菜看似平凡，但採用左靜岡縣出產嘅蕃茄 ，入口清舌甘爽口，不是一般蕃茄能媲美。 松葉蟹肉配上水雲，又是一道開胃菜。 爆膏螢光魷魚產自富山灣，現在正是最肥美的季節。 調了味的九州池魚仍然保留魚本身濃郁的鮮味。 間白魚卷海膽，海膽十分鮮甜 期間，廚師配合我們進食的速度，安排一道道刺身及壽司上枱。這種互動有交流的食法，才能真正品嚐到美食的意義。 深海池魚夠鮮甜 燒北海道白貝 ，保留海鮮的原汁原味。 第一次品嚐這種極鮮味的北寄貝刺身 火炙地金目鯛，魚嘅油分十足，甜度十足。 湯葉、海膽的組合相當新鮮，但出奇地夾。 花雕漬牡丹蝦都係第一次食，淡淡的酒香能帶出蝦的鮮味。 難得可品嚐產自北海道香春岩蠔，味甜、口感帶爽 黑陸魚喺日本國內嘅海鮮料理屬於超高級食材，今日能夠品嚐脂肪豐厚的火炙魚片。 黑松露銀雪魚，黑松露配上野生刺身級銀雪魚，香氣四溢。 富山灣白蝦仔壽司，一件壽司上鋪滿10幾隻小小的蝦仔，鮮甜美味。 貴妃蚌 三文魚子塞滿在岩手紫海膽內，廚師影真大手筆，食完已經飽咗大半。 象拔蚌 慢煮鮑魚 。香園但口，帶有濃濃的蟹膏香味。係我最欣賞的一道菜。 火炙吞拿魚腩 鰻魚壽司 醬油漬赤身 最後上枱的甜品有兩款，第一次食日本草莓天婦羅 ，感覺好特別，最後上咗牛奶雪糕，帶有微微薑味，食落幾清新。 呢餐由頭到尾都係精美嘅食材，全場已經冇飽肚野。我哋由頭食到尾，每道菜都極之欣賞，但坐在我們旁邊的一對夫婦，可能太細食，好似是撐住個肚咁食，都戥佢辛苦。如果太細食嘅人，真係唔應該挑戰呢一款咁豐富嘅25道菜廚師發板。

想食牛扒，又唔想自己煮，即刻諗到去荃灣廣場對面街嘅火山燒。餐廳嘅招牌菜係石燒牛扒。 試過2次，叫不同價錢的牛扒，都發覺牛扒質素高，而且用石燒呢種烹調方法仲好能夠鎖住牛扒嘅肉汁，必食之選。 呢度叫主菜，仲可以加錢轉套餐，有齊餐湯或沙律，小食，同特色飲品。 個串燒幾好味喎！唔會燒得太乾。 其實加$29升級超級套餐係必須嘅，因為除咗餐湯同小食之外，所有餐牌內嘅特飲同貴價飲品都包埋。我哋叫咗一個彩虹棉花糖焦糖朱古力、茉莉花茶海鹽奶蓋，呢兩杯野如果係.出面正台式店正價買都要幾十蚊一杯。而家跟餐認真抵飲。其他主食叫咗塩趜肥牛芝士丼、巨蟹柳溫泉蛋明太子忌廉意粉都相當唔錯。三個人晚餐成為$387，大滿足！

今日去咗荃灣廣場PizzaExpress試新菜，最近餐廳新推出西西里島風情食品，試咗佢幾個新菜式，非常之正。 餐前小吃我哋叫咗焗香草沙甸魚，呢個小食令我哋非常驚喜，沙甸魚配上濃味嘅香草車厘茄醬汁，食囉帶有少少鹹香，原來用咗銀魚醬、洋蔥、酸更煮成，配搭個香草麵包嚟食認真一流。 香草焗蘑菇非常Juicy，阿囝大讚最好味！ 主菜叫了西西里肉腸菠菜薄餅，最正係Pizza相鋪咗好多香草飛達芝士同菠菜茸，非常香濃，同西西里肉腸好配搭。 另一道主菜我哋order左茄子蕃茄寬條麵，呢個意粉完全冇用肉類，但係食落非常鮮味，佢嘅意式蕃茄醬配以茄子、酸豆、橄欖同羅勒葉，非常清新開胃。

Yummy Yummy！呢間餐廳嘅龍蝦套餐非常之抵食，見到餐牌好吸引，便入去試一試。 果然係正，一入去見到open kitchen內有個大火爐，係用嚟焗Pizza嘅，咁樣焗出嚟嘅Pizza最正。一去到叫杯生啤嘆吓先。 龍蝦套餐非常之豐富，有龍蝦湯、龍蝦沙律、龍蝦pizza、龍蝦意粉，仲有飲品。個龍蝦湯好香濃，雖然唔係好多龍蝦肉，但都好好飲。個龍蝦紅菜頭沙律幾特別，外型美觀吸引。龍蝦Pizza係會噴火嘅，果然夠晒氣氛。芝士焗龍蝦通粉十分美味，芝士香濃，蝦肉彈牙爽口！