喺金鐘返工嘅人都應該好清楚, 呢度都可以講係一個美食嘅沙漠🌵.. 疫情嘅關係所以堂食機會大大減少, 返得工多數都係外賣方便又快捷, 今日就同同事仔試咗一間已經開咗一兩年嘅人氣台灣外賣店💁🏻‍♀️ 真係好高人氣㗎, 午飯時間高峰期20至30人喺度等外賣, 佢哋好似有what’s app 落單嘅~ 是日午餐選擇~ 觀察過佢滷蛋肉燥飯一星期內出現嘅機率都好高🤭 紅燒排骨燉蘿蔔滷蛋肉燥飯 ($68) 份量都足夠, 味道中規中矩, 始終金鐘嘅選擇不多, 價錢比起灣仔區當然算貴… 另外同同事研究過配炒菜係最抵, 千祈唔好配烏龍茶🙅🏻‍♀️, 普通茶包貨色完全冇特別~

相約朋友新界區郊遊完畢, 一齊搭返車出九龍搵食, 第一時間就諗到新商場K11 Musea 😌 六七點係非常之難搵食嘅時間, 好多間門口都排咗長長嘅人龍 😱 唯一似少人啲啲嘅就揀咗呢間… 朋友仔太肚餓, 以下嘅相全部都係分咗碟之後影嘅😅 火焰尼斯吞拿魚沙律 ($128) 有蛋, 豆, 生菜, 我最愛嘅黑橄欖 可惜冇影相.. 味道OK!! 大蝦意粉 ($178) 似乎都係多人叫嘅招牌菜, 有芝士, basil, 啲蝦幾新鮮 元氣精華 ($98) 個中文名有啲好笑… 有芝士香腸, 煙肉, 小黃瓜, 炒蛋, 集合早餐嘅元素, 幾得意 海鹽朱古力香蕉冰雪世界 ($68) 知道呢度最出名嘅係打印咖啡, 最多人打卡 但夜晚就真係唔想眼光光… 穩穩陣陣就叫咗杯朱古力, 朱古力配香蕉係絕配, 味道一般~ 冇影到餐廳內部嘅相, 其實佢裝飾幾特別, 好多同藝術有關嘅展品, 我覺得係適合打卡多過真係以美食掛帥 💁🏻‍♀️ 一試無妨!

聽過傳說中嘅呢間纜車站附近嘅cafe好耐, 今日一到lunch time就同同事急步行過嚟, 佔盡地主之利嘅我哋15分鐘左右就已經到達 😎✌🏻仲有好正嘅窗口位坐添! 菜式其實都係啲普通意粉, 飯之類嘅選擇, 價錢同一般茶餐廳差唔多。 日式咖喱牛肉飯 ($46) - 咁樣嘅價錢份量真係對得住有餘 味道唔錯呀~ 日式叉燒飯 ($48) 冰滴咖啡 ($68) - 第一次嚟當然order佢最出名嘅冰滴咖啡 本身不是咖啡精, 我覺得好飲啦 附近都多學校, 平日午餐時間一點後都幾多學生過嚟食午飯, 座位唔多所以真係要早啲到! 坐到窗邊嘅位置仲可以一邊食一邊觀賞行走中嘅纜車添 😻

好唔容易又捱過一波疫情🥲 相約好耐冇見嘅好朋友聚聚, 一於就中午出嚟搵個慢活嘅地方悠閑咁食一個 brunch 😌~ 叫杯靚靚嘅latte 打個卡先 Prawn & avocado salad ($148) - 等齊人嘅時候嗌嘅沙律 crab pasta ($168)- 賣相好靚 少少辣, 天使麵配襯蟹肉, 好食 Florentine Trout ($158) Dirty Eggs ($148) - 似乎係最出名嘅菜式, 脆脆地嘅薯仔, 有牛油果, 紅腰豆, 半熟蛋, 墨西哥式嘅蛋黃醬, 食落又幾夾幾特別! 環境幾舒服, 唔趕人走, 而且呢一區感覺都幾慢活, 頗適合假日行過嚟曬曬太陽, 四處走走~ 😎

Lunch time 辦完自己嘅事, 趕住買個外賣返公司食, 走到金鐘海富最多外賣店嘅2樓𥄫𥄫🤔.. 呢邊都出名多外賣店選擇, 茶餐廳款式嘅, 台式便當都有。 睇到呢間外賣店擺咗幾款飯盒喺門口, 1:30pm 後每款減$10 😍 反正都未食過今日就試呢間! 玉子吉列炸豬扒便當 ($55) 個炸豬扒有啲乾, 除咗主菜之外亦都有啲炒雜菜蕃茄仔之類嘅配菜, 尚算豐富, 賣相ok, 食物質素絕對可以有改善空間 跟餐餸鮮豆漿, 減價之後嘅價錢合理好多~

約咗朋友睇戲@七點, 六點前就要食飯 😆 銅鑼灣就大把嘢食, 但真係好耐好耐冇食過Pizza喇, 所以第一時間就諗起要過嚟排呢間人氣意大利餐廳 😍 五點九嚟到, 2分鐘之後已經入得 ✌🏻 望見餐牌真係好多好多嘢想食喎, 連Pizza嘅款式都有好多想揀.... 粒粒鮮茄芝士沙律 ($148) 有意大利芝士, 車厘茄, 意大利醋, 新鮮好味, 作為頭盤都幾醒胃 13” 椰香夏威夷人拼雞味濃 ($198) 貪心嘅我哋當然係揀咗一半一半拼pizza啦 椰香夏威夷人有椰絲, 切成條狀嘅菠蘿, 水牛芝士, 蕃茄, 火腿.... 鋪咗椰絲嘅感覺好特別, 同其他配料嘅味道係夾嘅~ 至於雞味濃, 亦都係有水牛芝士同蕃茄, 另外仲有火箭菜, 烤雞, 紅洋蔥, 紅椒... 賣相都幾靚, 雞肉亦都唔鞋口, very good~ 總結, 我同朋友都食得非常滿意, 可惜兩個人試到嘅嘢唔多, 仲食唔晒要打包 😂 pizza 始終都係人多先食得開心啲~

堅持喺死城刺激經濟嘅我, 今晚又在灣仔覓食喇 😋 經常都經過呢間四爺車仔麵但一次都冇幫襯過, 感覺佢係一間比較高檔嘅車仔麵, 門口大大隻字寫住愛回家七五折優惠😍 今晚晩餐輪到你喇~ 皮蛋芫茜湯, 波菜麵 ($28) 雖然唔係芫茜粉不過我唔討厭 波菜麵做車仔麵嘅主食真係未試過, 襯唔襯就見仁見智, 創意分贏曬~ 瑞士滷豆腐 ($13), 瑞士雞翼 ($13) 個滷水汁好入味, 雞肉好嫩, 係正嘅~ 皇牌豬腩仔 ($15) 叫得做王牌都冇令我失望, 肥瘦適中, 唔算太肥膩, 肉質好腍~ 睇真啲隻雞翼真係幾大幾肥美 原本屬於價錢唔算平嘅車仔麵, 打咗個七五折之後喺抵食度大大加分 食物質素好, 食得過!

七八月嘅香港喺疫情之下簡直係死城.. ☠️ 週末嘅晚上六點後餐廳只做外賣, 街上面好少人... 行到過嚟銅鑼灣, 呢間鋪嘅前身係一間日本pancake甜品店, 記得我之前都有嚟食過, 估唔到已經執咗笠變咗另一間店 🙀 門口有蕃茄嘅標誌, 餐牌上嘅食物都係配搭自家製蕃茄濃湯, 咁就引咗我入去叫外賣! 😽 千挑萬選揀咗.... 自家鮮茄濃湯配牛魔王雙拼刀削麵 ($78) 鮮茄湯好濃味, 飲多幾啖都覺得幾口渴, 可能味精重左啲😅 牛腱爽口, 牛肩好腍, 刀削麵好咬口 😚 整體感覺OK, 有進步空間~ 欣賞呢間店喺逆市開張嘅勇氣, 期待下一次有機會坐入嚟堂食啦!

想食好耐嘅水門雞飯, 今日咁啱嚟開尖沙咀附近就有一間 🤩 由於疫情而家六點後冇堂食, 只能外賣, 水門雞飯做緊外賣七折, 唔使太多考慮就加咗$10要雞髀 🍗~ 😆 呢間店都幾旺, 只係啱啱六點已經有成10人喺門口排緊買外賣。 唔使$50食到個晚餐, 抵! 水門雞飯 ($54 + $10 轉雞髀) 份量我覺得可以, 雞肉幾嫩滑, 個醬汁好惹味! 送飯一流, 油飯我覺得唔算太油膩, 可以接受~ 個湯就有啲胡椒味太重嘅感覺, 我覺得一般 整體嚟講感覺唔錯, 價錢更加係超值!

旺角一街都係台飲小店, 每次過開嚟呢區都會好想搵間新嘅幫襯吓, 試唒咁多間~ 🥰 今日就揀咗今期比較高調嘅呢間九份茶舍 🥤 本來都心郁郁想試一試佢推介嘅芋圓, 但怕自己眼闊肚窄食唔到咁多野, 留返下次先~ 😌 黑糖瀑布珍珠奶茶 ($29) 好耐冇飲過黑糖珍珠奶茶喇, 始終個熱潮已經過咗一兩年, 呢間嘅珍珠唔算我食過最好食嘅, 味道都係太甜, 茶底還好, 價錢相宜而且做緊優惠, 都算幾抵~ 最緊要嘅係呢間店好有人情味, 好有心, 抵幫襯~