因為返嚟香港嘅時間只有72小時，所以爭取可以食到自己最想食到嘅嘢，想去尖沙咀搵海膽飯食，唔打唔撞用咗OpenRice搵到呢一間，睇完啲相同食評之後就訂咗兩位，6:00去到食90分鐘，其實我哋都用唔晒90分鐘。 最緊要一定要叫海膽飯，佢嘅價錢 $298 但我覺得佢個海膽好豐盛，最低限度真係好滿足，當然仲非常之新鮮。 其餘叫咗我哋自己鍾意嘅壽司，再加埋一杯梅酒（仲食埋梅酒入面粒梅），兩個人買單都唔使$1,000, 我真係覺得唔錯。 Bookmark 了，下次返香港再食！

已經係第二次嚟呢度食（第一次唔記得影相），上次食嘅時候係下午茶，唔係好多人，所以我哋有2:00坐到6:00pm，相比今日係食晚飯，佢要求我哋90分鐘要完成，同時同一層嘅另外兩間餐廳都已經開咗，好多人嚟食飯，因為兩個女仔嘅關係，所以只係叫咗一碟麵加兩個頭盤，感覺啱啱好。 兩個人食咗三樣嘢，再加兩杯野飲，埋單大約$500。食兩次佢哋嘅服務態度都好好，可以再進步多啲，希望秋天嘅時候可以試吓佢哋嘅室外感覺（因為而家實在太熱）。我會再嚟食！ 佢啲特飲「豬咪咪」= Baileys + Chocolate，如果唔想有太多酒精嘅感覺，呢杯 cocktails 都唔錯㗎！ 睇之前嘅介紹佢哋好似室外嘅座位可以有電影睇？好期待！ p.s. 咁大嘅餐廳其實得兩格廁所仲要同其他餐廳共用，有點兒那個？！

今日約咗朋友喺銅鑼灣食午餐，之前佢send咗10間餐廳俾我揀，因為就嚟要離開香港所以我想食中菜，揀呢一家嘅原因其實見到個名好得意（當時仲未知係 Mott 姊妹店），所以就揀咗呢度啦！朋友識得喺度做嘅朋友，就推介左以下幾款俾我哋，好細心每一樣淨係出兩件俾我哋，等我我哋可以試多幾款，好出色，好味道！ 花雕魚籽滷水燻蛋、軟殼脆蟹腸粉、韭菜蝦餃、黑鏄豆腐、蘿蔔絲酥、黑松露燒賣、小籠包、川芎白芷燉魚皇湯、椰汁西米露。全部都好正！多謝推介！

我唔係第一次食，不過第一次食尖沙咀呢一間，但就算啲嘢整得再幾靚、有幾好食，但服務態度差就已經乜都輸晒，首先你要人食90分鐘冇問題，但唔使食唔夠一個鐘頭就先叫人埋單，雖然你係有問到仲有冇野要額外叫，去到八點半真係有人排隊咩？又唔多覺囉，但就趕住要你走咁。 遇上呢啲日子尖沙咀簡直淪陷，亦都明白餐廳要係呢啲時間搵錢，問題係你地都收得唔平，俾啲服務出嚟啦！ 我哋張枱有幾位小朋友，有時都唔明點解佢哋要喺小朋友面前上菜，同佢哋講嘢個個都好似發緊夢咁，食餐飯真係好勞氣。

因為之前食得太多日本野，今年想食西餐，朋友就推介咗嚟呢度，一行十二個女仔就第一次嚟呢度食，環境氣氛都唔錯，啲員工嘅服務態度好好，侍應或者係坐喺餐廳入面嘅客人，有一半以上都係外籍人士，有推介左好多嘢比我地食。 尤其是係 Risotto and Spaghetti, 出乎意料咁比我想像中覺得更好食，因為今次啲嘢食唔係我呢位壽星女發板，所以啲名真係唔記得，不過我就負責影相，如果真係想試吓，我諗可以比張相佢哋睇，佢哋應該會解答到，我一定會再嚟食！

不嬲都好少特登去呢一區食飯，但因為屋企有長輩生日，方便家人所以去咗荃灣食飯。 不嬲美心皇宮比我嘅印象都係以快打快，食完就走，未必講求太多嘅服務，但今次好特別，可能係荃灣，比較舊區同埋多老人家，呢度更有人情味，服務亦都比我想像中好，啲嘢食亦都有水準，尤其是個炒飯，真係炒得好好味，俾我都會再嚟。 唔係好記得張菜單，因為全部都係姑姐發板，而佢比較鍾意清淡，同埋叫嘅每一樣餸都好啱佢嘅口味，大家都話如果要再嚟荃灣都會食佢。

周圍都係coffee shop，已近近地就有間我覺得性價比非常高嘅coffee shop，仲要食咗無限咁多次，今日我用左 HK$54 就有煎蛋辣牛肉熱狗仲要連買杯手沖咖啡... 真係覺得好抵食！

見到雜誌介紹 MO Landmark 做緊 Laduree 下午茶 $288+10% 仲送價值 $390 Laduree 鎖匙扣，即時打電話去訂位，但對方話要 1 月 7 號後先有位，咁跨張？我只好用人事關係訂位，先可以訂到位。

去過好多酒店 high tea, 我都覺得甜點偏多，一位女士根本冇可能食得晒，但今次好唔同，鹹點有五樣之多，每一件都好精緻，令到人見到嘅時候都想食晒佢，亦唔感覺太甜、太肥。
如果有時間，我強烈推介可以一試，會覺得好值得！😊

朋友已經介紹好耐，一直都未抽到時間去食，星期六興之所致，十五人一齊開大餐，全部夾埋共食咗 18 道菜，真係充滿罪惡，兼飽到上心口呀！不過真係好好味，最出色一定係個奄仔蟹，隻隻都爆哂膏，強烈推介呀！

下午先決定晚上一聚，決定食咩時，諗下未去過 The One，不如係入面選擇一間試下啦！經多人投票後就決定食台灣嘢啦！

有咩好食？睇相啦！

p.s. 坐位有限，最多八個人一齊坐，再多啲人就好迫架啦...