天時暑熱, 就決定Lunch time 行去黃埔試下隻熱狗.... 點知行到去已經成身大汗, 仲要成間舖坐滿晒人 (雖然間舖細細地, 但係已經有8,9 個人等緊野食) 係個一刻, 真係有啲想去第二間, 但係充滿熱誠嘅店長, 已經跨越咗店舖中嘅人. 再慢慢同我地介紹佢地嘅熱狗 佢嘅工作態度真係極之好
Hot dog 有四款選擇: 維也納腸, 匈牙利辣肉, 同嘛店長所介紹嘅芝士脆皮 & 白肉腸.
我地仲加咗炒洋蔥tim. 好可惜係無地方坐低食, 帶到返公司嘅時候, 啲醬汁已經令個麵包淋咗
希望下次叫外賣嘅時候, 將啲醬汁同隻熱狗分開會更好 另外, 跟個餐嘅薯餅幾好食, 杯荔枝綠茶就ok啦!

*小小意見: BBQ Grill 燒出黎嘅腸同洋蔥會更香口

原本訂咗八盛食日式燒肉, 但友人堅決要帶我地去醉燒亭, 所以決定一試. 我食開爐端燒, 次次都食唔飽同嘛埋單嘅時候就好肉痛.... 但今次真係喜出望外!!!! 一行6人, 個個都飲飽食醉, 每人都只不過係 $333

2支750ml嘅獺祭清酒: 好好飲
鵝肝5客($90each):啲鵝肝係燒到入口即溶,配嘛個燒明太子飯團(又香又脆)....
*其實2-3個人share一客已經足夠, 因為一客都有手掌心咁大份 抵食!
鵝肝雞翼: 朋友食嘅, 我只係見到佢好enjoy隻雞翼
燒雞翼: 一串兩隻, 幾抵食
燒牛舌: (厚切)有肉汁
燒牛肋骨肉: 較乾
安格斯牛扒: 有肉汁,好好食
燒雞泡魚干: 好鹹
燒吞拿魚血: 應該係魚嘅背部帶赤紅色的肉, 肉質比較滑
燒鰻魚: 好食, 唔會燒到乾它晒
燒豬頸肉: 較乾身
燒雞皮: 好脆, 但唔夠香口
燒吞拿魚鮫: 有兩件, 夠滑

香港嘅爐端燒之中, 我覺得呢度選擇比較多, 價錢又相宜. 所以我決定會同其他朋友再去

朋友生日, 想特別啲, 所以安排咗Brunch Buffet 同佢慶祝 本來大家都覺得$398 食餐晏都有啲貴, 但以brunch buffet 黎講, 係可以接受! 食物方面, 樣樣都幾好幾好, 唔錯唔錯…. 由海鮮冷盤到甜品, 我都好滿意 雖然有好多人, 但攞野食又唔使排隊喎 (最怕啲要好似同人搶飯食嘅buffet) 一邊慢慢食, 一邊欣賞山頂嘅風景, 唔錯唔錯!! 服務態度都幾好, 見你飲晒杯飲品, 就問需唔需要多杯 (Free soft drink) 最好嘅係我地幾個都飽到夜晚11先有少少餓嘅感覺, 差唔多一餐頂三餐. 超抵!!!
海鮮冷盤:
基本會有嘅Salad / Sushi: 一般啦~
生蠔: 唔錯, 有海水味, 仲要新鮮過好多其他嘅buffet ie. Kitchen@W hotel
青口: 好大隻, 但係就無咩味
龍蝦仔: 鹹咗啲
蝦: 好爽
蜆: 細細隻, 無肉食
生牛肉: 本身味唔夠, 但係加咗泰色酸辣汁之後就好食好多
哈密瓜Parma Ham: Ham就幾好, 哈密瓜就唔夠新鮮
芝士蕃茄: 完全無味

熱盤::
有二十多款, 不能盡數….
燒羊脾: 夠嫩, 只係唔夠熱
Prime rib: 肉身帶粉紅色又夠嫩.配蘑菇汁好好食
焗芝士雞肉薄餅: 好多芝士, 好香, 好好食, 又夠熱
珊瑚蚌炒西芹: 好食, 但係西芹有渣
印度咖喱&蒜味薄餅: 好香, 好好味

甜品
Movenpick 雪糕 不過waffle cone 淋咗
各式各樣嘅cheesecake/ mousse cake
即叫即做嘅Crepe

*Extra choice: (每人只可以點一款)
冬陰公湯: 個賣相十分好, 但係飲落又太鹹又太酸
Eggs benedict: 賣相十分好, 做出溏心又美味的蛋黃 一流
Eggs florentine:極力推介

另外, July &Aug嘅promotion係Every Wednesday嘅Buy 1 Get 1 Free 嘅牛排 & $10/oyster

啱啱先知紅磡係有珍珠奶茶飲, 所以Lunch time 就去買杯飲下....
一去到, 個門面就唔係太吸引...... 所以只係叫咗位珍珠奶茶試下先...
第一啖飲落去.... 真係有啲失望.... 茶有苦澀味, 奶茶唔夠滑, 仲有涼茶味
另外, 個膠杯太軟啦. 好怕一手就整爛個杯 c( ||| - _ -)

相比其他珍珠奶茶嘅地方 ie. 茶研70c, 真係差咗啲啦... 可能係我錯, 因為雞排先係賣點.......

點都好,佢嘅價錢算唔錯(同區要大約$30/lunch), 所以我會比多次機會佢.
下次會試下佢嘅炸雞排+荔枝綠茶 $22

12個人去參加"發達x" 嘅$168 墨魚團 + 海鮮餐, 未去之前見到 openrice 有 10 VS 25 .... 真係, 極之擔心........(因為比晒錢先知係度食, 無計)

一去到, 佢地就開始慢慢上菜, 所以每樣都可以熱喇喇食就已經比預期嘅好
之不過, 我地問啤酒幾錢支嘅時候... 經理話全部$30支, 但到我地搵呀姐攞住2支先嘅時候, 呀姐就話$26支.... 唔通啤酒都係海鮮價????

清蒸海上鮮 - 豉油味怪怪咁
白灼游水蝦 - 隻隻夠新鮮
清蒸鮮鮑魚 - 中等size
鮮魷魚時疏 - 鹹咗啲
仿古鹽焗雞 - 鹹咗啲, 又無雞味
秘製排骨 - 普通蒸排骨
魚香茄子肉鬆 - 好鬼油
郊外油菜 - 太油, 名副其實嘅油菜

$168 嘅價錢, 可以釣墨魚, 又有海鮮食. 算唔錯啦~ 不過話為食海鮮而去的話, 西貢仲有其他好選擇