除眾所周知有小曼谷之稱的九龍城外, 其實還有很多寂寂無名的地道泰國餐館落在小屋村內. 它們, 雖然沒有被廣大報章或傳媒報道, 沒有在OPENRICE的十大排行榜上, 但卻盡得當地居民, 俗稱"街坊", 喜愛, 是屋村內的熱門搜尋餐廳.

金曼谷泰國餐廳是由泰國人主理, 這裡的泰國人又是能操一口流利的廣東話, 帶一點泰國口音.
這裡晚上很多時也是坐無虛席, 尤其特別日子, 等位是一個大問題, 一小時是最基本吧, 最好日前先電話預約, 確保先不用輪飛仔, 但還要接受的是, 有時候即使預約了, 也得要在門外等一會兒呢.

串燒 (雞/牛/豬, 任選2款)

串燒

0

串燒

好多時候, 如果肉類被過份燒烤, 那種燒烤的味道會蓋過本身肉類的味道,  今次選了雞和豬, 基本上這兩款肉類本來的味道不似牛的味道那樣突出, 所以如果燒烤過火的話, 好容易兩款會變成同一味道, 幸而燒烤味沒有蓋過肉味, 肉質亦不會韌, 還是可以容易分辦開雞和豬. 
食串燒還是有一個問題, 就是燒好的肉通常會跟竹籤黏得很實, 開頭一口沒有問題, 但到中尾部, 要保持良好的食相儀態, 想用叉協助將肉在尾部推出, 實不容易, 力度要適中, 最怕尷尬的情況就是用力過度, 將肉飛出街, 尷尬了, 食物也浪費了. 另一做法就是用牙齒將中間肉的部份向前推出, 食相便開始惹人討厭了, 但能確保不會浪費食物, 有時候, 是要取捨的. 當然, 與家人共餐就輕鬆得多了, 怎樣食也沒關係!      

豬頸肉豬頸肉好味之處就是要有爽,彈口的感覺, 有燒過的味道. 另外, 醬汁也是非常重要, 這裡的,也是我喜歡的,醬汁是水狀的酸辣汁, 不是那種杰杰的甜酸醬, 水狀的好處是能滲入肉裡或只是微微的沾在肉面, 食起出來,不像杰醬食落好像食醬一般, 味道更加與肉結合, 有時如果豬頸肉比較乾身, 汁在這種情況更可以發揮保濕效果的功能.

腰果炒蝦球蝦球的份量可以吧, 蝦肉都有爽口的感覺, 味道一般, 沒有很出位的味道. 其實我認為腰果才是主角, 叫這味餸也是因為我喜愛腰果, 非常香口, 不腍, 腰果的數量夠多, 這是沒有令我失望的. 腰果跟蝦球的味道沒有直接的結合或配合, 根本是兩種的味道, 蝦球不會帶出腰果的味道, 腰果也沒有帶出蝦球的鮮味, 雖然兩者沒有雙連的關係, 但個別來說, 蝦球和腰果也是我喜歡的, 這樣二合一的配搭, 一餸可以滿足兩個味道渴望 

原個菠蘿炒飯重點來了!! 我最喜歡的食物來了!!! 每一次到任何一間泰國餐館的必點食物. 卻不是每間都有原個上, 用碟上的話, 感覺就好像普通碟頭炒飯, 沒有特色, 與原個上的菠蘿炒飯差天共地, 這是泰國菜的特色吧! 這個原個菠蘿盛著滿滿的炒飯, 飯面上舖了肉鬆, 腰果, 少許雜豆, 當然不少得菠蘿. 這個黃色的炒飯濕濕的, 帶有少許菠蘿味道, 好清新. 當食到底的時候, 我會將菠蘿起底, 括出剩餘的菠蘿肉享用, 不浪費吧!     

我心目中的地不地道, 純屬個人感覺. 我沒有比較過泰國跟香港的食物味道是否一樣或接近, 本人也只是多年前去過泰國一次而已, 要真正比較上來, 還是請專家泰國通胡先生了....

我只能說, 在這裡有泰國人主理, 有帶泰國口音的待應招待, 有泰國特色裝潢, 吃的是泰國菜式, 不管它的味道是否跟泰國完全一樣, 畢竟食的是總體感覺, 坐在這裡, 加上了一份"街坊"感覺, 這裡就是我最愛的"街坊"地道泰國餐館.  

難得的一次, 坐在Haggen-Dazs提供的坐位享受甜品, 浪漫不浪漫, 見仁見智. 只可以說的是, 當你身心疲勞的時間, 有一坐位, 有一杯雪糕作甜品, 無論如何, 也是多麼美好的一件事情. 這個藍莓拼一款自選雪糕產品, 底層配以窩夫及朱古力脆波波, 中層舖上一層淡忌廉, 面層加以主打藍莓雪糕球, 另配一個自選綠茶雪糕球, 再加數粒新鮮藍莓, 再再加上一層淡忌廉, 再再再加上藍莓醬, 再再再再加上半塊能量BAR, 層次非常多, 賣相非常好.

綠茶一向是我首選, 最喜歡的味道, 綠茶味夠濃, 不太甜, 食極都唔會厭! 藍莓亦都非常好味, 醬亦不會太甜.  雪糕加埋底層的窩夫及朱古力脆波波, 一口吃下去有咬口, 配搭非常好, 正!

所謂"各花入各眼", 此句亦適用於奶茶, 我認為, 去評一杯奶茶, 以客觀角度, 只是在於茶色, 茶香, 茶味(濃度), 至於去評論一杯奶茶好唔好飲, 只可以用主觀既感覺去評價, 因為 "各茶入各口", 只要係我覺得正, 冇論佢茶色茶香茶味都不及其他, 它仍然係"My Cup Of Tea"

以下係我個人評價:
因為凍奶茶, 沒有太強烈的茶香味, 茶色OK, 花奶比例適中, 少甜後的甜度岩, 飲完唔會有餘甜起口腔.
我明白唔會每一次都可以調較岩自己口味既奶茶, 但至少偏差不會太大!

沒有天下最好的奶茶, 只有最岩自己口味的奶茶!

去撐枱腳前做足準備, BOOK好位, 睇咗地圖, 唔使搵, 唔使等, VERY GOOD!

原先以為係要搭架殘殘舊舊既貨LIFT, 點知原來有條樓梯直接行上去. 由地下行上位於一樓既FACTORY 99, 整條樓梯都有佈置, 好有FACTORY特色, 而且夠晒寛!FACTORY果然係FACTORY, 真係夠晒大, 樓底好高, 枱數都唔算少, 但啲枱都好鬼大張既, 枱同枱之間既距離好大, 唔會有種壓迫既感覺.

我地被ASSIGN坐咗一張高枱, 雖然OPEN, 但我FEEL到有PRIVATE 既感覺, 有音樂播放, 但唔會影響到傾計, 又唔會聽到隔離枱既對話, 唔包括大大聲果啲

食品都幾多元化, 有SET DINNER, 亦可散叫! 我地叫咗
SET A: 蟹肉黑松露意大利飯 $169
SET D: 加拿大BB醬燒豬肋骨 $199
以上均配有法式焗田螺薯蓉, 黑松露磨菇忌廉湯, 焦糖燉蛋, 飲品自家製香草麵包這是二人分量, 如一人分量, 會是一個圓型的小包! 味道不過不失, 不會太乾, 軟林林的.

法式焗田螺薯蓉賣相麻麻, 有點乾, 微溫, 螺肉沒太大味道, 薯蓉尚算可以

黑松露磨菇忌廉湯

0

因為我個人不太接受黑松露的味道, 所以不作評論, 但可以講, 是非常強烈既味道. 相信喜歡黑松露的人就是喜歡這種味道了!

(主菜)加拿大BB醬燒豬肋骨

0

賣相好好, 有蜜糖豆加上我最愛的薯條 . 份量都幾大, 一個女人仔好難食得晒, 肉質唔算鞋, 不過肉味不夠, 醬汁亦唔夠多唔夠濃, 所以我個人覺得一般!

焦糖燉蛋

0

其實由上面食到喱一刻, 已經好飽, 仲有甜品加飲品, 感覺好抵食呢~ 講番個焦糖燉蛋, 好好食, 唔太甜, 比起我之前食過既所謂焦糖燉蛋, 那一個真是垃圾....而家先真係品嚐到正宗的焦糖燉蛋!! 正!

凍檸茶
又係好大杯, 如果一開始黎會好啲, 最後先黎飲就係飲唔得晒呢~~

喱度好適合三五知己, 一家大細來傾下計, 聚一聚, 喱度唔會有人催促, 唔會在你左右坐坐企企, 佢地只會你需要既時候先會過來為你服務, 佢地仲會自動過來加水, 喱個好重要囉! 讚! 喱度有BB櫈, 帶埋小朋友來都冇問題!

VERY GOOD!

喱間CAFE都相當唔起眼, 地點又隱蔽, 真係唔係朋友介紹, 都唔知有喱間野.

招牌都唔易睇到, 入內環境幾靚, 幾特別, 好多佈置. 其實都全場坐滿, 我地坐咗個近門口對牆邊坐.

餐廳主打唔係主菜, 係甜品, 所以晚餐選擇唔多.

我點咗個吉列豬扒定食 - 沙津, 配菜(唔記得係乜, 因為唔岩我口味).
沙律幾好味, 吉列豬扒都炸得唔錯, 分量適中, 夠我一個女人仔食.  熱鮮奶抺茶欠缺抺茶味, 味道比較淡. 抺茶份量如果多少少, 就好了!個人認為喱度最特別既地方係個廚房, 開放式得黎係好屋企feel, 廚房面積我估大約佔成間店既5分2位置, 所有野都係由喱一個廚房準備, 入面有起碼3-4個廚師, 因為廚房大所以並不感到擠迫, 透明度極高,
企起身已經好清楚望到廚師起度做緊乜, 又唔會好大油煙, 我好like 個廚房!!

餐廳仲有獨位洗手間! 讚! 有自己洗手間仲要乾淨既餐廳真係值得一讚, 因為我覺得對餐廳黎講, 洗手間係可有可冇, 不過對食客黎講, 我覺得係必需既, 因為以喱一類以cafe經營模式, 係為客人有一個悠閒既感覺, 所以客人逗留餐廳既時間都唔會短, 無論人有3急或者只係想洗下手, 都會需要用一用洗手間. 我覺得無論係店主為客人或員工而設置一個乾淨既洗手間都好, 喱一種貼心既態度, 值得一讚! 我絕對會因為個厠所已對喱間餐廳給一個更高評價.

對翠華既形象係, 位於港島, 名人茶餐廳, 同埋貴! 就只有好久以前去過既一次, 今日翠華竟然喺沙田開分店, 既然就腳, 無理由唔再試一次.

剛開張時非常之誇張, 假期早午晚都排晒長龍, 梗係唔排啦! 趁今日放假又早起, 落去食早餐就最適合不過, 之不過原來閒時都咁多人食, 成日都覺得乜啲人番工番咁晏既咩? 乜啲人唔使番工既咩? 點都要等...好就好在唔使等好耐囉!

早餐款式選擇唔多, 唔似茶餐廳咁可以轉來轉去, 唔只味道唔轉得, 連面都唔可以轉做米粉或通粉, 另款式顯得更少!
唯一轉得既就係個蛋同個包! 豬仔包定牛油餐包, 炒蛋定煎蛋?!
我就揀咗個早餐: 炒蛋, 豬仔包, 沙嗲牛肉面, 熱奶茶, 算係叫最接近我平時食嫁喇...現在的炒蛋基乎可以話係同一個style, 說真的,沒有什麼特別.
豬仔包味道更加無特別啦. 係細啲囉! 初初以為豬仔包係硬的,個外皮係脆的, 點知原來係軟的, 唔似得法式面包咁外皮一咬落去會跌碎. 沙嗲牛肉面, 個味都幾濃, 份量都幾多, 我一個人食唔晒, 而且早餐食面真係有啲唔習慣呢~熱奶茶有茶味, 夠滑! 個杯仲好精緻.
,
翠華早餐話貴又唔係十分貴,係款式少同唔夠彈性囉. 環境幾好, 枱與枱之間有好大空間, 唔會覺得迫. 喱個價錢, 咁我又情願食翠華多過隔離嗰間喎, 隔離嗰間等乜都好鬼耐!

早餐去到11:30am, 岩晒啲趕唔切11am 食早餐既人!

又到閒時食啲平時要排隊/等既餐廳喇. 今日係Pokka!

是日晚餐有2款:
1. 羊架
2, 豬配龍脷柳

2款都唔岩口味呢, 餐牌仲有好多選擇, 日式又有, 西式又有, 起云云咁多款入面, 最後揀咗個咖哩牛肉飯咖哩牛肉飯, 個咖哩都幾濃, 少咗啲甜味, 所以偏鹹, 飯唔夠軟, 有啲硬. 牛肉雖然唔係全熟, 見紅, 但都係靭.咬到有啲牙仔軟.

至於對面個羊架, 話凍個喎, 燒得唔夠熱, 所以唔好食! 啲珍珠米又硬既! 甜品唔知係乜東東, 好重奶味, 奶凍掛!

對面唯一竟然覺得好既係杯熱檸茶, 話岩口味喎!

晚餐都唔係好抵, 只係比正常餐牌上多咗杯飲品同甜品, 甜品又唔係特別吸引. 散叫仲好, 多d 款式選擇.
味道方面, 唔會有顯著既突出, 其他地方食到既味道都係咁上下. 但唔知點解會比人地貴!

Pokka好就好在會不斷為你加水, 對於我喱個對水非常渴求既人, 喱個服務我非常滿意, 唔使我不停叫加水!

由以前早餐二十蚊有找, 到而家接近午餐價錢, 可想而知早餐起香港人心目中已佔一個好重要既地位, 唔知係大家已經改變咗唔食早餐既概念, 定還是現時既早餐越黎越吸引, 越黎越會包裝呢?

炒蛋多士配通粉加飲品已經唔使朝早11點前趕頭趕命入去問"仲有冇早餐?"先可以食到了, 午餐, 下午茶都有得咁食. 當然如果你可以11點前去食的話, 就可以慳番幾蚊! 不過我認為都係早餐岩feel啲, 下午茶還是當晚餐食總係有點怪.

一早起身就係為咗去一年一度前世未迫過既動漫節, 準備入去迫之前, 都係嘆番個早晨全餐叉足電先. 去開灣仔, 就梗係搵番間又係起灣仔既餐廳啦, 橫樹又未食過, 離地鐵站都唔算遠, 就揀華星冰室. 起我領導之下, 就算幾隔攝, 都難唔到我既又無我想像中咁多人, 唔係處於繁忙階段, 環境尚算舒服. 大少諗到華星的命名會唔會同華星唱片有關係, 唔講都唔知, 聽落有啲似! 周圍有歌手明星既poster, 又有一塊簽滿名既board, 係都唔出奇呢!

食早餐有樣好, 唔使多揀! "炒蛋多士, 火腿通粉, 熱奶茶丫唔該"

炒蛋多士炒蛋好滑, 多士烘有少許脆口, 牛油在剛烘起的多士的餘溫上溶化, 多士夠厚, 夠企身, 夠承托力可以將炒蛋放在多士上, 一啖咬落去, 非常豐富.

火腿通粉火腿有少許鞋, 相對地較硬, 同通粉質地唔夠融洽, 食落去口感唔係太夾, 味道尚算可以.

熱奶茶 我喱排越飲越濃, 反而唔鐘意太多奶味, 不過通常第一次飲都唔會叫少奶, 唔知師父落手重唔重. 無少奶既情況下, 我都飲到夠茶味, 不過可能我重口味, 都係覺得奶味少許重.

唔會有一個完美既早餐, 你可能會鐘意喱度既炒蛋, 鐘意隔離既通粉, 鐘意對面既奶茶, 鐘意斜對面既環境, 每間餐廳都有佢獨有之處, 唔一定要每樣做得好先得你芳心, 只要有一樣野係令你回味無窮, 唔只係食物, 環境或者係一份感情都可以吸引到你, 就算其他做得唔算太出色, 你仍然會對此店念念不忘, 喱啲就係每間餐廳獨有既生存之道.

食飽飽, 出發去迫喇!

宜家果然諗得夠周到, 假若你係用心咁行的話, 行完佢兩層九曲十三彎既示範單位, 左度右度, 諗黎諗去, 必定花足你至少一至兩個小時, 消耗你大部份的腦細胞同體力, 出到黎, 一定會攰同多數會餓, 最岩就係食番啲野補充體力, 順便可以休息下. 如果你較岩時間行, 撞正行完就係下午茶時間, 你要求唔高的話, 平平地臨走前起度整番隻熱狗都唔錯.

一隻熱狗$6, 加埋杯任fill的汽水都只不過係$10. 喱度好在唔使搵位就食得! YES! 有時雖然比較長龍, 但只要大部份既人都係食熱狗, 等既時候都唔會好耐! 因為佢好多都係整定等你黎食! 你睇下....好過你去出面啲連鎖店, 等位等食物等比錢等餐死!!

鐘意喱度既自助形式, 自己加醬, 落幾多都得!
喱度有兩種醬比你選擇, 茄汁同芥辣, 通常第一次食都會猛落, 驚死唔夠咁, 睇下幾澎湃...但食落既時候就後悔喇, 一來食到成口成手都係, 污漕又呢hea, 二來太多醬, 淨係食到醬既味道, 根本食唔到熱狗有味道. 第二次會知道加少少醬吊下味就已經足夠.

平平無奇既熱狗經大改造後...一般既熱狗, 肉腸都不會比麵包過長, 放在麵包中間, 長度剛剛好. 宜家的熱狗果然夠晒突出, 不單只價錢突出, 肉腸更加突出, 長度比麵包還要長一截. 如果照佢原有既狀態, 第一啖咬落去係食唔到麵包既, 要去到第二啖先可以腸包合一, 熱狗一定要係肉腸同麵包一齊食先至好食, 喱個都係食熱狗既精神 因為大部份都係整定好晒, 所以熱狗本身唔係熱, 只要唔係凍就得. 肉腸外皮幾脆, 肉質都幾彈. 味道可以. 個包就反而唔太軟"屬", 有啲乾身同麵包有啲散開. 可能放耐咗!

正當你剛行完一輪, 心大心細完, 再決定咗買邊樣之後, 行到又攰又餓既時候, 嘆番個熱狗先走, 就係大滿足了!

今日適逢嚟開尖沙咀, 大少小有地熱心地問朋友尖沙咀有咩好介紹, 朋友介紹我地食"魔麵", 雖然對拉麵無咩興趣, 但睇在大少份上, 姑且試試.

厚福街一定知起邊, 但原來有幢H8係專做食肆就真係唔知, 上樓一出lift, 大大個"魔"字起門口坐陣, 好有氣勢! 喱度拉麵款式唔多, 主要唔同既在於湯底, 分五種: 豚魔、味魔、醬魔、辣魔、鹽魔, 睇個名都估到係咩味, 豬骨, 味噌, 醬油, 辣味, 鹽味, 我掙扎起究竟揀豬骨定辣味, 既然主要食佢既湯底, 辣通常會蓋過原有味道, 就來個原汁原味, 豚魔啦!

落order時先知, 原來麵身可以揀爽d, 普通定淋d, 待應仲解釋而家舉行緊個遊戲, 只要湯碗底印有個"米"字, 就會中獎, 獎品就係你食既果碗麵! 佢建議我地可以飲埋啲湯, 碰碰運氣. 嘩, 聽落好吸引, 但當然知道萬中無一啦! 有啲似黑白淡奶玩法!

除咗拉麵, 佢仲有好多款小食, 我地追加咗個甘栗紫薯餅, 睇相同名都覺得好吸引.

豚魔湯碗好別緻, 印有招牌"魔"一字. 每碗拉麵都會有豚角煮,叉燒, 半隻蛋, 粟米, 木耳絲, 蔥, 一塊大紫菜同一堆唔知係乜既紅色幼絲. 湯底色澤夠深, 好杰身, 先試一口湯底, 好濃厚既味道, 但又唔會好鹹. 麵身真係普通的爽淋程度, 下次可以嘗試爽身. 其實我就唔係好分得到豚角同叉燒, 好似一模一樣樣咁, 都係一片片, 形狀又差唔多, 又係有啲肥膏痴住啲肉, 肉同肥膏都好分明, 肥膏係入口即溶, 夾起都好容易會爛果隻, 好好味, 我平時會避開肥膏唔食既, 今次都忍唔住要成塊食! 溏心蛋又係做得好出色, 鐘意食蛋黃的人應該好鐘意吧! 我就只係食咗個蛋白.

除咗碗麵之外, 仲有一碟小配菜, 四季豆, 加上少許黑椒, 微微辣, 幾好食.

大少突擊我碗湯底, 佢話我果個好味d, 佢叫既係味魔, 喱個係我一定唔會揀的! 我乘勝追擊試咗佢湯底一口, 飲完成個口都好痴淋淋, 而且個味道都麻麻地.

唔覺唔覺食麵途中都飲咗好多湯, 又係考驗自己運氣既時候, 差唔多見底時打一打側個湯碗, 都可以睇到個碗底有無個"米"字, 嗯! 可以肯定我地係無米之人.

甘栗紫薯餅將紫色蕃薯把成蓉, 配上甘栗, 沾上炸粉, 炸成黃金色, 一小塊切開四件, 細細塊, 但料就十足, 咬落非常鬆軟, 甜甜的, 好有味道, 回味無窮!

朋友果然好介紹, 下次到我作介紹!